کۆمەڵگای خەمناکە یان کۆمه‌ڵگایەکی زیندوو ؟
Thursday, 11/09/2014, 12:00
2129 بینراوە
کۆڵۆنیالیزمی کۆن بە ئامرازی نۆی
ناتۆ بەرامبەر بە روسیاو چین
لەناو گرفتە قوڵەکانی خۆرهەڵاتدا دەستەڵاتی کورد ڕوڵی دارده‌ست ده‌بینێت
گەلێک بترسێت لە گۆڕانکاریی لە چاڵی دیکتاتۆرەکاندا دەمێنێتەوە
-------------------------------------------
دژی ڕێکخراوی داعش بە تایبەتی لە عێراق و سوریا، باراک ئۆباما سەرۆکی وڵاته یه‌کگرتووه‌کانی ئه‌مریکا شەوی 05/09/2014 لە "ویلز" لە کۆبوونەوەی "ناتۆ"دا هاوپەیمانییه‌کی سه‌ربازیی ئه‌مه‌ریکیی ئه‌وروپیی دیاری کرد که پێکهاتبوو لە 10 ئەندامی ناتۆ: ئه‌مریکا، ئه‌ڵمانیا، فرەنسا، بەریتانیا، ئه‌وسترالیا، کەنەدا، ئیتالیا، دانمارک، پۆڵۆنیاو تورکیا. دیسان رۆڵێکی تایبەتی دایەوە بە تورکیا لە کوردستان، عێراق وسوریا.
لە هەمان کاتدا سکرتێری گشتیی ناتۆ "ئەندرز فوگ راسموسن"، ئامادەیی ده‌ربڕی دژ بە روسیا له باره‌ی گرفتی ئۆکرانیاو هه‌روه‌ها دامەزراندنی هێزێکی هەمیشە ئامادە کە بنکه‌کەی لە ئەوروپای خۆرهەڵات بێت.
بزافی "ناتۆ" لە سەر ئەو دوو ته‌وه‌ره، دەریدەخات کە جەنگی سەپاندنی دەستەڵات به‌سه‌ر ئه‌و هەرێمانه‌دا که دەوڵەمەندن بە سەرچاوەکانی وزە نەک هەر بەردەوامە، بەڵکو کەوتۆته رادەیەکی مەترسیدارەوە بۆ ئاشتیی وهێمنیى گشتیی مرۆڤایەتیی.
دەوڵەتەکانی ناتۆ لە ژێر فشاری گرفتی دارایی و رامیاریی قوڵدا، بەرەو کۆڵۆنیالیزمی کۆن دەڕۆن بەڵام بە ئامرازی نۆی. جارێکی تر کۆمەڵگای مرۆڤایەتیی گەڕایەوە بەرەو سیستێمی جیهانی دوو جەمسەر. ناتۆ دژی روسیا وچین.
هەبوونی هێزەکانی ناتۆ لە کوردستان کە رۆژانە لە زیادبوونە، ئەڵمانیا بۆ یەکەم جار پاش جەنگی جیهانی دووەم، هیزی چەکداری خۆی دەنێرێت بۆ کوردستان. لە ناو ئەم گرفتە قوڵانەی خۆرهەڵاتی ناوەڕاستدا دەستەڵاتی کلیپتوکراتی کورد بە ئه‌قڵی کوێخای گوند، به سیسته‌مێکی شکست وموفلیس ڕوڵی دارده‌ست ده‌بینێت. ئەو دەرفەتەی کە ئه‌مریکا بە خۆڕایی پێی دابوون (23)ی ساڵی خایاند، خەریکی بەرژەوەندیی بنەماڵەیی بوون. ئاستی بیرکردنەوەی سیاسییان بە هیچ شێوەیەک لە بینینی لوتی خۆیان دەرباز نەبوو. لە باره‌ی ئامادەیی دارایی و سوپایی بۆ نزیکەی 6 ملیۆن کەس، ده‌بینین کاتێک کە بەغداد موچەی هەرێمی وەستاند و هێزەکانی "داعش" هاتن کلیپتوکراتی کورد که‌وتنه چ جیهانێکه‌وه!
بۆ ئەوەی سودمەندبین لە هەلومەرجی تازەی ملانێی جیهانیی، کۆمەڵگای کوردستان دەبێت خۆی رزگار بکات لەم ئەقڵەی ئێستای. ئەوا زیاتر لە 60 ساڵه ئەم ئه‌قڵه‌ی دەستەڵاتی کلیپتوکراتی ئێستا، گەلی کوردی خستۆتە چاڵێکی فکریی قوڵه‌وه. بەبێ ده‌رچوون لەم چاڵە ناتوانین هەنگاو بنێین بەرەو ژیانی دیموکراسیی، ئازادیی بیروڕا، رێز لە مافی تاکە کەس، پێشکەوتنی کۆمەڵگا، رێکخراوی مەدەنیی، لە بواری کولتوریی، سیاسیی، ئابوریی، سەربەخۆیی و دادپەروەرییدا.
لە بەرچاومانە ئەوی بە سەر جیهانی عەرەبییدا هاتووە لە کارەسات، بە درێژایی چاخی رابردو تا ئێستا، هۆیه‌که‌ی ئەگەرێتەوە بۆ کەوتنی گەلانی عەرەب لەناو چاڵی دیکتاتۆرەکان و دەستەڵاتی بنەماڵەی کلیپتۆکراتدا. لەناو ئەم چاڵەدا نوێ کردنەوەی بیروڕا نییە، تاکەکەس هەبوونی نییە، دەستەڵات بەرپرس نییە لە هیچ تاوانێک. لەناو ئەم چاڵە قوڵەدا، زیاتر لە 22 دەوڵەت و زیاتر لە 200 ملیۆن عەرەب، هیچ کێشێکیان لە ئاستی نیودەوڵەتییدا نییە، رۆژانە سوکایەتیان پێ ئەکرێت. دەوڵەتی شکست و پاشکەوتوو دادەمزرێن. رەوشەنبیر، دوکتور، ئەندازیار، زانایان لە بواری نەوەویی و تەکنۆلۆجیی و تەندروستییدا .. هتد هەڵدێن بۆ هەندەران. لە ناو کۆمەڵگادا هەلومەرجێکی کولتوریی ساز دەبێت بۆ لەدایکبوونی رێکخراوی توندڕوی وەک (القاعدە) و (داعش) و ئەبن بە دەسەڵاتدار و خۆیان دەسەپێنن بەسەر کۆمەڵگادا.
ئەو کارەساتەی بە سەر دانیشتوانی شەنگالدا هات، کلیپتوکراتی کورد بەرپرسیارە لێی، کارەساتی شەنگال جەوهەری کلیپتوکراتی کوردی دەرخستەوە بۆ سەد جارە.
گەلی زیندو ناترسێت لە هەوڵدان بۆ گۆڕانکاریی بنەڕەتیی. ئەو گەلەی بترسێت لە گۆڕانکاریی هەر لە ناو چاڵی دیکتاتۆرەکاندا دەمێنێتەوە.
