پارتی و محمه‌دی مه‌لا قادره‌كان به‌ره‌و كوێ ده‌رۆن
Friday, 05/04/2013, 12:00
ماوه‌یه‌كه محمه‌دی مه‌لا قادریش ، ده‌ستی به بۆله بۆل به‌رامبه‌ر به پارتی كردوه، هه‌ندێ ئاخافتن ده‌رده‌بڕێ ، كه ئه‌گه‌ر له‌و سه‌رده‌مه نه‌بێ هه‌رگیز وا ئیستا له‌ناو خه‌لكدا نه‌ده‌ژیا. به‌رزبونه‌وه‌ی ئه‌و ده‌نگه‌ش، به‌شی زۆری له ئازاره‌كانی ده‌رنه‌چونێتی له كۆنگره‌ی پارتی، كه ده‌بێ بڵێین، نابێ ئێمه به‌چه‌ند وته‌یه‌كی كۆتایی ته‌مه‌نی له هه‌موو تاوانه‌كانی بسرینه‌وه، ئاخر هه‌ر دوێنێ بوو به‌و پیریه‌وه ده‌یوت كوا پارتی كێی تیرۆركردیه؟ بۆیه قسه و ره‌فتاری هه‌ر به‌رپرسێک، که ئه‌مرۆ ده‌یكات ده‌بێته له‌كه به‌نیوچه‌وانیه‌وه. هاوكات به‌شی زۆری سیاسییه‌كانی پارتی و یه‌كێتی، وه‌ك هه‌ندێ له هاولاتیان لێهاتوه، به‌ر له مردن یان پیربوونیان، که ده‌چنه حه‌ج و نوێژ ده‌كه‌ن و ده‌ڵێین گه‌راینه‌وه بۆ قاپی خودا! یان وه‌ك هه‌ندێ خه‌لك بۆ فریودانی زیاتری خه‌لك نوێژ ده‌كه‌ن، به‌لام له ناخدا هه‌رگیز له‌گه‌ل یه‌ك وته‌ی قورئان یه‌ك ناگرنه‌وه
محمه‌دی مه‌لا قادر ، هه‌ندێ له په‌ره‌گرافی قسه‌كانی، باش و بوێری و ته‌قینه‌وه‌ی زیاتری ناره‌زایه‌تییه شاردراوه‌كانی پارتی نیشان ده‌دات، به‌لام له یادمان نه‌چێت، که محمه‌دی مه‌لا قادریش، هاوشێوه‌ی جه‌وهه‌ر نامق، ده‌ره‌نجامی سوكایه‌تی پێكردن ده‌بێت، کاتێک قسه‌ده‌كات بۆ خۆیه‌تیی نه‌وه‌ك بۆ ئازاری خه‌ڵك، كه بۆ كه‌سانی وه‌ك ئه‌و باشتره جگه له وازهێنان له پارتی، به‌وه‌ی نهێننینه زۆره‌كانی ئه‌م ده‌سه‌لاته و به‌رپرسه‌کان ده‌زانن باس بكه‌ن، تا سبه‌ی خه‌لك نه‌چێته سه‌ر گۆره‌كانیان نه‌فره‌تیان لێ بكه‌ن. من ده‌زانم ئه‌مرۆ به‌رپرسان به‌گشتی، مه‌ستی دۆلار و ده‌سه‌ڵاتی سیاسین، به ده‌سه‌لات و سه‌رباز و دۆلاری زه‌به‌لاح، که‌سیان لێده‌رناچێت که سبه‌ی له‌لاپه‌ره‌كانی مێژوودا ناویان به ناپاك و تاوانبار له‌هاوشێوه‌ی هیرباكۆس و مشیری حه‌مه تێده‌په‌رێ .
ئه‌وه‌ی وای كردوه به‌راشكاوی كه‌سێكی وه‌ك محمه‌دی مه‌لا قادر له‌ناو خودی پارتی وا قسان بكات، هاوشیوه‌ی (عه‌لی عه‌بدولا) جێگری سه‌رۆكی پێشوی پارتی، که سیداد بارزنی بۆی چووه ژوورێ و سوكایه‌تی پێی کرد تێشی هه‌ڵدا، ئه‌مڕۆش ئه‌و كه‌ش و هه‌وایه نوێیه‌یه كه پارتی به‌ده‌ستی خۆی له‌هه‌موو لایه‌ک چوارده‌وری خۆی كردۆته دژه خۆی، له‌مه‌ودوا ناتوانێ یان هه‌ر تاوانێک بكات وه‌ك سه‌رده‌می پێشوو، یان وه‌ک ئه‌و تاوانه‌ی به‌رامبه‌ر به بنه‌ماڵه‌ی فاخیر مێرگه‌سوری کردی بۆی بچێته سه‌ر، یان وه‌ک ئه‌وه‌ی که سه‌ركرده دیموكراته‌كانی باكورو رۆژهه‌لات و سه‌دان تێكۆشه‌ری سه‌ركرده‌ی وه‌ك ره‌ئوف ئاكره‌یی به‌ساده‌یی و بێ باجدانی سیاسی و جه‌ماوه‌ری و كاردانه‌وه‌ی جیهانی و ناوخۆیی تێنا‌په‌رێ ، به‌راده‌یه‌ك تا چه‌ند سالی تر محه‌مه‌دی مه‌لا قادر هه‌رچی به‌سه‌ر بێ، تۆمه‌ت وگومانی هاوشێوه‌ی ژه‌هر خواردنه‌كه‌ی جه‌وهه‌ر نامق له ملێ پارتی ده‌ئاڵێ.
1) 60 ساله پارتی به‌سه‌دان كه‌سایه‌تی تیرۆركردووه، به‌لام ئه‌مرۆ شه‌هید سه‌رده‌شت و سۆران بۆته مۆته‌كه و تارمایی له هه‌موو شوێنێ به‌دوای به‌رپرسانی پارتی و بارزانیه‌كانی ده‌سه‌لاته، ئه‌مه له‌كاتێكدا ئه‌و ده‌نگه جوانانه، كوره هه‌ژار و خاوه‌نی ته‌نیا قه‌ڵه‌م بوون، نه وه‌ك هه‌ردو سه‌رۆك دیموكرات (شڤان ئالچی و سولێمانی موعینی،.....) خاوه‌ن حزب، یان وه‌ك بنه‌ماله‌ی فاخیر مێرگه‌سوری و عه‌لی شه‌عبان و حسین ئاغای سورچی سه‌رۆك خێل بن. به‌لێ ته‌نیا هێزی ئه‌و دوو شه‌هیده نه‌مره ، له‌سه‌رده‌مێكدان ، كه نه‌وه‌یه‌كی وه‌ك خۆیان به پێنوسه‌كانیان بونه‌ته هێزێ ٦٠ساله‌ی پارتی و یه‌كئتی و جه‌لالی و مه‌لایی ده‌هاڕن و په‌رده هه‌ڵده‌ده‌نه‌وه له تاوان و ناپاكیه‌كانیان، رۆژانه تا بێت زیاتر ده‌بن، كه‌مه‌حاله تازه ئه‌و سه‌رده‌مه بگه‌رێته‌وه ، نه قه‌له‌مه‌كان بێ ده‌نگ بكرێن، نه‌خۆشیان مه‌غول ئاسا سیاسه‌ت بکه‌ن، بگرن و بكوژن له‌و لاشه‌وه خه‌لك ته‌نیا به فسكه فسك له ماڵه‌وه قسه بكات.
2) بونی چه‌ندین مینبه‌ری تێڤی و راگه‌یاندن له ده‌ره‌وه و ناوه‌خۆ كه ده‌توانێ كۆمه‌لگا له تاوانه‌كان ئاگاداربكاته‌وه بێ ئه‌وه‌ی بتوانرێ هیچ رێگریه‌ك بكرێ، ئه‌م هێزه راگه‌یاندنه زه‌به‌لاحه هه‌مه‌ره‌نگه، به‌دوای هه‌ڵه و تاوانێكی نه‌وه‌ك ئیستا به‌لكو كۆنی ئه‌و دوو پارته و به‌رپرسه‌کانیشه‌وه‌ن، له تیرۆرو ئه‌شكه‌نجه و رفاندن ، به‌راده‌یه‌ك ئیستا هه‌ر له‌سه‌ر ده‌نگه جوانه‌كان، ته‌نانه‌ت كه‌سانی وه‌ك (كارزان كه‌ریم و سه‌ید ئه‌كره‌م) كه ئه‌ندامی ده‌زگای ئاسایشی خۆیانن، یان ئیسلامیه سیاسیه بێ تاوانه‌كان ، ده‌گیرێن كاردانه‌وه‌ی جیهانی و ناوخۆیی لێ دێته ئاراوه. ده‌بێ ئه‌وه‌ش بڵێین ئه‌وه‌ی دوێنی ده‌یان گوت و ده‌وترا خه‌لك به‌بوێرانه ئازاره‌كانی به‌رامبه‌ر ئه‌و ده‌سه‌لاته ده‌رده‌بڕی ئه‌مرۆ له‌زۆر مالپه‌ر و تێڤێكان به‌ناوی ده‌نگی خه‌لك و كۆمێنت نووسین ده‌رگای ئه‌و ئازار و ریسواكردنی به‌رپرسان كراوه‌ته‌وه.
3) پارتی به‌هۆی كۆنترۆلكردنی جومگه سه‌ره‌كیه‌كانی ده‌سه‌لات (سه‌رۆكایه‌تی هه‌رێم ، سه‌رۆكایه‌تی حكومه‌ت، سه‌رۆكایه‌تی ده‌زگای ئاسایش ... هه‌روه‌ها به ته‌ها محێدینكردنی به‌رپرسانی یه‌كێتی، قورسایی و هه‌موو كاره ناشیرین و مه‌ترسیه‌كانی نیشتمان و شكسته سیاسیه یه‌ك له دوای یه‌كه‌كانی به‌رامبه‌ر به‌غدا به‌سه‌ر ئه‌ودا شكاوه‌ته‌وه و به‌مه‌ش ناره‌زایه‌تیه‌كانی جه‌ماوه‌ریش ئاراسته‌ی ئه‌و بووه به‌تایبه‌تی له ته‌قه‌كردنی له‌خه‌لك له ١٧ شوبات و بوار نه‌دانی به خۆپیشاندان له شاری هه‌ولێر.
4) گه‌رچی یه‌كێتی به‌گشتی و باڵێكی كاریگه‌ری به‌تایبه‌تی له‌وانه‌ی له‌میدیاكان باسكرا (كۆسره‌ت ره‌سول و باله‌كه‌ی ، عماد ئه‌حمه‌د و شیخ جه‌عفه‌ر و ..... له‌گه‌ل درێژه‌دانه له به كۆیله‌بوون به‌سیاسه‌ته‌كانی پارتی، به‌لام ئه‌مه كاتیه، چونكه مه‌حاله هیچ هیز و كه‌سایه‌تییه‌ك، تازه بتوانێت له‌یه‌ك ترازان، یان خه‌ریك بوونی كێشه ناوخۆییه‌كانی به‌رپرسانی یه‌كێتی له‌ململانێی سیاسی و ئیداریی بوه‌ستێنێت، چونكه نه‌‌كۆسره‌ت نه هیڕۆ نه نه تاله‌بانی ناتوانن ئه‌مه رابگرن. بۆیه زوو یان دره‌نگ ته‌قینه‌وه و ململانێكان ده‌رده‌كه‌ونه‌وه وه‌ك دلۆپه‌كردنی خانوو له لایه‌كه‌وه سواقی ده‌ده‌ی له‌لایه‌كی تر دێته خوارێ، گه‌رچی كه‌سانێک گره‌و له‌سه‌ر ئه‌وه ده‌كه‌ن كه یه‌كئتی له كۆنه‌وه فره مینبه‌ر و بیرورا بووه، به‌لام ئه‌وه‌ی كۆن ئه‌و فره ره‌نگیه‌ی رایگرتبوو، تاراده‌یه‌ك بیروباوه‌ر و قۆناخی شۆڕش و تاڵه‌بانی بوو، به‌لام ئیستا شه‌ره دۆلار و پرۆژه و كورسی و كاری سیخوری و ده‌گه‌وه‌شاندن له یه‌كتره، مه‌حاڵه كه‌سیان بتوانن یه‌كێتی له ژێر ئه‌و چه‌تره‌ی ئیستا رابگرن، ده‌بێ كۆسره‌ت و هێرۆ له‌و خه‌ونه حوشتریه بۆخۆیان به ئاگا بێن بۆیه زوو یان دره‌نگ به‌شی زۆری جه‌ماوه‌ری یه‌كێتی و كادیره‌كانی یه‌كێتیش سه‌نگه‌ر له‌پارتی و یه‌كێتیه پارتیه‌كان ده‌گرن، چونكه ئه‌و جه‌ماوه‌ره‌ی یه‌كێتی، گه‌رچی ئه‌مرۆ له نێو ده‌ستكه‌وتی پله و پایه ویژدانی زۆریان دۆراوه به‌ر فراوانی نارازی به‌رامبه‌ریان هه‌یه كه وا ده‌كات به ته‌واویی به‌ره فراوان بێت و ئه‌م ده‌سه‌ڵاته شلۆق بکه‌ن..
5) پكك ئه‌مرۆ هێزێكه تاراده‌یه‌كی زۆر كۆنترۆلی سێ به‌شی كوردستانی گه‌وره‌ی له‌گه‌ل ئه‌وروپا كردوه ، ئه‌م هیزه رۆژ له‌دوای ڕۆژ هه‌رچی بكات رووبه‌روی پێكادانی سیاسی و ململانێ له‌گه‌ل پارتی ده‌بێته‌وه ، هه‌نگاوه‌كانی ئێستاش هه‌ست پێ ده‌كرێ كه په‌یوه‌ندی و جۆرێ له‌سنوردانانی پارتی له‌نێوان پكك و گۆران و تاراده‌یه‌ك باڵی یه‌كێتیش هه‌یه ، بۆیه ده‌بینین، هێزێكی وه‌ك پارتی هیچ دۆستێكی سیاسی نه‌ماوه تاراده‌ی ئه‌وه‌ی ئیسلامیه‌كانیش له‌ترسی جه‌ماوه‌ره‌كه‌یان ناوێرن له پارتی نزیك ببنه‌وه، دۆسته‌كانی پارتی ئیستا جگه له چه‌ند پارتێكی كارتۆنی هاوشیوه‌ی خالید به‌گداش و هاشم عه‌قراوی یان ولاتێكی وه‌ك توركیا هیچی تر نییه، ئه‌مانه‌ش هه‌موی كاتیه، چونكه ته‌نیا جه‌ماوه‌ر كارتی گه‌وره‌ی سه‌ركه‌وتنه، كه‌چی پارتی به‌رامبه‌ر هه‌موو خه‌لكی ناڕازی له‌ده‌سه‌لات ، پارته ئاكتیڤه‌كانی كوردستان، رووداوه‌كانی ناوچه‌كه، ئاستی به‌رزبونه‌وه‌ی هوشیاری خه‌لك ... كه‌وتۆته ململانێ، مه‌حاله پارتی و یه‌كێتی و پارتیه‌كان له‌و هه‌نگاوه به‌و بارودۆخه‌ی ئیستا هه‌یانه ده‌ربچن، له شوێنێكا ده‌پسێن، ئیتر هه‌ر به‌رپرس و ده‌سه‌لاتێك به شێوه‌یه‌ك مێژوو لولی بدات مانه‌وه‌ی مه‌حاڵه، وه‌ك ره‌زا شا و موباره‌ك و بن عه‌لی به شۆرش، یان وه‌ك سه‌دام و هیتله‌ر و مۆسلینی به شه‌ر، هه‌روه‌ها وه‌ك سیسته‌می سۆسیالستی رۆژهه‌لات و سۆڤیه‌ت به پێگه‌یشتن و به‌رگه‌نه‌گرتنی زیاتری هه‌له و پێداویستیه مێژویه‌كان ده‌روخێت، یان وه‌ك بیری كه‌مالیزم له توركیا وا ده‌یبینن له ره‌گه‌وه رووداوه‌سیاسیه‌كان و وئیراده‌ی كورد هه‌لی ده‌ته‌كێنێ.
پارتی هه‌رچ هه‌وڵێک بدات، ناره‌زایه‌تیه‌كان له دژی زیاتر ده‌بێ و محه‌مدی مه‌لا قادره‌كانیش نمونه‌ی زۆرتر ده‌بێ، پارتیش هه‌رچی بكات تازه قۆناخه‌كانی ئیبن خه‌لدون پۆلین رێژكردنی كه ده‌لێ بۆ هه‌موو كه‌سایه‌تی و ده‌وله‌تێ سێ قۆناخ هه‌یه (منال، گه‌نج، پیر) پارتی كه ئیستا له‌قۆناخی پیریدایه و مالئاواییه به‌و ئه‌قلهی ده‌ژی و ره‌فتار ده‌كات، بۆیه ده‌نگه ناره‌زایتیه‌كان كپیش ببته‌وه سه‌رهه‌لده‌داته‌وه وه‌ك سه‌دام و كه‌مالیزم كه هه‌رچیان كرد له دوا ده‌ره‌نجامدا هه‌ر كورد بردییه‌وه و ده‌باته‌وه چونكه ئه‌وه‌ی له‌گه‌ل پێشكه‌وتنی میژوو و پێداویستی خه‌ڵك نه‌روات میژوو لولی ده‌دات و ریسوای ده‌كات ، گه‌ر به‌پاره و زه‌بروزه‌نگ بوایه هه‌رگیز هیتله‌ر و ناپلیۆن نه‌ده‌روخان
ده‌شزانم پارتی وا سانا نییه و به‌رده‌وام ده‌ست بۆ هه‌ندێ كارتی مه‌ترسیدار ده‌بات كه له ئه‌قلی خه‌لكدا نییه چونكه هێزێكه له هیچ تاوانێک به‌رامبه‌ر گه‌له‌كه‌ی سڵ ناکاته‌وه، به‌لام جگه له جیاوازی سه‌رده‌مه‌که، زۆربه‌ی كاته‌كان هۆكاری له‌ناو چونی دیكتاتۆره‌كانه له نێو گه‌لان به‌گشتی و كورد به‌تایبه‌تی له‌بێ ئه‌قلی داگیركه‌ر و دوژمنانمان ده‌ستكه‌وته‌كانیش به‌ده‌ست هاتووه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
