فه‌رماندارى هێزه‌کانى پاراستنى گه‌ل(HPG)ى شه‌نگال ئامارى شه‌ڕ و پێکدادانى مانگى ئابى هێزه‌کانى HPG-YJA-STAR-یه‌کینه‌کانى به‌رخۆدانى شه‌نگال له‌دژى گروپه‌ چه‌ته‌کانى داعش راگه‌یاند. به‌ پێى لێدوانه‌که‌ (17) چالاکى و شه‌ڕ و پێکدادان روویداوه‌ و له‌ ئه‌نجامدا (112) ئه‌ندامى چه‌ته‌کان که‌ دوویان ئه‌میرن کوژراون و (19) ى دیکه‌ش بریندار بوون. له‌ شه‌ڕ و پێکدادانه‌کاندا هه‌روه‌ها دوو شه‌ڕڤانى یه‌کینه‌کانى به‌رخۆدانى شه‌نگال گیانیان له‌ده‌ستداوه‌ .

فه‌رماندارى HPG ى شه‌نگال له‌ لێدوانه‌که‌یدا ده‌ڵێت:'' وه‌کو هێزه‌کانى HPG-YJA-STAR-یه‌کینه‌کانى به‌رخۆدانى شه‌نگال له‌ دژى هێرشه‌کانى گروپه‌ چه‌ته‌کانى ده‌وڵه‌تى ئیسلامى ئێراق و بیلادى شام(داعش) بۆسه‌ر هه‌رێمى شه‌نگال و گه‌لى ئیزیدیمان تێکۆشانێکى مه‌زنمان پێش خست. گه‌له‌که‌مان له‌ کۆمه‌ڵکوژییه‌کان رزگار کران، گه‌لێک هێرشى چه‌ته‌کان پوچه‌ڵ کرانه‌وه‌ و به‌رپه‌رچیان دراوه‌ته‌وه‌. هه‌روه‌ها له‌ دژى گروپه‌ چه‌ته‌کانى داعش که‌ ویستویانه‌ پێشره‌وى بکه‌ن به‌ تێکۆشانێکى گه‌ریلاکان گورزى کوشنده‌یان به‌رکه‌وتووه‌'' .

دوو ئه‌میریش له‌ ناویاندا(112) چه‌ته‌ى داعش کوژراون و (19) چه‌ته‌ش بریندار بوون

له‌ درێژه‌ى لێدوانه‌که‌دا ئامارى شه‌ڕ و پێکدادان و چالاکییه‌کانى مانگى ئاب راگه‌یه‌ندراوه‌. به‌ پێى لێدوانه‌که‌ (17) چالاکى و شه‌ڕ و پێکدادان روویداوه‌ و له‌ ئه‌نجامدا (112) ئه‌ندامى چه‌ته‌کان کوژراون که‌ دوویان ئه‌میرن و (19) ى دیکه‌ش بریندار بوون.

(28) ئۆتۆمبیلى چه‌ته‌کان تێکشکێندراون

له‌ چالاکییه‌کاندا هه‌روه‌ها سێ ئۆتۆمبێلى هه‌ڵگرى دۆشکا و ئۆتۆمبیلێکى هه‌ڵگرى هاوه‌ن به‌ گشتى (18) ئۆتۆمبیل تێکشکێندراون و (10)ى دیکه‌ش گورزیان لێدراوه‌.

ئه‌و که‌ره‌سه‌ته‌ سه‌ربازیانه‌ى ده‌ستیان به‌سه‌ردا گیراوه‌

ئۆتۆمبێلێکى هامه‌ر، پێنج کلاشینکۆف، (9) مه‌خزه‌نى پڕ له‌ فیشه‌ک، دوو چه‌کى (G-3)، ده‌مانچه‌یه‌ک، سێ مه‌خزه‌نى چه‌کى M-16 و موبابیلێک .

دوو شه‌ڕڤانى یه‌کینه‌کانى به‌رخۆدانى شه‌نگال گیانیان له‌ده‌ستدا

له‌ لێدوانه‌که‌دا ئه‌وه‌شخراته‌روو که‌ له‌ چالاکى و شه‌ڕ و پێکدادانه‌کاندا (2) شه‌ڕڤانى یه‌کینه‌کانى به‌رخۆدانى شه‌نگال(YBŞ) گیانیان له‌ ده‌ستداوه‌ .

ناسنامه‌ى ئه‌و دوو شه‌ڕڤانه‌ى یه‌کینه‌کانى به‌رخۆدانى شه‌نگال به‌مجۆره‌ راگه‌یه‌ندراوه‌:

1- سۆلا یه‌زدین براهیم بشار: له‌ گوندى سۆلاک گیانى له‌ده‌ستدا .

2- شه‌مۆ ره‌شۆ عه‌لی: له‌ گوندى جودالێ گیانى له‌ده‌ستدا .