پێشەكى:

دواى ئەوەى كاك سەردەشت عوسمانی ڕۆژنامەنووسیان تیرۆر كرد وایان ئەزانى ئیتر ئاشەكە وەك جاران بەتاڵ بووە و هەموومانیان بە ئەو غەدرە تۆقاندووە، بەڵام ئێمە وەك ستافی "كورد كوردە" بڕیارماندا كە هەم ئاگامان لە گیانى خۆمان بێت و هەم نەترسین و لە سەر ڕێگای هاوڕێكانمان بەردەوام بین تا بتوانین مێژووى نەگریسی سەرۆكێكی عەوامى بێ شەهادە و دار و دەستەكەى بنووسینەوە و بۆ نەوەكانە دواى خۆمانی هەڵگرین تا لە ئایندەدا چاوبەست لە نەوەى كورد نەكرێت و لە خۆڕا گۆڕی سەرۆكێكی خوێن ڕێژ و زۆردار تەواف نەكەن، بەڵكو هانیان بدەین كە نەهێڵن لاشەشیان لە ژێر خاكی ئەم نیشتیمانەدا بنێژرێت و بیاننێرنەوە بۆ ئەو ووڵاتانەى كە ئەمان موخابەرات و پیاویان بوون.

بێ گومان ڕەنگە ئێمە نەتوانین هەموو ئەو خاڵە جەوهەریانەى كە هەریەكەمان ئامانجمانە بگەیەنینە دوا قۆناغ بەڵام لەوە تێگەیشتووین ئەگەر بێدەنگ بین و هیچیش نەكەین ئەوا هیچمان لە دارو دەستەى ئەم زۆردارانە كەمتر نیە بۆیە بڕیارمانداوە ئەوەندەى پێمان بكرێت لەم ڕۆژگاری نەهاتیەدا هەر پێشمەرگە بین و هەر لە پێناوى بەرژەوەندیە نیشتیمانی و مرۆڤایەتیەكاندا لە هەوڵ و تەقەلادا بین تا بتوانین ویژدانى خۆمان ئاسودە بكەین و بۆ ئەو دەستە رەشانەشی بسەلمێنین كە سۆران و سەردەشتیان تیرۆر كرد وە پێیان بڵێین كە نەوەى كورد لە تۆپ و تانكى دوژمنى زلهێز ناترسێت و چەندین ساڵ دژی بەعسیزم و كەمالی تورك و ڕژێمى ئێرانى وەستاوە و خەباتى ئازادیخواى خۆی درێژە پێداوە ئیدى ئێوە بەم تولە و تانجیانەتانەوە خەیاڵتان سەقەتە گەر وا بیركەنەوە ڕێگەتان پێ دەدەین تا سەر ئەم غەدرە لە میللەتى كورد بكەن و بۆتان بچێتە سەر. كورد كوردە كورد جاش نیە و كورد نەك قەندیل بەڵكو پاتەى بەجێماوى مناڵێكى ئەنفالی ناو ئەو بیابانەى عەرەبستانەش نافرۆشێت. 

*******************************
پێشكەشە:

- بەو دەنگە تەزویرانەى دران بەتۆ.. سەرۆك
- بەو ترسەى كە لەناو دڵی هەمووماندا ئەژی، ترسی ئەوەى ڕۆژێ دێ ئەمانكوژیت.
- بەو ڕۆژەی منیشی تیا ئەكوژیت.

*************************************************************

قوربان..
هەژدەساڵ لەمەوبەر كچێ كوشتمى!
دەساڵ بەر لە ئێستە لە خۆرئاوابووندا خنكام.
هەشت عەوام پێش ئەم سەردەمەش لەناو خەمى فرۆشتنما وون بووم.
دوو ساڵیشە لەناو باخێكى نەمردا پشوو ئەدەم.
ئیتر خەمم نیە.
لە كۆڕەو تا ئێران هاتووم
كیمیایی هەڵەبجەم بەسەردا پرژێنراوە
لە گەرمیان ئەنفالكراوم
لە بەهاری راپەڕینا، تۆ لە كەرەج و تاران بوویت، من هەڵمكوتایە سەر ئەمنەكە.
لە شەڕی پارە و پولتاندا هێندە كوێرەوەریم چەشتووە، كە ئیدی بێزتان لێ دەكەمەوە.
گەر دەستیشت ئەچێتە خوێنى منەوە
قۆڵت هەڵكە،
تۆ پیشەتە كە پیاو بكوژی.
قوربان..
بۆ كوێ ئەچیت؟ لە هەركوێ بیت ئەتنووسمەوە.
نەك هەر یەكجار
هەموو ڕۆژی لەخاچم بەیت
هەموو ساتێ هەڵمواسیت.
منیش نەبم
كوردێك هەیە كە تێتئەگات
سەردەشتێك راستەبێتەوە، بۆ ئێمەت بگێڕێتەوە.

********************************

پاڕانەوە

گوێم لە نوزە نوزى سەگێكی بەرماڵەكەت بوو ئەیووت:
خۆزگەم بەو گەماڵەى كە سەگی بەرماڵیان نیە.
چاوی پڕ بوو بوو لە تەم و ئەیووت
خوایە قەت نەمكەیت بە سەرۆك.

گوێم لە نزای شەهید بووە.
شەهیدێك نەهاتە خەوم و نەڵێت،
تف لەو شتەى پێمووت سەرۆك،
ئێمەى لە پێش دەبابەكانەوە ناردوو، هەر بەزیندوویی فرۆشراین.
لە پێناو دینارەكانیا، بەناوى نیشتیمانەوە خوێنی ڕشتین، خوایە سوپاس، بەس نیە منیش ئەو نەبووم.

گۆێم لە مناڵە بۆیاخچیەكەى "سەرا"بوو ئەیووت:
كێ قاچی دا ئەنێ داینێ
بۆیاخ بۆ هەمووتان ئەكەم، سەرۆك نەبێ.

زۆر ئێواران كە غەدری ئەم فیرعەونە باڵاكورتە مەستی كردووم
گوێم لە دەنگى ئەم خاكە بووە ئەیووت:
لەوەتەى هەم لەوەتەى بووم
نامەردی وەك ئەم خۆفرۆشەم لەسەر نەبووە.
زۆر نامەردیم دیووە لێتان، بەڵام تا هەنوكە،
بەد كردەوەى وام نەدیووە..

ئەو ئێوارەیەى كە كوژرای
"زەرەی هاوڕێم"
هەموو خاكی ئەم ووڵاتە هاواری كرد
عەیامێكە گەنجی مەرد و ڕۆڵەى هەژاری ئەم گەلە ئەخنكێنیت
عەیامێكە ئەى كوڕی ئاشبەتاڵەكان
ئەى پاشەڵ پیس
ئەى قارەمانەكەى سی و یەكى ئاب
عەیامێكە هەرچی وەك تۆ نەدووێ
وەك تۆ بیر نەكاتەوە
وەك تۆ سەیری دوونیا نەكات
تۆش وەك ئاگر ئەیسوتێنیت
عەیامێكە.. زۆر لە مێژە دەستت بەخوێنى ڕۆڵەى كورد سوركردووە.
ڕۆژگار دەست بە خوێنت سوركات.