شەهید مامۆستای یەکبونە؟

Wednesday, 01/10/2014, 12:00

دیکتاتۆڕەکان مەزنترین درۆزنی مێژوون وگەورەترین دەغەڵکاری سەردەمی دەسەڵاتی خۆیانن. ئیمپریالیستەکان دیکتاتۆڕەکان دادەتاشن ولە گژ ئەو وڵاتانەی بەردەدەن کە بیانترسێنن. دوو بابەت (هۆیەکان زۆرن) دەبێتە هۆی دیکەی کە کۆمەڵگا لە دیکتاتۆڕی گەورەو چووک بترسێ، ترس لە بڕینی بژیوی خەڵک، ترس لە سەرکوت بە دەستی ئەو دیکتاتۆڕانە، زلهێزەکان لەسەردەستی دیکتاتۆڕەکان خاکی ئەو گەلانە دەکەنە زەندۆڵستان وجەهەننەم تا کۆمەڵگا فێرکەن بێدەنگی هەڵبژێرێ ومل بۆ زەبروزەنگی ئەو دیکتاتۆڕانە داخا. دیکتاتۆڕەکانی کورد جگە لە جەستەیەکی کۆتەڵی کە لەژێر ڕکێفی بیانیدا هەناسە دەکێشن وفەرمان بە ڕێوە دەبەن چیدیکە نین.ئەوان تەنیا ئەنگوستی ئاماژەیان بەرەو زەحمەتکێش و چەوساوەکان راکێشاوە.سپڵەترین دیکتاتۆڕ لە حیزبو رێکخراوەی کوردیدا بەتایبەت لە باشوور هەڵکەوتوە. دەڵێن شەهید مامۆستای یەکبونە ! کێهە یەکبون با لە نەیاری کورد بپرسین.

دیکتاتۆڕەکانی باشوور چەکی هەرە مەزنیان،، درۆیە،، وهەڵخەڵەتاندن. نەیارەکانمان زیاتر لە راسییەکانی نەتەوەییمان تێدەگەن تا کاربەدەستی کورد. کیسەی ئەو دیکتاتۆڕانە وەک هەمبانەیەکی پڕ لە درۆیە کە بە ئانقەست وەک راستیەکان دەیخەنە سەر زمان بە مەبەستی کڵاولەسەرنان وفریوی کۆمەڵگا بە کاری دێنن. لە نێوان دیکتاتۆڕی کوردو کۆمەڵگای کوردەواریدا لە باشور تەنیا پردێک هەیە بە ناوی ،، بێ باوەڕی یا بێ متمانەیی،،. بێ باوەڕیش دیاردەیەکی ،، دەرونناسییە،، کە تاک متمانەی خۆی بەرانبەر بە دەسەڵات لە دەست دەدا. لەوەها بارودۆخێکدا وزەو چالاکی وخوڵقاندن لە تاک وەردەگیرێ وکۆمەڵگاش بەرەو سیستمێک دەبا کە شادابی وجموجۆڵ وبەرهەمهێنان رادەوەستن وژیان تەنیا دەبێتە خواردنی رۆژانەو خەوتن.
بێ متمانەیی لەو سەردەمەدا وێنەی نەخۆشییەکی هەمە لایەنەی لێهاتووە کە خۆی داوەتە دەست چارەنوسی بەردەمی باو باهۆز. کاتێک کۆمەڵگا تووشی قەیرانی،، ئابوری وسیاسی،، دەبێ متمانە بە دەسەڵات وسیستمی بەڕێوەبەر هێدی هێدی بەرەو لاوازی هەنگاو دەنێ. بۆ نمونە لە وەها سیستمگەلێکدا لۆمپێنێکی وەک ،، مەحمود سەنگاوی،، دەبێتە قارەمانی رزگاری! بۆیە پێوانەی یاسایی وەها دەسەڵاتێک بەرەو هەڵوەشێنەوە دەچێ.ئیدی، بەرتیل،پێشێلکردنی یاسا، دزی، ژنکوژی، قەتڵی شاراوە،......روو لە زیادبون دەکا.دەسەڵاتیش بە یارمەتی ئەربابەکانی بە باشترین شێوە لە وفەزایە کەڵک وەردەگرێ.

ئاڵا و سرودی نەتەوەیی:
پاش شەڕی یەکەم ودووهەمی جیهانی جوغڕافیای سیاسی وخاکی زۆر وڵات ئاڵۆگۆڕی بەسەر هاتووە.زۆربەی ئەو دیاردەیە بە زەبری ئاڵوگۆڕەکانە ولەدەست دەسەڵاتدا نەبووە.زۆر جار دوای ئاڵگۆڕەکان هەم سرودی نەتەوەیی وهەمیش ئاڵای وڵاتەکان گۆڕاون. سۆڤیەتی پێشوو، کۆماری ئیسلامی، یان لە تورکیا ئەوە خەریکە سیستمی ئاتاتورکی بەرەو سیستمی سیاسی ئەردۆغانی دەڕوا(مەبەستم ئەوە نییە ئەردۆغان پیاوی چاکە) لە ئامریکای باشوور لە ئافریقاو.....زۆر جێگای دیش رێڕەوی سیاسی دونیا بە پێی قازانج وسیاسەتی سەردەم دەگۆڕدرێ.بەڵام ئەوەی لەلای دەسەڵاتی باشوور هەیە لە هیچ کوێی ئەو دونیایە نییە. کتێبی قوڕعان نزیکەی ١٤٠٠ ساڵە نەگۆڕەو وەک خۆی ماوەتەوە. کەس ئەو توانایەی نییە ئاڵگۆڕی بەسەر بێنێ ومرۆڤی موسڵمانیش رێزی لێدەگرێ ومافی خۆیەتی. ئێستێش نەمزانی ئەو ئاڵایەی نەمر پێشەوا داویەتی دەست مەڕحومی مستەفا بارزانی وپێی گوتووە: ئەو ئاڵایە دەدەمە دەست تۆ دەبێ بیپارێزی لە کوێڕا هاتووە.؟ هیچ بەڵگەی مێژووییمان لەبەر دەست دا نییە کە ئەو رووداوە بسەلمێنێ. کاکە مەسعودیشمان بە کەیفی دەیڕێسێ دەیدوورێ وکەسیش ناوێرێ متەقی لێ بێ.(ئەدی دیکتاتۆڕ چۆنە؟) .

سرودی نەتەوەیی ئەی رەقیب:
شەڕ لەسەر ئەو سرودە کەزیاتر شەڕە لەسەر ئەو نیو دێڕەی کە دەڵێ: دینمان ئاینمان هەر نیشتمان (هەرکوردێک ئەو رستەیەی پێ دین وئایینی خۆی نەبێ دیارە وەکوردبیر ناکاتەوە).ئەو رۆژانە پارڵمانتارە بێکارەکانی پارڵمانی هەولێر فەرمویانە هەر کەس لەکاتی بیستنی ئەو سرودە نەچیتە سەر پێ سزا دەدرێ. لە هەموو دونیادا لە وڵاتی زانست ناس، دانان یا گۆڕێنی سرود کاری ناوەندو لێکۆڵینەوەو لێکۆلەرو زانیار ئەدیبو زمانناسە.لەلای ئێمە دەبێ دەفتەری سیاسی بکوژی سەردەشت عوسمان وکاوە گەرمیانی دانیشن ئیزنی گۆڕینی سرودی نەتەوەیی کورد بدەن.!(لە کاتی خۆیدا مەلا حەیاکیش دەیگوت دەسەڵاتی باشوور مافی گۆڕینی ئەو سرودەیان نییە لە راستیدا ئەو سرودە وەکی ئامرازێک دەنرخێنرێ تا گەنجی کوردی پێ هان دەن ولاینگر بەدەست بێنن چون تەوای کردەوەکانیان بە پێچەوانەی هەڵویستی ئەو سرودەیە) . با بزانین کا مەسعود چۆن ،دین وئایینی نیشتمانە؟

ئەو تڕاژیدیایەی کە بەسەر حیزبەکانی رۆژهەڵاتی کوردستان هاتووە بە هەڵکەوت نییە. لە کاتی خۆیدا کە مەڕحومی دوکتور قاسملو دەبیری یەکەمی حیزبی دێمۆکڕات بوو.، قیادە مۆوەقەتیش، رێبەریی پاش شکستی مەڕحومی بارزانی وەئەستۆ گرتبوو. لە حەق نەگوزەرێن ئەو کات بارودۆخێکی یەکجار گران خۆی سەپاندبوو. لەوەها رۆژگارێکدا تەنیا پشتو پەنا کۆماری ئیسلامی بووە! کە بتوانێ وەک ،، پێشمەرگانی وەفادار،، وەریان بگرێ.(ئەوەش سیاسەتی ئەو حیزبانە رۆژهەڵات بوو کە ئەوڕۆ تاوانەکەی دەدەنەوە).پرسیار ئەوەیە کە ئەگەر بۆ پاڕتی دێمۆکڕات وئەوانی دیکە دینو ئیمان نیشتمانە؟ بۆ چی سێ دەیە زیاترە حیزبەکانی ئەو بەشە لەوڵات زنجیر کراون وجوڵەیان لێ بڕاوە؟ ئەگەر نیشتمان دین وئایینی کاک مەسعودە بۆچی پارەی فرۆشی نەفت لە بانکەکانی تورکیە دادەنرێ؟ ئەگەر نیشتمان ئەوا خۆشەویستە بۆ بەزۆر بوویەوە بە سەرۆکی هەرێم؟ باشە زۆرت نەماوە ئەو ساڵەش تەوابێ، دەبێ ئیسپاتی بکەی نیشتمانت خۆش دەوێ ودەست لە سەرۆکایەتی هەڵگری. ئایا شەهید بۆتە مامۆستای یەکبون؟ من دەڵێم نەیانهێشتووە ئەو ئەرکە بدرێ بە شەهید. خۆزگە تا‌قە شەهیدێکمان نەبوایەو حاڵمان ئەو حاڵەش نەبوایە کە تێیئداین.