هەردوكیان لە ساڵی 1979 دەسەڵاتیان گرتە دەست، مەسعود بارزانی لە كۆنگرە بوو بە سەرۆكی پارتی دیموكراتی كوردستان وەك كەسی یەكەمی پارتی و، سەددام حوسین یش بوو بە سەرۆك كۆمار و كەسی یەكەمی عیراق  . بەڵام بەرپرسانی پارتی لە پێناو بەرژەوەندی تەسكی خۆیان دەیانەوێت پارتی بە هەمان بەهانەی كە بەعس وەستایەوە، وا ئێستا خەریكە جێگەی ئەوی تر دەگرێتەوە و ئەوساكە شەری دژی دكتاتۆرەكەی بەغدای كرد و سەرو بنی زمانی دكتاتۆربون و زوڵم كردنی بوو  لە میلەت و كیمیاباران و ئەنفال و نەبونی ئازادی بوو، ئەمرۆ بەرپرسانی پارتی وا خەریكە  مە سعود لە خشتە بەرن و هەمان رەفتاری مالكی و سەددامی پێ دووبارە بكەنەوە . زۆر رەخنەیان لە مالیكی گرت كە پێداگری لەسەر مانەوەی لە سەر كورسی سەرۆك وەزیرانی عیراق گرت و تەنانەت بە هێڵی سوریان لە قەڵەم دا و هەموو رێگایەكیان گرتەبەر بۆ نەهێشتنی دووبارە خۆپاڵاوتنی بۆ ئەو پێگەیە . وتیان مانەوەی دەبێتە هۆی بنیاتنانی بنەمای دیكتاتۆریەت، سەرەرای رێگەپێدانی دەستور بەو كارە  بەڵام ئەوان كەوتنە پەیوەندی لەگەڵ دۆست و دوژمن بۆ نەهاویشتنی ئەو هەنگاوەی مالكی سەرنەكەوتنی  و رازینەبونی لایەنەكان  بەو كارە .

ئەمرۆ پاش سی وشەش ساڵ لە سەرۆكایەتی بارزانی بۆ پارتی وبیست و چوار ساڵ بۆ هەرێمی كوردستان، دەبێت جیهان چیمان پێ بڵێت لە هەوڵدان و جەخت كردنی بەرپرسانی پارتی لەسەر مانەوەی  مەسعود بارزانی لە سەرۆكایەتی هەرێم . سەددام بیست و چوار ساڵ كەسی یەكەمی عیراق وحزبی بەعس بوو  ،  مەسعود بارزانی ئەوە سی و شەش ساڵە هەر كەسی یەكەمی پارتیە.

لە سایەی حوكمی دكتاتۆرەكەی بەغدا جگە لە وێرانی و شەر و بەدبەختی خەڵكی عیراق بە هەموو پێكهاتەكانیەوە، هیچ خێرێكیان نەبینی ، لە سایەی حوكمی  مەسعود بارزانییشدا ئەگەر  راپەرینی خەڵك و خۆبەختكردنی خەڵكی كوردستان و دەست و بردی میللەت لە فەراهەم كردنی نیمچە ئازادیەك نەبێت چی بۆ گەلی كورد و دوارۆژی كراوە، ئەوەتا نەك پێش ناكەوێت، وا رۆژ لە دوای رۆژ پاشەكشە دەكات . بۆیە ئەگەر وەك دەڵێن (ئەگەر هەوەسە دی بەسە)  . وا دوو دەیە و نیوی رەبەقە  ئەم كوردستانە بە خۆی و حزبەكەیەوە بەرێوە دەبات ، ئەگەر بارودۆخی تیرۆر لە عیراق نەبوایە ئێستا ئێمە لە خەڵكی عیراق خراپتر دەبووین، هەرچەند ئێستا وەزعی دارایی و ئابووری عێراق لە هەرێمی كوردستان باشترە ئەگەر راستگۆ بین لەگەڵ خۆماندا .

بۆیە دەبێت بڵێین، تا ئێستا بواری ئەوە ماوەتەوە،  مەسعود بارزانی بیر لەوە بكاتەوە كە بە دەستاودەستكردنی دەسەڵات لەسەر دەستی ئەو فەراهەم بێت  مێژوویەك بۆ خۆی تۆمار دەكات و لەوەزیاتر خەڵك لەخۆی بێزار ناكات و بە رێز و پێگەی سیاسی و خەباتی خۆیەوە كوردستان دەداتە دەستی تازەگەریەوە و خۆی دەكات بە مرەجەعێكی باوەرپێكراو ، ئەگەر وەك سەرۆكی حزبەكەی بمێنێتەوە ئەوە كاری خەڵك نیە و خۆی و ئەندامانی حزبەكەی بریار لەوبارەوە دەدەن.

ئەگەر تۆزێك بیر لە چۆنێتی لادانی مالكی بكەین دەبینین كە پەند وەرگرتن لەو مەسەلەیە زۆر رەنگ سوریمان بۆ دەهێڵێتەوە ، چەند هەوڵی خۆی دا و مكوربوو لەسەر مانەوەی بەڵام هیچ شتێك دادی نەدا وا ئێستاش واقع ئەوە دەخوازێت كە گۆرانكاری لە چونێتی بەرێوەچونی هەرێمی كوردستان بە شێواز و عەقڵیەتی نوێ  بكرێت، ئەگەر  مەسعود بارزانی رەفتارەكانی ماندیلا بێنێتەپێش چاوی خۆی و بە خۆی لە لەوتارێكی مێژوییدا بۆ خەڵكی كوردستانی روون بكاتەوە كە ئێمە لە قۆناغی دیموكراسیدا دەژین و پێویستمان بە حوكمی دامودەزگەیی هەیە و بە هەنگاوەی سەرەتای بنیاتنانی حوكمی رەشید دێنێتە ئاراوە و دەتوانین لە سەرجەم دكتاتۆر و قۆرخارەكانی رۆژهەڵاتی ناوەراستی جیابكەینەوە . با لە رۆژانی داهاتوو  بیروبۆچون و رەفتار و دیدگای لەسەر ئەو  پێگەیە ببینین و ئەوسا حوكم بدەین .