كورد لە ئاسیا سێڵیشدا بووە پلە دوو!
Sunday, 04/03/2012, 12:00
دوای 80 ساڵ بەسەر دامەزراندنی عیراقدا كە بە زەبر و زۆرەملێ كورد كرایە پلە دوو، كۆمەڵێ شۆڕش و راپەرین لەپێناو راگرتنی هاوسەنگی نێوان كورد و عەرەب لە عیراقدا ئەنجام دران، تا كورد و عەرەب یەكسان بن و عەرەب وەك پلە یەك و كوردیش وەك پلە دوو دانەنرێ!.
ئەوەی جێگەی سەرسوڕمانە، كۆمپانیایەكی زەبەلاحی كوردی كە بارەگای لە كوردستانە و زۆربەی بەشداربوەكانیشی هەر كوردن، بە خشكەیی بۆ خاترانەی چاوی چەند عەرەبێكی بەشداربوی ئاسیاسێڵدا، كورد كرایە پلە دوو! بۆ نمونە
- كاتێ پەیوەندی بە ئاسیا سێڵەوە ئەكەیت، پێت ئەڵێ: بۆ زمانی عەرەبی ژمارە 1 لێ بدە و بۆ زمانی كوردیش ژمارە 2.
- كاتێ پەیوەندی بە كەسێكەوە ئەكەیت و مۆبایلەكەی داخرا بێ، سەرەتا بە عەرەبی و دواتر بە كوردی وەڵام ئەداتەوە!.
- كاتێ دەتەوێ زمانەكان هەڵببژێری، زمانی عەرەبی ژمارە 1 و زمانی كوردی ژمارە 2.
لە زۆر شتی تریشدا عەرەبی خراوەتە پێش كورد، باشە ئەپرسم ئەگەر زۆرینەی بەشداربوەكان كورد بن، بۆچی ئەبێ جارێكیتر عەرەب پلە یەك و كورد پلە دوو بێ؟. یان بەلایەنی كەمەوە، لەناو جەرگەی هەرێمی كوردستان كە جگە لە كۆمەڵێ خێزانی عەرەب، نزیكەی 97%ی دانیشتوانەكەی كوردن، بۆ ئەبێ لێرەش سیگناڵەكانی ئاسیا سێڵ عەرەبی بێت؟.
شەرمێكی گەورەیە بۆ كۆمپانیای ئاسیا سێڵ كە سوكایەتی بە كورد بكات و جارێكیتر بیخاتەوە خانەی پلە دووەوە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
