ئەو هەڵبژاردنانەی كە چاوەڕوان دەكرێت ئەنجام بدرێت، تا ئیستا كاتەكەی دیاری نەكراوە، ئەوەی ئیستا لە نێو شەقامەكاندا قسە و باسی لە بارەوە دەكرێت، ئەوەیە گۆڕانكاریەكی ئەوتۆ نایەتە ئاراوە، ئەو هێزانەش كە لەبەرچاون چاوەڕیی گۆڕانكاری ریشەییان لیناكرێت، ئاشكرایە پارتی و یەكێتی ناتوانن شتی نوێ بكەن، هەوڵەكەشیان بۆ پاراستنی پێگەكەیانە، بەڵام خاوەن هێزن ئەگەر 100% هێزەكەیان نەپارێزن ئەوا 70% دەتوانن بپارێزن، هێزی سێیەم كە لە نێو جەماوەر دا باسی لێوە دەكرێت جەماعەتی نەوشیروان مستەفایە، هەر چەندە نەوشیروان مستەفا باسی گۆڕان دەكات و ناوی لیستە كەیشی گۆڕانە بەڵام ناتوانێت گۆڕانكاریەكی ئوتۆ بكات، چونكە پارتی و یە كێتی توانا و هێزیان زۆر لەوە زیاترە و ئەمجارەشیان 70% بە دەست دەخەن، ئەگەر نەوشیروان مستەفا 30% لە دەنگەكانیش بە دەس بخات، ئەو ژمارەیە بەشی گۆڕان ناكات. دەتوانرێت بگوترێت ئەگەر چاوەڕی بین نەوشیروان گۆڕان دروست بكات ئەوا لە خەفڵەتێكی گەورەدا دەژین. دەبێت نەوشیروان مستەفا لەهەندێك دەڤەر كاریگەری هەبێت ببێتە دەنگی زۆرینە، بەڵام خاوەن ئەو توانایە نییە ببێتە هێزی گۆڕان. 

نەوشیروان بۆ خۆی لە ساڵی (1976)ەوە تا ئیستا یەكێتییە و خۆی بە جیا نەزانیوە، ئەو شەریكی باش و خراپی یەكێتی و حكومەتیش بووە. ئەو گەندەڵییەی لەناو حكومەت و حزب دا هەبووە ئەگەر 75% خەتایی ئەو نەبووبێت 50% خەتای ئەو بووە. ئەو گۆڕانەی كە ئەو باسی دەكات ئەگەر لەو ماوەیەدا نەیتوانی بیكات واتە بە درێژایی ئەو سی و سێ ساڵە، ئایا لە مەودا پێی دەكرێت؟ چاوەڕی وڵام نیم چونكە بۆ خۆم باش دەزانم نەوشیروان مستەفا ناتوانێت بڵێت من جیاوازم و لە یەكێیەتی و پارتی جێاوازترم و لە ئەوان باشترم، ئەگەر خۆی لە گەڵ پارتی و یەكێیەتی بەراورد بكات، ئەو ئەندام پەرلەمانەم بیر دەخاتەوە كە گوتبووی با حكومەتی ئێراق چاو لە ئەزموونی دیموكراتی كوردستان بكات! 

دەبێت نەوشیروان مستەفا هەندێك راگەیاندنی كوردی نزیكی ئەمریكا، یان ئەمریكا بۆ خۆشی پشتگیری بكات، یان كاندیدەكانی كەسانی ئاكادیمی بن، پێویستە بیرمان نەچێت (پارتی و یەكێتی)ش وەهان. ئەمریكا پێی باشە هەر كەسێك پیاوی ئەو بێت بە نەوشیروان مستەفایشەوە. ئەمریكا لە چوارچێوەی بەرژەوەندییەكانی خۆیدا جموجوڵ دەكات و بە گوێرەی خۆی نزیكی ئەویش دەبێت. واتا نەوشیروان مستەفا لە دوای یەكێیەتی و پارتی لە لیستی ئەمریكا دێت. نەك لە ریزی پێشەوە و لە سەرەوەی لیستەكەیەوە نییە. دەبێت دەنگی ناڕازی لە بەرامبەر یەكێیەتی و پارتی یان بەرەی ناكۆكی ناو یەكێتی پشتگیری بكەن ئەمەش ئاساییە، لە رێفراندۆمی هەڵبژاردنەكانی نێو یەكێتی واتە "رێفۆرمخواز و محافزەكار" نەوشیروان لەوێ سەرنەكەوت دیسان هێز لە دەستی محافزەكارەكاندا مایەوە، بەڵام ئەم هەڵبژاردنە جیاوازە ئەو دەنگەی ریفۆرمخوازەكان بە فیڕۆ ناڕوات. دەتوانێت ئەندام پەرلەمان دروست بكات. واتە هێزی نەوشیروان فەرمییەتێكی زیاتر قازانج دەكات. 

ئەو هەڵبژاردنە لەوەی ساڵانی پێشو جیاواز ترە، پێشتر یەكێتی فێڵی ساحە و پارتیش لەو فیڵ تر بوو. وێناكان دەنگەكان و هێزەكانیش هەر ئەوان بوون خەڵكی خۆیان دەیانزانی هەر سەر دەكەون، لەبەرئەوە هەر لە پێش راگەیاندنی ئەنجامەكانەوە رەقسیان دەكرد. بەڵام لەم هەڵبژاردنەدا هێزی دیكەش لە مەیدان هەن. ئەمەش دەهێڵێت بیر كردنەوەی زیاتر لای خەڵك دروست بێت. ئەمجارەیان خەڵك ناترسێت راتبی ببڕن، بایعی ببڕن و لە كار دووری بخەنەوە. چونكە دەرفەتی فەرمی دیكەش هەن، ئەمجارەیان درۆ و خەڵەناندن و ترس نایخواتەوە، لە وانەیە هەندێك ئاگایان لە وەزعەكە نەبێت و هێشتا وەكو پێشتر بیر بكەنەوە، بەڵام ئەمە ڕێژەیەكی كەمە. 

مونافسەی نێوان لیستەكان دەستپێبكات هەتا پێدەچێت ئەنجامی ئەو مونافسانە بە كوشتنیش تەواو بێت. بۆ نموونە ئەو یەكێتییە ریفۆرمخوازی گەرمیان و سلێمانی لەم هەڵبژاردنە توڵەی خۆیان دەكەنەوە. ئەمەش ئەگەری شەڕ جارێكی دیكە دێنێتە ئاراوە. بەڵام كاریگەری لە سەر ئەنجامی هەڵبژاردنەكان نابێت. 

ئەو ركابەرایەتییەی كۆتایی بە ناچاری دێنێت، رێگە لە پێش بژاری دیكی دەكاتەوە لەراستیدا ئەو دەرفەتە لە دەركەوتنی ناكۆكی نێوان یەكێتی و پارتی هاتەئاراوە، ئەو ناكۆكییە بۆشایی دروست كرد، هێزی دیكەش ئامادەیی خۆیان نیشان دا بۆ پڕ كردنەوەی ئەو بۆشایییە. بۆ جاری یەكەمە لە كوردستاندا ئەوەندە ركابەر هەبێت، و ئەوەندە كیانی سیاسی ئامادەیی ركابەری نیشان بدەن. هوشیاربوونەوەی خەڵكیش خاڵێكی گرنگە، چونكە خەڵك لە پارتی و یەكێیەتی زۆر توڕەن تەنانەت بۆچوونی وەهایش هەیە كە ئەگەر هێزێكیش هەبێت پارتی و یەكێتی بڕوخێنێت ئەوا لایەنگری زۆرە. 

وەكو ئەنجام دەتوانرێت بگوترێت دەرفەتی رای ئازاد هاتووەتە ئاراوە، دەتوانرێت دەنگی ناڕازی ببرێتە پەرلەمان، لەماوەی داهاتوودا ئەگەر ئەو هوشیارییەی پێشبكەوێت ئەوا دەتوانرێت نوێنەری راستەقینەی گەل دروست بكرێت. 

لیستی هیوا خاوەنی ئەو بانگەشەیە كە ئەو دەرفەتە هاتووەتە ئاراوە تا دەنگی ناڕازی خەڵك ببرێتە پەرلەمانەوە، لێرە دا ژمارە گرنگ نییە، گرنگ نوێنەرایەتی كردنە یەك كەسی راست دەتوانێت نوێنەرایەتی راست بكات. لیستی هیوا لەلایەن ژنە وە سەرۆكایەتی دەكرێت ئەمەش واتای ئەوەیە كە ناڕازی ترین و بندەست ترین مرۆڤیش كە ژنە لە توانایدا هەیە نوێنەرایەتی بكات تا ئیستاش پەرلەماندا بێ نوێنەر ماوەتەوە. ئەگەر باوەڕمان بە گۆڕان بێت ئەوا لەو خاڵە دا دەست پێ دەكات ئەم مەسەلەیە بۆ رێكلام نابێت، بەڵكو پرنسیپە، زیهنیەتی لیستی هیوا ئامادەیە ئەو قاڵبانە تێكبشكێنێت كە بە هەزاران ساڵە لە كوێلە كردنی كۆمەڵگادا بەڕێوە دەبرێت. ئەوانەی داخوازی گۆڕانن و زیهنییان بۆ گۆڕان ئامادەیە، ئەگەر یەكەمجار پێشەنگایەتی ژیان بە تایبەتمەندی ژن نەبینن ناتوانن خۆیان لەو دووبارە بوونەوە رزگار بكەن. چونكە گۆڕانی ریشیی زیهنە، پێوانی گۆڕانیش زیهنە، لیستی هیوا تا ئێستا توانیویەتی ئەو گۆڕانە وێنا بكات. ئەو زیهنیەتە كە بڕیاری فرەژنی دا هەڵبەتە لەم هەڵبژاردنەدا بێ وڵام نابێت. ئەو رێكخراو و ژنانەی كە داكۆكی لە مافی ژنان دەكەن، گرنگە لیستی هیوا راست هەڵسەنگێنن و تاقە لیستێك كە سەرۆكی ژن بێت لە دەرەوەی بازنە نەهێڵنەوە و كاری جددی بۆ بكەن.