پارتى ئێكەم زەنگا ترسێ و راگەهاندنا شەرى لێدا !!!

Friday, 14/05/2010, 12:00

دیارە پشتى تیروركرنا (سەردەشت عوسمان)ێ خیندكار و روژنامەڤان بارودۆخێ ئەمنیێ هەرێما كوردستانێ بەرەو ئالوزیێ دچیت و هەژمارەیەك دەزگەهێت راگەهاندنێ و روژنامەڤانان و رێكخراوێت جڤاكا مەدەنى (هەفتەیا بێدەنگ نابیــن) راگەهاندن، هەڤدەم بەیاننامە و بەیاننامەكاریێ دەست پێكریـە، بەلێ گرنگ ناڤەروكا بەیانناما (م،س) (پارتی)یە كو براستى بێهنا شەرى و خوینێ ژێ دهێت و براستى جهێ مەترسیێ یە بۆ هەرێما كوردستانێ.
ئەز باوەر دكەم ئەگەر دەزگەهێت ئەمنیێت پارتى و ئێكەتى بخوژى (سەردەشت عوسمان) و (سوران مامەحەمە) شەهید نەكربــن، بەلێ بەرپرسن بۆ دیتنا بكوژێت وان و پێتڤییە بزووترین دەم بكوژێت وان هەردوو روژنامەڤانان ببینن و بدەنە دادگەهێ و بۆ خەلكێ كوردستانێ دیار بكەن كانێ كى بوون ئەو كارێ هوڤایەتى كرین و بووچى ژى ئەو كەس تیرور كرنە؟.
بەلێ مخابن دەزگەهێت راگەهاندنێ یێت پارتى و ئێكەتى ژى هەم بێدەنگن و هەم ئەوان كەسان بتێكدەر پێناسە دكەن كو نەرازى بوونا خو ل سەر تیروركرنا (سەردەشت عوسمان و سوران مامەحەمە)ى دیار دكەن، بەیانناما (م،س) پارتی وەكى بەلاغێت سەربازییە كو ژ لایێ فەرماندێت عەسكەرى ڤە دهێنە بەلاڤكرن و لایەنێ بەرانبەرى خو گونەهبار دكەن بو دەست پێكرنا مەزنترین هێرشا لەشكەرى و ئەنجامدانا مەزنترین كوشتن و برینێ، لەوما ئەز وەسا دبینم ژبەركو پارتى هەست ب گونەهباریا خو دكەت بەرانبەرى تیروركرنا روژنامەڤان (سەردەشت عوسمان)ى و بوو نەهێلانا ئەوێ گومانا 100% ل سەر پارتى و دەزگەهێت وان یێت ئەمنییە بزاڤێ دكەت بڤێ بەلاغا عەسكەرى نەهێلیت، بەلێ ئایە پارتى دێ شێت ئەوێ گومانێ ل سەر خو نەهێلیت كو (سەردەشت عوسمان) بدەستێ وان نە هاتییە شەهیدكرن، بێگومان نەخێــر، چونكى كەسەك نینە لڤى ولاتەى باوەر بكەت كو بێى هەڤكاریا دەزگەهێت پارتى هیچ باندەك بشێت كەسەكێ ل سەر جادێ و بروژ برەڤینیت و پاشى ببەتە باژێرەكێ دى و ل وێرێ تیرور بكەت!!
لەوما ئەز باوەر دكەم پیتڤییە ئەڤجارە نەكو تنێ لدژى تیروركرنا سەردەشت عوسمان و سوران مامە حەمە و چەندین نڤیسەر و روژنامەڤانێت دى پێتڤییە خوپیشاندان بهێنە كرن، بەلكى پیتڤییە بۆ دەست ژ كار ڤەكێشانا مەسعود بارزانى و جەلال تالەبانى و حكومەتا هەرێمى بگشتى خوپیشاندانێت مەزن بهێنە ساز كرن، چونكى ئەگەر ئەڤ تاوانە ل هەر وڵاتەكێ هاتبانە ئەنجامدان وەزیرێ ناڤخوى و برێڤەبەرێت ئاسایشێ دا دەستێ خو ژ كارى ڤەكێشن، بەلێ ئەڤ بەرپرسێت مە یێت چاڤشوور ژ هیچ تشتەكێ شەرم ناكەن و بزوورداریێ نەبیت دەستێ خو ژ كورسیكا دەستهەڵاتێ بەرنادەن.