هه‌ڵوێست و دیدی کوردستانپۆست، سه‌باره‌ت به رووداوه‌کانی ئه‌مڕۆی کوردستان
Saturday, 16/07/2011, 12:00
هەرچەندە کوردستانپۆست له پێش 17ی شوباتیشدا خۆی یەکلاکردبوویه‌وه، بەو ئەنجامە گەیشتبوو، کە لە ژێر سایەی ئەم دەستەڵاتە خێڵەکیی و بنه‌ماڵه ناپاکانه‌ی کورددا، بەرژەوەندی باڵای نەتەوەیی و نیشتمانیمان که‌وتۆته ژێر مه‌ترسیی و هه‌ڕه‌شه‌وه و کۆمهڵگای کوردییان به قەیرانێکدا بردووه و گه‌یاندوویانه‌ته لێواری تێکه‌وتن و تێداچوون، که له هه‌موو مێژووی کورددا هێنده‌ی ئه‌مڕۆ ناسنامه‌ی نه‌ته‌وایه‌تییمان نه‌شێوێنراوه، بۆیه تا ئەم دوو پارتە فەرمانڕەوابن، گرفتەکانی کۆمه‌ڵگا لە هەموو بواره جیاوازه‌کاندا، سیاسیی، ئابوریی، فەرهەنگیی و نەتەوەیی، قوڵتر ده‌بنه‌وه، تەنانەت کەسایەتی تاکی کۆمه‌ڵگاش له داڕمان و ونبووندا خۆی ده‌بینێته‌وه.
له‌م روانگه‌یه‌وه کوردستانپۆست بڕوا و هیوای بە دیالۆگ، قسەگۆڕینەوە و پێکەوەژیان له‌گه‌ڵ ئه‌م ده‌سه‌ڵاته‌دا نییه. ئێمه ساڵانێکە پەنجەمان خستۆتە سەر ئەو ڕاستییه و سەرسەختانە بەڕوویاندا وەستاوینەتەوە، به رای زۆر که‌س کوردستانپۆست بۆته رابه‌ری ئه‌و په‌یامه، خەڵکی ناڕازیی وشیارکردۆته‌وه، که بەو کەش و ژیانەی ئه‌مڕۆی کوردستان رازی نیین، ئه‌م ده‌سه‌ڵاته خێڵه‌کییه‌ی که کۆمهڵگای کوردیی به‌ڕێوه ده‌به‌ن، بۆ خواستی بێگانه‌یه، که‌وا بڕیار له سه‌ر چاره‌نووسمان ده‌ده‌ن، بۆیه خۆ رزگارکردن له ده‌ستی ئه‌مانه هەوڵدانه بۆ ئه‌وه‌ی توند و قایمتر ئەم شەڕە لە بەرانبەر بەرەی دز و خائین و سیاسییە دۆڕاوەکاندا بکەین.
لە 17 ی شوباتیشەوە ئەمبەر و ئەوبەری ئێمە، له‌گه‌ڵ ده‌سه‌ڵاتدا بۆ خەڵک جوانتر ڕوون بۆتەوە، ئێمەی لەو بەڕه‌و رووبونەوەیەدا، گەیاندۆتە قۆناغێکی تر. هەرچەندە بەرەی گه‌ل دوو هێندەن لەبەرانبەر به‌ره‌ی دەستەڵاتدا، بەڵام جیاوازیی شێوازی کارکردن و تێڕوانینمان بۆ چارەسەری گرفتەکان، ئه‌وه نیشان دەده‌ن، که به‌ره‌ی دژه ده‌سه‌ڵات پەرت و ناکۆکه، ئەمەش به قازانجی دەستەڵات شکاوه‌ته‌وه. بۆ نمونە (گۆڕان، کۆمه‌ڵه و یه‌کگرتوو)، خۆیان کردۆته ئۆپۆزیسیۆنێک له‌گه‌ڵ یه‌کتردا رێککه‌وتوون و خۆیان نمایش ده‌که‌ن، هیوایان بە چارەسەرێک هەیە، کە لەڕێگەی دیالۆگەوە له‌گه‌ڵ ده‌سه‌ڵاتدا چاکسازیی بکه‌ن، ئێمە بڕوامان بەو قسەگۆڕینەوە و دانووساندن، دیالۆگانه نییه، به‌لای ئێمه‌وه ئه‌م جۆره سیاسه‌ته، ددانپێدانان و ره‌وادانه به تاوان و خیانه‌ت و دزییه‌کانیان، بەشێك لە کەسایەتیی چالاکه مەدەنییه‌کانیش بڕوایان بە ڕێگاچارەی یاسایی هه‌یه، ئێمە به پێچه‌وانه‌ی ئه‌مانه‌شه‌وه بڕوامان به‌و جۆره خه‌بات و چالاکییانه‌ش نییه، چونکه ئه‌مڕۆ له کوردستان و له عێراقدا یاسا بوونی نییه، ئه‌وه‌ی هه‌شه یاسایه‌ک نییه کاری پێ بکرێت، دەستەڵات خاوه‌نی یاسایه، یاساش بۆ سزادان و ئازاردانی لاواز و بێکه‌سه‌کانه، بۆ خزمه‌تیی حیزب و بنه‌ماڵه‌یه، یاسا له کوردستاندا سه‌روه‌ر نییه، به‌ڵکو ژێروه‌ره، بۆیه ئێمه سورین له سه‌ر به‌کارهێنانی زمانی چەکوش، ئه‌وه ته‌نها چه‌کوشه ده‌توانێت دیالۆگ له‌گه‌ڵ رۆحی زوحاکه‌کانی ده‌سه‌ڵاتدا بکات، نه‌ک به بۆنی گوڵ زوحاکه‌کانی ده‌سه‌ڵاتی پێی مه‌ست و بێهۆش بکرێت.
لە17 ی شوباتەوە دیمەنی رووداوه‌کان جوانتر ئه‌وه‌یان بۆ خەڵکی ئاشکرا کرد، که بە هیمەتی کوردستانپۆستییەکان، ئێمەش باڵێکین بۆ قۆناغێکی دواتر، کە پێداگرتن و به‌رده‌وامبوونه لە سەر نەمانی دەستەڵاتی خێڵ و بنەماڵە، هەموو هەوڵەکانمان لەوێدا چڕکردۆتەوە، هه‌رچه‌نده لێرە و لەوێش بەر گازندەی دۆستانە و گلەیی بووینەتەوە، گوایه چاوپۆشیمان لە هەڵوێستی چەند چالاکه‌وانێکی مەدەنی، یان چەند پەیڤی قەڵەمی ئه‌و نووسه‌رانه کردبێت، که ده‌یانه‌وێت سازش له‌گه‌ڵ ده‌سه‌لاتدا بکه‌ن، یان خۆیان و خه‌ڵکی له پێکدادان له‌گه‌ڵ ده‌سه‌ڵات دوور بخه‌نه‌وه، ئێمه وەک لە سەرەتاوە گوتمان، کوردستانپۆست لەم قۆناغەدا، چەکوشەکەی ڕوو لە دەستەڵاتە و بە تەلەسکۆپ بەدوویانەوەیە، بەڵام داخوازیی ئەو کەسانەی بە نامە و نووسراو پێمان ده‌ڵێن، داوای هه‌ڵویستمان لیده‌که‌ن، که‌وا که‌سانێک نەرمی به‌رامبه‌ر بە دەستەڵات دەنوێنن، مه‌یلیان به لای دیالۆگ و گفتوگۆ و چاکسازییدایه، داوامان لێده‌که‌ن بۆچی ئێمه قسه‌یان له سه‌ر ناکه‌ین و هه‌ڵویستیان له‌سه‌ر وه‌رناگرین؟ لێره‌دا ده‌ڵێین ئه‌مه مانای ئەوە نییە، کە ئێمە له‌و نووسه‌رانه ڕازییی بین و هەڵوێستەکانیانمان لا دروست بێت، ئێمه بڕوامان وایه که خه‌ڵکی کوردستان ئه‌مڕۆ پێش ئێمه که‌وتوون و هه‌ڵوێستیان له‌سه‌ر وه‌رگرتوون.
چەند کەسایەتی و گروپ و ڕێکخراوێک لە چەند ڕۆژی ڕابردوودا، خۆپیشاندانیان لا پەسەند نەبوو، سەرباری ئەوەی کوردستانپۆست نیگەرانە لەو هەڵوێستانە، بەڵام ئەوەشمان لە بەرچاوگرتووە، کە هەریەکەیان بەجۆرێک لە ترسی لێپێچینەوەی یاسایی له‌گه‌ڵیاندا، یان به پاساوی ئه‌وه‌ی نەبادا لەکاتی خوێنڕژاندا تاوانه‌که بکه‌وێته ئەستۆیان، بۆیه لە بانگەواز بۆ خۆپیشاندان، خۆیان دوور ده‌خه‌نه‌وه، نایانه‌وێت خۆیان بخه‌نه ژێرباری هیچ لێپرسراوێتییه‌که‌وه، به رای ئێمه ئەگەر ئەم دۆخە هه‌روا بەردەوامی پێبدرێت، ئەو قەڵەمانەش بەو ئاوازەوه بخوێنن، ئەوە بێ هیچ جیاوازییەک ده‌که‌ونه خانه‌ی خزمه‌تکردن به ده‌سه‌ڵات، له نێوانیاندا هه‌مه‌ئاهه‌نگیی و یه‌کده‌نگییه‌ک دروست ده‌بێت، ئه‌مه‌ش دڵی ده‌سه‌ڵاتی پێ خۆش ده‌کات.
ئه‌و گروپه‌ی ناوی خۆیان ناوه ئۆپۆزیسیۆن، له به‌ره‌ی گه‌ل و به‌رژه‌وه‌ندییه‌کانییدا نیین، خۆیان دوور خستۆته‌وه، به‌داخه‌وه وه‌ها خۆیان رێکخستووه، ده‌یانه‌وێت له کاتیی ئاشتیی و ناته‌باییدا له هه‌ردوو لا بخۆن، له لایه‌ک خاوه‌نی ده‌نگی ناڕازیی ئه‌و خه‌ڵکه ده‌بن، له لاشه‌وه له‌سه‌ر مێز و خوانی ده‌سه‌ڵات داده‌نیشن، ئه‌مانه وایان داناوه، ئه‌گه‌ر سه‌ره‌نجامی هه‌ر راپه‌ڕین و خۆپیشاندانێک به‌دی بێت، خۆیان ده‌بنه خاوه‌نی، ئه‌گه‌ر ده‌سه‌ڵاتیش بمێنێت، له‌گه‌ڵیاندا رێکده‌که‌ون و ده‌که‌ونه چاکسازیی و درێژکردنه‌وه‌ی ته‌مه‌نی ده‌سه‌ڵات، ئه‌مه ترسناکترین رۆژگاره ئه‌و میلله‌ته له سایه‌ی ئه‌م به‌ناو ئۆپۆزیسیۆنه تێیکه‌وتووه، وای کردووه نائومێدیی و بێمتمانه‌یی له ناو خه‌ڵکدا دروست بێت، که‌س نازانێت ئه‌گه‌ر سه‌رکه‌وتنێک له راپه‌ڕین و خۆپیشاندانێکدا به‌دی بێت، ئه‌مانه چۆن دێنه پێشه‌وه و به‌ره‌وه چ ئاقارێکی ده‌به‌ن، ئه‌گه‌ر پێچه‌وانه‌که‌شی بوو، چۆن ئه‌م گروپه‌ی ئۆپۆزیسیۆن خۆیانی لێ به‌دوور ده‌گرن و به دڵی ده‌سه‌لات قسه ده‌که‌ن،
سه‌باره‌ت به‌و نامه‌یه‌ی مه‌کته‌بی په‌یوه‌ندییه‌کانی حکومه‌تی هه‌رێم له تاران، که باس له‌وه ده‌کات ئۆپۆزیسیۆن هانا بۆ ئێران ده‌بات بۆ ناوبژیکردن و هێورکردنه‌وه‌ی شه‌قام، ئێمه لێره‌دا داوا له بزووتنه‌وه‌ی گۆران ده‌که‌ین که کۆمێنتاریی خۆیان له‌سه‌ر ئه‌و نامه‌یه بده‌ن، هه‌رچه‌نده ئه‌مه ئه‌وه ده‌سه‌لمێنێت، که به‌ره‌ی به‌ناو ئۆپۆزیسیۆن، له‌گه‌ڵ په‌یمان و په‌یامه‌که‌ی خۆی، به‌رامبه‌ر به‌و خه‌ڵکه‌ی ده‌نگی پێیدان راستگۆ ده‌رنه‌چوون، بۆیه رۆژ له دوای رۆژ خه‌ڵکی کوردستان متمانه‌یان به‌و بزووتنه‌وه‌یه نامێنێت.
ئه‌زمونی راپه‌ڕین و خۆپیشاندانه‌کانی ناوچه‌که و ئه‌وه‌ی له کوردستان و ئه‌و وڵاتانه‌دا ده‌گوزه‌رێت، ئه‌وه‌مان فێرده‌کات، که ئۆپۆزیسیۆنی کوردی کۆسپن له‌به‌ر ده‌م گۆڕانکارییه‌کی رادیکاڵی له کوردستاندا، که خۆی له نه‌مانی ده‌سه‌لاتی بنه‌ماڵه‌دا ده‌بینێته‌وه، نه‌ک دیالۆگ و گفتوگۆکردن له‌گه‌ڵیاندا، ئێمه بڕوامان وایه هیچ کام له‌و گروپی ئۆپۆزیسیۆن و حیزبانه‌ی تر، نوینه‌ری راسته‌قینه‌ی گه‌لی کورد نیین، ته‌نها کۆمه‌ڵێک که‌سن مێژوویه‌ک دروستی کردوون و دوکانی سیاسییان کردۆته‌وه، بازرگانی به سه‌ر چاره‌نووسی ئه‌و میلله‌ته‌وه ده‌که‌ن، ئێمه بروامان وایه ئه‌و ده‌سه‌ڵاته به راپه‌ڕینێکی جه‌ماوه‌ر‌یی وه‌ک راپه‌ڕینه‌که‌ی ساڵی 1991 راده‌ماڵرێت، راپه‌ڕینێک، که نابێت کاتی بۆ دیاریی بکرێت، دیارییکردنی کات و شوێن بۆ خۆپیشاندان و راپه‌ڕیین، ئه‌و په‌یامه به ده‌سه‌ڵات ده‌دات و پێیان ده‌ڵێت: وه‌رن وا ئێمه له‌م شوێنه‌داین لێمان بده‌ن، بمانگرن، ئازارمان بده‌ن، بمانکوژن.
خه‌ڵکی کوردستان پێویستیی به خۆرێکخستن و خۆکۆکردنه‌وه‌یه له ده‌ره‌وه‌ی ئه‌و بزووتنه‌وه و رێکخراوانه‌ی که ئیستا له کوردستاندا بوونیان هه‌یه، ده‌بێت خه‌بات بۆ رووماڵه‌کردن و نه‌هێشتنیان بدرێت، ئێمه له‌گه‌ڵ داخوازییه‌کانی خه‌ڵکی کوردستانداین، که خۆی له نه‌مانی ئه‌م دوو بنه‌ماڵ و ده‌سه‌ڵاته ده‌بینێته‌وه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
