حەز ئەکەم پێشەکی کورتە چیرۆکێکی هەفتەی ڕابردوو باس بکەم کەوا چۆن عەرەب لەئاست کوردا وەك ٢٢ لەسەر ٧ وایە. هەفتەی ڕابردوو بۆ کاری وەرگێڕی چووم بۆ قونسولیەی عێراق لە لۆس ئەنجولس. بە حوکمی ئەوەی زمانی عەرەبی ئەزانم و دەرچووی کۆلیژی ئادابی بەشی زمانی عەرەبیم لە زانکۆی موستەنسریرەی بەغدا ساڵی ١٩٨٩، و لەکارەکەم بەردەوام لێرەو لەوێ چاوم بە کەسانی عەرەبی ئەکەوێ و بەکاری دێنم ،هەستام وەك خۆبەخشێك بۆ کاری وەرگێڕی. کاتێک چووین بۆ قونسولیەی عێراق جگە لە کارمەندی عەرەب یەك تاکە کوردی تیا نەبوو. جگە لەئاڵای عێراق هیچ ئاڵایەکی کوردی و یان نووسینێکی کوردی لەهیچ شوێنك بەدی نەکرا،تەنانەت وێنەی سەرۆکی عێراقی عروبە (فواد مەعوسم) لەهیچ شوێنێك هەڵنەواسرا بوو. نە ئەبوو بووترێ کوردستان، بەڵکو تەنها شمال عێراق.ئەوەی کوردبوو کارەکانیان بۆ ڕانەئەپڕاند و دویان ئەخست. هیچ جۆرە ئەتەکێت و پرۆفێشناڵتیان تیا نەبوو،تەنها ئەوەندەی عەرەب بوون و بەس.

خۆشبەختانە هەوڵ و ماندوو بوونی کوردستانپۆست هەردەم جێگای خۆی لەدڵی هەزارەها مرۆڤی هۆشداردا کردەوە، ئەمەش یەکەمین پەیام و پاڵنەری سەرەکی لەپشت ئەم سایتەیەوەیە. کە توانی سەرکەوتوانە کارەکانی خۆی بەئەنجام بگەیەنێ، سەرباری چەندین گێرمە و کێشە و هەڕەشەو تیرۆر کە کرانە سەری، لێ هەرگیز کۆڵی نەداو لەخەبات بەردەوامە. ئەم کارەی کوردستانپۆست بێ هاوکاری چەندین کەسی دڵسۆز لەناوەوەو دەرەوەی کوردستان ڕەنگە مەحاڵ بووبێت. بەڵام دیارە میللەتی کورد بۆ ئازادی و سەربەخۆیی هەمیشە لەوێ بوون و ئامادەییان هەیە.

لەسەرەتای دروست بوونی ئەم بزووتنەوەیەدا، لەکوردستانپۆست بڕیاردرا کە هاوکاری و پشتگیریان لێبکەین، بۆ ئەمەش هەستاین بەهەموو کارێك کەوا جەماوەر لە دەوریان کۆبکەینەوە و تاویان بدەین. لەهیچ شتێك سڵمان نەکردەوە و لەیارمەتیان بەردەوام بووین تا کار گەیشتە ئەوەی هەندێ کاری نەشیاو و و قێزەوەن لەلایەن ئەم بزووتنەوەیەوە سەرهەڵبدا،هەروەك چۆن لای پارتی و یەکێتی و حزبەکانی تر هەبوون. دیارە لەو ڕۆژەوەی هەستمان کرد پەیامی ڕاستەقینەی گۆڕان جێبەجێ ناکرێ، ئێدی کەوتینە ڕەخنە بارانکردنیان و سەنگەرمان لەدژیان هەڵدا. لەڕاستیدا ئەمە هەر لەسەرەتاوە کاری ئیشکردنی کوردستانپۆست بووە. بەجۆرێك ئەوەندە لەگەڵ لایەنێکداین کە بزانین دڵسۆز و خەمخۆری گەلن،هەر زانرا پێچەوانەکەیەتی،ئەوا نوکی ڕەخنەکانمان گەلێ تیژە.

دیارە من یەکێك بووم لەو چالاکوانانەی بزووتنەوەی گۆڕان و خەریکی چەندین کاری ڕێکخراوەیی و بەستنی چەندین سیمینار و کۆبوونەوە بووم لەگەڵ کوردانی ئەمریکا و کەنەدا تا پیتاك و پاڵپشت بۆ گۆڕان دروست بکەین.  لەمەدا بەهاوکاری هەموان توانیمان گوڕێکی بەتین بدەین بە گۆڕان و گۆڕانخوازان.  لەو هەوڵانەدا زۆرجار تووشی چەندین ڕەخنە و گلەیی و گازندە و هەڕەشە و گوڕەشە بووین، بەلام گوێمان پێنەدان و کۆڵمان نەدا، هەر بۆیە گۆڕان گەلێ بەخێرایی هەروەك ڤایرۆسی شێرپەنجە تەشەنەی سەند و بڵاوبۆوە. بەڵام هۆکاری سەرەکی وازهێنانم لەو کارە سیاسیە ئەگەڕێتەوە بۆ ئەوەی، کاتێ گۆڕان بەشداری یەکەمین هەڵبژاردنی عێراقی کرد، هات و دەنگی کوردی وەك پارتەکانی تر بەرە و بەغدادی عروبە نارد و جارێکی تر عێراقی بوونی خۆی دووپات کردەوە. کاتێک زانیم ئەمە ستراتیژی گۆڕانە، ئێدی نەدەنگم پێیان دا و نەبەردەوامیش بووم لە پاڵپشتیان. لای من وابوو کەوا گۆڕان پارتێکی نەتەوەیی و لۆکاڵیە، کەچی پێچەوانەی ڕاست دەرچوو. گۆڕان ئێستاشی لەسەر بێت،هەر لەعێراقچێتی خۆی نەکەوتووە.