خیانەت و پرسى دیكە

Sunday, 04/08/2013, 12:00

هیچ نەتەوەیەك بەقەدەر نەتەوەى كورد خاینى پێنەگەیاندوە لە مێژوى خۆیدا ، مێژوى ئێمە نەك مایەى شانازى نیە ، بگرە مایەى ئەوەیە سەرلەبەر دادگاى بكرێت، مرۆڤ بۆ ئەوەى لەم راستیە ساكارە بگات ، با بچێت شیعرەكانى ئەحمەدى خانى و حاجى قادرى كۆیى و مامەند كەركوكى و قانع و بێكەس بخوێنێتەوە.
مێژووى پڕ خیانەتى كورد واى كردوە كە ئەوەتى هەین نۆكەرو داردەستى بێگانە بین، هەربۆیە نەبوینەتە خاوەنى تاج و تەخت و بەخت، شانازى بە ئازایەتیشەوە دەكەین، ئاخر ئەگەر تۆزقاڵێك ئازایەتیمان تیابوایە دەبوایە دەوڵەت بوااین ، نەك تورك و فارس و عەرەب لە شوێنى ترەوە بێنین و بیكەینە كەڵەگاى خۆمان.
خیانەت لە نەوەكانى ئایندە دەكەین و سامانى ژێر زەوى ئەم وڵاتە بە هەرزان و تاڵان بە وڵاتانى تر دەفرۆشین و ئەوەش بە دەسكەوت دەزانین،
خیانەت لە پێشمەرگە دێرینەكان دەكەین و بە بڕێك پارە فریویان دەدەین و بەناوى ئەوان و شەهیدەكانیشەوە دەنگ كۆدەكەینەوە.
خیانەت لە مردوەكان دەكەین و بۆئەوەى لەكوردى بەرینەوەلەبرى ئەوانیش دەنگ دەدەین، تەنانەت لە برى مردوەكانیش بۆ ماوەیەكى دورو درێژ بەشە خۆراكى مانگانە وەردەگرین.
خیانەت لە پارچەیەكى جەستەمان دەكەین و لەبەر خاترى توركیا دەرگاى سنوریان بە روودا دادەخەین ، هەربەوەشەوە ناوەستین ، سەگ و تولەى دنیایان تێبەردەدەین، ئەمەش هەر بۆ ئەوەى مل بدەن بەوەى ببنە گوێ لەمستى ئێمە ، باسى كوردایەتى و ئەو شتانەش دەكەین.
خیانەت لە ئازادى دەكەین و شتێك ناو دەنەین ئازادى و لە سایەیدا دزى و تاڵان و ستەمكارى پیادەدەكەین.
خیانەت لەو سوێندە دەكەین كە لەكاتى وەرگرتنى پۆست و پلە وەرگرتنا دەیخۆین و یەكسەر پشت دەكەینە میللەت و روو دەكەینە گیرفان .
خیانەت لە كەركوك و ناوچە دابڕێنراوەكان دەكەین و بە خاك و خەڵكەوە دەیانفرۆشین و لەولاشەوە فرمێسكى تیمساحانەیان بۆ دەڕێژین.
باسى كۆنگرەى نەتەوەیى دەكەین و راپۆرت لەسەر یەكتر بۆ وڵاتە دراوسێكان و نەیارانى كورد دەنوسین.
ئێمە هەر بەسروشت خائینین، لەگەرمەى هەژارى و نەدارى و ئابڵوقەى ئابوریدا كەل و پەل و دانەوێڵەو خواردنمان دەشاردەوە بۆ ئەوەى بە گران بیدەینەوە بەهاوزمانى خۆمان .
شەڕى ناوخۆ خۆى خیانەت بوو، كەچى ئێمە لەشەڕى ناوخۆیشدا خیانەتمان لەیەكتر دەكرد، كە یەكێ دەكوژرا ئەوى تەنیشتى پێش ئەوەى لاشەكەى بباتە دواوە تفەنگەكەى دەبرد.
بەشێكى زۆر لە پیاوانى ئاینى ئێمە ، بۆ بڕێك پارە چاوپۆشى لە ستەمكارى دەكەن و بەناوى ئەوەشەوە كە دەسەڵات و حاكمى رۆژ گوێ لێگرتنیان ئەرك و بە گژا چونەوەیان گوناهە، كۆیلە دروست دەكەن لە كاتێكا خوا و پێغەمبەرەكەیان داواى ئەوەیان لێدەكەن كۆیلە ئازاد بكەن و مرۆڤى ئازاد پێبگەیەنن، ئەو پیاوە ئاینیانە تەنانەت لە ئاستى خوێن رشتنى خەڵكى سڤیا و بێچەكیشدا ، هەڵوێست وەرناگرن.
سەر لەبەرى مێژوى ئێمە ، ئێستاى ئێمە لیپاو لیپە لە خیانەت و ناجۆرى تەنانەت بڕواننە ناونانى ماركێت و بازاڕەكانمان ، بڕوانە جل و بەرگ لەبەر كردن و هەست و كەوتملن ، بڕوانن گوێ لە چ دەنگ و ئاوازێ دەگرین ، بڕوانن چى دەخۆین و چۆنى دەخۆین و چەندى خەسار دەكەین.
ئایە ئیتر كاتى ئەوە نیە ، سەر لەبەرى ئەم مێژووە ، رووە تاریكەكانى ئەم مێژووە، دادگاى بكرێت، یەكجار با ئازایەتى ئەوەمان تیا بێت نەفرەت لە كارو كردەوە ناشرینەكانى خۆمان بكەین، یەكجار با بەراستى داواى لێبوردن بكەین بۆ ئەوەى نەوەیەكى تەندروست و لێبوردە دروست بێت.