نامەیەکی کراوە له کوردستانپۆسته‌وه بۆ نه‌وشیروان مسته‌فا
Friday, 23/09/2011, 12:00
(کێشه ستراتیژییه‌کانی کوردستان، هه‌ڵه‌ی کوشنده‌ن، نابێت بهێڵین تاکتییکی سیاسی حیزبی، زاڵ بێت به‌سه‌ر گرفته مێژووییه‌کانی سیسته‌می سیاسیی کوردستاندا).
ئه‌مه دیدی کوردستانپۆست بووه له سه‌ره‌تای کارکردنییه‌وه وه‌ک میدیایه‌ک، تاوه‌کو یه‌که‌م کۆنفراسی خۆی، که جارێکی تر جه‌ختی له سه‌ر پرس و دۆزی نیشتمانیی و نه‌ته‌وه‌یی و مێژوویی کورد کردۆته‌وه.
له‌و دیده‌وه، ئه‌گه‌ر به لۆگیکی تاڵه مووه‌که‌ی معاویه‌ش بێت، ئێمه تا ساتی ئاڕاسته‌کردنی ئه‌م نامه‌یه‌ش ده‌ستگرۆیی گۆڕانمان کردووه وه‌ک بزوتنه‌وه‌یه‌کی سیاسیی و کۆمه‌ڵایه‌تی له کوردستاندا، به جۆرێک له لایه‌ن ده‌سته‌ڵاته‌وه تاوانبارکراوین به‌وه‌ی ئێمە دیوێکی تری گۆڕان بین، یان بزوتنه‌وه‌ی گۆڕانمان له پشته‌وه بێت! چونکە ئەوە ئێمه بوین له‌کاتی هه‌ڵبژاردنه‌کاندا تینمان دانێ و کاریگه‌ریی به‌رچاومان له‌سه‌ر به‌ده‌ست هێنانی کورسییه‌کانی فراکسیۆنی گۆڕان هه‌بوو له پارله‌ماندا، هه‌وادار و دۆستانی خۆمان هاندا، که پشتگیری له پرۆژه‌ی گۆڕانکاری له کوردستاندا بکه‌ن و به‌خۆشمان ڕۆڵمان هه‌بووه له ئه‌فراندنی که‌شێکی سیاسیی وه‌ها که به‌شێکی زۆری خه‌ڵکی کوردستان چاوکراوانه و بەبێ سڵه‌مینه‌وه ڕووبه‌ڕوی ئه‌و ده‌سته‌ڵات و پارته تاڵانکار و ناپاکانه ببنەوە. ئێمە ئه‌و دیواری ترسه‌مان شکاند، کە هه‌ردوو پارتی ده‌سته‌ڵاتدار (پارتی و یەکێتیی) له نێوان خۆیان و خه‌ڵکدا دروستیان کردبوو، کە هه‌رکه‌سێک بیویستایه که‌لێنێکی تێبخات، به تابوری پێنجه‌م و ده‌ستی ده‌ره‌کی و ده‌یان تانه و بوختانی تر تاوانباریان دەکرد، تەنانەت ئەوان ڕه‌خنه‌ی سیاسییشیان تابۆ کردبوو، ئێمه ئه‌و تابۆیانه‌مان شکاند، که خرابونه سه‌ر ڕای سیاسییانه‌ی خه‌ڵکی کوردستان. له‌و دیده‌شه‌وه پێمان وابووه و ئیستاش پێمان وایه ژیانی سیاسیی و کۆمه‌ڵایه‌تی و ئابوریی و په‌روه‌رده‌یی خه‌ڵکی کوردستان دەبێت بگۆڕدرێت.
به‌ر له شۆڕشه‌کانی به‌هاری عاره‌بی، ئێمه لە کوردستاندا ئه‌و گۆڕانه‌مان له شۆڕشێکدا دیوه‌ته‌وه، کە (گۆڕان) مانای شۆڕشێکه لە سه‌رتاسه‌ری هه‌موو نیشتمانی کوردییدا، بۆیە بەرەو رووی هەموو ته‌گه‌ره و ئاسته‌نگییه ناوخۆییه‌کان وەستاوینەتەوە، نەک بچوککردنەوەی گۆڕان بۆ ئاستی چاکسازیی، و ریفۆرم، کە له سازشی حیزبی و ژێربه‌ژێردا له‌ناو ببرێت، بە شێوەیەک ئیراده‌ی گۆڕان له ناو خه‌ڵکدا بکوژن، ئێمە بڕوامان وایە، گۆڕانی ڕاسته‌قینه به‌ڕێوه‌یه، بێگومان کوشتنی ئه‌و ئیراده‌یه لە هەر لایەکەوە بێت، هیچی که‌متر نییه له تیرۆر، زیندانی کردن و تۆقاندنی جه‌سته‌یانه‌ی ده‌سته‌ڵات، کە له ڕێگه‌ی چه‌کداره‌کانییه‌وه ئه‌نجامی ده‌دەن.
به‌ڕێز نه‌وشیروان مسته‌فا...تۆ له لای دۆست و نه‌یاره‌کانیشت وا ناسراوبوویت، (
گوایە) سیاسه‌تمه‌دارێکیت ڕادیکالانه هه‌ڵوێست له‌سه‌ر ڕووداوه‌کان وه‌رده‌گریت، هه‌ر بۆیه بڕیاره‌کانت هه‌میشه وروژێنه‌ری دۆخی سیاسیی بوون و کاریگه‌ریی ڕاسته‌وخۆیان له‌سه‌ر ژیانی سیاسیی کۆمه‌ڵگای کوردیی دادەنا. ئێمه له ڕێگه‌ی ئه‌م نامه‌یه‌وه به‌ناوی هه‌موو کوردستانپۆستییه‌کانه‌وه ئاگادارت ده‌که‌ینه‌وه، که زۆر وریایانه له ئاست دۆخی سیاسیی کوردستاندا دەبوو به‌رخود بیت، ئێمە دەیڵێینەوە، کێشه‌کانی ئێمه‌ی خه‌ڵکی کوردستان ستراتیژین، هه‌ر هه‌ڵه‌یه‌ک له‌و ئاسته‌دا بکرێت، هەڵەی مێژووییه، کاریگه‌ریی قوڵی له‌سه‌ر ژیانمان ده‌بێت.
ئێمه له ئاست به‌شداری کردنت له پرسه‌که‌ی دایکی مه‌سعود بارزانییدا، ڕاوتێبینی خۆمان ئاڕاسته‌کردیت، به‌ڵام هێشتاکه له‌به‌ر بەرچاوگرتنی ئه‌مرۆ و واقیعی دابونه‌ریت و هێشتنه‌وه‌ی تاڵه مووه‌که‌ی معاویه‌دا، بڕیارمان نه‌دا، بتانخه‌ینه ڕیزی ده‌سته‌ڵاته‌وه، وه‌ک ئه‌وان ڕادیکالانه هه‌ڵوێستتان له‌سه‌ر وه‌ربگرین، به‌ڵام له‌پاش ئه‌م کۆبوونه‌وه‌یه‌تان له‌گه‌ڵ مه‌سعود بارزانییدا، ناچار ده‌بین وه‌ک چۆن سه‌نگه‌رمان له ده‌سته‌ڵات و لە دەست و پێوەند و نووسەر و پاشکۆکانیان گرتووه، له‌به‌ره‌ی گه‌له‌وه ڕووبه‌ڕویان ده‌بینه‌وه، بەم نامە کراوەیە راستەوخۆ ئەم پرسیارەتان ئاڕاستە دەکەین، تا بزانین ئێوه‌ش دروست له‌کام به‌ره‌ن؟ به‌ره‌ی گه‌ل، کە هیچ بوارێکی بۆ قسه‌گۆڕینه‌وه و دانیشتن نه‌ماوه له‌گه‌ڵ ده‌سته‌ڵاتدا، هەروەها په‌رله‌مان و حکومه‌ت و کۆبوونه‌وه حیزبییه‌کان، کە به‌جۆرێک یه‌کلابۆتەوە دژی خواستەکانی گەلی کوردستانن، بۆیە دەمانەوێت بە ئاشکرا ددانی پێدا بنێیت و پێمان بڵێن ئێوە لە ریزی ئەم ناپاک و نیشتمانفرۆش و تاڵانکارانەدان، یان له به‌ره‌ی ماف خوراو و ئازادییخواز و نیشتمانپه‌روه‌رانەن؟
نه‌وشیروان مسته‌فا...ئێوە مێژوویەکتان لەگەڵ رێکخراو و حیزبە کوردییەکاندا هەیە و کەسایەتییەکی سیاسیی ناسراوییت، سه‌روبه‌رێکت له‌گه‌ڵ مێژووی کورددا هه‌یه، ده‌زانیت که میلله‌تی کورد جگه له کێشه‌ی هه‌رێمی و جیهانی گیرۆده‌ی سه‌رکرده‌ی ته‌قلیدی و پارتی خێڵه‌کی و دیکتاتۆریه‌تی حیزبییه. ده‌بوو زۆر ورد و وریایانه هه‌ڵوێسته له‌سه‌ر ڕوداوه‌کانی جیهانی و هه‌رێمی و ناوخۆتان بکردایە، دیاره پرۆژه‌ی گۆڕانکارییه‌که‌تان وه‌ک له سه‌ره‌تاکانیه‌وه دیاربوو، کۆکردنه‌وه‌ی مه‌یلێکی نوێ و ده‌نگێکی نوێی سیاسی کۆمه‌ڵگای کوردی بوو له باشووری کوردستان. له ڕووی ڕیکخراوەییه‌وه، به‌شدارییپێکردنی ئه‌و نه‌وه نوێیه بوو، که ده‌نگ و ڕای سیاسیی جیاوازیان هه‌یه له نه‌وه‌ی باڵاده‌ستی ئێستا، کۆمه‌ڵێک گه‌نجی ئه‌و نه‌وه نوێیه‌ت وه‌ک ڕاوێژکار و مونه‌زری بزوتنه‌وه‌که‌ت له ده‌وری پرۆژه‌که‌ت کۆکردۆته‌وه و پرس و ڕایان له‌گه‌ڵدا ده‌که‌یت.. به‌ڵام تا ئه‌مڕۆکه ئه‌وه‌ی له ته‌مه‌نی زیاتر له دووساڵه‌ی ئه‌و بزوتنه‌وه‌یه‌دا به‌دی ده‌کرێت، ته‌نیا له‌رزۆکیی و دوودڵی و دوو فاقەیی سیاسیانه‌یه له‌ئاست ڕووداوه‌کاندا، دەبوو ئێوە له‌ئاست جیهانیدا ئه‌وه‌تان له‌به‌رچاوبووایه، که جیهان به‌هۆی کێشه ئابورییه‌کان و گه‌شه خێراکانی په‌یوه‌ندییکردن و گه‌ڕانه‌وه‌ی باڵی میانڕه‌و، ڕادیکال و چه‌په‌کان له گۆڕه‌پانی سیاسیی خۆرئاوادا، که ڕاستڕه‌وه‌کان به‌شێوه‌یه‌کی ترسناک گه‌یشتبوونه چه‌قی بڕیاری سیاسیی و کاریگه‌رییان له‌سه‌ر ڕه‌وشی ڕووداوه‌کانی جیهان داناوه. ئه‌م گه‌ڕانه‌وه‌یه جۆرێکه له هێزبه‌خشین به شۆڕشه‌کانی ناوچه‌که و پشتگیرییه‌کی چالاکانه‌یه له گۆڕانکاریی سیسته‌می ئابوریی جیهانی و په‌یوه‌ندییه فه‌رهه‌نگیی و سیاسییه‌کانی نێوگه‌لان، له‌و ناوچەیەشدا، که دابه‌ش بووه به‌سه‌ر چه‌ند هاوپه‌یمانییه‌کی هه‌رێمی و جیهانییدا، وه‌ک گروپی ئێران، پێکهاتووه له سوریا و حیزبوڵای لوبنانی و حه‌ماسی فه‌ڵه‌ستینی و به‌شێکی زۆری پارته شیعه‌کانی عێراق و ناوچه‌که، یەکێتیی نیشتمانی کوردستانیش لەگەڵیاندا، کە ئه‌م میحوه‌ره‌یان به پشت و په‌نای به‌رژه‌وه‌ندییه‌کانی ڕوسیا و چینییه‌کان پشت ئه‌ستورکردووە. هێنده‌ی ئەمانە هه‌لی سیاسیی ده‌قۆزنه‌وه ناتوانن کاریگه‌رییەکی سیاسییان هه‌بێت و چاوەڕوانی گۆڕانه خێرا و کتوپڕه‌کانن، دوور و نزیک ئه‌وانیش ده‌گرێته‌وه.
میحوه‌ری دووه‌مییش تورکیا و ئیسلامییه‌کانی ئاکه‌په ڕابه‌رایه‌تییان ده‌کات، پێک هاتووه له سعودی عه‌ره‌بی، ژه‌نه‌راڵه‌کانی میسری پاش موباره‌ک، له کوردستانیشدا پارتی دیموکراتی کوردستان، کە پشت ئه‌ستورن به ئه‌مه‌ریکا. زیاتر وه‌ک هێزێکی ئابوریی کاریگه‌ریی ده‌خه‌نه سه‌ر ڕووداوه‌کان، بەڵام ئەمانیش ناتوانن ڕاسته‌وخۆ جڵه‌وی ئه‌و هێزه چالاکه‌ی شه‌قامی سیاسیی بگرنه ده‌ست، ئەمانە زیاتر میحوەرێکه ده‌توانێت ڕووداوه‌کان که‌مێک دوابخات، به‌ڵام ئاڕاسته‌کانی بۆ ناگۆڕدرێت..
هێزی سێهه‌میان هێزی گه‌له و هێزێکی جه‌ماوه‌رییه، به‌ئاگا هاتۆته‌وه و له هاوکێشه سیاسییه‌کاندا قسه و هه‌ڵوێستی سیاسیی خۆی ده‌رده‌بڕێت، ده‌یه‌وێت به‌شداری سیاسیی ڕاسته‌وخۆ بکات له ناوچەکەدا، ئه‌م هێزه جه‌ماوه‌رییه نوێیه، جگه له هاوپه‌یمانی له‌گه‌ڵ ئۆپۆزیسیۆنه‌کانی دژ به‌ده‌سته‌ڵاتدا، تا ئه‌مڕۆ هێزێکی سرکه و دەستەمۆ نەکراوە، نایه‌وێت بکه‌وێته ژێر کاریگه‌ریی هیچ کام له‌و دوو به‌ره هه‌رێمی و جیهانییه‌وه. ئه‌مەیان هێزی گه‌له و له‌پاش سه‌ده‌یه‌ک له فەرامۆشکردن و په‌ڕاوێزخستنی گه‌ڕاوه‌ته‌وه گۆڕه‌پانی سیاسیی، دەیەوێت ده‌سته‌ڵاته ڕه‌ها و تۆتالیتاره‌کان و سیسته‌می سیاسیی باوی ناوچه‌که بگۆرێت.. ئه‌مه زه‌مینی سیاسیی و ئەو ساته مێژووه ڕاسته‌قینه‌‌یه، که ناوچه‌که و کوردستانی تیادا ده‌ژی...
ئێمه نازانین نه‌وشیروان مسته‌فا و ڕاوێژکاره‌کانی چۆن له ڕووداوه سیاسییه‌کان ده‌ڕوانن، به‌ڵام ئاگادارتان ده‌که‌ینه‌وه، بۆ مێژوو، بۆ خاتری له‌ده‌ست نه‌دانی ئه‌و ده‌رفه‌ته‌ی له‌به‌رده‌م گۆڕان و ژیانی سیاسیی کۆمه‌ڵگای کوردییدایه، که هه‌ر هه‌ڵه‌یه‌کی بچوکی سیاسیی له‌م ساته‌دا بکرێت، کە وەک دەیبینین ئێوە بەردەوام دەیکەن، ئەمە ده‌بێته مایه‌ی پاشکه‌وتنی دۆزی کورد و پرۆسه‌ی گۆڕانگاریی ڕیشه‌یی له کوردستاندا. ئه‌و دیدار و کۆبوونه‌وانه له‌گه‌ڵ پارتیی و سه‌رانی ده‌سته‌ڵاتی بیست ساڵه‌ی هه‌رێمی کوردستاندا، مانای ڕۆح پیاکردنه‌وه‌یه به جه‌سته‌ی سیاسیی و خیانەتکار و گه‌نده‌ڵ و په‌ککه‌وته‌ی ئه‌واندا، چونکه به‌ر له ئێمه خۆتان باشتر ده‌زانن، کە پارتی بەتایبەتی حیزبێکی خێڵه‌کییە و بنەماڵەی بارزانی، نیوسه‌ده زیاتره پرسی کوردی کردۆتە قوربانی بنه‌ماڵه‌کەی، هه‌ر ئاشتبونه‌وه و به‌شداریکردنێکی سیاسیی له‌گەڵ ئەمان و لە ناو ده‌سته‌ڵاتدا بۆ به‌ڕێوه‌بردنی کۆمه‌ڵگه‌ی کوردیی، مانای دواخستنی نیو سه‌ده‌ی دیکەیە له نشوستیی و ئاشبەتاڵی سیاسی و پاشاگه‌ردانی گه‌لی کورد.
به‌شێکی زۆری بزوتنه‌وه‌ی گۆڕان بۆیه له ده‌وری پرۆژه‌که‌ی ئێوه کۆبوونه‌تەوه و له‌گه‌ڵ ئێوە له یەکێتیی هاتنه ده‌ره‌وه، مه‌به‌ستیان هه‌ڵوێست وه‌رگرتن بوو له به‌رانبه‌ر ئه‌و هاوپه‌یمانییه بازرگانییه‌ی نێوان یەکێتیی و پارتی، که یەکێتیی ته‌سلیم به ئیراده و فه‌رمانه‌کانی بنه‌ماڵه‌ی بارزانی کرد، هه‌ر پێکهاتن و هاوپه‌یمانییه‌کی ئێوه‌ش هه‌مان ته‌سلیم بوونه به ئیراده و فه‌رمانه‌کانی بارزانی، چونکه ئاشکرایه بنه‌ماڵه‌ی بارزانی و پارته‌که‌یان هیچ کاتێک ئاماده‌نین، دۆسییه‌ی تاڵانکردنی سامانی کوردستان بکه‌نه‌وه، هه‌ر له سه‌رمایه بزر و خه‌فه‌کراوه‌که‌ی 1974 ه‌وه، که هه‌مووی موڵک و پاره‌ی به‌خشراو بووه به کورد تا ده‌ست به‌سه‌راگرتنی گومرگ و داهاتی کوردستان له 1991 بۆ 2003، بنەماڵەی بارزانی و پارتی ئاماده نیین به ئاشکرا به دواداچوون بۆ ئه‌و پرۆژه و پرۆتۆکۆله نهێنیانه‌ی نه‌وت و ڕێژه‌ی %17 ی بودجه‌ی هه‌رێم بکەن، به هه‌مان شێوه ئاماده نیین دۆسیه‌کانی ئاشبەتاڵی 1974 و کوشتاریی هه‌کاری و شه‌ڕی ناوخۆی تا 1986ی چیا و شه‌ڕی په‌که‌که‌ی 1992 و ناوخۆی 1994 تا 1998 و خیانه‌تی31ی ئاب و کوشتاری 17ی شوبات و تیرۆرکردنی رۆژنامه‌نووس و نووسه‌ران... هتد بکرێت.. پارتی ئاماده نییه هیچ کات نه چه‌کداره‌کانی، نه‌ده‌زگای به‌دناوی پاراستن، نه ئه‌و سه‌رمایه زۆره‌ی له سامانی میللەت کۆی کردۆته‌وه ته‌سلیم به حکومه‌ت و ده‌زگایه‌کی نه‌ته‌وه‌یی بکاته‌وه، چونکه کردنه‌وه‌ی هه‌رکام له‌و دۆسێیانه و لێسه‌ندنه‌وه‌ی هه‌رکام له‌و هێزه داگیرکراوانه له‌لایه‌ن بنه‌ماڵه‌ی بارزانییەوە، یه‌که‌م مانای: ئاشکرابونی ئابڕومه‌ندانه‌ی نهێنیه‌کانیانە، دووه‌م : مانای له‌ده‌ستدانی هێزی ناشه‌رعی مانه‌وه‌یان دەگەیەنێت. هه‌ر ڕێککه‌وتن و کارکردنێکی پارت و ڕێکخراوێکی سیاسیی کوردستان به‌ده‌ر له جێبه‌جێکردنی ئه‌و مه‌رجانه مانای خۆ به‌ده‌سته‌وه‌دانه به خواستەکانی بنه‌ماڵه‌ی بارزانی و پارته‌که‌یان، دیسان مانای پشتکردنه له به‌رژه‌وه‌ندیی گه‌لی کورد. هه‌میشه یاریه‌کانی ئه‌و خێڵه سیاسییه به سه‌رۆکایه‌تی بارزانی، یاریکردنە بۆ مل شکاندنی بەرامبەرەکەیان، ئەوان هه‌رگیز هاوپه‌یمانییه‌کیان نه‌به‌ستووه له ده‌ره‌وه‌ی به‌رژه‌وه‌ندی خۆیان. سه‌ردانی مه‌سعود بارزانی بۆ ئه‌و ده‌ڤه‌ره‌ی له 17ی شوباته‌وه چ شه‌رعیه‌تێکی سیاسیی و جه‌ماوه‌ریی نه‌مابوو، کۆبونه‌وه‌ی له‌گه‌ڵ ئێوه‌دا، وه‌ک ئۆپۆزسیۆن و سه‌رانی بزوتنه‌وه‌ی گۆڕان، ته‌نیا بۆ به‌ده‌ست هێنانه‌وه‌ی ئه‌و شه‌رعییه‌ته‌یه و هیچی تر، وه‌ک چۆن یەکێتیی له هێزێکی جه‌ماوه‌رییه‌وه کردە حیزبێکی بازرگان و شه‌ریکه گه‌نده‌ڵی خۆی، ئه‌وا ده‌یه‌وێت هێز و خواستی گۆڕنکاریی ئه‌و هه‌رێمه‌ی 17ی شوبات له ڕێگه‌ی سه‌رانی بزوتنه‌وه‌ی گۆڕانه‌وه بکاته شه‌ریکه به‌ش و زیاتر له یەکێتیی به ئێوه‌شی دەکات.
ئێمه لێره‌وه وه‌ک کوردستانپۆستییه‌کان، داوات لێده‌که‌ین، له زووترین کاتدا هه‌ڵوێست و ڕوونکردنه‌وه‌ی خۆتان بده‌ن له‌سه‌ر په‌یوه‌ندییتان به پارتی دیموکراتی کوردستان و بنه‌ماڵه‌ی بارزانی و ده‌سته‌ڵاتی ئیفلیجی کوردستان، ڕوون و ئاشکرا و به‌بێ ناردنی په‌یامی شه‌فه‌وی و ده‌ستی دوو، خه‌ڵکی کوردستان ئاگادار بکه‌نه‌وه، که له‌کام به‌ره‌وه ئێوە ده‌تانه‌وێت گۆڕانکاریی ڕیشه‌یی له کوردستاندا بکه‌ن؟ ئێمه لێرە بەدواوە و پاش ئەم ڕوونکردنه‌وه‌یه هه‌ڵوێستمان ڕاده‌گه‌یه‌نین، ئه‌و تاڵه موه‌ش ده‌پسێنین، که بزانین بزوتنه‌وه‌ی گۆڕان شه‌رعیه‌تی سیاسیی ده‌دات به ده‌سه‌ڵات و بنه‌ماڵه‌یه‌ک، کە له هیچ گۆشه‌یه‌کی یاسایی و سیاسییه‌وه شه‌رعییه‌تی نه‌ماوه.. ئێمە ئه‌وساکه ناچار ده‌بین وه‌ک به‌ره‌ی ده‌سته‌ڵات هه‌ڵوێست له‌به‌رانبه‌ر گرده‌که‌ش وه‌ربگرین.
کوردستانپۆست
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
