ململانێی باڵەكان و قوربانى میدیای ئازاد.. شاسوار عەبدولواحد بەنموونە

Sunday, 27/10/2013, 12:00

1832 بینراوە

بەلای هەندێكەوە كوشتنى مرۆڤ ئەوەندە سووك و ئاسانە وەكو ئەوەى قوم لەجگەرەیێ بدات و گڵاسێ ئاو هەڵبقۆڕێنێ، گەورەییەكەیشی لەڕووى تاوانەوە وەك لە ئیسلامدا ئاماژەى پێ دەدا: كوشتنى مرۆڤێك بەناهەق كوشتنى تەواوى مرۆڤایەتیە.. ئەوەى لەسلێمانى ڕوویدا بەتەقە كردن لە بەرپرسی كەناڵی ئاسمانى(ئێن -ئاڕ- تى) جگە لەوەى هەوڵێكى تیرۆریستیە، لەهەمان كات دەرخەری بێ دەسەڵاتى و كەم ئاگایی دام و دەزگا ئەمنیەكان نیشان دەدات كە چۆن دەبێ بەڕۆژی ڕووناك و بەبەرچاوى خەڵكەوە مرۆڤ بكرێتە ئامانج بۆ لەناوبردن و سڕینەوەى؟ ئاخر مرۆڤ ئەوەندە بێ ڕێز نییە تا ئەوەى لەجێوە ئەقڵی یەكێكى نەگرت بیداتە بەر گوللە و بیپێكێ.

زۆر جار لەناوبژیوانى دوو كەسدا، كەسی ناوبژیوان دەبێتە قوربانى ئەو هەوڵەى دەیەوێ كۆتایی بەو شەڕە بێنێ كە لەنێوانیان ئەو دوو كەسەدا ڕوو دەدات.

كەناڵی (نالیاtv)وەك یەك لەو كەناڵە كوردیانەى بە ڕاستگۆیی و بوێرییەوە ڕاستیەكان دەگەیەنێ و لەلایەن جەماوەر و بینەرانەوە پێشوازیەكى گەرمى لێ دەكرێ و بابەتەكانى بوونەتە هەوێنى سەر زاری خەڵك، ئەوەش لە پەرۆشی و ئەو ئازادییە بەرجەستە بووە كە لەلایەن بەڕێوەبەر و دەستەى كارگێری كەناڵەكەوە بەڕنامەڕێژی بۆ كراوە و لەخەتى میدیای ئازاد بەیەك لەهەرە كەناڵە سەركەوتووەكانى ڕاگەیاندنى كوردی هەژمار دەكرێ و هەواڵە بەپەلە و بەردەوام و هەڵدانەوەى لاپەڕە شاراوەكان و خوێندنەوەى ڕووداوەكان نەخاسمە بابەتە گەرمەكانى ڕۆژ لە ڕووداوە سیاسیەكان و زۆر شتى تر هێندەى دیكە ئەم كەناڵەیان پڕ بینەر و بەپێز كردووە كە ڕۆژ لەدوای ڕۆژ زۆرترین بینەر لەدەوری خۆی كۆبكاتەوە و ئەوەش بۆ هەندێ كەس ژانە سەر و بۆ هەندێكى دیكە جێی ستایشە. جا ئەوانەى حەزی پێ ناكەن و ڕقیان لێیەتى و دوو چاویان پێی هەڵنایێ، هەمیشە لێی لەسەنگەرن و كار بۆ ڕوخان و تێكدان و پووچەڵكردنەوەى هەر هەوڵێكى دەدەن.

ئەوەى دەرهەق بە(شاسوار عەبدولواحید) ئەنجامدرا ئەگەر موعجیزە نەبێت، ئەوە بێ شك ئێستا دەمێبوو دەبوو تەرمى ئەو بەڕێزە بەخاك بسپێردرایە، ئاماژەكانیش ئەوە دەردەخەن گوایە ڕەنگدانەوەى ئەو دوو باڵەى مەكتەبی سیاسی كاریگەری لەسەر ئەو ڕووداوە هەبووبێ، ئەوەش تا چەند وایە؟ ئەوە ئیشی ئێمە نیە و دادگا و لێكۆڵینەوەكان ڕووى ڕاستەقینەى ئەو بابەتە دەردەخەن، هەموویشمان دەزانین چۆن لەگەرمەى خۆپیشاندانەكانى17ی شوبات ژمارەیەك لە دەمامكدارەكان خۆیان گەیاندە ئەم كەناڵە و سوتاندیان، لێرەدا خوێندنەوەم بۆ ڕووداوى ئەم تەقە كردنە ئەوەیە:

یەكەم: بەلای هێندێ گوایە ئەم كەناڵە لەلایەن دكتۆر بەرهەمەوە تەمویل دەكرێ و ئازادییەكى ڕەهای پێ بەخشیون لەوەى چۆن بەكاری میداكاری خۆیان هەڵبستن و سڵ لەهیچ هەواڵێ نەكەنەوە ئەگەر لەسەر خودی خۆیشیبن، بۆ ئەو ئەگەرەش دەبێ بۆ ڕووداوەكەى سوتانى ئەو كەناڵە بگەڕێینەوە كە لەوەتەى ئەم كەناڵە لەكەش و هەوایەكى ناسك و هەستیار لەدایك بووە، لەگواستنەوەى ڕووداوەكان بووەتە پێشەنگ.

دووەم: هیستریا و هەڵچوونى ناخی كەسانێكى دیاریكراو كە گوزارشت لە سیاسەتى یەكێتى و تەنانەت خودی مەكتەبی سیاسی ناكات، لەتەقەبولنەكردن و وەرنەگرتنى هیچ ڕەخنەیەك، ڕەنگە لەدەستڕۆیشتوویدا بۆ كپكردنى ئەو دەنگە، پەنا بباتە بەر ئەم كارە.

سێ یەم: لەسیاسەت زۆر جار بۆ یەكلاكردنەوەى كێشەكان پەنا دەبردرێتە بەر هەندێ سیناریۆ ئەگەر ئەو سیناریۆیە نەخوازراویش بێت كە ئەمە لە سیاسەتدا كارێكى قێزەون و نەشیاوە و زۆرجار پەنای بۆ دەبردرێ.

چوارەم: بۆ ئەوەى دام و دەزگا ئەمنیەكان نەكەونە بەر نەشتەری دەزگاكانى ڕاگەیاندن بەوەى كەمتەرخەمن و ناتوانن لەئاست ئەركەكانیاندا ببن، هەروەكو لە ڕاگەیەندراوى سەرۆكایەتى هەرێم و حكومەتى هەرێمدا هاتووە دەبێ بەجددى كار بە دۆزینەوەى ئەو دەستە بكرێ كە بەم كارە هەڵساون.

پێنجەم: لە نەگەیشتن بەهیچ سەرەداو و بەرئەنجامێك و یاخود داپۆشین و قەپاتكردنى ئەم كەیسە، جگە لەوەى باری نائارامى باڵ بەسەر ئەو ڕەوشە دەكێشێ، ئەگەری دووبارە و چەندبارە بوونەوەى زیاتری لێ دەكرێ نەخاسمە بەرامبەر هەموو ئەو دەزگا و كەسانەى بەبوێرییەوە خاڵ لەسەر پیت دادەنێن و ڕاستگۆیانە دەخاڤن، بە ئومێدى ئاشكراكردن و ئیعلانكردنى هەرچی زووە، چونكە سلێمانى شاری ئارامى و فرەیی و دەنگى دیموكراسیە ئەوەش ئەركى سەرشانى یەكێتیە پەرە بەو ڕەوشە دیموكراسیە بدات كە ساڵانێكە لە سایەیاندا دەنگەكان بەئازادی بیروبۆچوونەكانیان دەردەبڕن.