کاتی خۆی شێتێکی تەپۆ هەبوو لە سلێمانی ناوی عەبە شەکەنە بوو. عەبەی سورفل کە دەڕۆشت قاچەکانی بە دوای خۆیدا رادەکێشاو چاوەکانی راست و چەپیان دەکرد. لە پڕێکدا دەستی دەکرد بە بۆڕە بۆڕ، بەڵام چ بۆڕە بۆڕێک؟ ئەو ناوەی پڕ دەکرد.
گریانەکەی لەسەر ئەم ئاوازە بوو:

هۆ هۆ هۆ هۆ ئۆ ئوو ئاع ع ع .......

پێنج پارتەکە دەتوانن بۆ دانیشتنەکانیان سود لە گریانەکەی کاک عەبە شەکەنە وەربگرن. کاتێک لە عەبەیان دەپرسی بۆ دەگریت ئەو دەیوت: "نوقسانی هەیە." خەڵکیش تەنەکەیەکیان بۆ عەبە دائەنا باز بدات بەسەریدا ئینجا پارە وەربگرێت. عەبە دەیهێناو دەیبرد هەر بازی بۆ نەدەدرا. دیقی بە خەڵک دەکرد. لە بەردەمی تەنەکەکەدا هەر دەهات و دەچوو. هەر یەکەی هاوارێکی لێ دەکرد:

عەبە بۆ پێشەوە!

عەبە بۆ دواوە!

عەبە بیدە بە گێڕ!

عەبە دەرچۆ!

بینەران زۆر جار تاقەتیان دەچوو. دەچوون بە دیار ئیشی خۆیانەوە. لە بازاڕ یەکترییان دەبینییەوە. یان لەو سەرەوە دەهاتنەوە و لە یەکترییان دەپرسی:

- ئەرێ عەبە بازی داوە؟

- نا، ماویەتی.

- ئەرێ عەبە بازی نەدا؟

- نا ئەمجارەش بازی نەدا.

- عەبە بازەکەی هەر نەدا؟

- تۆزێکی مابوو.

عەبە کە بازەکەی بە هەر حاڵێک بەسەر تەنەکەکەدا دەدا پڕ بە دڵی هاواری دەکرد:

- هــەیییییی شەکـــــەنـــــــە!

ئیتر بینەران دەوری عەبەیان چۆڵ دەکرد تا "نوقسانی هەیە"یەکی دی و بۆڕە بۆڕێکی نوێ، تەنەکەیەکی بەتاڵی تر و شەکەنەی ئایندە.

ناوچەکە لە سوتاندایە، قەیرانەکان تا بینەقاقای میللەت هاتووە و لاوانی کوردستان وڵات چۆڵ دەکەن. کەچی لەم کاتەدا حیزبەکان وەکو عەبە شەکەنە نوقسانیان هەیە و بە بۆڕە بۆڕی پرسی سەرۆک مێشکی خەڵکیان بردووە.

هەر کاتێک سەرۆکیان دانایەوە.

بازیان دایەوە بە سەر تەنەکە بەتاڵەکەدا.

هەر ئەوە هەڵدەگرێت هەموو بە جارێک بڵێین: