پێش به‌م دیارده قێزه‌وه‌نه بگرن ، .مه‌سه‌له‌ی سێکس له‌نوسین دا
Friday, 25/12/2009, 12:00
. یه‌کێک له‌ودیارده قێزه‌وه‌نانه‌ی ، ده‌سه‌لاتی کوردی به‌گشتی و پارتی ویه‌کێتی به‌تایبه‌تی ، وه‌ک سیاسه‌ت په‌نای بۆ ده‌به‌ن ، تێکشکانی که‌رامه‌تی تاکی کورده ، ئه‌ویش له‌ڕێگای ده‌سه‌لات و دۆلار به خشینه ،تا که‌سێتیه‌کی زه‌لیل و بێ ئیراده‌و کۆیله دروستبێت که به‌ئاره‌زوی خۆیان ناپاکی و تاوان ئه‌نجام بده‌ن ، وه درێژه به‌ته‌مه‌نی پڕ له‌تاوانیان بده‌ن ، هه‌ر ئه‌مه‌شه وای کردوه سه‌رباری سه‌دان تاوان و ناپاکی ، کاردانه‌وه و ناره‌زایه‌تی جه‌ماوه‌ری که‌م سه‌رهه‌ڵبدات .... له‌ته‌ک ئه‌مه‌ش به‌شێک له وانه‌ی قه‌له‌م ده‌گرنه ده‌ست به‌تایبه‌تی ئه‌وانه‌ی به‌نازناو ده‌نوسن په‌نا بۆ چه‌کێک بۆ تیرۆرکردنی نه‌یاره فیکری وکه‌سێتیه‌کانیان ده‌به‌ن له‌ڕیگای نازناو نوسین که ئه‌گه‌ر که‌سی نوسه‌ر له‌ناو نیشتمان بێت و بابه‌تی هه‌ستیار باس بکات ئه‌وا پاساوی ئه‌وه هه‌یه له‌ترسی دام و ده‌زگا داپلۆسێنه‌ره‌‌کانی (پاراستن و زانیاری) ناوی خۆی نه‌نوسیێت .، به‌لام هیچ پاساوێک نیه بۆ که‌سێک له‌ئه‌ورپا بژیت و خاوه‌ن ره‌گه‌زنامه بێت ، یان له‌مالپه‌رێک به‌نازناو بنوسێت له‌مالپه‌رێکی تر به ناوی خۆیه‌وه!؟ ، یان هه‌ندێ نوسه‌ر له مالپه‌ری سبه‌ی به‌زمانی گول بنوسن که‌چی هه‌مان نوسه‌ر له‌مالپه‌ری کوردستان پۆست ، به زمانێکی دژ به گوله‌که‌ی سبه‌ی بنوسن ؟
ماوه‌یه‌که دیارده‌یه‌کی قێزه‌وه‌ن هاتۆته ناونوسینی کوردی ئه‌ویش په‌نابردن بۆ مه‌سه‌له‌ی ره‌وشتی ئافره‌ت ، چ خۆی یان به‌پرسێکی سیاسی بێت . ئه‌م دیارده قیزه‌وه‌نه ، چه‌کیکه له‌ململانێی سیاسی هێزه نه‌یاره سیاسی و هه‌ندێ نوسه‌ری کورد به‌کارهاتوه ، له‌ئه‌ورپای مۆدێرن ئه‌م مه‌سه‌له‌یه هیچ گرنگیه‌کی پێ نادرێت ، چونکه به‌نده به‌ژیانی که‌سه‌که‌وه ، ئه‌وه‌ی لای تاکی ئه‌ورپی گرنگه ، ره‌فتارو هه‌لوێست و به‌رپرسی بونێتی له‌کاتی پله‌ی سیاسی ، نه‌وه‌ک مه‌سه‌له‌ی که‌سێتیه‌کانی. .
له‌رۆژهه‌لاتی ناوه‌راستیش نوسینی بابه‌ت له‌سه‌ر مه‌سه‌له‌ی ژنان و شه‌ره‌فیان ، روبه‌روی تیرۆر و سوکایه‌تی پێ کردن ده‌بنه‌وه . بۆیه زۆر شه‌رمه‌زاریه له‌ململانێێ سیاسی په‌نا بۆ ئه‌م مه‌سه‌له یه ببردرێت .
لام زۆر ئاسایه ، مرۆڤێکی نه‌خوێننده‌وار به‌و چاوه خوێندنه‌وه‌ی هه‌بێت ، به‌ڵام زۆر شه‌رمه‌زاریه که‌سێک خۆی پێ نوسه‌ر یان پێسکه‌وتوخواز یان کادیری خۆ به (ئۆپزسیۆن) بێت ، له‌ململانێی سیاسی په‌نا بۆ په‌روه‌ندی که‌سێتی ژیانی ئافره‌تان ببات . که‌هه‌مومان ده‌زانین هه‌م کێشه‌ی کۆمه‌لایه‌تی زۆری لێده‌بێته‌وه ، هه‌میش دیارده‌یه‌کی قێزه‌وه‌نه که‌وا به شێنه‌یی خۆی ده‌خزێنێته ناو نوسینی کوردی . ئه‌مه جگه له‌وه‌ی له‌کۆمه‌لگا تێنوه سێکسیه‌کانی وه‌ک ڕۆژهه‌لات ، مێشیک ده‌کرێته گامێشێک ..
زۆرینه‌ی کۆمه‌لگای کوردی ئه‌گه‌ر به‌رپرسێک باکگراوندی منالیشی سێکسی کردبێت به‌له‌که‌یه‌کی زۆر گه‌وره شه‌رمه‌زار ده‌کرێت ، به‌لام ئه‌گه‌رولات ئاوا پڕ له‌به‌رپرسی ناپاک و دز و فایلدار ونه‌ته‌وه فرۆش بێت زۆر ئاسایه ؟ یان پیاوان به‌ئاره‌زوی خۆیان له‌گه‌ل ژنان رابوێرن ، به‌دیارده‌یه‌کی سه‌لیم لێک ده‌درێته‌وه ، به‌لام ئه‌گه‌ر ژنێک بچوکترین کاری سێکسی بکات ، ئه‌وا به سوکایه‌تی لێک ده‌درێته‌وه . لێره‌دا ئاستی ڕۆشنبیری که‌س و گروپه‌کان هه‌لده سه‌نگێنرێت.
بۆیه هیودارم کوردستان پۆست هه‌ولبدات هه‌ر نوسینێک له‌م باره‌وه هات له‌بری بلاو کردنه‌وه بۆناو ته‌نه‌که زبله‌که‌ی فڕی بدات . ئه‌گه‌رنا به‌شدار ده‌بێت له‌م تاوان و کاره قێزه‌وه‌نه ، که‌به‌داخه‌وه هه‌ندێ جار تێی که‌وتوه ... ده‌کرێت ململانێنی سیاسی له‌سه‌ر باکگراوندی سیاسی و فیکری و ره‌فتاری که‌سه‌کان بێت له‌کاتی به‌رپرسیاره‌تی له ده‌سه‌لات ، نه‌وه‌ک په‌نابردن بۆ مه‌سه‌له‌ی ژیانی، که‌ئێمه نازانین راستیه‌کان له‌کوێدایه . بۆیه هه‌قه نوسه‌ر بزانیت قه‌له‌م وه‌ک چه‌که ئه‌گه‌ر ئاگات لێ نه‌بێت ده‌بیه تیرۆریست ، که‌له‌بری گوله به وشه تاوانه‌که ئه‌نجام ده‌ده‌یت . به‌هیوای ئه‌وه‌ی سنورێک بۆ ئه‌م دیارده‌یه دابنرێت تا قه‌له‌م و ره‌خنه سوک نه‌بن ، ئه‌مه‌ش به‌پله‌ی یه‌که‌م ده‌گه‌رێته‌وه بۆ مالپه‌رو ڕۆژنامه‌کان که بابه‌تی له‌م شیوه بلاو نه‌که‌نه‌وه .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
