یاده‌وه‌ری سلێمانی
Tuesday, 12/06/2012, 12:00
به‌شه‌وقه‌وه که‌وته یادم یاده‌وه‌ری سلێمانی
پیاسه‌ی شه‌قام و گه‌ڕانی ناو کۆڵان و جاده‌کانی
...
سڵاوی گه‌رمی هاوڕێیان ده‌ستگوشین و ته‌وقه‌کانی
توی مه‌لیک و ئۆرزدی باک و وه‌ستانی سابونکه‌رانی
گه‌رم و گوری ده‌لاکخانه و چێشتخانه وبازاڕه‌کانی
مه‌زادخانه و جوازه‌که و ناو ده‌بۆکه و پیاسه‌کانی
هاواری سه‌وزه فرۆش و ده‌سگێڕه چایچیه‌کانی
مه‌حکه‌مه و مزگه‌وتی گه‌وره‌و قه‌نات و دوکانه‌کانی
ژاوه ژاوی ئاسنگه‌ر و ناو گه‌راجی پاسه‌کانی
جاده‌ی کاوه‌و پیره‌مێرد و مه‌وله‌وی و سه‌عاتچیه‌کانی
شیرینی و تام و له‌زه‌تی محه‌له‌بی و شه‌عریه‌کانی
حسیب ساڵح و تاکۆیی و کۆڵانی قه‌زازه‌کانی
سه‌رشه‌قام و مه‌لعه‌به‌که و ئابڵاخ و کانی ئاسکانی
سه‌ناعه‌و غرفه تجاره‌و سه‌هۆڵه‌که و پیاسه‌کانی
شێمحێدین و قه‌ره‌جاوا و سه‌رچنار و قلیاسانی
مه‌شروب فرۆش و ده‌ڵاڵ و بائعی و هه‌لاجه‌کانی
شه و و ده‌هۆڵی پارشێو بانگ و مه‌لاو شێخه‌کانی
ته‌راویح و بانگ و قورئان ، مزگه‌وت ته‌عزیه و قه‌برانی
خێر و سه‌رفتره زه‌کات و بیست و حه‌وتی ڕه‌مه‌زانی
ئێواره‌کۆڕ و ئاهه‌نگ و شانۆگه‌ری و شیعره‌کانی
ئاماده‌یی و خۆ قۆزکردن بۆ عه‌سر و گه‌ڕانه‌کانی
سه‌راو خۆهه‌ڵخستن له‌سه‌ر ، شیشی شۆسته‌ی جاده‌کانی
ده‌ستگێر و کتێب فرۆشی ناوه‌ڕاستی شۆسته‌کانی
نه‌ورۆز و خۆپیشاندان و ته‌قه و ماراسۆنه‌کانی
موساره‌حه و چاوچاوێن و موجه‌فیفه‌ی به‌یانیانی
بێ پاره‌یی و شه‌ڕ و به‌زم و ناکۆکی دایک و باوکانی
ئه‌من و لچ ڕه‌ش و پۆستاڵ و موسه‌له‌حه‌و سجنه‌کانی
جیش شعبی و عفوی عام و عسکری و تسریحه‌کانی
فیراری و ڕاکردن له ده‌ست مولازم موحسینه‌کانی
پێشمه‌رگه و دیوارنوسین و ته‌ق و تۆقی شه‌وه‌کانی
سه‌یرانی باخی به‌ختیاری به‌کره‌جۆ ، تابین ، دوکانی
قه‌راخ و قه‌شقۆڵی و زێوێ و ئه‌حماوا و ده‌ربه‌نیخانی
سه‌مون و قه‌یماخ و نان و جگه‌ر و سه‌روپێکانی
ئاماده‌یی و به‌که‌لۆری و سه‌عی و امتیحانه‌کانی
فلیمی عه‌ره‌بی و سه‌هره‌ی شه‌وانی هه‌ینیه‌کانی
حه‌مامی ده‌ره‌وه‌و جورنه و پسکیت و ته‌ڕه‌ساسه‌کانی
شروب و لوقم و نۆکاو و ترش و خوێ و ترۆزیه‌کانی
فڕیوه و چاوشارکێ شه‌ڕو تۆپ و تیپاوتیپه‌کانی
گه‌س و له‌فه و ڕابواردن و به‌زم و ڕه‌زمی شێته‌کانی
کیمیاوی و ئه‌نفال و قه‌تڵ و تعریب و تبعیسه‌کانی
ساروخ و ته‌یاره‌و شه‌ڕی نێوان عیراق و ئێرانی
کوێت و ئه‌مریکاو کوشتاری زۆری جه‌بهه و شه‌ڕه‌کانی
ڕاپه‌ڕین و ڕێی قاچاخ و کۆچ و ڕه‌وی لاوه‌کانی
له‌گه‌ڵ ئه‌م هه‌موو ڕوداوه و خۆشی و ناخۆشیه‌کانی
تۆ هه‌ر قیبله‌گای پیرۆزی ئه‌ی شاره‌که‌م سلێمانی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
