حەسەن نەسرولایەك... ژباشورێ كوردستانێ

Monday, 18/04/2011, 12:00

ئاشكرایە ئەڤ بارودوخێ ئالوز ونەسەقامگیریا باژێرێ هەلمەت وقوربانیێ وچەند باژێركەكێن دیترن سەرب پارێزگەها سلێمانیێ ڤەگرتین، بوویە جهێ داخێ لایێ هەموو هاوولاتیەكێ خوەدى شەرەف ودلسوزێ ئاخ وئالا ومێژوو ووەلاتێ كوردستانێ یاكو هەر ب درێژاهیا مێژووێ ژ بن دەستى وزورداریا دوژمنێت خوە دنالیت وهێشتا بریندارە وئەو دوژمنە تانوكە ژى دزیندى نە، مینا ئەژدەهایەكێ تەماشەى ڤێ پارچا ئازاد دكەن یاكو ب باشورێ كوردستانێ ئەم ب ناڤ دكەن وبوویە سەهم وترسەك بو دوژمنێت مە، چنكو دزانن باشور بێ باكور نابیت ودگەلدا روژئاڤا بێ روژهەلات نابیت وهوسا لەشێ كوردستانێ تەمام دبیت وبهەبوون وگەشەبووناوێ تەنا وئارام نابن ول نیازا هەر دەرفەتەكێ نە دیسان ڤێ پارچا ئازاد ژى ب داعویرن، ژبەركو دزانن بوویە بنگەهێ نەتەوەیى وهەموو كوردەك لهەر پارچەك وقورنتەكا جیهانێ بیت ب چرایێ ئازادیێ وشانسێ كوردان بو گەهشتن ب ئارمانجێت خوە دهەلسەنگینن وشانازیێ پێ دكەن.
لێ موخابن كو ئەڤ پێشهاتێت تازەیێن ڤێ دەڤەرا بناڤ ئەرەبى وفارسى بخوە ڤە گرتین كویێ بەرەڤ قوناغەكا تازەتر دچن وسیناریوێت دلخوشكەر هەموو كەس ولایەك هیڤى دكەن ودهێتە هەستكرن گوهورینێت بنەرەتى وتەواو دسیستەمێ سیاسیێ وان وەلاتێن دچارچوڤێ ڤێ دەڤەرامە ئیشارەت پێكرى بخوەڤە بگرن وهەروەسا هزر وبیركرنا تاكێ وان ژى بهێتە نویكرن ب وى شێوەى ئێدى تاكرەوى ونەقەبوولكرنا یێ بەرامبەر وریزگرتن بو بنەما ومافێن ژیانێ بو هەر تاك ومللەتەكێ لایێ وان دەستورێ ژیانێ بیت وئەم كورد ژى ئەگەر ب ئێكجارى ژى ب مافێن خوە یێن نەتەوەایەتى دچارچوڤێ كیانەكێ سیاسى دا شاد نەبین، لێ ئەڤ سەربوورا مە ل هەرێمێ كو زامنێ ب دەستڤەئینانا مافێن دیترێن نەتەوایەتى نە گەشێ پێ بكەین وقوناغەكا دیتر دەربازكەین بەرەڤ سەركەفتنێ ب ڤەگەراندنا دەڤەرێن دابرایى ب تایبەتى كەركوك یاكو بارزانیێ نەمر ب دلێ كوردستانێ ناڤكرى وهەر كەسەك دزانیت هەستیارى وگرنگیا دلى و ژدەستداناوێ چ واتەیەكە و تا ئیرو ژى دوژمنێت مە ب بوهانە وبوختانێت جودا هەولا دابریناوێ دكەن وخوپێشاندانێت ئاژاوەگێریا ئەرەبێت شوفینى ل 25ى شوباتێ ل باژێرێ كەركوكێ باشترین بەلگەنە كو ئەم كورد وكوردستانى دهوشیاربن وخوە دسەردانەبن ورژدیێ ل ئێك رێزیا ناف مالیاخوەبكەین.
دیسان دبێژم جهێ داخێ یە كو ژ روژا 17ى ڤێ هەیڤێ وتانوكە ئالوزى دبەردەوامن لبن پەردە وبوهانەێت جودا كو لایەنەكێ خوە ب "گورانخواز" راگەهاندیە هاندانا گەنجان دەن ڤێ سەربورێ ب شێوینن ول خەلكێ دلسوزێ كوردستانێ تێك بدەن وسنورێت یاسایێ شكاندینە و یێن ئازادیێ بەزاندینە وهەروەسا عورف نەرێتێت جڤاكێ مە یێ كوردى ژى بێ حورمەت كرینە ودل رەشى ورەش بینى وكەرب وكینەك ل ناڤ خەلكێ پارێزگەها سلێمانیێ جێگیركرینە وئەڤە لایێ وان سەركەفتن و پێشكەفتنە، چنكو دفەرهەنكاواندا بتنێ ژنافبرنا دەستكەفتێت بخوین وتەگوشینا مللەتێ مە هاتینە دەست توماركریە وئەوا ل دوهى ب شەرێ نافخو نەشیان بكەنە راستى ئیرو ب رێكا ئازراندنا شەقامێ سلێمانیێ ورێتنا خوینا گەنجێت مە هەولدەن جێبەجێ كەن ب وێ بوهانێ ل سلێمانیێ گەندەلى هەیە وخزمەت نەهاتیەكرن وخوە ژبیردكەن كو ئەو دبەرسیارێن وێ پاریزگەهێ بوون ژلایێ سیاسى وحكومى وپێتڤیە ل سەروێ چەندێ ئەو بێنە دادگایى ونەفرەتكرن.
لێ ب هزرامن ئەم دلخوش بووین كو دێ كونترولا ڤێ رەوشا مەترسیدارهێتەكرن، چنكو چەند ئەو لایەن رژدبن بو تێكدانێ، مە ماموستاێت بەریزێت ئاینى هەنە، دلسوزێت ڤى خاك و وەلاتى دێ مایتیكرنێ كەن وهەرچەندە هەولدانێت وان ب سوپاسى ڤە دبەردەوامن، بەلێ ئەوا ئەز وهەروەسا شەقامێ كوردستانى توشى دلتەنگیێ كرى وهەست ب مەترسیێ كرى وتارا (مەلا مەحمەد نەسرولا)یى بوو ل سەرایێ ئازادیێ ل سلێمانیێ كو نێڤژا روژ ئەینێ ل وێرێ كرن وبێ كو هزر بكەت یان هەست ب بەرپرسیارتیێ بەرامبەر خوادیى ومللەتى وروخسەتا شەرعى هەبیت فەتەوەیا جیهادێ دا و وپاش دوعاكرن لسەر دەستهەلاتێ ب سەركەڤن وداخازكر بەردەوام بن لسەر خوپێشاندناخوە تاكو داخازێت وان جێبەجێ بن ئەڤجا روژەك بیت یان هەیڤ وسالەك بیت وداخازیێت وان ژى ئاشكرانە هەر ئەو خالن یێن بەیانناما بزوتنەوەیا بناڤ گورانخواز ل 29كانونا دووێ راگەهاندین وبتنێ ب ژنافچوونا هەرێمێ ودەستكەفتیێت وێ رازى دبن، دیارە ئەڤ ماموستایێ جهێ داخێ یە بەرێز ل شوونا دوعا بو كەركوكێ بكەت وهاندنا كوردا وحكومەتا هەرێمێ بكەت ل هەوار خەلكێ دلێ كوردستانێ بچن ولسەر بەعسیان ب سەركەڤن، هاریكاریا بەعسیان دكەت وگەنج وخەلك وحكومەتا هەرێمێ ب سلێمانیێ ڤە مژوویل دكەت داكو دەرفەت ژدەست بەعسى وشوفێنیان نەچیت، دیارە (مەلا مەحمەد نەسرولا)یێ مە گەلەك داخبارێ (حەسەن نەسرولا)یێ باشورێ لوبنانێ یە یێ كو بوویە بەنجەشێر دلەشێ لوبنانیاندا و وەنەكریە وەلاتێ لوبنانێ ئارام وسەقامگیر ببیت ول شوونا خزمەتا لوبنانێ بكەت ئەجینداێت ئیرانێ ب رێڤەدبیت ول شوونا پروسێسا گەشەپێدانێ ژهەموو لایەكێ پێشڤەبەت هەر ماوەیەكى جارەكێ توشى كارەسات ونسكویا دكەت وب هەیڤا خەلك ل بەیروتێ كومكرن تاكو ئێدى لایەنگرێت خوە ژى بێ زاركرین، ب هزرامن ئێدى ماموستایێن بەرێزێن ئاینى ژهەمى ئاینەكى (موسلمان، مەسیحى ، ئێزدى،...) رولێ وانە وبەرامبەر بەرپرسیاریەكا خودایى ومێژووینە بەرسڤا ڤى ماموستایى بدەن ورێكێ ل فیتنەگێریى بكرن وسنورەكى بوئاژاوەگێریێ بدانن، چنكو هوین بو مللەتى مینا "خوێنە" ئەگەر هوین خرابین واتە مللەت خراببوو وبلا ئێدى دەرفەت بو (نەسرولا)یان نەبیت ب ناڤێ ئاینى تێكدانێ وئەجینداێت دوژمنان برێڤەبەن وسوپاس بوخودێ مللەتێ مە ئایین رێزن ب تایبەت گەنج رێزێ ل ئاخفتنا هەوەدێ گرن.
فارس عیسى خێلەخى-زاخو
هاتیە بەلاڤكرن دروژناما ئەڤرو، هژمارا روژا 27ێ شوباتى 2011ى،ل12.