نامه‌یه‌کی کراوه له مه‌سعود بارزانیه‌وه بۆ معمر قه‌زافی
Sunday, 06/03/2011, 12:00
له پاش سڵاو ، هیوای سه‌لامه‌تی و ته‌ندروستیه‌کی باشت بۆ ئه‌خوازم ، به‌ڕێز جنابی معمر قه‌زافی ، هیوام وایه ته‌مه‌نت دوو ئه‌وه‌نده درێژ بێت بۆ خزمه‌تی بنه‌ماڵه به‌ڕێزه‌که‌ت ، له‌م هه‌لوو مه‌رجه ناسکه‌دا که وڵاته‌که‌تانی گرتۆته‌وه ، به پێویستم زانی ئه‌م نامه‌یه‌ت ئاڕاسته بکه‌م و هاوخه‌مت بم
من زۆر ده‌ست خۆشیت لێ ئه‌که‌م به‌رامبه‌ر به هه‌ڵوێستی ڕه‌ق و توند ئامێزت به‌رامبه‌ر هاوڵاتیانی ڕه‌ش و ڕووت و برسی که ڕژاونه‌ته سه‌ر جاده‌کان و به حسابی خۆیان داوای چاکسازی و نه‌مانی گه‌نده‌ڵی و ئازادی و دیموکراسیه‌ت ئه‌که‌ن ، پێم وایه کاردانه‌وه‌کانی هێزه ئه‌منیه‌کان له وڵاته‌که‌تدا به بۆردومان کردنی خه‌ڵکی ناڕازی و خۆپیشانده‌ران کارێکی زۆر شیاوه و له‌جێی خۆیدایه ، ئه‌وه تاکه حه‌له بۆ مانه‌وه‌ی ئێمه‌مانان له‌سه‌ر کورسی ده‌سه‌ڵات ، به‌ڵام قوربان گیان حه‌ز ئه‌که‌م وه‌ک دۆستێکی دڵسۆز بیرت بخه‌مه‌وه که هه‌تا زوه هه‌رچی موڵک و ماڵ و سه‌روه‌ت و سامانت هه‌یه بینێره ده‌ره‌وه‌ی وڵات نه‌وه‌ک نه‌توانیت وه‌زعه‌که کۆنترۆڵ بکه‌یت و ناچارت بکه‌ن ده‌ست له کار بکێشیته‌وه و وڵات جێبهێڵیت ، چونکه ده‌نگی میلله‌ت هه‌ر که یه‌ک که‌وت کێو له‌بن دێنێت ، هیچ هێزێک ده‌ره‌قه‌تیان نادات ، ئینجا شتێکی دیکه .. ئێمه لێره سڵ له کوشتنی خه‌ڵک ناکه‌ینه‌وه ئه‌وه‌ته به‌رامبه‌ر به شوشه‌ی شکاوی باره‌گایه‌کمان خوێنێکی زۆرمان ڕشت ، ئه‌بێت خه‌ڵک چاوترسێن بکه‌یت بۆ ئه‌وه‌ی سام و هه‌یبه‌تی خۆت حیزبه‌که‌ت ده‌رخه‌یت ، هه‌رچه‌نده ئه‌زانم که تۆش وه‌ک خۆم ده‌ست ناپارێزیت له‌وه‌یا زۆر له یه‌ک ئه‌چین ، له زۆر شتی که‌شا هه‌ر له یه‌ک ئه‌چین ، بۆیه چه‌نێک خه‌می کورسیه‌که‌ی خۆممه دوو ئه‌وه‌نده خه‌می کورسیه‌که‌ی تۆشمه ..
قوربان منیش وه‌ک سه‌رۆکی هه‌رێمی کوردستان دوچاری ئه‌و قه‌یرانه بووم که ئێستا تۆ و ده‌سه‌ڵاتی تۆی تێکه‌وتوه ، ئه‌وه‌ی که هاوڵاتیانی لێبیا به تۆی ئه‌که‌ن لێره‌ش هاوڵاتیانی کوردستان به منی ئه‌که‌ن ، ئه‌وه‌ی که ڕۆژێک من چاوه‌ڕوانی نه‌بووم ئه‌و ته‌قینه‌وه‌ی بورکانی ناڕه‌زاییه‌ی خه‌ڵکی کوردستان بوو ، ئه‌گه‌ر چی هه‌موو(تاکتیک و هێز و فێڵێک) به‌کار ئه‌هێنم بۆ ده‌م کوت کردنیان به‌ڵام ئه‌وان زۆر له‌وه زرنگتر و چاو نه‌ترس ترن به‌تایبه‌ت خه‌ڵکی شاری سلێمانی و چوارده‌وری ، قوربان گیان ئێستا که‌س باوه‌ڕ به قسه‌کانم ناکات هه‌ر لێدوانێکیش بده‌م که‌س تاقه‌تی نیه گوێ بگرێت پێم ئه‌ڵێن ئه‌و قه‌وانه کۆنه ، ته‌واوی پلان و کارنامه‌کانم که‌شف بوون و خه‌ریکه به‌ره‌و هه‌مان عاقاری حوسنی موباره‌ک و زه‌ین العابدینم ئه‌به‌ن ، ئه‌گه‌رچی هه‌موو هێزه چه‌کداره‌کانم له ئاماده باشیدان بۆ سه‌رکوت کردن و له‌ناو بردنی ده‌نگه ناڕازیه‌کانی وڵاته‌که‌م ، به‌ڵام سودی نیه و ئه‌وان (بێده‌نگ نابن) ! جا به پێی ئه‌و دۆستایه‌تیه کۆنه‌ی که هه‌مانه و سیسته‌می به‌ڕێوه‌بردنمان ئه‌گه‌ر یه‌ک سیسته‌م نه‌بێت هیچێکی وای فه‌رق نیه ، ئه‌مه‌وێت که‌مێک ئامۆژگاریم بکه‌یت که چۆن مامه‌ڵه له‌گه‌ڵ ئه‌و خه‌ڵکه چاو نه‌ترسه بکه‌م که ته‌نانه‌ت سڵ له فیشه‌کیش ناکه‌نه‌وه ، ته‌واوی کارنامه و پلانه هه‌مه‌جۆره‌کانی سه‌رکوت کردنم بۆ ڕه‌وانه بکه‌یت ، پاشان خۆت ئه‌زانیت ئێستا حیزبی به‌عس نه‌ماوه و مخابن له ناو چوه ، نازانم په‌نا بۆ کوێ به‌رم تا له‌م ته‌نگه‌ژه‌یه نه‌جاتمبات ، سیقه‌شم به یه‌کێتی نیه که هاوپه‌یمانین چونکه له ڕابردوا دوژمنی سه‌رسه‌ختی یه‌ک بووین ، ئێستا به‌رژه‌وه‌ندی ستراتیجی به‌یه‌که‌وه‌ی به‌ستوین ئه‌ترسم ئه‌و کۆنه قینه‌یان له دڵا مابێت و له هه‌ر ساتێکا ئه‌وانیش وه‌ک مار به خۆم و حیزبه‌که‌مه‌وه بده‌ن ، بۆیه په‌نام هێناوه‌ته به‌ر قاپیه‌که‌ی تۆ ، ئه‌گه‌ر بتوانیت به چه‌ک و جبه و ده‌بابه و فڕوکه‌ی جه‌نگی و چه‌کی قورس و سوک هاوکاریم بکه‌یت ، ئه‌گه‌رچی ئه‌وه‌ش ئه‌زانم که حاڵی تۆ له‌م ساته وه‌خته‌دا له من باشتر نیه به‌ڵام باوه‌ڕکه زۆر ناچار بووم بۆیه هانام بۆ هێناویت تکایه چاوه‌ڕێی هاوکارییتم ..
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
