تەنها كۆنگرەى قاهیرە بوو توانى مالكى پەلكێشى كوردستان بكات

Sunday, 15/02/2009, 12:00

1604 بینراوە

كۆنگرەى قاهیرە لەگەڵ ئەوەدا كە زۆرێك ترس ولەرزى خستە نێو ماڵى بەناو سەركردایەتى كوردەوە بەڵام ئەگەر بە راستى ودروستى وسیاسیانە ودوور لە بەرژەوەندى تەسكى حزبى بخرێـتە دیراسە ولێكۆڵینەوە دەردەكەوێت كە تەنها وتەنها فاكتەر بوو كە توانى فشار دروست بكات بۆ سەر حكومەتەكەى مالكى كە بێت بەدەم داواكانى پێكهاتەكانى عێڕاقەوە بە كورد وعەرەبى سونەو بەعسیەكانیشەوە ، لەم چەند دێرەى خوارەوەدا باس لە گرنگى كۆنگرەى قاهیرە وئەو لایەنانەى توانیان زۆرترین سوودى لێ وەربگرن وئەو لایەنانەش كە تا سەر ئیسقان بە هەڵە مامەڵەیان لەگەڵ كرد وهەرگیزیش بەشدار نابن لە سوودەكانى.
1/ كۆنگرەى قاهیرە لەپێكهاتەدا بریتى بوو لە كۆبونەوەیەكى ئاسایى چەند گروپ وحزبێكى عێراقى خاوەن جەماوەر وپێگەى راستەقینەى میللى كە لەوانەیە لەبەرز ونزمى رۆژگاردا ژمارەى دەنگەكانیان كەم وزیادى كردبێت، بەڵام بەراستى هەڵقوڵاوى ناخى جەماوەرن (بەدوور لەوەى كە من یان تۆ ئەوانەمان قبوڵە یان نا) ودەبێ قسەیان هەبێـت لە داهاتووى عێراقى نوێدا .
2/ كۆنگرەى قاهیرە بە رەزامەندى وئاگادارى سەرجەم وڵاتانى دەوروبەرى عێراق وكەنداو بەریتانیا وئەمریكا وبۆ دەست كارى كردنى نەخشەى سیاسی عێراقى نوێ بوو بۆ راست كردنەوەى ئەو لارسەنگیانە بوو كە لەئەنجامى دەست تێوەردانى ئێران ودەست بەسەردا گرتنى باڵى ئێران لەنێو شێعەكانى عێراقدا .
3/ كۆنگرەى قاهیرە توانى دورترینەكانى سەر گۆڕەپانى عێراقى پێكەوە كۆبكاتەوە ودەسپێك بێت بۆ گفتوگۆیەكى دروست وراستەقینە ، دوور لە موجامەلات وكاریگەرى ئێرانى لەسەر قەرارى سیاسی .
4/ كۆنگرەى قاهیرە لە روانگەى ئەو سێ خاڵەى سەرەوە كە باسم كرد تەنها وتەنها كارت بوو بۆ ئەوەى مالیكى پێگەى لەق بێـت وپەنا ببات بۆ كۆنە پاڵپشتى ئێرانى ولە رێگەى ئەویشەوە فشار بخرێتـە سەر مەجلیسى ئەعلا ویەكێـتى وپارتى كە هەتا ئێستەش ناتوانن لە قسەى ئێران دەربچن (ئەمەش ئەو خاڵەیە كە واى كردبوو ئەمریكاش رازى بێت بە هەنگاوى لەوجۆرە) .
بەڵام وەك بینیمان مامەڵەى سەركردایەتى كوردى نەك لەجێگەى خۆیدا نەبوو بەڵكو زۆر كەمتر بوو لەو ئاستەى كە بچوكترین سیاسی وخاوەن ئەزموون چاوەڕوانى لێوە دەكرێ ، ئەوەى من لێرەدا دەمەوێ ئیشارەى پێ بكەم لەئاست نەبوونى سەركردایەتى كوردە لە مامەڵە كردن لەگەڵ پێشهاتەكانى دەوروبەریدا ، هەموومان باش دەزانین كە مالیكى وەك چۆن برێمەر لە كتێبەكەیدا وەێفى دەكات بەوەى كە ێەددامى شێعەیە واتە هەمان نەهج وبەرنامە وشێوازى حوكى هەیە ، لەلایەكى ترەوە بینیمان كە حكومەتەكەى مالیكى تەنها وتەنها ئاستەنگ بووە ودەبێت لەبەردەم جێبەجێ كردنى ماددەى (140) وگێڕانەوەى ناوچە دابڕاوەكان بۆ سەر هەرێم ، ئەمەش بە شایەتى سەركردایەتى یەكێتى وپارتى خۆیان ، ورەوتى حوكمڕانى لە عێراقدا بەرەو كەنارنانى لایەنەكان ویەكلایى كردنەوەى بۆ خۆى دەڕوات وئەوەش دیار بوو لە جێبەجێ كردنى بەشەكانى سوپاى عێراق بە بێ پرس وئاگادارى سوپا سالارى، وفشار خستنە سەر كورد لەوناوچانەى كە تا ئێستەش كوردەكان بونەتە قەڵخان بۆ پاراستنى ئاسایش وهێمنى ، بەڵام دیارە كورد (راست تر بڵێم یەكێتى وپارتى) چونكە هەرگیز ناتوانن ستراتیژى بیر بكەنەوە وهەمیشە چاویان بڕیوەتە بودجە وگیرفانە شڕەكانى خۆیان ، وكەمتر بیر لە دەستكەوتى سیاسی نەتەوەیى دەكەنەوە ، بەناشوكرى نەبێت ئەوەشى كە دەست كەوتوە قەزا وقەدەر بوە نەك ئازایەتى ولێزانین.
ئەگەر سەركردایەتى یەكێـى وپارتى زیرەك ولێزان بونایە بەئاسانى نەدەكەوتنە نێو بازنەى سیاسەتى مالكیەوە وزۆرترین سوودیان دەبینى لەو كۆبونەوەیە ، ئەویش بە سوود وەرگرتن لەو بەشداریەى یەكگرتووى ئیسلامى كە خاوەنى پێگە وقورسایى خۆیەتى وهەر بۆیەش بانگهێشتى ئەو كۆبونەوەیە كرابوو وەك ئەوەى جێگاى ئومێدە بۆ داهاتووى عێراق وبەشێكى خاوێن وكاریگەرە لە پرۆسەى دژە گەندەڵى ولەوپێناوەشدا خەبات وتێكۆشان وفیداكارى دیارە ، یەكێـى وپارتى نەك لەبەر بەرژەوەندى تەسكى حزبى وكورتى ئاسۆكانیان نەیانتوانى پَزانینیان هەبێت بۆ ئەو بەشداریەى یەكگرتوو ، بەڵكو هەر زوو پەنایان بردەوە بەر ئەو دروشمانەى كە لاى گەلى كورد نەشازن وەك خیانەت ووڵات فرۆشى ودەست خستنە نێو دەستى بێگانە .
یەكگرتوو هەر وەك مێژووى پانزە ساڵەى سەلماندویەتى كە هەرگیز خیانەت پێشەى نەبوە ، وئەو ئامرازانەشى پێنەبوە تا بتوانێ دەستى سوور بێت بە خوێنى كورد ، لەگەڵ ئەوەشدا وەك كارى سیاسی هەر زوو رایانگەیاند كە بەشداریان لە جێگاى خۆى نەبوە ولە پاش یەكەم دانیشتن كشانەوەى خۆیان راگەیاند ولەچەند كۆبونەوەى تردا بەشداریان نەكرد ، هەموو ئەمانەش تەنها لەبەر ئەوەى كە كۆنگرەكە بەبێ یەكێـتى وپارتى بەرێوە نەچێت ، یەكێـى وپارتیش لەبەر ئەوەى لە ئێرانەوە پێیان وترابوو نابێت بەشدارى بكەن لە كۆنگرەیەكدا كە دەسەڵاتى مالكى كەمبكاتەوە ودەستى ئێران ببڕێت لە دروست كردنى بڕیارى سیاسی عێراقدا .
ئەوەى جێگاى سەرسوڕمانە بێ باكى یان بێ شەرمیە لە گەل وهاوڵاتى ، لەكاتێكدا كە دەبوو یەكێتـى وپارتى هەڵوێستێكى جیاوازیان هەبوایە وپشتى بەشداری كردنەكەى یەكگرتوویان بەر نەدایە بۆ ئەوەى ئەگەر لەو مەیدانەشدا گەلى كورد وهەرێمى كوردستان قازانجێكى بەركەوت لەدەستمان نەدایەت بەڵام هەر بەیانى كەوتنە پیا هەڵدانى مالكى وبەشداریە چكۆلەكەى یەكگرتووشیان كردە قوربانى بەرپێى مالكى ئەوى ترى خوێنەر ئاگاداریەتى .
لە ئەنجامدا و وەك لێزانینى مالیكى وبردنەوەى گرەوەكان وپشت گوێ خستنى یەكێـى وپارتى ومەجلس ئەعلاش ، ئەوەیە خۆى دەچێتە مەیدان وهەمان ئەو شتانەى كە ئەمریكا ووڵاتانى دراوسێ وكەنداو چاوەڕوانى لێ دەكەن ئەنجامى دەدات وبەوەش لە چەقى دائرەى ئەمریكا نزیك دەبێتەوە وئێرانیش هەرگیز لێى زیز نابێت چونكە ئەویش دۆستى بەهێزى دەوێت نەك لاواز ، وسەرجەم پێكهاتەكانى عێراقى لاخراویش دێنەوە ریز(سونەى عەرەب وبەعسیەكان وئەفسەر ودەرەجەدارەكانى سوپاى عێراقى) بەوەش ئەوەندى تر كورد وداشەكانى دەست ئێران كەنار دەخرێن ومەركەزیەت لە عێراقى نوێدا ئەوەندەى تر بەهێز تر دەبێت ، هەموو ئەمانەش لە تێنەگەیشتن لە یاساكانى ململانێ وئیش كردن لە سەر بنەماى موجامەلە ونەعامە ئاسا سەركردن بە لمدا .
بۆیە ئەوەى كە ئێستە كورد یان دروست تر یەكێتـى وپارتى گیریان خواردوە بە دەستیەوە وتەنانەت ناوێرن بە ئاشكراش دژایەتى بكەن هەر هەمان مالیكی یە كە كۆنگرەى قاهیرە دەیتوانى بە پرۆسەیەكى دیموكراسى ومەدەنیانە وبەبێ ئەوەى پێكهاتەى سیاسی وكۆمەڵایەتى وڵات لەرزەى تێبكەوێـت ، لەهەمان كاتدا داواكاریەكانى كورد وجێبەجێ كردنى ماددەى (140) وپێكەوە ژیان لە عێراقدا ئێستە مەودایەكى ترى بڕیبوو .
لەكۆتاییدا دەڵێم بەراستى كەسانێك كە ئەوەندە لە یارى سیاسی نازانن بۆچى خۆشیان ومللەتیش دەكەنە قوربانى هەوەس ولێنەزانینەكانیان .