روونکردنه‌وه‌ی کوردستانپۆست له‌سه‌ر تیرۆرکردنی سه‌رده‌شت عوسمان
Friday, 17/09/2010, 12:00
به‌دوای روونکردنه‌وه‌کانی پێشوومان له‌سه‌ر تیرۆرکردنی سه‌رده‌شت عوسمان، که په‌یامنێری کوردستانپۆست بوو له هه‌ولێر، هه‌روه‌ها به‌هۆی ئه‌و راگه‌یاندنه‌ی، که له‌لایه‌ن لێژنه‌ى لێكۆلینه‌وه‌ى تایبه‌ت به دۆسیه‌ى رایانگه‌یاند، به پێویستیی ده‌زانین ئێمه‌ش هه‌ڵویست و روونکردنه‌وه‌ی خۆمان له‌و چه‌ند خاڵه‌ی خواره‌وه‌دا ئاشکرابکه‌ین:
یه‌که‌م:رۆژی 06 - 05 2010 ته‌رمی رۆژنامه‌نووس سه‌رده‌شت عوسمان له موسڵه‌وه هێنرایه‌وه هه‌ولێر، پاش ئه‌وه‌ی به ده‌موچاو و له‌شییه‌وه جێگای لێدان و برینداریی پێوه‌بوو، دوو سێ گولله‌ش به ده‌مییه‌وه نرابوو. سه‌رده‌شت عوسمان خوێندكاربوو له به‌شی زمانی ئینگلیزی له كۆلێژی ئادابی زانكۆی سه‌ڵاحه‌دین، له هه‌مانکاتدا په‌یامنیری کوردستانپۆست بوو، که چه‌ندین هه‌واڵی هه‌ستیاریی بۆ ناردووین، له‌به‌ر لێکه‌وتنه‌وه‌ی کێشه‌ی سیاسیی زیاتر، ئێمه به نهێنی هێشتوومانه‌ته‌وه. مانگێک به‌ر له ته‌واوبوونی خولی خوێندن، واته له رۆژی سێشه‌ممه 4 / 5 / 2010 له به‌رده‌م كۆلێژه‌كه‌یدا، سه‌رده‌شت به به‌رچاوی زیره‌فانیی و ئاسایشی ناو زانکۆ، له‌لایه‌ن پاراستنه‌وه، رفێنرا.
هۆکاریی رفاندن و تیرۆرکردنه‌که‌ی ئاشکرایه، که په‌یوه‌ندیی به‌و نووسینه‌وه بوو، که له کوردستانپۆستدا به‌ناوی (من عاشقی کچه‌که‌ی بارزانییم) بڵاوی کرده‌وه. ئه‌و نووسینه ده‌توانرێ بووترێ، که ساتیرێکی سیاسیی بوو، نه‌ک سووکایه‌تیی کۆمه‌ڵایه‌تیی. نووسینی بابه‌تیی ئاوا و ره‌خنه‌گرتن له سیاسیی وکه‌سایه‌تییه ناوداره‌کان به‌شێکه له دیارده‌ی ئازادیی و کۆنتڕۆڵکردنی هه‌ڵسوکه‌وتی ئه‌و که‌سایه‌تییانه. هه‌ر ده‌سه‌ڵاتێک رێگریی له‌و دیارده‌یه بکات، ناتوانێت لافی دیموکراتیی و ئازادیی لێبدات. ده‌سه‌ڵاتیی کوردیی ئه‌و ده‌سه‌ڵاته‌یه که به ڕواڵه‌ت بانگه‌شه‌ی ئازادیی ده‌ربڕیین و کاریی رۆژنامه‌گه‌ریی ده‌کات، ده‌نا پیستر و گه‌نده‌ڵترین ده‌سه‌ڵات، له جیهاندا بوونی هه‌بێت ئه‌م ده‌سه‌ڵاتیی کوردییه‌یه، که ئه‌ندامانی سێ بنه‌ماڵه، وا به‌سته به داگیرکه‌ر و دوژمانیی کورد، به‌ڕیوه‌ی ده‌به‌ن.
پێش ئاشکرابوونی ناسنامه‌ی سه‌رده‌شت عوسمان، به ناوی (سه‌رۆ)وه ده‌ینووسی، له‌و نووسینه‌وه سه‌رۆ بووه جێگای سه‌رنجڕاکێشانی پاراستن و به‌دوایدا ده‌گه‌ڕان، تا بیدۆزنه‌وه. تاکه رێگایه‌ک بۆ دۆزینه‌وه‌ی ناوی راسته‌قینه‌ی سه‌رۆ، سایتی کوردستان نێت بوو. ئه‌م سایته به پێچه‌وانه‌ی زۆر ماڵپه‌ڕ، ستافێکی نییه، ته‌نها که‌سێک به‌ڕێوه‌ی ده‌بات، واته هه‌ر نهێنییه‌ک هه‌بێت له‌و که‌سه زیاتر ده‌رناچێته ده‌رێ، به‌ڵام هه‌ندێ نووسه‌ر و که‌سی نزیکی خۆی، کۆدی ئه‌دمینیان پێیه، جارجاره بابه‌تی خۆیان داده‌به‌زێنن، یه‌کێک له‌وانه کچ و زاوای خاوه‌نی کوردستان نێته. برای زاواکه‌ی دانیشتووی وڵاتێکی ئه‌وروپییه و وه‌ک زانیارییان پیداوین سه‌ر به پاراستنه. ئه‌و که‌سه به‌ناوی کچه‌که‌ی عومه‌ر فارسه‌وه (X عومه‌ر) وه‌ڵامێکی سه‌رده‌شتی دایه‌وه به‌ناوی (وه‌ڵامێك بۆ نوسه‌ره جنێوفرۆشه‌كه‌ی كوردستان پۆست ...)، به‌ڵام به‌ماوه‌یه‌کی کورت کاک عومه‌ر فریا که‌وت و ناوه‌که‌ی گۆڕی و کردی به (ئه‌ڤین عومه‌ر). ئه‌و زانیارییه ده‌مێکه به ئێمه دراوه، به‌ڵام له‌به‌ر ئه‌وه‌ی زوو له کاتیی خۆیدا فریا نه‌که‌وتووین تا ئه‌و ناوه ببینین، ناتوانین پێ له‌سه‌ر ئه‌وه دابگرین، هیوادارین خاوه‌نی ئه‌و سایته روونکردنه‌وه‌یه‌ک بدات، ئه‌گه‌ر ناڕاستیی و نادرووستییه‌کی تێدایه، ئێمه داوای لێبوردنی لێده‌که‌ین، له‌گه‌ڵ ئه‌وه‌شدا ئێمه به‌ڵگه‌ی دیکه‌مان به‌ده‌سته‌وه‌یه، که له گۆڕینه‌وه‌ی نامه‌ی نێوان کوردستان نێت و سه‌رده‌شت عوسماند، که خاوه‌نی ئه‌و ماڵپه‌ڕه داوای ناوی راسته‌قینه و وێنه‌ی سه‌رده‌شتیی له خۆی کردووه، ئه‌مه له کاتێکدا ئه‌و داخوازییه له ئه‌ڤین عومه‌ر نه‌کراوه، تا ئیستاش نازانرێت ئه‌و که‌سه کێیه که ناوی سه‌رده‌شت عوسمانی بۆ ده‌زگای پاراستن ئاشکرا کردووه؟ ئێمه ئه‌مه جێده‌هێڵین و ده‌چینه سه‌ر باسێکی تر، ئه‌وه‌نده ده‌ڵێن که ئه‌م کاره به خۆڕایی ناکرێت.
دووه‌م:له کۆتایی مانگی شه‌شدا ئه‌ندامێکی کوردستانپۆست سه‌ردانی هۆڵه‌ندای کرد، له‌گه‌ڵ خۆیدا ئه‌و به‌ڵگانه‌ی پێویسته بۆ لێکۆڵینه‌وه و بانگردنی خاوه‌نی کوردستان نێت، بردییه به‌رده‌م پۆلیسی ئه‌و گه‌ڕه‌که‌ی که ئه‌و لێی داده‌نیشێت. وه‌ک ئاگادارکراوینه‌ته‌وه، وه‌ڵامدانه‌وه و گه‌یشتن به‌ئه‌نجامی شکاته‌که‌مان کاتیی زۆری پیده‌چێت. ئێمه راوێژکارێکی یاساییمان له هۆڵه‌ندا هه‌یه، ئه‌و پێی راگه‌یاندین که له‌وه زیاتر هیچ قسه و روونکردنه‌وه و زانیارییه‌ک نه‌به‌ینه نێو راگه‌یاندنه‌کان، چونکه مه‌سه‌له‌که جگه له پرۆسه‌ی به‌ڕیوه‌بردنێکی یاسایی، سیاسییشه. بۆیه له نووسینی ئه‌م روونکردنه‌وه‌یه‌دا ئێمه ئه‌و خاڵه به به‌رچاو ده‌گرین.
سێیه‌م: کاتێک ناوی سه‌رده‌شت عوسمان، بۆ پاراستن ئاشکراده‌بیت، بۆی ده‌که‌ونه بۆسه‌وه، له ماوه‌ی چاوار مانگدا چاودیری ماڵ و شوێنی هاتوچۆ، ئه‌و کۆلیژه‌ی لێده‌خوێنێت بست به بستی کۆنترۆڵ ده‌که‌ن، سه‌رده‌شت خۆی هه‌ست به‌مه ده‌کات، ئێمه‌شی ئاگادارکردبووه و له نووسینه‌کانی دواییاندا باسیش له هه‌ڕه‌شه‌ی کوشتن و مه‌ترسیی بۆ سه‌ر ژیانی ده‌کات.
چواره‌م:دۆزینه‌وه‌ی ته‌رمی سه‌رده‌شت له شاری موسڵ و راگه‌یاندنه‌که‌ی لێژنه‌ى لێكۆلینه‌وه، ده‌مانگه‌یه‌نێته راستییه‌ک، ئه‌ویش ئه‌وه‌یه، که هه‌ر له‌سه‌ره‌تاوه پاراستن پلانی ئه‌وه‌ی داناوه که تاوانیی تیرۆرکردنه‌که بداته پاڵ (انسار الاسلام). له چاو شاره‌کانی تری عێراق و هه‌رێمی کوردستان، گروپی جند الاسلام زۆرترین چالاکییان هه‌یه، هه‌ر بۆ ئه‌وه‌شه ئه‌مان شاری موسڵیان کرده نیشان، تا له‌وێ سه‌رده‌ست بکوژن و انسار الاسلامی پێ تاوانبار بکه‌ن، ئه‌مه نهێنی شوێنی تیرۆرکردنه‌که‌ی سه‌رده‌شتمان بۆ ئاشکرا ده‌کات، ئه‌گینا هه‌ر ئه‌و رۆژه‌ی سه‌رده‌شتیان له‌به‌ر ده‌می زانکۆدا فڕان، ده‌یان توانی سه‌ره‌ونگومی بکه‌ن، ئیستاشی له‌سه‌ر بێت ته‌رمه‌که‌ی ئاشکرانه‌که‌ن، به‌ڵام ئه‌وان ویستییان لایه‌نێکی تری پێ تاوانبار بکه‌ن، ئه‌و پلانه‌ش زۆر به ساده‌یی و ساکارانه داڕێژراوه، ئه‌قڵێکی وریا و زیره‌ک له پشتییه‌وه نه‌بووه. له رۆژی رفاندنه‌که‌دا ئه‌و سه‌یاره‌یه‌ی که سه‌رده‌شتیان تێفڕێ داوه، به‌بێ وه‌ستان به‌ره‌وه سه‌ری ڕه‌ش براوه، سه‌رده‌شت له‌گه‌ڵ مه‌سروری کوڕی مه‌سعود بارزانییدا به‌ره‌و روو بۆته‌وه و ده‌ستی کردووه به جنێوپێدانی سه‌رده‌شت، هه‌رچییه‌کی وتووه ئه‌ویش پێی وتۆته‌وه، هه‌ر سووکایه‌تییه‌کی پێکردووه ئه‌میش پێی کردۆته‌وه، ته‌نانه‌ت که لێشی داوه، ئه‌میش هێرشی کردۆته‌وه سه‌ری، پاسه‌وانه‌کی مه‌سروریش لێیان داوه. هه‌روه‌کو پلانی کوشتنه‌که، که موسڵیان بۆ هه‌ڵبژاردووه، له جێوه سه‌رده‌ست نه‌کوژراوه، به‌ڵام سه‌یاره‌یه‌کی تر، که ئه‌فسه‌رێکی به‌رزی نیوه بارزانیی (واته یه‌کێک له دایک و باوکی بارزانیی بووه، نه‌ک له بنه‌ماڵه‌ی مه‌سعود) ئه‌و له‌گه‌ڵ خۆیدا بردوویه‌ته‌وه بۆ موسڵ و به‌و هه‌موو بازگه‌یه‌دا بێ وه‌ستان ده‌ربازی کردووه، که‌س سه‌یاره‌که‌ی نه‌پشکنیوه. دیسان ئه‌و بارزانییه، بردوویه‌ته ژووره‌که‌ی خۆی و ئه‌ویش ده‌ستی کردووه به جنیودان و سه‌رده‌شتیش به‌و هیلاک و ماندووبوویه و برسێتییه، قسه‌ی خۆی پێ گووتۆته‌وه، ئه‌و ئه‌فسه‌ره بارزانییه‌ش کردوویه‌ته نامه‌ردیی و سێ فیشه‌کی ناوه به‌ده‌میه‌وه. دوای ئه‌وه به‌و شه‌وه بردویانه و فڕێیان داوه. وه‌کو بیستوومانه‌ته‌وه به‌شێک له‌و رووداوانه به کامێرا و به ڤیدیۆش گیراوه.
ئێمه به کورتیی و به‌بێ ناوهێنانی تاوانباره‌کان و له‌سه‌ر قسه‌ی ئه‌و راوێژکاره یاساییه، ناوه‌کان ئاشکراناکه‌ین، به‌ڵام لێره‌وه ده‌ڵێین ک ه‌مه‌سعود بارزانی، مه‌سروری کوڕی، عیسمه‌ت ئه‌رگووشی و (ئـ. ب.) تاوانباری یه‌که‌من له پلان و تیرۆرکردنی سه‌رده‌شت عوسمان. هیچ موتیڤێکیش نییه که انسار الاسلام یان لایه‌نێکی تر سه‌رده‌شتی تیرۆرکردبێت.
پێنجه‌م:سه‌رده‌شت عوسمان که‌سێک و نووسه‌ر و رۆژنامه‌نووسێکی عیلمانیی بووه، نوێژکه‌ر نه‌بووه، رۆژووی نه‌گرتووه، وه‌کو مه‌سعود بارزانی له رۆژانی هه‌ینییدا نه‌چۆته مزگه‌وت. له دوور و نزیکه‌وه په‌یوه‌ندیی به هیچ گروپ و حیزبێکه‌وه نه‌بووه، نه‌خوازا ئیسلامییه‌کان.
شه‌شه‌م: ئه‌و راگه‌یاندنه‌ی لێژنه‌ى لێكۆلینه‌وه که تایبه‌ته به دۆسیه‌ى سه‌رده‌شت عوسمان دروست کراوه و هیچی راست نییه. ئه‌م سه‌رنجانه‌ی خواره‌وه‌مان له‌سه‌ری هه‌یه:
1- لیژنه‌که نه‌ناسراوه و که‌س نازانێت کێن؟.
2- وه‌ک به‌ناوه‌رۆکی راگه‌یاندنه‌که‌دا ده‌رده‌که‌وێت، ئه‌وانه‌ی له‌ناو لیژنه‌که‌دان، که‌سانی شاره‌زا و زیره‌ک و خاوه‌ن ئه‌زموون نیین. زمانی نووسینه‌که‌یان ناته‌واوه و هه‌ره‌مه‌کیانه داویانه‌ته به‌ری و چیرۆکیان هۆنیوه‌ته‌وه.
3- خاوه‌نی ئه‌و وێنه‌یه که گوایه ناوی (هشام محمود اسماعیل)ه، وه‌ک به وێنه‌که‌دا ده‌رده‌که‌وێت ته‌مه‌نی زیاتره له 28 ساڵه، سیامای ده‌موچاوی له فیته‌ر ناچێت، به‌ڵکو به دابه‌سته‌یه‌کی بێکاریی که‌ته‌ی خواردن زۆرخۆر.
4- چاوی کوڕه‌که شاردراوه‌ته‌وه، ده‌بوو ئه‌و لیژنه‌یه ئه‌گه‌ر راستگۆبوونایه، به ئاشکرا ئه‌و که‌سه‌یان بهێنایه‌ته سه‌ر ته‌له‌فیزیۆن، هه‌ر وه‌ک دروستکردنی سیناریۆکه‌ی شێخ زانا، ئه‌میشیان وا به‌ڕیوه‌ببردایه. مادام به قسه‌ی خۆیان ئه‌و که‌سه تاوانباره نه‌ده‌بوو چاوی بشارێته‌وه.
5- ئه‌و لیژنه‌یه بێلایه‌ن نییه و سه‌رۆکی هه‌رێم بۆ خۆی دروستی کردووه، په‌رله‌مانی کوردستان و نیوه‌ی حکومه‌ته‌که‌ی هه‌رێم که یه‌کێتیی نیشتیمانی کوردستانه، ئاگادار نییه.
6- ئه‌و لیژنه‌یه له‌سه‌ر هیچ به‌ندێکی یاسایی پێک نه‌هێنراوه و مه‌رجه‌کانی به‌ڕیوه‌بردنی یاسایی نایگرێته‌وه.
7- ئه‌و لیژنه‌یه ئاماژه‌ی به راپۆرتیی خه‌سته‌خانه و چۆنێتیی تیرۆرکردنه‌که نه‌کردووه، وه‌ک له هه‌موو وڵاتێکی یاسادا چاوی لیده‌کرێت.
8- لێکۆڵینه‌وه و قسه‌کانی ئه‌م لیژنه‌یه پێچه‌وانه‌ی هه‌موو زانیارییه‌کانی رابردووه، که له ماوه‌ی چه‌ند مانگی رابردوودا خۆیان باسیان لێوه‌ده‌کرد.
حه‌وته‌م:هه‌روه‌کو له روونکردنه‌وه‌یه‌کی پێشووماندا رامانگه‌یاند، که‌وا به‌پێی ئه‌و مه‌رجانه‌ی دامان ناوه، ئێمه ئاماده‌ین بگه‌ڕێینه‌وه بۆ کوردستان و به‌شداریی ئه‌و لیژنه بێلایه‌نه بکه‌ین و که‌سانی پسپۆڕ و شاره‌زاش ئاماده‌یی خۆیان پیشانداوه هاوبه‌شی به‌دواداچوونی که‌یسی تیرۆرکردنی سه‌رده‌شت عوسمان بکه‌ن.
هه‌شته‌م:دیسان ئێمه داواده‌که‌ین، مه‌سرور بارزانیی، ره‌زامه‌ندی خۆی پیشان بدات، که ئێمه وه‌کو چاوپێکه‌وتنێک له‌گه‌ڵیدا ده‌که‌ین و چه‌ند پرسیارێک سه‌باره‌ت به تیرۆرکردنی سه‌رده‌شت عوسمانی ئاڕاسته ده‌که‌ین. ئه‌گه‌ر ئه‌وان خۆیان به‌بێ تاوان ده‌زانن، با به‌ره‌وه روو بێته‌وه و ئه‌و چاوپێکه‌وتنه قبوڵ بکات.
کوردستانپۆست
هه‌ندێک له سه‌رچاوه و بابه‌ته‌کانی رابردوو:
ئاگادارییه‌ک له کوردستانپۆسته‌وه سه‌باره‌ت به تیرۆرکردنی سه‌رده‌شت عوسماننامهیهکی کراوه بۆ خاوه‌نی ماڵپه‌ڕی کوردستان نێت!له کوردستان نێته‌وه یه‌که‌م هه‌ڕه‌شه‌ی تیرۆرکردنی سه‌رده‌شت عوسمان ده‌ستی پێکرد
به‌مزوانه كوردستانپۆست داوای یاسایی له سه‌ر عومه‌ر فارس به‌رپرسی كوردستان نێت تۆمار دهكاتلێژنهى لێكۆلینه‌وه بکوژه‌کانی سه‌رده‌شت عوسمان ئاشکرا ده‌کات، که ناویان (ئا ئا) و (ئا میم)ه
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
