دیاریی نه‌ورۆز

Tuesday, 26/03/2013, 12:00

بۆ ئه‌م نه‌ورۆز و به‌هاره‌
بۆ غه‌ریبێ دوور له‌ یاره‌
یاریش هه‌مان کوردستانی دێرین و خاوه‌ن ژیاره،
ده‌بێ نه‌ورۆزانه‌م چ بێت!
بۆ ئه‌و خاکه‌ی هێشتا دیلی ده‌ستی بێگانه‌ و نه‌یاره‌
ئه‌ی کوردستان بۆ خۆت بڵێ: چیت به‌دیاری بۆ بنێرم!
تۆ خۆت مێرگی هه‌زار ڕه‌نگی سوور گوڵانی
تۆ خۆت باخچه‌ی ژین و گوڵجاڕه‌که‌ی گشت دڵانی
تۆ خۆت چرۆ و گۆپیته‌که‌ی سه‌رچڵانی
تۆ خۆت دیاریی و تاقه‌ گوڵه‌که‌ی ژین و گیانی.
بۆیه‌ منی غه‌ریبه‌که‌ی دووره‌ شاران
بۆ ئه‌م نه‌ورۆز و به‌هاره‌
جه‌ژنانه‌م ده‌وێ ،جه‌ژنانه.‌
کاتێ دڵم ئه‌یکاته‌ جێژن
که‌ چاوم هه‌ڵێنا سبه‌ی
تێر سه‌یری که‌م و ببینم
شه‌کانه‌وه‌ی ئاڵای سه‌ربه‌ستیم لێ دیاره‌ .

تاران
نه‌ورۆزی 2713