بۆ خه‌لکێ دهۆك و ده‌ڤه‌را بادینا !
Saturday, 19/03/2011, 12:00
ما هه‌تا که‌نگێ دێ ژ دره‌وێن بنه‌مالا بارزانی باوه‌ر که‌ن. ئو ما هه‌تا که‌نگێ نێچیرڤان بارزانی دێ ئێت دهۆکێ و هه‌ر دێ بۆ وه‌دره‌وا که‌ت و هوون ژی دێ ژێ باوه‌ر که‌ن ؟ هه‌روه‌کی ل 14ی ئادارێ هاتیه‌دهۆکێ و به‌حسا سه‌رهلدانێ کریه‌و دبه‌ر را ژی هنده‌ك دره‌و کرین کو پرۆژێن ستراتیجی !! هه‌بووینه. به‌لێ نه‌گۆت کا ل رۆژا کو خه‌لك ب سه‌رهلدانێ رابوونه، ئه‌و ل کیڤه‌بوو، ئو بۆ وی خه‌لکێ کو ب سه‌رهلدانێ رابوونه چ کریه؟ ئو نه‌گۆت ئه‌و پرۆژێن ستراتیجی چنه؟!! یێ کو نه‌زانت، دێ هزر که‌ت کو کارخانێن چێ کرنا باله‌فڕا ل کوردستانێ ده‌ینانه، یان که‌رکووك و خانه‌قین و شنگال و ده‌ڤه‌رێن دی ڤه‌گه‌ڕاندیه‌بۆ سه‌ر کوردستانێ. پرۆژێن وی یێن ستراتیجی ل دهۆکێ ئه‌ڤه‌نه؛ فرۆشگه‌ها مازی و ئۆتێلا شندۆخا و ڤیلایێن سه‌د ده‌فته‌ری ل سه‌ر چیایێ شاخکێ دناڤبه‌را هه‌ردو شارعا دا ل مالتایێ و چه‌ندین پرۆژێن بازرگانی و باشترین عه‌ردێن دهۆکێ دانه‌بارزانیا، ئه‌ڤه‌هه‌می بۆ خۆ و بنه‌مالا خۆ چێ کرنه، به‌لێ بۆ خه‌لکێ کو ب سه‌رهلدانێ رابوونه‌چ چێ کرنه؟ به‌لێ چ بۆ شه‌هیدا چێ کرنه‌کو هه‌ڕۆژ دبێژن کو ئه‌ڤ ئه‌زمۆنه‌به‌رهه‌مێ خوینا شه‌هیدایه؟ کا ئه‌و " پرۆژێن ستراتیجی " یێن کو بۆ بنه‌مالێن شه‌هیدا چێ کرنه؟ بۆچی بنه‌مالێن شه‌هیدا ب خۆ به‌رهه‌مێ خوینا شه‌هیدا نابینن ؟ نه‌کو به‌س ئه‌ڤه‌بتنێ به‌لکی ئه‌و نێچیرڤان بارزانی و بنه‌مالا وی حساب دکه‌ن کو هه‌می خه‌لکێ کوردستانێ و بتایبه‌تی خه‌لکێ بادینا کارکه‌رێن وانن و عه‌ردێ کوردستانێ ژی ملکێ وانه.
ڤێجا گه‌لی خه‌لکێ کوردستانێ و بادینا خۆ هشیار که‌ن و بزانن کو هوون دێ گونه‌هکار بن، چنکی ئه‌وێ زولمێ دکه‌ت و یێ کو زولمێ قه‌بیل دکه‌ت گونه‌هکارن و گونه‌ها وان وه‌کی ئێکه.
دبیت کو هنده‌ك بێژن کو ئاخفتنا وی راسته‌و بۆچی دره‌وه؟ ئه‌ڤه‌خه‌لك خۆنیشاندانا دکه‌ن و حزبێن سیاسی هه‌نه؟ به‌لێ نابێژن ئه‌و چ خۆنیشاندانن و چ حزبن ؟ ئه‌رێ ئه‌و خۆنیشاندانێن کو تێ دا دبێژن: بارزانی تو پێشه‌وایی ! ئو ب به‌ژن بالا مه‌سعوود و نێچێرڤانی بێژن !! ئه‌رێ ئه‌و چ خۆنیشاندانن ؟! یان ئه‌و حزبا کارتۆنی یا کو وه‌کی به‌رهه‌م سالحی به‌حسێ کری کو به‌س ژ نه‌فه‌ره‌که‌و چه‌ند خزمه‌ك وکه‌سوکارێن خۆ ل خۆ کۆم کرینه و بۆدجه‌کا مه‌زن پێ وه‌ردگرن. ئه‌رێ دبێژن ڤانا حزب یا خۆنیشاندان ؟ ئه‌گه‌ر هۆسا بت هێتله‌ر و سه‌ددام و هه‌می دکتاتۆر ب حزب و خۆنیشاندانێ هۆسا رازینه.
ئه‌گه‌ر به‌رێ بۆ وان ب ڤان دره‌وا دچوو سه‌ری، به‌لێ ئه‌ڤرۆ زه‌مانێ ئینترنێت و تکنۆلۆجیایێ یه، نه‌زه‌مانێ باسك و خه‌نجه‌رێ یه، له‌وما ئێدی ب ڤان جۆره‌دره‌وا ناچت سه‌ری.
ژبه‌ری کو ڤێ نامێ ب دوماهیك بینم، من دڤێت کو راستیه‌کا ڤێ بنه‌مالێ بۆ خه‌لکێ ده‌ڤه‌را مه‌دیار که‌م، نه‌خاسمه بۆ نڤشێ نوو یێ پشتی سه‌رهلدانێ، چنکی ئه‌و چ ژ دیرۆکا ڤێ بنه‌مالێ نزانن و چ جارا بۆ وان نایێت گۆتن. به‌لێ یێن کو ل ده‌مێ شۆڕه‌شا ئه‌یلۆلێ پێشمه‌رگاتی کربیت و چوو بیت ده‌ڤه‌رێن حاجی عمران و قه‌سر ماکۆزا، ڤێ مه‌سه‌لێ باش دزانت.
شێخ ئه‌حمه‌د (برایێ مه‌لا مسته‌فایی یێ مه‌زن) ل ده‌مێ شۆڕه‌شا ئه‌یلۆلێ جاشێ (عبدالکریم قاسم) ی بوو و هه‌می ده‌ڤه‌را بارزان شۆڕه‌ش لێ نه‌بوو، ئو ئه‌و پێشمه‌رگێ کو ژ ده‌ڤه‌را به‌هدینا چووبا حاجی عمران یان قه‌سر ماکۆزا د ده‌ڤه‌را بارزان را ده‌رباس دبوو و بارزانیا نان نه‌ددان پێشمه‌رگا و دا بێژن: " زا هوین پێشمه‌رگێن مستۆیی نه". ئو هه‌تا کو شێخ ئه‌حمه‌د مری ژی هه‌ر جاشێ ئیراقێ بوو. ئو کوڕێ وی شێخ ئۆسمان (بابێ ئه‌دهه‌م بارزانی) جاشێ سه‌ددامی بوو. ئو محمد خالد (کوڕێ شێخ ئه‌حمه‌دیه‌و خه‌زیرێ مه‌سعوودیه) هه‌تا ده‌مێ سه‌رهلدانێ ژی هه‌ر جاشێ ئیرانێ بوو. ئو ئه‌دهه‌م بارزانی ژی ل گه‌ل مامێ خۆ محمد خالدی جاشێ ئیرانێ بوو. ئو پشتی سه‌رهلدانێ هه‌می دزانن کو نێچیرڤان و مامێ خۆ مه‌سعوود بارزانی ژی بوون جاشێن سه‌ددام و تورکیایێ. ل سالا 1996ێ سه‌ددام ئینان د هه‌ڤلێرێ دا و کورد کوشتن، ئو ده‌بابه‌و باله‌فڕێن تورکیا ئینان کوردستانێ و هه‌ر دیسا کورد دکوشتن. جه‌لال تاله‌بانی ل سالا 1966 ێ بوو جاشێ ئیراقێ و مه‌سعوود و نێچیرڤان ل سالا 1996ێ، ئانکو پشتی (30) سالا ئه‌و ژی وه‌کی مامه‌یی !! بوون جاش.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
