مانگی هه‌نگوینیتان پیرۆز
Tuesday, 28/04/2009, 12:00
1179 بینراوە
کاردۆ حاجی که‌مال
ڕۆژێک نیه پاش به‌خه‌به‌ر هاتنه‌وه‌م دیده‌م به هه‌واڵێکی خۆشدا بکرێته‌وه ،تا تۆزقاڵێک خه‌می دوور ووڵاتیمان بڕه‌وێنێته‌وه ، ڕۆژی شه‌ممه 24-42009 وه‌ک پیشه‌ی ڕۆژانه چاوێکم خشانده لاپه‌ڕه‌ی ڕۆژنامه‌و ماڵپه‌ڕه کوردیه‌کان تا بزانم دواڕووداوه‌کانی ناو یه‌کێتیه‌که‌م به‌روکوێ ملی ناوه ، که ڕۆیشتمه سه‌ر ماڵپه‌ڕی (چاودێر) نوسینێکم به‌رچاو که‌و‌ت که نه‌ک ته‌نها توشی شۆکی کردم به‌ڵکو خوازیار بووم لاقه‌که‌ی تریشم له‌ده‌ستبدایه نه‌ک هه‌ڕه‌شه‌ی که‌سه فه‌وزاویه‌که‌ی ناو پارتیم بدیبایه به‌رامبه‌ر به سه‌رکرده دێرینه‌کانی ناو یه‌کێتی !!! من وه‌ک شه‌هیدێکی زیندوو واقم وڕمابوو له خۆم پرسی من وڕێنه ده‌که‌م یان خاوه‌نی چاودێر تووشی هیستریا بووه ؟
من ڕووی ده‌مم ده‌که‌مه کاک کۆسره‌ت و گشت مه‌کته‌بی سیاسی و مه‌کته‌بی سه‌رکردایه‌تی (ی.ن.ک) ،بانگی هه‌موو کادرو پێشمه‌رگه‌ی دێرین و ئه‌ندامه دڵسۆزه‌کانی ڕێبازی کاکه (ئارام) ده‌که‌م ،ئه‌وه بۆ وا بێنووزه و بێهه‌ڵوێستن ؟ ئێوه تا دوێنێ قاره‌ما‌نی سه‌دان داستان و خاوه‌نی پیرۆزترین هه‌ڵوێست بوون ،تا که‌نگێ سوکایه‌تی که‌سانی ناحه‌ز و قین له‌دڵ به‌رامبه‌ر یه‌کێتی قبووڵ ده‌که‌ن ؟ وای لێهاتوه کۆنه شیوعیه‌کی تازه پارتی به‌رپرسی ڕاگه‌یاندنی پارتی سه‌رۆ قادر هه‌موومانی کرده سه‌گ و که‌سیشمان ووشه‌یه‌کی له‌ده‌م نه‌هاته ده‌ر ، سوکایه‌تی به ته‌واوی گوندنشینه‌کان کردو له‌لێکیشمان نه‌کرد، که ئێوه‌ی سه‌رکرده نه‌هاتنه ده‌نگ منیش مه‌جبورم ڕووی ده‌مم بکه‌مه گه‌له‌که‌م و بڵێم ئه‌وانه‌ی ئاوی دووبه‌ره‌کی ده‌که‌ن به ئاشی یه‌کێتیدا ، هه‌مان گروپ بوون بۆ خاتری فه‌رمانی ئاغاکانیان شۆڕشیکی خاوه‌ن سه‌دوبیست هه‌زار پێشمه‌رگه‌یان ڕاده‌ستی ده‌وڵه‌تی داگیرکه‌ری به‌عسیان کرده‌وه و خۆشیان وه‌ک به‌رزه‌کی بانان تێیان ته‌قاند ، له گرمه‌ی شه‌وه‌زه‌نگی بێ هیوابووندا ئه‌وه کاک ناوشیروان و هاوڕێکانی وازیان له خوێندن و له‌زه‌ت و خۆشی ژیان هێناو په‌یتا په‌یتا له که‌ناری دانوبه‌و ووڵاتانی تره‌وه گه‌ڕانه‌وه برداۆست و خڕی ناوزه‌نگ و یه‌که‌م چه‌خماخه‌ی شۆڕشی هه‌ژارانیان به‌رپا کرده‌وه ، ئه‌وه کوڕانی کۆمه‌ڵه بوون ئاگردانی خامۆشکراوی ماڵی کوردیان گڕدایه‌وه ، به قادره ده‌رباره‌که‌ی ڕاگه‌یاندنیش ده‌ڵیم سه‌رۆکه‌که‌ی تۆ بوو حه‌وسه‌د پێشمه‌رگه‌ی یه‌کێتیان له هه‌کاری قه‌تڵوعام کرد ، پرسیارت لێده‌که‌م کێ بوو 31ی ئابی تۆمارکرد تۆ بڵێی نه‌وشیروان بوبێت و ئێمه پێمان نه‌زانیبێت ؟ ئه‌وه تۆیت پاشه‌ڵت پڕه له خیانه‌تکاری و نوسینه‌کانت له ساڵی 1994 دا سه‌دان کوڕی کوردی به کوشتدا ، له کۆتایشدا به جه‌نابی کاک مه‌لا به‌ختیار ده‌ڵیم له‌یلی زه‌مان گۆڕاوه خێره خۆت و سه‌رۆ ئێستا وا جه‌رگتان بۆیه‌کتر بۆته کۆی زوخاڵ ؟ یاخوا پیرۆزی یه‌کتر بن و ئه‌م مانگی هاوینه‌تان په‌شیمانی له‌دوا نه‌یه‌ت .
به‌ریتانیا_ 26-4-2009
