دەسەڵات و ئۆپۆزسیۆن کوردستانیان کردۆتە هۆڵی سینەما

Saturday, 16/06/2012, 12:00

بیرم دێت کە بەمنداڵی دەچووین بۆ سینەما دوو کارئەکتەری فلیمەکان زۆر سەرنجیان ڕادەکێشاین، یەکەمیان پاڵەوانی فلیمەکەبوو کە پێماندەوت کوڕە ئازاکە، دووەمیان کچە جوانەکەی خۆشەویستی پاڵەوانی فلیمەکەبوو کە پێماندەوت دنکی کوڕە ئازاکە، هەر کاتێک پاڵەوانی فلیمەکە دەردەکەوت دەمانکرد بە چەپڵە کوتان، هەر کاتێک کچە جوانەکەش دەربکەوتایە ئەمانکردە فیکە لێدان، چەپڵەو فیکە تەنها ڕۆڵی ئێمەبوو لە هۆڵی سینەماکەدا، ئەوەی ئاقاری فلیمەکە بۆ کوێ دەڕوات و چۆن کۆتایی پێدێت ، ئێمەی بینەری فلیمەکە هیچ بەشداری و کاریگەریەکمان نەبوو.
ئەوەی ئیستا لە واقیعی سیاسی کوردستاندا دەگوزەرێت پڕاوپڕ ئەو ڕۆژانەم بیر دەهێنێتەوە کە فیکەمان لێدەداو چەپڵەمان ئەکوتا، کوردستان لەم ڕۆژانەدا بە هەستیارترین قۆناغەکانی ژیانی سیاسی و کۆمەڵایەتی و دیبلۆماسی خۆیدا گوزەر دەکات، ململانێ و جەمسەربەندی و ئاڵوگۆڕی هاوکێشەی هێز لە نێوان هێز و لایەنە سیاسیەکاندا، هەنگاو دەنێت بۆ ئارایشتێکی تازەی دەسەڵاتداریەتی و پەیوەندی لە ئاستی عێراق و کوردستاندا.
هەڕەشەو چاو سورکردنەوە، لێسەندنەوەی متمانەو لەشکر کێشی، بڕینی بودجەو ئاشکرا کردنی نهێنیەکان، سەردانی دەوڵەتانی ناوچەکە و نامە و بروسکە گۆڕینەوە، دروست کردنی بلۆکی هاوبەش و هاوبەرژەوەندی، بێدەنگی وهەڵوێست هەڵگرتن بۆ دوای ڕووداوەکان، ئەمانە بوونەتە ئامراز و کارتی گوشاری دەست هێز و لایەنە ناکۆک و دژە بە یەکەکانی ئێستای پێکهێنەرانی پرۆسەی سیاسی عێراق و هەرێمی کوردستان.
ئەگەر لە کڵێشەدا کێشەی ئێستای نێوان هەرێمی کوردستان و حکومەتی مەرکەزی چۆن دەربکەوێت، یان هەر جۆرە لێکدانەو شیکردنەوەیەکی بۆ بکرێت، بەوەی کێشەی کەسەکانە، یان کێشەی نەتەوەیە، یان کێشە دەوڵەتە ناوچەی و هێزە ناوخۆیەکانە، ئەم هۆکارانە هیچی لەو ڕاستیە کەم ناکاتەوە کە سەرەکیترین فاکتەری ئەوەی ئێستا ڕوودەات، پەیوەندی بە پرۆژە و دیدی پێکهێنەرانەی هێزەکانەوە هەیە، لە ڕوانگەی (نەتەوە، مەزهەب، عەشیرەت، تایفە)وە بۆ بنیاتناوەی دەوڵەتی تازە لە عێراقدا، تەواوی ئەو هیز و لایەنانەی کە لە دوای پرۆسەی داگیرکردنی عێراقەوە دەستیان لە کورسی دەسەڵات و سەروەت و سامانی کۆمەڵگا گیربووە، هێزی پێکهێنانەوەی دەوڵەت و سستەمێکی (هاوچەرخ و مەدەنی)نین تا هاوڵاتی لە سایەیاندا بتوانێت لە مافی یەکسان بۆ ژیانێکی ئارام و ئاسودە بەهرەمەندبێت، بە هەرێمی کوردستانیشەوە کە لە ساڵی (٢٠٠٣) وە بوویە بەشێک لەو سیناریۆیە سەراسەریە.
ئەوەی لە کوردستان دەبینرێت کە جێگای مەبەستی وتارەکەی منە، بەرواورد کردنی هۆڵی سینەماو فلیم و پاڵەوان و کچە جوانەکەیە، لەگەڵ کاریگەری و ڕۆڵی بەشداری خەڵکی کوردستانە لەم کایە سیاسیەی ئێستادا، کە خەریکە چارەنووسی نەوەی داهاتوش دیاری دەکات، ئەگەر واقیعی سیاسی کوردستان وەک فلیمێک سەیر بکەین و خەڵکی کوردستانیش وەک بینەری فلیمەکە، ئەوا پاڵەوانی فلیمەکە کۆمەڵێک ناون کە سەرقاڵی کۆبونەوەی نهێنی و پیلانی نهێنی و ئامانجی نهێنین.
پاڵەوانەکانی فلیمەکەی ئێستای کوردستان کە لە شاشەی سینەماکەی واقیعی ئێستای کوردستانەوە نمایش دەکرێت و دەردەکەون ئەم ناوانەن (یەکێتی، پارتی، گۆڕان، کۆمەڵ، یەکگرتوو، سەرۆکی هەرێم، سەرۆکی پەرلەمان،سەرۆکی حکومەت، جار جاریش کچە جوانکە بۆ لێدوانێک دەردەکەوێت)، هەموو ئەم هێز و دەزگا و ئۆرگانانە ئەگەر لەڕووی سیاسی و شکڵیەوە نەیاری یەکتربن و پەرۆشنامە بۆ یەکتر بنێرن، ئەوا لە چوارچێوەی هەموو ئەگەرەکاندا هەموو هاوڕان لەسەر ئەوەی کە خەڵکی کوردستان بکەنە بینەری فلیمی سینەماکە، ئەم هێزانە لەڕووی سیاسی و سایکۆلیژیەوە سەرقاڵی ئەوەن بەووردی کار لەسەر بێئیرادەکردنی خەڵکی کورستان بکەن، ئەم هێزانە خەریکن کۆبونەوەی ژورە تاریکەکانی نێوان (تاڵەبانی، بەرزانی، بەرهەم ساڵح، نەوشیروان مستەفا، عەلی باپیر، ئاشتی هەورامی، نێچیرەڤان بارزانی، هێرۆ ئیبراهیم، مەلا بەختیار، فوئاد حسێن، محەمەد فەرەج، سەلاحەدین بەهادین) کە لە ڕابوردودا بینیمان و ئێستاش بەردەوامە دەکەنە ئەڵتەرناتیڤی بڕیاری سەرجەم کۆمەڵگا.
ئەم حیزب و لایەنە سیاسیانە زۆر بە وریایەوە خەریکن چەپڵە کوتان و فیکە لێدان دەکەنە تەنها ئەرکی سەرشانی خەڵکی کوردستان لەم ڕۆژگارە هەستیار و چارەنوسسازانەدا، دەسەڵاتدارانی کوردستان پەنا بۆ هەموو داهێنانێک دەبەن کە بڕیاری خەڵک قەتیس و دیل بکات، ئەو حیزبانەش کە پێیاندەوتریت ئۆپۆزسیۆن کە بڕیاربوو سستەمی دەسەڵادارێتی لە کوردستان و نوێنەرایەتی لە بەغداد بگۆڕن، کۆمەڵ و یەکگرتوو هاوشانی پارتی و، گۆڕانیش خەریکی پاراستنی هێلکەکانیەتی بۆ ئەوەی لە سەبەتەکەدا نەشکێت.
لەم ململانێ گەرم و سەختەی ئیستای نێوان دەسەڵاتدارنی کوردستان و عێراقدا، هەموو هێز و لایەنەکان حیساباتی قازانج و زیانەکانی خۆیانیان کردوە، لە کۆمپانیای دەرهێنانی نەوتەوە تاکو بەش بردن لە بودجە و کۆنترۆڵ کردنی تەواوی سەرچاوەکانی ژیانی ڕۆژانەی خەڵک، ئەوەی دیار نیە دەور و دەخاڵەتی خەڵکە، دەنگی خەڵکی کوردساتنە، لە پێشهاتێکدا کە هەموو نەهامەتیەکانی لەسەر شانی ئەوان کۆتایی پێدێت.
دەبێت خەڵکی کوردستان لەم قەواغە سەپێنراوە بێتە دەرەوە، خەڵکی کوردستان نابێت لەم ڕۆژگارە هەستیارەدا دەنگ و ڕەنگیان دیار نەبێت، نابێت درێژە بە بینەری ئەم فلیمە بدەین، بەبێ ئیرادە و هاتنە مەیدانی هێزی جەماوەری خەڵک، هیچ داهاتویەکی ئینسانی و شایستە لە سایەیەی ئەم پاڵەوانانەدا مسۆگەر نابێت، ١٧ شوبات باشترین نموونەیە بۆ ناڕەزایەتی و ئیرادەنواندن، لە ئێستادا لە کوردستان دەنگێکی کز و کەمی خەڵک دەبیسرێت، ئەم دەنگە کز و کەمە بەس نیە بۆ ئەوەی خەڵکی کوردستان بڵێت، خۆم چارەنوسی خۆم دیاری دەکەم، نەک سەرکردە بازرگانەکان.