ئۆجه‌لان : من ده‌رفه‌ت به هیچ کهسێک ناده‌م، یاری به به‌ها و پرنسیپه‌کانم بكات
Saturday, 23/01/2010, 12:00
رێبه‌ری گه‌لی کورد عه‌بدوڵڵا ئۆجه‌لان له دیداری حه‌فتانه‌ی خۆیدا رایگه‌یاند که، ئه‌وان به‌رده‌وامن له بایکۆتکردنی دیداره هاوبه‌شه‌کانی نێوان گیراوانی زیندانی ئیمرالی، وه‌کو ناره‌زایه‌تی ده‌ربڕینێک دژ به ڕه‌فتاری نادادوه‌رانه‌ی به‌رێوه‌به‌رانی زیندان.
ئۆجه‌لان گوتی: ماوه‌ی دیداری ئه‌و له‌گه‌ڵ گیراوانی دیکه که یه‌ک کاتژمێره، بۆ 50 خوله‌ک که‌م کراوه‌ته‌وه.
ئۆجه‌لان دژ به‌وه که مافه بنه‌ره‌تیه‌کانی ده‌کرێته بابه‌تی سه‌ودا و مامه‌ڵه، به توندی ناره‌زایی ده‌ربری و گوتی: من ده‌رفه‌ت به هیچ کهسێک ناده‌م که یاری به به‌ها و پرینسیپه‌کانم بکات.
ڕێبه‌ری گه‌لی کورد بانگی له ده‌وڵه‌تی تورک کرد که به جدی هه‌ڵسوکه‌وت بکات.
رێبه‌ری گه‌لی کورد عه‌بدوڵلا ئۆجه‌لان له دیداری چوارشه‌ممه‌ی رابردوو له‌گه‌ل پارێزه‌رانی به‌م شێوه‌یه باس له ره‌وشی زیندانه‌که کرد و گوتی: ئه‌وان به‌رده‌وامن له سه‌ر چالاکی بایکۆتکردنی دیداری هاوبه‌شی گیراوان ، وه‌ک ده‌زانرێت ماوه‌ی دیداره‌کان له یه‌ک هه‌فته‌دا10سه‌عات بوو ، به‌ڵام ته‌نیا ده‌رفه‌تی ئه‌وه‌یان ده‌دا که یه‌ک کاتژمێر یه‌کتر ببینن، ئه‌نجامنه‌دانی ئه‌و جۆره دیدارانه بۆ من کێشه نیه، چونکه من له‌سه‌ر دۆخی ته‌نیایی راهاتووم، ئه‌وه‌تا ماوه‌ی 11ساڵه من به ته‌نیا له‌و شوێنه ژیان به سه‌ر ده‌به‌م ،من به‌رگه‌ی ئه‌و دۆخه ده‌گرم ، به‌ڵام به‌زه‌ییم به هه‌ڤالانی دیکه‌دا دێته‌وه، حه‌ییفه که دووچاری ئه‌و ره‌وشه کراونهته‌وه، من دڵنیا نیم له‌وه‌ی که تا چ راده‌یه‌ک ده‌توانن خۆراگری بکه‌ن له به‌رامبه‌ر دۆخێکی وادا ، له دوا دیداری هاوبه‌شی نێوانماندا ئه‌و سه‌عاته‌شیان بۆ 50 خوله‌ک دایانبه‌زاند ، له هه‌لومه‌رجێکی وادا به‌رده‌وامبوونی ئه‌و جۆره دیدارانه بێ واتان، بۆیه بریارمان دا که ئه‌و دیدارانه بایکۆت بکه‌ین، ئێمه لێره نه‌ک ته‌نیا داوای هیچ شتێکی زیاد بۆ خۆمان ناکه‌ین ، به‌ڵکو داواکارین که به پێی یاساکانی خۆیان هه‌ڵسوکه‌وت بکه‌ن ، مایه‌ی سه‌رسووڕمانه که چه‌ند ساکارانه ره‌فتار ده‌که‌ن و رێز له یاساکانی خۆشیان ناگرن،به‌ڵام داوامان لێده‌که‌ن که رێز له‌و یاسایانه بگرین.
ئۆجه‌لان به پێداگیریه‌وه گوتی: که‌س ناتوانێت سه‌وداومامه‌ڵه به مافه‌کانی ئه‌و بکات و داوای له ده‌وڵه‌ت کرد که ره‌فتاری جدی بنوێنێت و گوتی: هه‌رگیز بێده‌نگ نابێت به‌رامبه‌ر به‌وه‌ی که یاری به به‌ها و پرنسیپهکانی بکرێت و به‌م شێوه‌یه درێژه‌ی به قسه‌کانیدا: ماوه‌یه‌کی کورت به‌ر له‌ئێستا چاوم به به‌رێوه‌به‌ری زیندانه‌که که‌وت و داوای لێكردم که ئه‌گه‌ر بێده‌نگ بم ، جیهازێکی ته‌له‌ڤزیۆنم بۆ دێنێت، به واتایه‌کی دیکه ده‌یانگوت زۆر قسه مه‌که، بێده‌نگی بنوێنه. من مرۆڤێكی ئابرومه‌ندم، وابه‌سته‌ی پرنسیپهکانی خۆمم، مافی ئه‌وه‌تان نییه که به شێوه‌یه‌کی وا ساکار هه‌ڵسووکه‌وتم له گه‌لدا بکه‌ن، وا بیر ده‌که‌نه‌وه که به به‌خشینی جیهازێکی ته‌له‌فزیۆن فرێوم ده‌ن، مایه‌ی سه‌رسووڕمانێکی گه‌وره‌یه که بهو شێوه ساکاره له پرسه‌کان نزیک ده‌بنه‌وه. ماوه‌ی 10ساڵه چاوه‌روانی ئه‌وه‌ن که جیهازێکی ته‌له‌فزیۆنم بده‌نێ ، به‌ڵام ئه‌وه‌ش ناده‌ن. وا بیر ده‌که‌نه‌وه که به چه‌ند شتێکی ساده‌و ساکار هه‌ڵمخه‌ڵه‌تێنن ، تۆبڵێی ئه‌وان به چ چاوێک لێمده‌ڕوانن؟ وا پێده‌چی ئه‌وان به‌یه‌ک چاو سه‌یری من و عوسمان و بۆتان و ئه‌و پیسکانه‌ی که له ریزه‌کانمان هه‌ڵهاتوون ده‌که‌ن، چونکه ئه‌وانه به چه‌ند شتێکی هه‌رزان فریودران و به‌هه‌مان شێوه‌ش لێمان نزیک ده‌بنه‌وه، من بوار به‌که‌س ناده‌م که ده‌ست له به‌ها و پرنسیپه‌کانم وه‌ربدات، به‌ر له ئێستا زۆر که‌س بهو رێبازانه له خشته‌بران، ئه‌وان ده‌خوازن هه‌مان رێباز به‌رامبه‌ر به منیش پیاده بکه‌ن، من به سه‌وداو مامه‌ڵه‌یه‌کی وا هه‌رزان هه‌ڵناخه‌ڵه‌تێم."
ئۆجه‌لان سه‌باره‌ت به AKPش ڕایگه‌یاند که، ڕو‌وی راسته‌قینه‌ی ئاشکرا بووه و شرۆڤه‌کانی له‌م ڕووه‌وه فراوانتر کرد.
رێبه‌ری گه‌لی کورد پیلانی AKPی بۆ له‌ناوبردنی کوردان وه‌ها به‌ناوکرد: به‌ده‌ستی بایکاڵ و باخچه‌لی مردنمان پێنیشان ده‌دات و هه‌وڵ ده‌ده‌ن ئێمه به له‌رز و تا رازی بکه‌ن. ئۆجه‌لان ده‌ستنیشانی کرد که 'ئه‌وه‌ی جێبه‌جێ ده‌کرێت فاشیزمی سوننی- سیاسیی ئیسلامییه' و گه‌لی کوردی وشیارکرده‌وه که بهو پیلانانه هه‌ڵنه‌خه‌ڵه‌تێت.
رێبه‌ری گه‌لی کورد عه‌بدوڵڵا ئۆجه‌لان گووتی: ده‌بێت کورد له‌هه‌ڵبژاردنیشدا ده‌نگ به AKP نه‌دات و بانگه‌وازی له گه‌ل کرد که یه‌کێتی خۆیان بێننه‌دی و بپارێزن.
ئۆجه‌لان ده‌ستنیشانکردنێکی وه‌های کرد: " AKP سه‌ره‌تا کوردان برسی ده‌کات، پاشان ده‌یه‌وێت به‌رێگه‌ی هاوکاری و قه‌رزدانه‌وه کوردان به‌خۆیه‌وه گرێبدات. پێویسته کوردان هیچ نرخێک بۆ ئه‌وه دانه‌نێت، به‌پیلانی به‌مڕه‌نگه هه‌ڵنه‌خه‌ڵه‌تێت. چونکه له‌ئه‌نجامدا ئه‌وه‌ی زیانی به‌ربکه‌وێت و ئه‌وه‌ی بکوژرێت هه‌ر گه‌له‌که‌ی ئێمه ده‌بێت. پێویسته ئه‌مه به‌وشێوه‌یه لێی تێبگه‌ن. هه‌ر بۆیه من تووڕه ده‌بم، له‌هه‌موو کهسێک تووڕه ده‌بم، من له‌گه‌لیش تووڕه‌م، من ئه‌و قسانه‌م هه‌ر ته‌نیا بۆ کوردان نابێژم، به‌ڵکو بۆ گه‌لی تورکیش ده‌بێژم؛ بۆچی ده‌نگ به زیهنییه‌تێکی به‌مڕه‌نگه ده‌ده‌ن. پێویسته یه‌ک ده‌نگیش نه‌ده‌ن به زیهنییه‌تێکی به‌مڕه‌نگه."
ئۆجه‌لان ده‌ستنیشانی کرد هێرشکارێتی CHP و MHPش پارچه‌یه‌که له پیلانه‌که و گووتی: ئه‌و هێڵی نه‌ته‌وه‌په‌رست و میللیگه‌راییه‌ی که‌وا وه‌ک دژبه‌ری AKP خۆی نیشان ده‌دات، خزمه‌ت به ته‌سفییه‌کردنی کوردان ده‌کات: " لایه‌نی نه‌ته‌وه‌په‌رستێتی، میللیگه‌رایی و کۆمه‌ڵکوژپارێزێتی بایکاڵ و باخچه‌لی نیشان ده‌ده‌ن و ده‌ڵێن به AKP رازی ببن. ئه‌و کۆنسێپته‌ی له‌به‌رده‌م ئێمه‌دا دایانناوه ئه‌مه‌یه: مردن نیشانی ئێمه ده‌ده‌ن و ده‌ڵێن به‌له‌رزوتا رازی ببن. له‌نێوان ئه‌و مه‌یله‌ی نه‌ته‌وه‌په‌رست - میللیگه‌رایی و مه‌یلی ئیسلامییه‌تی سوننی و سیاسییدا هیچ جیاوازییه‌ک نییه. ئه‌وه‌ی له‌رابردوو پێکیان ده‌هێنا فاشیزمی نه‌ته‌وه‌په‌رست - میللیگه‌را بوو. ئه‌وه‌ی ئێستا به‌ده‌ستی AKP پێکیدێنن فاشیزمی ئیسلامی سوننی و سیاسییه. ئێوه ده‌زانن که زۆربه‌ی کوردان سوننیین. AKP ئه‌و ناسنامه‌یه به‌کار دێنێت و هه‌وڵده‌دات گه‌له‌که‌مان به‌مڕه‌نگه له‌و لایه‌نه‌وه هه‌ڵوشێت."
رێبه‌ری گه‌لی کورد ئاماژه‌ی به شته‌کانی پشت په‌رده‌ی ئه‌و کۆنسێپته‌ش کرد و گووتی: له‌پشت هه‌موو ئه‌وانه‌دا ئینگلستان و ئه‌مریکا ههیه و ئامانجی ئه‌و پیلانه‌شی وه‌ها باس کرد: "تورکیا په‌یمانی ئاسایشی باڵا له‌گه‌ڵ وڵاتانی هه‌رێمه‌که‌‌دا واژۆ ده‌کات. له‌گه‌ڵ هێزه‌کانی باشوور به‌سه‌ر PKK دادێن، فشاری هه‌رێمی له‌سه‌ر دروست ده‌که‌ن. له‌تورکیاش هه‌ولبده‌ن به‌ده‌ستی AKP کوردان بخه‌ڵه‌تێنن و هه‌وڵبده‌ن پرسه‌که چارهسهر بکه‌ن. ده‌ردی AKP ته‌نیا ئه‌وه‌یه که پشتیوانی ئه‌و هێزانه وه‌ربگرێت که ده‌زانرێن کامانه‌ن، ته‌مه‌نی خۆی درێژبکاته‌وه، که‌مێک زیاتر ده‌نگ به‌ده‌ست بهێنێت و دوو سێ خولی دیکه‌ش ده‌سه‌ڵاتدارێتی خۆی درێژبکاته‌وه. ده‌یه‌وێت په‌یمانی ئاسایشی باڵا له‌گه‌ڵ ئێران، ئێراق و سوریا واژۆ بکات، هێزه‌کانی باشووریش به‌لای خۆیدا رابکێشێت، پشتیوانی ئه‌وروپا، ئینگلستان، ئه‌مریکا وه‌ربگرێت و به‌مڕه‌نگه هه‌وڵ ده‌دات کوردان ته‌سفیه بکات. به‌ڵی ده‌بێت ئه‌وه له‌بیر نه‌کرێت که له‌وانه‌یه ئه‌م پیلانه بهپێچه‌وانه به رووی ئه‌واندا بشکێنته‌وه."
سه‌باره‌ت به بابه‌ته‌که ئۆجه‌لان شۆڕشی فه‌ره‌نسا و ئۆکتۆبه‌ری به نموونه هێنایه‌وه. ئۆجه‌لان به‌بیری هێنایه‌وه که له‌هه‌ردوو نموونه‌که‌شدا هێزه نێو ده‌وڵه‌تییه‌کان بۆ ئه‌وه‌ی به‌هاواری ئه‌وه بچن که رێ له‌به‌رده‌م هه‌ڵگیرساندنی شۆڕش بگرن ، به‌ڵام سه‌رنه‌که‌وتن.
ئۆجه‌لان گووتی: " له‌وانه‌یه له‌دژی ئێمه یه‌کگرتنێکی زۆر مه‌زن و پشتیوانییه‌ک له AKP بکرێت، به‌ڵی ئه‌مه بهو واتایه نایه‌ت که ئه‌و تێکۆشانه‌ی که‌وا گه‌ل پشتیوانی لێده‌کات مه‌زن و فراوان نابێت."
ئۆجه‌لان به‌بیری هێناوه که له‌چوارچێوه‌ی ئه‌و سه‌ودا و مامه‌ڵه‌یه‌ی له‌سه‌ر بۆتاشدا ئه‌ویان له روسیا ده‌رخستوو و گووتی: ئه‌مڕۆش په‌یه‌وه‌ندییه نێونه‌ته‌وییه‌کان له‌دژی کوردان به‌کار ده‌هێنرێن.
ئۆجه‌لان جارێکی دیکه به پێداگریه‌وه باسی له سه‌قامگیربوونی ئاشتی کرد و گوتی: وێرای هه‌موو ئێش و ئازارێک هه‌ڤالانی خۆمانمان بۆ ئاشتی ئاماده کرد.
ئۆجه‌لان پرسێكی له‌و جۆره ئاراسته‌ی گه‌وره به‌رپرسانی تورک کرد: ئێوه بۆ ئاشتی چیتان کردووه؟
عه‌بدوڵڵا ئۆجه‌لان ره‌خنه‌ی له به‌رێوه‌به‌رایه‌تی تورک گرت له به‌رامبه‌ر ئه‌وه‌ی که پرسێکی وا که بووه هۆی گیان له‌ده‌ستدانی ده‌یان هه‌زار که‌س وه‌ک پرسی تیرۆر نیشان ده‌ده‌ن.
ئۆجه‌لان ووشیاریی دا که ئه‌وانه‌ی ده‌زانن شه‌ڕ بکه‌ن ده‌بێ بزانن که چۆن ئاشتیش سه‌قامگیر ده‌که‌ن.
رێبه‌ری گه‌لی کورد عه‌بدوڵڵا ئۆجه‌لان به بۆنه‌ی هاتنی ساڵی 2010 ه‌وه بانگی چاره‌سه‌ری دیموکراتیانه‌ی له کاربه‌ده‌ستانی تورک کرد و ، به بیری هێنایه‌وه که ئه‌وان وێرای هه‌موو ئێش و ، هه‌لومه‌رجێکی دژوار هه‌وڵیان دا ئاشتی بێننه‌دی ، ویستیشیان که پێکیبێن ، به‌ڵام سه‌رنه‌که‌وتن و ، له‌سه‌ر ئه‌وه‌ش وتی: له راستیدا دیار بوو که پێویسته چ شتێک بۆ ئاشتی بکرێ ، شته‌کان سه‌خت نه‌بوون ، دیسان ده‌ڵێم بۆ ڕاوه‌ستاندنی فرمێسکی چاوان دوو وشه به‌سن ، واته دیداری ئاشتی ئه‌وانه‌ی خزم و که‌سوکاریان له‌شه‌ڕ دا ژیانیان له ده‌ستداوه ، ده‌توانن بهو قسانه فشار بخه‌نه سه‌ر حکومه‌ت بۆچاره‌سه‌ری ، ڕاوه‌ستاندنی فرمێسکی چاوان ئه‌وه‌نده ئاسانه ، به بۆنه‌ی ساڵی 2010 وه جارێکی تر بانگ له سه‌رۆککۆمار ، سه‌رۆک وه‌زیر ، سه‌رۆکی فه‌رمانداری گشتی ، به‌رێوه‌به‌رانی پۆلیس و ، به‌رێوه‌به‌رانی ئیستخبارات ده‌که‌م ، ده‌بێ هه‌موو کهسێک پێداویستی و به‌رپرسیارێتی بۆ ئاشتی به‌جێبێنێت ، ئه‌وه پێداویستیه‌کی ده‌وڵه‌تبوون و ، پێداویستی جدیه‌تی ده‌وڵه‌ته.
ئۆجه‌لان ڕایگه‌یاند که تا ئێستا بۆ چاره‌سه‌ری زۆر جار بۆچونی خۆی ده‌ربڕیوه، به‌ڵام ده‌وڵه‌ت گوێی به بۆچون و ، هه‌وڵه‌کانی بۆ چاره‌سه‌ری نه‌داوه.
ئۆجه‌لان به بیری هێنایه‌وه له‌گه‌ڵ ئه‌وه‌ی که پرسێک ههیه و بۆته هۆی مردنی 50 هه‌زار که‌س ، به‌ڵام کاربه‌ده‌ستانی تورک وه‌ک پرسی تیرۆر به‌ناوی ده‌که‌ن و ، له‌سه‌ر ئه‌وه‌ش وتی: چاره‌سه‌ری ئه‌و پرسه زۆر سه‌خت نییه ، ئێمه بۆچونه‌کانمان بۆ چاره‌سه‌ری زۆر به‌ڕوونی ده‌ربڕی ، زه‌حمه‌تیش نه‌بوو که پێویستی قسه‌کانی ئێمه به‌جێ بێنن ، به‌ڵام نه گوێیان له بانگی ئێمه گرت و نه هه‌وڵه‌کانمان بۆ چاره‌سه‌ری به‌هه‌ند بینرا ، من لێره لێکۆڵینه‌وه‌م له ئه‌زموونه‌کانی جیهان و رێی چاره‌سه‌ری کرد ، له ئه‌نجام دا رێیه‌کم بینی که ئێمه بگه‌یه‌نێته ئاشتی ، ئێمه ئه‌و بۆچونانه‌مان نووسی ، به‌ڵام کاربه‌ده‌ستانی ده‌وڵه‌ت ، ئه‌و هه‌وڵانه‌ی ئێمه‌یان له‌به‌رچاو نه‌گرت ، من ره‌خنه له‌و هه‌ڵوێستانه ده‌گرم که هه‌وڵه‌کانمان له به‌رچاو ناگرێ ، ده‌ڵێن له هه‌ردوولا 40 تا 50 هه‌زار که‌س مردن ، به‌ڵام ئه‌نجامێکی ڕاستیان له‌وه ده‌رنه‌خستووه ، ناوی تیرۆری لێ ده‌نێن ، به‌ڵام ئه‌وه چاره‌سه‌ری نیه و ، بهو قسانه‌ش ناتوانن مرۆڤه‌کان هه‌ڵخه‌ڵه‌تێنن به‌ڵام له ده‌ڤه‌رێکی که 50 هه‌زار که‌س بمرن ، نه‌ک تیرۆر ، شه‌ڕ ههیه . له ووڵاتانی تر ئه‌وه‌نده زیان هه‌بێ دانووسان ده‌که‌ن ، داده‌نیشن و ، گفتوگۆ له‌سه‌ر رێی چاره‌سه‌ری ده‌که‌ن ، من ناڵێم ئیللا وه‌رن له‌گه‌ڵ من قسه بکه‌ن ، من ناونیشان و رێبازی جیاوازم نیشان دا ئاماژه‌م به زۆر شت کرد ، به‌ڵام ئه‌وه له‌به‌رچاو نه‌گیرا.
ئۆجه‌لان ڕایگه‌یاند که له تورکیا سیاسه‌ت له‌سه‌ر خوێن به‌رێوه‌ده‌برێ و ، له‌گه‌ڵ ئه‌و هه‌موو ئێشه‌کانیش هه‌نگاویان بۆ ئاشتی نا و ، له کاربه‌ده‌ستانی ده‌وڵه‌تی تورکی پرسی ئێوه چیتان کرد؟
ئۆجه‌لان وه‌ها درێژی به لێدوانه‌که‌ی دا : ئێوه‌ش ئه‌وه ده‌بینن،هێشتاش سیاسه‌ت له سه‌ر خوێن به‌رێوه ده‌به‌ن،ده‌ڵێن،شه‌هیدمان ههیه،به‌ڵام ڕێز بۆ شه‌هیده‌کانی خۆشیان دانانێن،مادام شه‌ر دروست بوو و مرۆڤه‌کان مردن ،ئه‌و کات ده‌بێت ڕێ له ئێش و ئازاره‌کان بگیرێت و خه‌بات بۆ ئاشتی پێشبخه‌ن،ئه‌وه ئه‌رکی به‌رێوه‌به‌رانی ده‌وڵه‌ته،ئێمه‌ش له ساڵانی 93 به‌دواوه ،تێکۆشانی ئاشتی به‌ڕێوه ده‌به‌ین،،11 ساڵیشه لێره‌وه تێکۆشانی ئاشتی به‌ڕێوه ده‌به‌م ،هه‌وڵه‌کانی ئێمه بۆ ئاشتی پێکهاتن ،به‌ڵام به‌هۆی سیاسه‌تی ده‌وڵه‌ته‌وه ،بێ ئه‌نجام بوون، به‌ڵێ نزیکه‌ی 50 هه‌زار که‌س مردن، به‌ڵام له‌بری ئه‌وه‌ی ڕێ له مردنی دیکه بگرن ،هێشتاش ئه‌و مردنانه به‌کار دێنن،باس له جیاکاری و تیرۆر ده‌که‌ن ،ئێمه هیچ کاتێک نه‌مانویستووه ئه‌م ووڵاته دابه‌ش بکرێت،ده‌ڵێن:شه‌هیدی ئێمه ههیه،مه‌گه‌ر هی ئه‌وان ههیه و شه‌هیدی ئێمه نییه؟ وێرای هه‌موو ئازار و سه‌ختیه‌کان ،هه‌ڤاڵه‌کانی خۆمان بۆ ئاشتی ئاماده‌کرد ،ئه‌ی له‌به‌رامبه‌ردا ئێمه‌وه چیتان کرد؟ئێوه ته‌نها ئازاره‌کانتان قوڵتر کرده‌وه.
ڕێبه‌ری گه‌لی کورد عه‌بدوڵڵا ئۆجه‌لان چوونه‌وه‌ی گروپه‌کانی ئاشتیشی وه‌ک نموونه‌ی دوایین هه‌وڵه‌کانیان بۆ ئاشتی هێنایه‌وه و ڕایگه‌یاند:ئه‌و به‌وه ویستویه‌تی ،نیشانی بدات گه‌لی کورد بۆ ئاشتی ئاما‌ده‌یه.
ئۆجه‌لان به‌بیریشی هێنایه‌وه ،ووتی: ئێمه وێرای هه‌موو ئازار و سه‌ختیه‌کان ،هه‌ڤالان و گه‌له‌که‌مان ئاماده‌ی ئاشتی کرد، پێشه‌نگانی ده‌وڵه‌ت هه‌رچۆن ئاماده‌کاری بۆ شه‌ڕ ده‌که‌ن ،ده‌بێت زه‌مینه‌ی ئاشتیش دروست بکه‌ن،ئه‌وانه‌ی شه‌ڕ ده‌زانن ،ده‌بێت هێنانه‌ئارای ئاشتیش بزانن،به گوته‌ی :پرسی تیرۆر ههیه،ناتوانن له پرسه‌که واته پرسی کورد ڕزگاریان ببێت،هێنده هه‌رزان له پرسه‌که نزیک مه‌بنه‌وه،ئێمه‌ش بۆ ناسنامه و ئازادی گه‌له‌که‌مان تێکۆشاین ،به‌هه‌زاران گیراوی گه‌له‌که‌مان هه‌ن ،ئه‌وانه‌ی له‌م سه‌رمایه دا ،له چیاکان ماونه‌تهوه، هه‌ن. ده‌بێت له هۆکاری مانه‌وه‌یان له چیاکان تێبگه‌ن".
ئۆجه‌لان له دیداره‌که‌یدا په‌یوه‌ندی نێوان دۆخی خۆی و، پرسی ئازادی گه‌لی هه‌ڵسه‌نگاند و وتی: گرنگ دۆخی تاکه‌که‌سی من نیه، گرنگ ئازادی گه‌له، دۆخی من به‌م بابه‌ته‌وه په‌یوه‌سته.
ئۆجه‌لان ڕایگه‌یاند که چه‌مکی ئه‌و بۆ ڕێبه‌رایه‌تی دیموکراتیش هه‌مان شته.
رێبه‌ری گه‌لی کورد عه‌بدوڵڵا ئۆجه‌لان گوتی: پرسی کورد پرسی ئازادی خه‌ڵکێکه و پرسی ناسنامه‌یه‌که. داواشی کرد که هه‌لومه‌رجی ئه‌و و ئازادی ئه‌ویش په‌یوه‌ست به‌وه‌وه هه‌ڵسه‌نگێنرێ و به‌م شێوه‌یه درێژه به قسه‌کانی دا : ده‌بێ ئه‌و پرسه له‌سه‌ر یه‌ک که‌س بنبه‌ست نه‌کرێ ، پرسێکی کۆمه‌ڵایه‌تی و سیاسیه ، پرسی ئازادی و ناسنامه‌ی گه‌لێكه ، پرسێکی وا سیاسی به ئه‌قلێکی سیاسی ،به‌رێبازی سیاسی چارهسهر ده‌کرێ ، هه‌ڵوێستی سیاسی ئه‌وه‌یه. ئه‌وه هه‌لومه‌رجی من گفتوگۆ له‌سه‌ر ده‌کرێ ،له‌سه‌ر ئه‌وه چالاکی ئه‌نجام ده‌درێ ئه‌گه‌ر وا بێ ، ئه‌وه ئێوه ده‌بنه که‌ره‌سته بۆ ئه‌و گه‌مانه‌ی له‌سه‌ر من به‌رێوه‌ده‌برێ ، گرنگ بۆ من دۆخی گه‌له ، من جارێکی تر ده‌ڵێم گرنگ دۆخی تاکه‌که‌سی من نیه گرنگ بۆ من دۆخی گه‌له ، دۆخی 5 هه‌زار هه‌ڤاڵم له زیندانه‌کان و ، ئازادیانه ، هه‌موارکردنی هه‌لومه‌رجی من و ئازادی من دوای ئه‌وان دێ ، دۆخی من په‌یوه‌سته به‌وانه‌وه ، ئه‌وا بڵێین دۆخی من باش کرا ، به‌ڵام ئه‌گه‌ر دۆخی هه‌ڤاڵه‌کانم و گه‌له‌که‌م باش نه‌بێ ، هیچ واتایه‌کی باش بوونی دۆخی من نامێنێ ، گه‌له‌که‌مان ، رێبه‌رایه‌تیه‌کی بهو شێوه‌یه‌ی په‌سه‌ند کرد و ، منیش وا له هه‌لوێستی گه‌ل له سه‌ر خۆم تێگه‌یشتم ، چه‌مکی من بۆ ڕێبه‌رایه‌تی دیموکرایه‌تی ئه‌وه‌یه.
ئۆجه‌لان رایگه‌یاند که ئه‌و به‌ها به ژیانێک ده‌دا که له‌سه‌ر بنه‌مای تێگه‌یشتنه ، مرۆڤێك که تێبگات ، ئازاد ده‌بێ ، مرۆڤێکیش ئازاد ببێ ، جوان ده‌بێ و، ده‌بێته مرۆڤێکی باش.
ئۆجه‌لان رایگه‌یاند که ئه‌گه‌ر ئه‌و باسه مایه‌ی تێگه‌یشتن نه‌بێ ، ئه‌وا هه‌موو کهسێک به توندی ڕه‌خنه ده‌کات ، ئه‌گه‌ر پێویست بێ پارێزه‌رانی خۆشی ڕه‌ت ده‌کاته‌وه و ، دیدار ئه‌نجام نادات.
دوپاتیشی کرده‌وه که ئه‌و له هه‌لومه‌رجێک دا نیه که رێبه‌رایه‌تی کرده‌یی بکات ، ئه‌وه به پێی ئه‌خلاق و ، یاساش راست نیه.
ئۆجه‌لان ڕاشیگه‌یاند که ئه‌و هه‌میشه گومانی خۆی ده‌رده‌بڕێ و وتی به سزای دیسپلین ده‌یانه‌وێ من سه‌رکوت بکه‌ن ، من ناکه‌ومه نێو ئه‌و گه‌مانه‌وه، ده‌توانن من بکوژن ، من له‌وه ناترسم به‌ڵام ناتوانن به من بڵێن قسه مه‌که.
ئۆجه‌لان وه‌ها درێژه‌ی به لێکدانه‌وه‌که‌ی دا: من ده‌توانم بڵێم که من لێره ، دوایین کاروانی خۆم به‌پێی هه‌ڤاڵه‌کانم و ، گه‌له‌که‌م دوایی دێنم ، به‌پێی به‌رپرسیارێتم بۆ گه‌له‌که‌م ده‌بێ درێژه به ژیانم بده‌م ، هه‌ر بۆئه‌وه‌ش له دژی ئه‌و هه‌لومه‌رجه‌ی که له مردن خراپتره به‌رگه ده‌گرم ، ئێوه به‌رخودانی مه‌زلومه‌کان ، که‌ماله‌کان ، خه‌یره‌یه‌کان ده‌زانن ، من ناچارم به پێی یاده‌وه‌ری ئه‌و هه‌ڤالانه هه‌ڵسووکه‌وت بکه‌م ،ژیانداریان بکه‌م ، ئه‌وانه مرۆڤی زۆر بوێر بون ، به کراوه‌یی ده‌ڵێم، له‌وانه‌یه به هێنده‌ی ئه‌وان بوێر نه‌بم ، له‌وانه‌یه که‌سێکی ئاساییش بم ، له‌وانه‌یه به هێنده‌ی ئه‌وه‌شی ده‌گوترێ نه‌بم ، به‌ڵام یه‌ک شت ده‌زانم ، به شێوه‌یه‌ک که شایانی گه‌له‌که‌م وبه‌هاکانی بێ ، درێژه به ژیانی خۆم ده‌ده‌م ، تێكۆشانی من لێره زۆر ڕوون و ئاشکرایه ، تێکۆشانی پاراستنی نه‌فسه ، تێکۆشانی داکۆکی کردنه له نه‌فسی خۆم ، من لێره بڕیاری خۆم داوه ، نه هه‌لوێستێكی نه‌رم و دروست کراو ، نه هه‌لوێستێکی زۆر ڕه‌ق و توند نیشان ناده‌م ، له سیاسه‌ت دا نه‌رم ده‌بم ، به‌ڵام هه‌رگیز له پره‌نسیپه‌کانم پاشگه‌ز نابمه‌وه ، دووره‌په‌ر‌ێزیش ده‌بم له هه‌ڵوێستی توندی هه‌ردوو لا.
رێبه‌ری گه‌لی کورد عه‌بدوڵڵا ئۆجه‌لان جارێکی تر ڕایگه‌یاند که بزوتنه‌وه‌ی ئازادی گه‌لی کورد خۆی بڕیاری خۆی ده‌دا ، له ئێستا به‌دواوه تێکۆشان به‌رده‌وام ده‌بێ ، با به پێی خۆیان بیری لێ بکه‌نه‌وه و خۆیان بڕیاری خۆیان بده‌ن ، له ئێستا به‌دواوه رێک ده‌که‌ون ، شه‌ڕ ده‌که‌ن من نازانم ، خۆیان بڕیار ده‌ده‌ن.
رێبه‌ری گه‌لی کورد عه‌بدوڵڵا ئۆجه‌لان په‌یامی به پارتی ئاشتی و دیموکراتی BDPش دا که له 1 ی شوبات دا کۆنگره‌ی خۆی ده‌به‌ستێ و وتی:
ده‌بێ BDP خۆی له دۆخی پارتی ناسنامه‌یه‌تی ڕزگار بکات ، ده‌بێ ببێته پارتێک له مه‌ڕ پرسه‌کانی گشتی وڵات به‌رپرسیار بێ ، هه‌ر بۆئه‌وه‌ش ده‌بێ لایه‌نه جیاوازه‌کان و، مرۆڤی لایه‌نی تریش له‌خۆ بگرێ ، ده‌بێ رێنمایی خۆی ئه‌وه بێ.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
