بۆ هاوڕێم حسێن خزری كە لەسێدارە بەرزتری

Wednesday, 19/01/2011, 12:00

ماوەی چوار ساڵە هاوڕێی خۆشەویستم و هاورێبازم كاك حسێن لەكاتی جێبەجێكردنی كاروخەباتە دیموكراتیەكانی لەشاری كرمانشا لەلایەن هێزەكانی كۆماری ئیسلامیەوە دەستگیركراو، دوای ئەشكەنجەێكی دڕندانەو لەدادگایەكی ناعادیلانەو كارتۆنی و ناڕەوادا بەتۆمەتی دژایەتی شۆڕش و خودا، بەناحەق سزای سێدارەیان بەسەردا سەپاند.
كاكە حسێن ئەوا ماوەی سێ ساڵە چاوەڕێی جێبەجێكردنی سزاكەیەتی. باوەڕدەكەم زۆر بێباك و مەردانە لەبەردەم پەتی سێداردا وەستاوە. چونكە لەنەوە رەسەنەكەی شاری ورمێیەو لەخێلی راپەڕیوی شكاكە، كەبەدرێژای سەدەی بیستەم بەردەوام لەسەرهڵدان دابوون.
كۆماری ئیسلامی ئێران كەلەسەر بەرهەمی شۆڕشی گەلانی ئێران دامەزراوە، گەلانی ئێران ویستیان بەتێكۆشانی جەماوەری شۆڕشگێڕ لەدەستی رژێمێكی ملهوڕی وەكو شا رەزای پەهلەوی ئازادیان بێت، بەڵام نەیانزانی تووشی رژێمێكی خراپتر لەودێن و لەلای خۆیان بڵێن"هەزار خۆزگەمان بەكفن دز". سەرەڕای ئەوەی هەشت سالأ لەگەلأ رژێمی عێراق بوونە هۆكاری گەڕانەوەی ئەم ناوچەیە چەند سەدێك بۆ دواوە، هێشتاش پێداگری دەكەن لەسەر ئەو كەلە رەقیە مەزهەبیەی كەبووە هۆكاری نەهامەتی بۆ تەواوی گەلانی ئێران.
دوای كۆتای هاتن بەشەڕی ناڕەوای عێراق ـ ئێران، گەلانی ئێران وایان زانی جا ئیتر دەحەسێنەوەو كۆتای بەنەهامەتیەكان دێت، بەڵام لەبەر ئەوەی كێشەكان وەك خۆیان مابوونەوە، بۆیە بەردەوام گەلانی ئێران لەدوای لێگڕینێكی نوێدابوون، بۆیەش دوایی بێدەنگیەكی كەم لەكۆتایەكانی ساڵانی نۆوەت ئیتر گەلی كورد رێگای خۆی دۆزیەوە، بەخاوەن دەركەوتن لەبەڕێز ئۆجەلان لەئەنجامی ئەو گەلەكۆمەیەی كەكرابووە سەری لەساڵی"1999"، لەوێوە خەڵكی رۆژهەڵاتی وڵات بڕیاری تێكۆشانێكی نوێیداو ئەوەش بووە هۆكار كەهەزاران لەكوڕان و كچانی بەشداری شۆڕشی گەلی كوردبن كەهەر چوارپارچەی وڵاتی گرتبووەوە.
هەڤالأ حسێن یەكێكە لەو لاوە خوێنگەرمانەی لەگەلأ كرانەوەی چاوەكانی و هەستكردن بەئازارەكانی گەلەكەی روودەكاتە ناو كۆڕی تێكۆشان و وەكو گەنجێك لەگەلأ لاوانی هەرچوار پارچەی كوردستان دەست بەتێكۆشانی شۆڕشگێڕی دەكات، ئیتر لەكوێ كاروخەبات دیموكراتی هەبێت حسێن لەوێ ئامادەیە. كوڕان و كچانی رۆژهەڵات ئیتر بەفروانی لەناو تێكۆشاندا جێدەگرن و ئەو رۆحە گەنج و پڕ ووزەیەیان دەگاتە هەموو هەرێمەكانی وڵات، لەكاتێكدا داگیركەران و هێزە پیلانگێڕە نێودەوڵەتیەكان و كۆنەپەرستانی كورد، بە بەدیل كەوتنە دەستی بەڕێز ئۆجەلان وایان دانابوو كەئیتر ئەو بزووتنەوەیە كۆتای پێدێت. بەڵام ئەو رۆحە تازەیەی كەلاوانی رۆژهەڵات خستیانە ناو بزووتنەوەی ئازادیخواز، شۆڕشیان لەمەترسی لەناوچوون و گەڕانەوە دواوە رزگاركرد. بۆیە لاوانی رۆژهەڵات مۆڕالێكی نوێبوون بۆ بزووتنەوەی ئازادیخوازی كوردستان.
ئەو شەپۆڵە نوێ و گەنجەی كەلەرۆژهەڵات بەرەو تێكۆشانی ئازادی هاتبوو، دوای ماوەیەكی كەم لەئەزموونگرتن ئیتر بەرەو خۆبەرێكخستنی تایبەت چوو. ئیتر لەمەودوا "پەژاك" وەك هێزێكی نوێ لەگۆڕپانی سیاسی رۆژهەڵات بەئیرادەیەكی سەربەخۆی نەتەوەیی دەركەوتوو، توانی لەماوەیەكی كەمدا خۆی بۆ خەڵك بسەلمێنێت. بۆیە لەساڵی"2004" بەدواوە ئومێدێكی نوێ چەكەرەی كردو خەڵكیش باوەشی بۆ كردەوە. لەبەر ئەوەش بوو لەماوەی ئەو چەند ساڵەی رابردوو گووێبیستی چەندین چالاكی مێژووی بووین، چ لەتێكۆشانی گەریلای و چ لەتێكۆشانی زیندان و هەروەها لەتێكۆشانەكانی تری مەدەنی و سیاسی و جەماوەریدا.
ئەگەرچی بزووتنەوەی ئازادی كورد لەرۆژهەڵاتی وڵات لەهەموو بوارەكانی تێكۆشاندا گۆڕانێكی ریشەیی دروستكردوە، بەتایبەتی وەرچەرخانیشی لەخەباتی زینداندا كرد، ئیتر زیندان بۆتە خوێندنگای تێكۆشەرانی ئازادی، ئەنجامی ئەو خۆبەڕێكخستنەش گەورەترین مانگرتنی سەرتاسەری ئەنجامدرا لەساڵی"2008"، ئەو مانگرتنە سەلماندی كەگەلی كورد ئیتر كونجی زیندانیش دەكاتە گۆڕەپانێكی فرەوان بۆ تێكۆشان. هەرچەندە رژێمی داگیركەر دەستبەرداری كردەوەكانی نەبوو، بەڵام تۆكمە بوونی ئیرادەی زیندانیان هاوتەریب لەگەلأ خەباتی شاخ و سەرهەڵدانە جەماوەریەكان توانی یەكڕیزی ئەو بزووتنەوە گەنجە نیشانبدات.
كۆماری ئیسلامی دوای ئەوەی لەسیاسەتی تەسلیمگرتنی زیندانیان شكستی هێنا، سەیری كرد ئەو نەوەیەی ئێستا لەتێكۆشاندایە وەكو نەوەی رابردوو نییە، نەتەسلیم دەبێ و نەدەترسێ و نەكۆڵدەدات، بۆیە كەوتە ناو نزیكاتیەكی كۆنەپەرست و دڕندانە لەبەرامبەر زیندانیانی بێ چەك پەتی سێدارەی كردە چەكی ترسنۆكی.
جاری یەكەم لەمێژووی بزووتنەوەی ئازادیخوازی هاودەمدا كادیرانی لەسێدارە بدرێن، ئەویش یەكەم كەس حیكمەت حەسەن دەمیر بوو، دوای ئەوەی لەژێر ئەشكەنجەو سەرمای زستاندا قاچێكی لەدەستدەدات، بێ ئاگاداری پارێزەرو هیچ كەسێك لەیەكێك لەرۆژەكانی زستانی "2007"لەسێدارەیاندا. دوای ئەویش ئیحسان فەتاحیان كەلەرێكخستنەكانی كۆمەلەدابوو، پاشانیش لاوێكی وڵاتپارێز و بێ وەی باوكی دوو زارۆكی چاوگەش فەسیح یاسەمەنیان خستە ژێر پەتە ترسنۆكەكەیان.
سەرەڕای هەوڵە ئاشتی خوازانیەكانی بزاڤی كورد بەڵام كۆماری ئیسلامی لەكردەوە قێزەونە سێداریەكانی نەكەوتوو ئەمجارە چوار لاوی كوردی شۆڕشگێڕی خستە بەردەم قنارەو سێ كوڕ و كچێكی شۆڕگێڕی لەناوەندی پایتەختی زوڵمی تاراندا لەسێدارەدان، هاوڕێیان" شیرین، عەلی، فەرزاد و فرهاد" بوونە بوومەلەرزێك و لەناو رۆحە زوحاك ئاساكانی تاراندا هەژان و جیهان هەمووشی بەو كردەوەیە سەرسام بوو، زیندانیانیش لەراست ئەو ئیرادە پۆلاینەی چوار شۆڕشگێڕی كورد تووشی شۆك بوون، باوەڕدەكەم نەوە دوای نەوە دەبێ باسی قارەمانیەتی ئەو چوار دلێرە بكات. چونكە تائێستا نەبووە كەسێك كەبەرەو سێدارەبچێت و نوقڵ ببخشێتەوەو بەسروودی ئەی رەقیب و خۆی پەتی سێدارە بخاتە گەردەنی. ئەمە قارەمانیەتی ئەو مرۆڤانەیە كەلە پەتی سێدارە بڵندترن.
كاك حسێن یان بەنازناوەكەی تری هێمن، بەڕێكەوت لەهاوینی "2007" بەدیداری شادبووم، لەیەكەم یەكترناسینمانەوە هۆگری یەكتری بووین، من دڵخۆشبووم كەلاوێكی ورمێی بەوشێوە چالاك و بزێو و رۆشنبیرو زرنگە دەناسم، لەو تەمەنەدا سێ زمانی سەرەكی و سێ زارەوەی كوردی بەڕەوانی دەزانی، خوێندكارێكی باشی فەلسەفە و زانست و هۆگری شیعرو ئەدەبی كوردی، هەربەو هۆیەشەوە بوو نازناوی هێمنی شاعیری هەڵگرتبوو، حسێن دەیگووت بنەماڵەكەمان خۆشەویستی زۆریان هەیە بۆ شاعیرانی كورد بەتایبەت هێمن موكریانی، بۆیە منیش لەسەر داوای ئەوان نازناوی هێمنم بۆ خۆم هەڵبژارد. هێمن كەسێك بوو بەردەوام دەیویست نهێنی و دواین زانیاری لەلای ئەو بێت، بۆیەش لەهەموو كاتێكدا لەناو مشتومڕو گفتوگۆی چڕدابوو، خەمخۆرێكی ئازادی گەل و رۆحێكی گەورەی هەبوو لەعشق و خۆشەویستی و ئازادی بۆ وڵاتەكەی.
لەبەرواری دەستگیركردنی كاكە هێمنەوە تا ئەو رۆژەی لەزیندانی ورمێ گواستیانەوە بۆ شوێنێكی نادیار، بە ورەیەكی پۆلاینەوە سەرپەرشتی هاوڕیانی دەكرد و خەڵكی رزگاردەكرد لەهەوڵە تەسلیمكارو ورە روخێنەریەكانی جەلادانی زیندان. بەو هۆیەش بوو لەنیوەڕۆیەكی ئەم هاوینە زنگێكم بۆ هات بە ژمارەیەكی نەناسراو، دوای ئەحوالأ پرسین گوتیان كاك هێمن دەیەوێت قسەت لەگەلأ بكات، منیش لەخۆشیدا كەوتمە ناو شلەژانێكی سەیرەوە باوەڕم نەدەكرد لەزیندانەوە گوێبیستی دەنگی هێمن بم، بۆیە دوای كەمێك كە زنگم بۆی لێدایەوە وەك جاران بەدەم پێكەنینەوە ئەحواڵپرسی لێكردم وپرسیاری دۆستانی كرد، پێمگووت ئێمە خەمی ئێوەمانە نەوەك ئەو جەلادانە لەكارە خراپەكانی خۆیان بەردەوام بن و لەسێدارەتان بدەن، هێمن وتی خەمی ئێمەتان نەبێ ئێستا مێژوو بەدەستی ئێمەیە، ئەوان لەئێمە دەترسێن چونكە ئێمە شۆڕشگێڕو ئەوانیش جەلادی مەرگی مرۆڤ. دوای ئەو دیدارە ئیتر تەنها جارێكی تر دەرفەتی ئەحواڵ پرسینێكمان بۆ رێكەوت، ئیتر لەو رۆژەوە هەر چاوەڕێم، دەبێ كەی زەنگی تەلەفۆنێكم بۆ بێت و پێم بڵێن كاك هێمن دەیەوێت قسەت لەگەلأ بكات.
هاوڕێی خۆشەویستم دەزانم ئێستا لەناو سەرماو بەستەڵكی شاری ئاخوندەكان و لەبەرامبەر بێڕەحمی جەلادە كۆنەپەرستە فارس و عەجەم و شیعەگەرە ریشدرێژە كۆنەپەرستەكانی، ئێستا لەململانێدای لەگەلأ مەرگێكی داسەپاو، دەزانم ئێستا چاوەڕی پەتی سێدارە دەكەی، لەوانەشە لەسێدارەشیان دابیت، بەڵام باوەڕكە دەزانم كەتۆ لەپەتی سێدارە بەرزتری. ئەوەی لەكۆتایدا سەر دەكەوێت ئەو تێكۆشانەیە كە كاكە حسێن و هەموو ئاشقانی ئازادی رێبواری رێگاكەین. نەك ئاخوندەكان و ئەوانەی خۆیان
بەسیاسەتمەداری كورد دادەنێنن، بەڵام هێشتا لە ریشی مەلاكان دەترسێن.