كۆنفرانسی نەتەوەیی پرسێكی ستراتیژییە نەك شەخسی دووەمین وەڵامم بۆ كاك هیوا عەبدوڵا

Monday, 11/07/2011, 12:00

هیچ مەسەلەێكی شەخسیم لەگەلأ كاك هیواو هیچ نوسەرو رۆشنبیرێك نییە، بەڵام خۆم بە بەرپرسیش دەزانم كاتێك هەركەسێك بێ و لەخۆیەوەو بەهەندێك تێڕوانینی شەخسی پرسێكی وا گرنگی وەك كۆنفرانسی نەتەوەیی هەڵسەنگێت و خۆشی لەوبارەیەوە شتێكی ئەوتۆی لەدەست نێت، هەڵبەت پێویستە رەخنە بكرێت. پێویستە كاك هیوا لەو رەخنانە نەترسێت و خۆشی وا نیشان نەدات لەبەر ئەوەی لەسەر پرسی نەتەوەیی رەخنە دەكرێت، چونكە یەكەم هەڵەیە خۆت بەناوەندی پرسی نەتەوەیی بزانی و وەكو ئەوەی هەمووشتێكی بۆ پرسی نەتەوەیی كردبێ و ئیتر نابێ بەڕێزیان رەخنەبكرێت. منیش رێزم بۆ ماندووبوونی رابردووت هەیە و هیوام دەكرد لەتێكۆشانی نەتەوەیی دا بەردەوام بوونایە، بەڵام بەردەوام نەكردنتان لەگەلأ ئەوەی بڕیارێكی شەخسیتانەبووە، هەمانكات نغرۆبوونیشە لەناو تاكڕەویەتی ژیانی ئەوروپا، بۆیە دەبێ ئێستا بەسروشتی وەری بگرن كە لەسەر ئەوپرسە رەخنەبكرێن، چونكە ئێستا بۆ خۆتان ژیان بەسەردەبن نەك بۆ نەتەوەكەتان.
بۆیە پێویستم بینی دووبارە وەڵامی كاك هیوا بدەمەوە، چونكە ئەمڕۆ لەهەر پرسێك هەستیارتر بەلای منەوە پرسی كۆنفرانسی نەتەوەیە. دوای ئەوەی لەباكورو رۆژئاوای كوردستانیش دووبەرەی كوردستانی دروستبوون و ئەنجامی باشیان بەدەستخست، ئومێدمان بەگردبوونەوەی كوردان لەدەوری یەكتر زیاتربووە، هەرچەندە دەسەڵاتدارانی هەرێمی كوردستان تائێستا بەجدی نزیكی ئەو پرسەناكەونەوەو لەنێوان بەڵێ و نەخێردا دێن و دەچن، هەمانكات ئەوانیش تا ئێستا بە ئەقڵیەتی كۆنی سۆسیالیستەكان نزیكی پرسی یەكێتی نەتەوەیی دەبنەوە، بۆیە لەگەلأ ئەوەی لەدەوڵەتانی هەرێمی دەترسن، هەمانكات تاكو پەیامی زڵهێزەكانیشیان پێ نەبێ ئەوان ناتوانن بەرەو پیری بانگەوازی كۆنفرانسی نەتەوەیەوەبێن، لایەنەكانی تریش وەكو ئۆپۆزیسیۆنی پەرلەمانیش ئەوانیش تا ئێستا هیچ پەیامێكی كراوەیان نییە بۆ چارەسەری پرسی كورد چ لە باشوور چ لە پارچەكانی تر، هەمانكات تا ئێستا وەڵامی ئاشكرایان نییە بۆ بەستنی كۆنفرانسی نەتەوەیی.
ئەوەی تائێستا سوورە لەسەر پرسی كۆنفرانسی نەتەوەیی و پێداگری لەسەر دەكات و هەنگاوی بۆ دەهاوێژێت پەكەكە و ئەو رێكخستنانەن كە لەدەوری ئایدیۆلۆژیایی پەكەكەوە كۆبوونەتەوە، ئەوەی لەباكورو رۆژئاواش پێكهاتووە هەموومان دەزانین بەدەستپێشخەری ئەوان بووە، هەمانكات ئەوان گەورەترین فیداكاریان كرد تاكو بۆ سەرخستنی ئەو پرۆسەیە دەنگ بەزۆر كەس بدەن كە شایستەی ئەو دەنگانەنین.
دەبێ چۆن سەیری كۆنفرانسی نەتەوەیی بكەین؟ چۆن لە ئەقڵیەتی كۆن رزگارمان دەبێت؟ لەگەلأ ئەوەی پێویستە خۆمان لە سۆسیالیزمی بونیادنراوەوە رزگاربكەین بەهەمانشێوە پێویستە خۆمان لە ئەقڵیەتی لیبڕالیستانەش رزگاربكەین، كە ئەمڕۆ كاك هیواو زۆرێكی وەك ئەو گیرۆدەی بوونە، لەلایەكی تر ئێمە لەگەلأ ئەوەی پێویستیمان بە گۆنقرانسێكی نەتەوەیی سەرتاسەری هەیە، بەهەمانشێوە پێویستمان بە كۆنفرانسی نەتەوەیی ناوخۆش هەیە، واتا هەرپارچەێك پێویستە لەناو خۆشیدا ئەم یەكبوونە سازبكات. بۆیە دوور لە زهنیەتی بوون بەدەوڵەتبوون دەبێ كۆنفرانس یان كۆنگرەی نەتەوەیی ئەنجامبدرێن، واتا پرسی نەتەوەیی بوون لەپرسی دەوڵەتبوون جیابكەینەوە زۆرباشە. هەمانكات دەبێ لەپرسی حیزبی و سیاسەتی رۆژانەشی دەرخەین، تاكو هەموو كۆمەڵگا هاوكاربێت بۆ ئەنجامدانی كۆنفراسی نەتەوەیی. واتا لەمڕۆ بەدواوەوە ئەو راگەیاندن، سیاسەتمەدار، كەسیەتی، رێكخراو و گروپانە رەخنەبكەین كاتێك بەنزیكایەتی یان بەزمان یان بەناوهێنانی كوردستان وەك كوردستانی عێراق یان توركیا یان سوریا یان ئێران باس دەكەن. یان بەزمانی داگیركەران و شرۆڤە و تێروانینەكانی ئەوان بڵاودەكەنەوە. هەروەها خۆیان وەك شرۆڤەكار و ئاگادار لە سیاسەتی پارچەكانی تری كوردستان نیشاندەدەن، بەڵام تەنها مەبەستیان پاساو بۆ سیاسەتەكانی ئەردۆغان یان نەژاد یان ئەسەد یان ئەوانەی عێراق بێنەوە. پێویستە پەرە بە زمان، كلتورو ئەقلیەتی نەتەوەیی بدرێت، چونكە ئەوەی لەباشووری كوردستان گرنگی پێ نادرێت و جێگای بایەخی دەسەڵاتداران و هاوڵاتیانیش نییە كلتوری نەتەوەیمانە.
ئێمە لەباشووری كوردستان لەناو واقعێكی سیاسیداین، گۆڕانكاری و دیموكراتیەتیش دوو پێویستین، بۆ ئەو مەبەستەش خەڵك رژا شەقامەكان، ئێستا ئەگەر چاكسازی ریشەی ئەنجام نەدرێت دیسان خەڵك رێبازی دیموكراتیان تاقیدەكاتەوە تاكو دەگاتە ئەنجام، دەكرێت دەسەڵات بەگێرەشێوێن بەناوی بكات یان ئۆپۆزیسیۆنی پەرلەمانی بیكاتە ماڵی خۆی، بەڵام لەئێستاداو لە هەموو دەورو زەمەنێكدا خۆپیشاندان و ناڕەزایی خەڵك كارێكی رەوایەو لەشوێنی خۆیدایە. لەكوردستان پێویست دەكات بە بەرپرسیارانەتر نزیكی ئەو رەوشە ببینەوە، كاتێك بەرپرسیارانە جموجۆلأ بكەین مانای وانیە لایەنگریەتی دەسەڵات دەكەین یان ئەگەر بەزمانێكی ئاگراوی و رووخاندن و لەناوبردن قسەبكەی مانای وانییە زۆر رادیكاڵی و خمخۆری میللەت تۆی، ئەوەش دەبینین ئەوانەی بەیەكترین دەگووت گێرەشێوێن و بڕووخی بۆ چەندەمین جارە لەسەر مێز گفتوگۆ كۆدەبنەوە، لەوانەیە ئەنجامێكی ئەو تۆشی نەبێت، بەڵام ئەویش رێگایەكی دیموكراتیانەیە بۆ چارەسەركردنی كێشەكان.
ئێستاش ئەڵێم بەڕێزت و هەموو ئەوانەی لە دەرەوەی وڵاتن رۆژانە گوێتان لە ئازارەكانی هاوڵاتیان نییە و بڕیاریشتان نییە بێن شانبەشانی خەڵك كاربكەن بۆ دیموكراتیزەكردنی هەرێم و گەڕانەوەی ناوچەدابڕاوەكان و ئەنجامدانی كۆنفرانسی نەتەوەیی. من لەكاتی خۆپیشاندانەكان زۆر كەسی تری بەناو رۆشنبیرم بینین، بەڵام لەشوێنێك هاتنە ناو خەڵك كە سەرای ئازادی جمەی دەهات، لەشوێنێكیش خەڵكیان بەجێهێشت كاتێك پیاوانی دەسەڵات ئامادەكاری هێرشكردنیان دەكرد بۆسەر خۆپیشاندەران. نازانم باسی كام هێزو لایەنی نەتەوەیی دەكەی كە خۆپیشاندانی بەناڕەوا وەسف كردبێت، یەكەم كەس لەكوردستان بەڕێز ئۆجەلان پشتگیری دایە خۆپیشاندەران و سەركۆنەی پارتی و یەكێتی كردو بۆ بەڵگەش سەیری مانشێتی رۆژنامەی چەتر بكە لەو بەروارەدا، هەمانكات بەڕێزان لەهەموو پارت و لایەنەكانی وەك كەجەكە، كۆنگرەی گەل، كۆنگرەی نەتەوەیی. ئەوانەی سەرەتا هەڵوێستایان نێگەتیڤ بوو سەرەتا بەرپرسانی بزووتنەوەی گۆڕان، پاشانیش یەگرتووی ئیسلامی، دواتریش برادەرانی حیزبی دیموكراتی ئێران. وەكوتر تەواوی لایەنە سیاسیەكان لەگەلأ خۆپیشاندەران هاوهەڵوێستبوونە. بۆیە ناكرێت لەخۆتەوە لایەنێك تاوانبار بكەیت و تفەنگ بەتاریكیەوەبنێین. هیواداربووم كاك هیوا بابەتەكەی دیسان لە رۆژنامەی هاوڵاتی بڵاوكردبوایەوە، نەوەك لەبەر ئەوەی من بەناوی نوێنەری گۆڕان رەخنەم كردوە هاتووە ماڵپەڕی ئەوەی بەكارهێناوە، ئومێدەوارم برادەرانی ماڵپەڕی سبەی بەرۆحێكی بەرپرسیارانەتر بیربكەنەوەو بابەتەكە وەكو خۆی بڵابكەنەوە.
****ئەم بابەتە وەكو پرەنسیپ بۆ ماڵپەری سبەێ بەرێزو رۆژنامەكەی بەرێ كرابوو، بەڵام بەهۆی ئەوەی كە چەند رۆژێكە رێكراوەو بڵاونەكراوەتەوە وەكو خۆی بڵاوی دەكەینەوە. بەسوپاسەوە بۆ ئەو كەس ولایەنانەی كە ئەم بابەتە بڵاودەكەنەوە. لەگەڵ رێزماندا بۆ هەموو لایەك.
[email protected]