دەردی رەچەکێش

Monday, 10/12/2012, 12:00

چزوی تەزووی ژانی خەریبی لە هەندەران وێنەی دۆڵپایەکە کە هێدی هێدی خوێنی لەشی مرۆڤ دەمژێ و تەمەن بەرەو وشکایی و نەمان دەبا. ساتەکان لە دوورە وڵاتی بە بێ ئەوەی ئیزنت لێ وەرگرن وەها سناریویەکت بۆ دادەڕێژن ئەو سەری نا دیار. دەردی دابڕان و ئاڵۆزی رێگوزەری مێژوومان وای لێکردوین کە تەنیا روو لە دوژمن و داگیرکەران بکەین و گازەندەمان بەرەرووی وان واڵاکەین. چەپ و راست پێمان وابێ کە خەتای زل هێزەکانە، خەتای ئورەپییەکانە! خەتای کورد کوژی عەڕەب و فارس و تورکە! کەوا رۆژگارمان لە دەستپێکی هەزارەی سێ دا ئاوا تێپەڕ دەبێ. بە باوەڕی من تاکی هەر نەتەوەیەک لە کەسایەتی خۆی ڕا دەست پێ نەکا و رەخنە لە خۆی نەگرێ وەکی کوردی لێ بەسەر دێ!
پاش چەرمەسەری سەردەمی منداڵی و میرمنداڵی و گەنجی و پاش 13 ساڵ خوێندن بە زمانی بیانی (فارسی رەگەز پەرەست) و 25 ساڵ وانە گوتنەوە بە زمانی فارسی بە منداڵی بێ سووچ و تاوانی کوورد، هەوارمان کێچی هەڵێناو بە تەمەنی سەرەولێژی پیریدا وێڕای بنەماڵە کار و ماڵ و وڵاتمان جێ هێشت و روومان لە هەندەران کرد و لە ساقڕخانەی وڵاتی بیانی گیرساینەوە! رۆژ هاتو مانگ و ساڵ چوو، بەتەمای گەڕانەوە بۆ وڵات و رزگاری نەتەوەکەمان لە رۆژهەڵات، سۆمای چاوان بەرەو کزی دەڕوا و پیری و کەنەفتیش سایەی کەم نەبێ ئامێزی بۆ کردوینەوە و یەخەمان بەرنادا!
رێبازی شێعری هێمن، رێڕەوی ژیانی پڕ لە نەهامەتی و دژواری مامۆستا هێمن لە وڵات و لە هەندەران بۆ من بۆتە ئاوێنەیەکی تەواو و نۆما کە خۆمی تێدا بەدی دەکەم و چرکەساتێک یادی هێمن لە مێشکمدا ون نابێ.
(بە داخەوە مامۆستا هێمن سێ قۆناغی ژیانی پڕبوو لە دەرد و ئازار:
قۆناغی یەکەم: کاتی دەسەڵاتی تون بە تونی بنەماڵەی پەهلەویدا.
قۆناغی دووهەم: سەردەمی هاتنەسەرکاری کەمتیارەکانی کۆماری ئیسلامی دا.
قۆناغی سێیەم: ئەم قۆناغە لە هەر دوو قۆناغی دیکە پڕژانترە کە کاتی خۆی لە کۆماری کوردستان مەرحومی قازی موحەممەد نازناوی شاعیری میللی پێدا بەڵام مەرحومی دوکتور قاسملو بە هۆی جیاوازی بیر و باوەڕ لەگەڵ هێمن دا، نێوی "جاشی میللی" بۆ دانا!؟!؟...
لەوەش بترازێ مەلای مەنشور، مەلا عەوڵای حەسەن زادە (حەیاکی) بە هێمنی دەگوت: "جاشە پیرە" یان "سەرقافڵەی جاشان"!)
هەر ئەوەش بوو بەو هۆیە ئەو ماوەیەی کە لە هەندەران دەژیم بە یادی هێمن و رێگوزەری هۆنراوەکانی جار ناجار خامەم تیژ دەکەمو هەستی دڵی خۆم تێکەڵاوی ناڵەی جودایی دەبمو بە پێی لێهاتوی لە چوارچێوەی هۆنراوەدا دەیاننوسمەوە. من پێم وایە هەتا هێمن شاعیر بێ من خۆم لە قەرەی شێعر نادەم چون ئەرکێکی زۆر گرانە ئەویش بە تایبەت لە هەندەران!
گوتیان لەو وڵاتەی کە من لێی دەژیم ناوەندی وای هەیە کە مرۆڤ دەتوانێ بەرهەمەکانی نیشان بدا و ناوەڕٶکی بابەتەکانی شی بکاتەوە هەتا بکرێتە سەرزمانی ئەو وڵاتە، زۆر خۆشحاڵ بوم و رووم لەو شوێنە کرد هەتا خۆم بناسێنم و بەرهەمەکانم بۆ وەرگێڕن. پاش نزیک بە کات ژمێرێک پەیوەندی بۆ چەند لایەنە بەرپرس، پێی گوتم: قسەیەکم هەیە نابێ لێم زوێر بی! من دەزانم کورد ووڵاتی کورد چەندە مەزنە، شۆڕشەکانی ئێوە چییان بەسەر هاتووە و چۆن دابەش کراون و ..... و ..... و زمانی کوردی چەندە دەوڵەمەندە و ژێرخانی ئابوریتان چەندە بە هێزە!
بەڵام تەواوی ئەو کەسانەی کە من بۆ راپەراندنی کارەکەی تۆ پەیوەندیم پێوە گرتن هەموویان گوتیان:
لە ریزبەندی ستانداردی زمانەکانی دونیادا بە هۆی ئەوەی کوردستان و کورد دەوڵەتی سەربەخۆی نییە و خاوەنی زمانی یەکگرتوو نییە، ئێمەش ناتوانین بابەتەکانی تۆ وەرگەڕێنین! دەتوانی نووسراوەکانت بکەیە فارسی و پاشان ئێمەش وەریدەگەڕێینە سەر زمانی فەنلاندی!...
قەت ئەو کارە ناکەم چون تا موچێژی خۆی لە دەست دەدا. لە حالێکدا بە پەرۆشییێکیگەلێک گران ئەو ناوەندەمان جێ هێشت، کاتێک هاتمە دەرێ، بە دەنگێکی بڕێک بەرز بە زمانی دایکی گوتم: "تف لە خۆم، تف لە سەرکردەی درۆزن و گوێ لە مست!"
چۆن دەبی نەتەوەیەکی ئاوا مەزن رێنوس و رێزمانێکی یەکگرتوی نەبێ و نەتوانێ بە زمانی شیرینی کوردی مێژووی خۆی و مێژوی وڵاتی دیکەش بخوێنی؟
دەردە دەردی رەچیکێشە بۆیە مەنزڵ تاتا بووە!