وەزارەتی جانتا رەشەكە

Monday, 04/06/2012, 12:00

ساڵانێك دەیانوت: دروستكردنی حزب بۆتە كۆمپانیای بازرگانی و وەك جانتای دۆلار هەڵگر بەدەست (سكرتێر، سەرۆك، ئەمیر، ئەمیندار، رێكخەر، رێبەر)ی حزبەكەوەیە و كەسی یەكەم كون فەیەكونە و هەموو شتە و هەموو كارەی حزبە.
ساڵانێك دەیانوت: دروستكردنی رێكخراو بە ناوی قەبە و كۆمەڵی مەدەنی و ئەم چین و ئەو توێژ، باشترین جۆری كۆمپانیای بازرگانییە بۆ گیرفان پڕ كردن و خۆدەوڵەمەند كردن و خۆدەرخستن و سنگ دەرپەڕاندن.
ئێستاش ساڵانێكە دەڵێن: ئەم پەتایە حكومەتی هەرێمیشی گرتۆتەوە و لە سێ كابینەیا وەزارەتێكی جانتا رەش هەیە، جانتایەكی رەش بە دەست پیاوێكی سەر سپییەوە.
من لە ناوەرۆكا لەگەڵ بەرهەمهێنانی نەوت و بە خۆماڵی كردنی ئەو سامانە سروشتییەم، بەس بە مەرجێك بۆ خزمەتی هاوڵاتیان و دانیشتوانی وڵاتەكە بێت و دادپەروەرانە داهاتەكەی دابەش بكرێت و بەرپرسیارانە مامەڵەی لەگەڵ بكرێت. چونكە ئەو سامانە سروشتییە پەیوەندیدارە تەنانەت بە داهاتووی نەوەی نەتەوەیەكەوە و موڵكی تاكەكەس و تاكەس حزب، یان فرە كەس و فرە حزبێكی كەمینە نییە.
وەزارەتێك ماوەی 7 ساڵ بێ، هەیكەلی وەزارەتەكەی رێكنەخرابێت، لەپایتەخت بینایەی تایبەت بە خۆی نەبێت و لە ژوورێكی ئەنجوومەنی وەزیراندا بێت، لە پارێزگاكانی هەرێم بەڕێوەبەرایەتی گشتی نەبێت و هەمە كارە و هەموو شت پیرەمێردێك و جانتاكەی بێت!.
ئەو پیرە مێردە یاسای وەزارەتەكەی مراندبێت و هیچكام لە بڕگەكانی جێبەجێ نەكردبێت كە تایبەتە بە دامەزراندنی كۆمپانیای كوردستانی بۆ گەڕان بە دوای نەوت و دەرهێنانی نەوت. هیچ ژمارە حیسابییەكی شەفافی نەبێت بۆ داهاتی نەوەتەكە. سیاسەتی پترۆڵ دۆلار جێبەجێ نەكات و نەك میللەت، پەرلەمانیش نەزانێ چۆن گرێبەست كراوە و لەگەڵ كێ كراوە و چەند نەوت دەفرۆشێت و كام پێكهاتەی دەفرۆشێت و داهاتی چەندە و داهاتەكە بۆ كوێ دەچێت و لە چیدا خەرج دەكرێ؟ ئەرێ ئەگەر ئەمە وەزارەتی جانتا رەشەكە نەبێ ئەی چییە؟
ترسم لەوە هەیە رۆژێك گوێی شەیتان كەڕ بێ، ئەو كابرایە خوا نەكردە لە ترۆمبێلێك، لە تەیارەیەك، دەعمێك، وەرگەڕانێك روویدا، ئەوسا ئەم حكومەت و نیشتمان و پەرلەمانە بەسزمانە و خەڵكە چی بكات؟
چۆن كۆتی ئەو جانتا رەشەی پیاوە سەر سپییەكە بكاتەوە؟