بۆم تێکە جامێک
Wednesday, 02/09/2015, 18:07
ساقی بۆم تێکە خۆش خۆش پیاڵە
لە دەست ئەوچەرخە پڕم لە ناڵە
بۆم تێکە جامێک دەباسەرخۆش بم
لە عیشق وڕاستی داییم تێکۆش بم
دەبینم بە چاورۆژوشەوی تاڵ
زانست بێ قەدرە نییەتی ئاواڵ
هەرچی زانایە ژینی پڕ مەینەت
تەواوی عومری هەرئاخوخەفەت
دووڕەنگی وڕیاهەر بە پێی فیلان
بازاری گەرمە ڕێی مەکروحیلان
جاچۆن نەنۆشم بادەی یەکڕەنگی
تاکەی کپ کرێم تاکەی بێ دەنگی
ساقی بۆم تێکە سووکانە نەبێ
جامی زل بێنە چووکانە نەبێ
بە موتریب بڵێ سازی دڵ لێدا
باخامۆش نەبێ لەلای من نەڕوا
چون دەردەدارم زامم گرانە
جەرگم خوێنینە حاڵ پەرێشانە
فیدات بم ساقی پەیاپەی تێکە
خەمو خەیاڵم بە مەی ساڕێژکە
تێپەڕبووژینم کەڵکی بۆم نەبوو
تان وپۆی تەمەن ئاوری تێبەربوو
کاتێک کە کێشام دوایین هەناسە
لەدووری یاران پڕ بووم لەتاسە
رۆژی مردنم لە گۆڕیچەی تەنگ
تەڵقینی گڵکۆم مەکەنە جەفەنگ
بە زمانی خۆم ویردم داڕێژن
رستەوکەلامی وردورد دابێژن
ئەوجارئاسودەم گۆڕیشم سارد بێ
زۆردارونەفام ژیانی تەنگ بێ
بم شۆرن بە مەی دڵم مەشکێنن
لە جیاتی شیوەن چەنگوونەی بێنن
بەدەنگی بەرز لێدە ن نایەی دڵ
لەشەومەترسن لەکەس مەبن سڵ
دەڵێن لەودونیا زیندوودەبمەوە؟
دەڵێم ژین وابێ تێی هەڵناچمەوە
کاتێک دەمبەنە گڵکۆی قەراخ شار
با دووربن لە من نەزان وشۆفار.
جەعفەرکەریمی ( شەیدا)
٢٥/٤/١٣٧٠هەتاوی( ٥/٢/١٩٩١زایینی).
رۆژهەڵاتی کوردستان، مهاباد
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
