نامه‌یه‌ک بۆ مام جه‌لال سه‌باره‌ت به وتاره‌که‌ی له پلینیۆمی ئه‌م ساڵدا
Saturday, 26/12/2009, 12:00
وه‌ک یاسازانێک و که‌سایه‌تییه‌ک، که چه‌نده‌ها ساڵه له بواری سیاسه‌ت و یاسادا کار ده‌کات، ده‌بووایه له‌م پلینیۆمه‌دا جگه له میوانێکی شه‌ره‌فی کۆبوونه‌وه‌که هیچ ڕۆڵێکی ترت نه‌بینییایه به حوکمی ئه‌وه‌ی، که ئێستا (سه‌رۆکی کۆماری عێراقی) به‌ناو فیدراڵین. نامه‌وێت زۆر بچمه ناو بنه‌ما یاساییه‌کانی ئه‌م بۆچوونه‌م، به‌ڵام لام ئاشکرایه، که باشتر له به‌نده ده‌زانن که سه‌رۆک کۆمار هه‌میشه و له هه‌موو وڵاتانی جیهاندا (بۆ سه‌رتاپای گه‌له و ده‌بێت بێلایه‌نانه کار بکات و هیچ چالاکییه‌کی سیاسی و لایه‌نگرییانه‌ی نه‌بێت)، به‌ڵام لاموایه به‌ڕێزت له‌سه‌روو یاسا و ده‌سه‌ڵاته‌کانه‌وه‌یت.
به‌هه‌ر حاڵ هه‌ر خوێنه‌رێک ئه‌م وتاره به‌نرخه !ده‌خوێنێته‌وه له خۆی ده‌پرسێت: ئایا به‌درێژایی مێژووی خه‌باتی کاک نه‌وشیروان هیچ شتێکی به‌جێ هێناوه، که شایه‌نی باس و پێزانین بێت؟ ئایا چ ڕۆژێک له ڕۆژان کاک نه‌وشیروان ته‌نها هه‌نگاوێکی ڕاستی ناوه له ناو یه‌کێتییدا؟ که‌سایه‌تییه‌کی ئاوا، که خاوه‌نی بڕیار و هه‌ڵوێستی هه‌ڵه‌ی خۆیه‌تی، بۆچی له‌ناو کوردستاندا به‌م شێوه‌یه ناوبانگی ده‌رکردوه؟ ئایا ئه‌م هه‌موو خه‌ڵکه‌ی، که پشتگیری له کاک نه‌وشیروان و بزوتنه‌وه‌که‌ی ده‌که‌ن ئایا هه‌موویان نه‌زانن و ئاگایان له شته‌کان نییه؟
ئه‌و وتاره‌ی که بۆ تۆ ئاماده‌کراوه، که له پلینیۆمه‌که‌ی یه‌کێتیدا بیخوێنیته‌وه، ده‌بووایه نووسه‌ر ڕێی به‌هه‌ندێک هه‌ڵه نه‌دابه‌یه تێپه‌ڕبن. له لایه‌که‌وه کاکه‌ی نووسه‌ر له بری وشه‌ی (سۆشیال) لنه‌وقوچی کردۆته‌وه و به (شۆسیال) ناوی بردووه، که ئه‌مه‌ش ووشه‌یه‌کی نوێیه له فه‌رهه‌نگی ڕامیاری یه‌کێتی نیشتمانی کوردستاندا. له لایه‌کی تره‌وه گه‌ر نووسه‌ری ئه‌م ئه‌م ووتاره بیت باسی سکرتێری یه‌کێتی نیشتمانی ناکه‌یت وه‌ک که‌سی سێهه‌م که خۆتیت و له سه‌رتاپای وتاره‌که‌دا گه‌ر بۆ جارێکیش بێت ناوی ئه‌وه‌ت نه‌بردووه که سکرتێری یه‌کێتی جه‌نابتان و که‌سایه‌تییه‌کی تر نییه که ده‌ر بێت له خوێنه‌ری ووتاره‌که. ئه‌مه‌ش هۆکاره‌که‌ی ئه‌وه‌یه، که نووسه‌ر له کاتی نووسیندا ئه‌وه‌ی له بیر کردووه، که به‌ڕێزتان ئه‌و که‌سه‌ن، که ووتاره‌که ده‌خوێننه‌وه و نه‌ک که‌سێکی تر.
به‌ڵام له هه‌مووی گرنگتر ئه‌وه‌یه، که له‌م وتاره‌دا جیهان به دوو پۆڵ ده‌بینن: ڕه‌ش و سپی، باش و خراپ، نیشتمانپه‌روه‌ر و دوژمنان، فریشته و شه‌یتان وه له نێوان ئه‌م دوو پۆڵه‌دا هیچ شتێکی تر نییه. به تێڕوانینی تۆ لایه‌نێک هه‌یه له ناو یه‌کێتیدا که بریتین له لایه‌نی فریشته‌کان: کاک کۆسره‌ت وکاک عومه‌ر فه‌تاح و و و . . . . . له لایه‌کی تر لایه‌نی تێکده‌ر و هه‌ڵه‌داره‌کانی ناو یه‌کێتین ،که ئه‌گه‌ر هه‌نگاوێکیش بێت به ڕاست به درێژایی مێژوویان نه‌یانناوه.
هه‌زار حه‌یف و مه‌خابن که ئه‌م ووشانه له سه‌رۆکی کۆماری عێراقی فیدراڵ ده‌بیستین، که ئه‌رکی سه‌رشانی پۆسته‌که‌ی خۆی له‌بیر کردووه و هاتۆته ناو شه‌قامی کێبڕکێی سیاسی وڵاته‌که و دژ به ته‌نها که‌سایه‌تییه‌ک قسه ده‌کات، که پێکه‌وه به درێژایی چه‌نده‌ها ساڵ له ناو یه‌ک سه‌نگه‌ردا پێشمه‌رگه‌یه‌کی تێکۆشه‌ر و هه‌وڵده‌ر بوون، که ئه‌م هه‌ڵسه‌نگاندنه نه کاری تۆیه وه‌ک سه‌رۆک کۆمارێک و نه له‌گه‌ڵ ئه‌و پۆسته‌شدا ده‌گونجێت، که ئێستا هه‌تانه. جگه له‌وه ئایا له خۆتان و سه‌رتاپای هه‌ڵبژارده‌ی فریشته‌کانی ناو یه‌کێتیتان پرسیوه بۆچی به درێژایی ئه‌م هه‌موو ساڵه هه‌ڵه‌کانی کاک نه‌وشیروان و تاقمه‌که‌یتان له ناو یه‌کێتیدا به شاراوه‌یی هێشتۆته‌وه و به بێ ئه‌وه‌ی بتوانن دوو ووشه له‌سه‌ری ده‌رببڕن؟ ئایا گه‌ر بارودۆخی پێشووی مه‌کته‌بی سیاسی ئاوا بووبێت، ئه‌ی ئێستا چه‌ند هه‌واڵ و ڕووداو و کاری تر هه‌یه که به هه‌مان شێوه خه‌فه‌خانی ده‌که‌ن و نایه‌ڵن بڵاوببێته‌وه؟ گه‌ر کاک نه‌وشیروان هه‌موو ئام کاره ناهه‌موارانه‌ی به‌جێ هێنابێت، ئه‌ی جه‌نابتان و سه‌رتاپای مه‌کته‌بی سیاسی شوێنتان چییه له‌و بڕیارانه و له بێده‌نگبوون له ئه‌نجامه‌کانی؟ گه‌ر له پاش هه‌ڵه‌ی یه‌که‌م و دووهه‌م و سێهه‌م بێده‌نگیتان و مه‌کته‌بی سیاسی به‌رده‌وام بووبێت، ئه‌وا ئه‌مه ده‌رده‌خات که‌ئێوه‌ش شه‌ریکی بڕیاره‌کانی کاک نه‌وشیروان بوون گه‌ر ده‌رئه‌نجامه‌کانی پۆزه‌تیڤ یان نێگه‌تیڤ بووبن و هیوادارام ئه‌م شه‌ڕه په‌ڕۆیه‌ی، که یه‌کێتی نیشتمانی کوردستان هه‌ڵیگرتووه نه‌گاته ڕاده‌یه‌ک،که گه‌ر شتێک له ئه‌فریقیا یان ئه‌مریکای باشوور ڕوبدات، به‌سه‌ر کاک نه‌وشیروان و بزوتنه‌وه‌ی گۆڕاندا بهێنن. چونکه گه‌ر کاره‌ساتی هه‌ڵه‌بجه ئێستا له تێڕوانینی به‌ڕێزتاندا هۆکاره‌که‌ی کاک نه‌وشیروان بووبێت، جا نازانم له هه‌موو ئه‌م بڕیارانه‌دا و هه‌موو ئه‌م هه‌ڵانه‌دا به‌ڕێزتان له کوێ بوون و کاتتان به چییه‌وه به‌سه‌رده‌برد.
جیهان جیهانێکی نادوو سیستێمییه.واتا جیهان ته‌نها ڕه‌ش و سپی نییه، ته‌نها باش و خراپ نییه، به‌ڵکو جیهانێکی تێکه‌ڵه‌یه و ڕه‌فتاروهه‌ڵوێسته مرۆڤایه‌تییه‌کان ناتوانین ته‌نها به ڕه‌ش یان به سپی هه‌ڵبسه‌نگێنین و به‌ڵکو زۆر ڕووداو و دیارده هه‌ن که هه‌ردوو پۆڵه‌که‌ی تیادایه و هه‌ڵسانگاندنی مێژووی سه‌رکرده‌یه‌کی کورد به‌م شێوه‌یه له لایه‌ن به‌ڕێزتانه‌وه تێڕوانینێکی زۆر هه‌ڵه و لایه‌نگرانه و نابینینیانه‌یتان ده‌رده‌خات، که ئه‌گه‌ر چی وه‌ک ڕێزێک بۆ ئه‌و هه‌موو ساڵانه‌ی کاری پێکه‌وه‌ییتان ده‌بووایه چه‌ند خاڵێکی تری پۆزه‌تیڤت بخستایه سه‌ر ووتاره‌که‌ت هه‌ڵسانگاندنه‌که‌ت شێوازێکی تری وه‌ربگرتایه بۆ ئه‌وه‌ی نه‌ک ته‌نها خه‌باتی سیاسی کاک نه‌وشیروان ناشرین نه‌که‌ن، به‌ڵکو خه‌بات و هه‌ڵوێستی خۆشتان نه‌خه‌نه ناو چاڵی هه‌ڵه و بێده‌نگوون له هه‌ڵه چونکه هه‌ڵسه‌نگاندنێکی له‌م شێوه‌یه‌دا وێنه‌ی به‌ڕێزتان له نالێپرسینه‌وه و بازدان به‌سه‌ر هه‌ڵه‌کاندا ده‌رده‌خات، که به درێژایی چه‌نده‌ها ساڵ ئه‌م ڕاستییانه‌تان له گه‌ل و سه‌رتاپای ئه‌ندامانی یه‌کێتی شاردۆته‌وه‌و واتا ئێستاش هه‌ر ده‌توانن به هه‌مان شێوه گه‌ل و ئه‌ندامان وه‌ک پێشوو چه‌واشه بکه‌ن.که ئه‌مه‌ش وێنه‌یه‌کی جوان نییه، که سه‌باره‌ت به خۆتان و یه‌کێتی پیشانی ده‌ده‌ن.
هیوادارم جارێکی تر گه‌ر کاکه‌ی نووسه‌ر نووسراێکت بۆ ئاماده بکات ئه‌وا زیاتر ووردتر و ژیرانه‌تر و واقیعیانه‌تر شته‌کان هه‌ڵبسه‌نگێنێت و به‌ر له‌وه‌ی دێڕه‌کان بنووسێت با بیر له نێوان دێڕه‌کان بکاته‌وه و بۆ ئه‌وه‌ی ئه‌و داره‌ی، که له‌سه‌ری خه‌ڵکیدا ده‌یه‌وێت بیشکێنێته‌وه، سه‌رو پۆته‌ڵاکی یه‌کێتیش نه‌گرێته‌وه.
تێبینی: داوا لێبوردن له کاکی نووسه‌ر ده‌که‌ین ووشه‌ی به‌رێز بۆ جه‌لالمان لێکردۆته‌وه ، چونکه به کورتی ئه‌و جه‌لاله بێرێزه نه‌ک هه‌رئه‌وه‌نده به‌ڵکو گه‌نده‌ڵ و خیانه‌تکاره ، بۆیه ئێمه له کوردستانپۆست رێز له‌و جۆره خیانه‌تکار و گه‌نده‌ڵانه ناگرین.
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
