خانوه ته‌نه‌که‌کانی مزگه‌وتی گه‌وره
Tuesday, 11/06/2013, 12:00
حه‌فتاکانی سه‌ده‌ی ڕابردوو بوو، زستان به‌هه‌موو هێزیه‌وه ڕووی له‌م شاره کردبوو، باڕه‌شه شێته‌که‌ی شار ده‌روازه‌ی بۆ ئاوه‌ڵه ببوو ، به‌فر چه‌ند ڕۆژێک بوو باری بوو، باوکم پیاوێکی نورانی له‌به‌فر بۆ دروست کردین و دوو کڵۆ خه‌ڵوزمان لەتەنورە هێناو له‌چاوه‌کانیمان چه‌قاند و گێزەرێکی سوری تۆخیشان کرد بەلووتی، خوشکه بچکۆله‌که‌شم له‌چکه گوڵدارەکەی خۆی کرده ملی . ئه‌وپیاوه‌نورانیەمان له‌حه‌وشه‌که جێهێشت و بۆخۆمان له‌په‌نجه‌ره نزمه‌که‌وه سه‌یرمان ده‌کرد ، بیرەمە ئەو شەوە کە مانگەشەوبوو ناو حەوشە بچکۆلەکەمان وەک ڕۆژی ڕووناک وابوو بۆ یە لەپەنجەرە نزمەکەوە هەموو جارێک لەدڵنیابوونی پیاوە نورانێکەمان دەڕوانی داخۆ ماوە یان حەوشی ماڵەکەی جێ هێشتووین ، بۆ بەیانی دیمان چۆن ڕیشۆڵه‌و چۆله‌که بزێوه‌کان له‌سه‌ر سه‌ری هه‌ڵده‌نیشتن و بەدەنوک خەریکی ڕنینەوەی دەم و چاوی بوون .
دایکم بۆڵه بۆ ڵی بوو دەیووت بەلۆعەی ئاوه‌که به‌ستوێتی و ئاومان نی یه ، له‌سه‌ر ئاگر دانه‌که مه‌نجه‌ڵێکی دانابوو . به‌سه‌تڵێک به‌فری حه‌وشه‌که‌ی ده‌هێناو له‌مه‌نجه‌ڵه‌که‌ی ده‌ناو ده‌توایه‌وه،من بیرم له‌وه کرده‌وه ئه‌گه‌ر وابڕوات تائێوارە ، پیاوه نورانێکه‌ش سه‌ره‌ی دێت، بۆ نه‌چین ئاو بێنین له‌مزگه‌وتی گەورە ؟ هه‌رچه‌ند دایکم ووتی سه‌رماتان ده‌بێت به‌ڵام گوێمان پی نه‌دا و ڕۆشتین ، ماڵمامان له‌شه‌قامی مه‌وله‌وی بوو که‌به‌لای ده‌بۆکه‌دا ڕۆشتین ڕوه‌و سه‌ره‌وه باکه خه‌ریک بوو هه‌ڵمان گرێ ، داروو به‌رد به‌ستبووی و ببوه شه‌خته، له زۆربه‌ی بنمیچه‌کانه‌وه چلوره هاتبۆ خواره‌وه ، شه‌قامه‌کان چۆڵ بوون ،سلێمانی لەسەرمادا هەڵدەلەرزی .
ئه‌وه‌ی به‌ده‌ره‌وه‌ش بوو سه‌روچاوی پێچابوو خۆی کۆم کربۆوه‌و به‌پرتاو ده‌ڕۆشت ، شار وه‌کو ئێستا نه‌بوو جگه له‌وه‌ی بچوک بوو که‌میش خه‌ڵکی لێ دەژیا ، به‌تایبه‌ت له‌ڕۆژێکی وه‌ک ئه‌مڕۆدا کەسەرماکەی هەموو شتێکی لەگۆ خستبوو ، له‌گۆیژه‌وه با که ده‌ی لوراند له‌گه‌ڵ خۆیدا ورده به‌فری په‌خش ده‌کرد سەربەرەوخوار ، که‌گه‌وره بووم و جارێک وه‌ک ئه‌م ڕۆژه ڕه‌شه‌با بوو مامۆستای جوگرافیا پێ ی ووتین ئه‌گه‌ر چه‌ند کونێ بکه‌ینه گۆیژه ،ئه‌م باڕه‌شه بۆهه‌تا هه‌تایه له‌م شاره نامێنێ ، ئێستا پێکەنینم بەو مەمۆستایەدێت کە بڕوای بەتیوریەک بوو لەئەزەڵەوە هەڵەبوو ، که گه‌شتینه به‌رمزگه‌وتی گه‌وره قه‌ره‌باڵغیه‌کی زۆرله‌به‌رده‌م خانوه ته‌نه‌که‌کاندا دروست ببوو ، ئەو کاتە ڕیزێک ژوور لەتەنەکە دروست کرابوو دەرۆزەکەرەن تێیدا دەژیان ، من به‌خوشکه‌که‌م ووت تۆ بچۆ ئاوه‌که بێنه من ده‌چم بزانم ئەو قەرەباڵغیە چیه ؟ به‌وحاڵه‌ی قه‌ناعه‌تم پێ ی کرد و من چوم به‌ره‌و ئاپوره‌ی خه‌ڵکه‌که ، دیم پیکابێکی پۆلیس وه‌ستابوو پۆلیسێک سه‌روچاوی به‌یه‌شماخێکی سپی وه‌ک فه‌ڵه‌ستینێکان به‌ستبوو ، ده‌ستی له‌سه‌ر ڕه‌شاشێکی حه‌فارۆف دانابوو ،جوتێ ده‌ستکێشی ئه‌ستوری خوری له‌ده‌ستا بوو ،، من ئه‌وکاته هێنده به‌دیقه‌ته‌وه له‌و پۆلیسه‌م ڕوانی که‌چۆن هه‌ناسه‌ی ده‌داو هه‌ڵمه سپێکه له‌ده‌موو لوتیه‌وه ده‌هاته ده‌ره‌وه ، پۆلیسێکی ڕەشتاڵەبوو چاوەکانی هێندە ڕەش بوو دەوت لەتوونی حەمامدا هاتۆتە دەرەوە لەناکاودا له‌خانوی ته‌نه‌که‌ی دووهه‌مدا لاشه‌یه‌کی سارده‌وه بووی سواڵکه‌رێکیان هێنایه‌ده‌ره‌وه . من یه‌که‌مین جارم بوولاشه‌ی مردوو ببینم ، گویم له‌پیاوێک بوو ووتی(نابۆنی نه‌کردوه قوڕ به‌سه‌ره ڕه‌نگه چه‌ند ڕۆژبێ نانی نه‌خواردبێ) ، خه‌ڵکه‌که ژنه‌که‌یان خسته ناو پیکابه‌که ژنه‌که له‌زگماکه‌وه پشتی کۆم بوو ، هەموو ئەوانەی لاشە سارد بوەکەیان هەڵگرت بۆ ناو پیکابەکە بە جامەدانی و مشکێکانیان بەر لوتیان شاردبۆوە هاڵاو لەدەم و لوتی هەموانەوە دەهاتە دەرەوە. کاتێک به‌رده‌می ژوره‌که چۆڵ بوو من سه‌رێکم کرد به‌ژووره ته‌نه‌که‌که‌دا ، سه‌رتاپا ڕه‌شی بوو ته‌نه‌که‌یه‌کی کون کون که‌ئاگری تیا کردبۆوه ،پیاڵه‌یه‌کی زه‌ڕلی و قۆریه‌کی سه‌رتا پا ڕه‌شم به‌رچاو که‌وت ، که‌ویستم بڕۆم بۆ لای خوشکه‌که‌م و ئه‌م ڕوداوه‌ی بۆ بگێڕمه‌وه، له‌ژێر پێمدا چاره‌که دینارێکی سوتاوم دۆزێوه پڕم دایه‌و به‌ڕاکردن به‌ره‌و ده‌رکی مزگه‌وتی گه‌وره ڕۆشتم ، چاره‌که دیناره سه‌وزه‌که‌م له‌ناو ده‌ستما توند قایم گرتبوو ، خوشکه‌که‌م که‌له‌خۆم گه‌وره‌تر بوو توڕه‌بوو لێم ووتی چیت لێ هات؟ بۆ هێندەت پێ چوو؟ من خەریکە قاچەکانم ڕەقدەبێتەوە ،ئیتر من هه‌موو شتێکم بۆ گێڕایه‌وه ، دوای پاره‌که‌م پشان دا لێ ی وه‌رگرتم....و پێ ووتم ئه‌م پاره‌یه ناچێ سوتاوە ، پاشان پاره‌ی ژنه مردۆکه‌یه .خوا کوێرت ده‌کات، چۆن پاره‌ی مردوو سواڵ که‌ر هه‌ڵ ده‌گریته‌وه ؟ من ووتم له‌ده‌ره‌وه‌ی ژوره‌که‌بوو ، ئاوه‌که‌مان به‌سه‌ره هه‌ڵ گرت به‌ره‌و ماڵ چوین ، به‌فره‌که له‌ژێر قاچمان خرمه خرمی بوو، باکه‌ش سه‌ر به‌ره‌و خوار کار ئاسانی بۆ ده‌کردین ، به‌وبه‌ر قه‌سره‌که‌ی میزا تۆفیقه‌وه داشقه‌یه‌کی شێلم فرۆش وه‌ستا بوو ، من به‌خوشکه‌که‌مم ووت بابچین شێلم بکڕین ، خوشکه‌که‌م ووتی من شتی حه‌رام ناخۆم و پاره‌که‌ش ناچێ ، من ترسی ئه‌وه‌م هه‌بوو که‌له‌ماڵه‌وه شکاتم لێ بکات و به‌لێدانم بدات ، هه‌رچۆنێ بێت هات له‌گه‌ڵم و له‌به‌رده‌م داشقه‌که‌دا وه‌ستاین، چاره‌که دیناره‌که‌م پشانی مامه‌ی شێلم فرۆش داو
پێم ووت ئه‌م پاره‌یه ده‌چێت ؟ پیاوێکی درێژ بوو ڕیشی ماش و برنجی بوو لایه‌ک له‌جامانه‌که‌ی کربوو به‌چه‌ناگه‌یه‌وه و له‌بن گوێ ئاڵاندبوو ، به‌دیقه‌ته‌وه ئه‌م دیو دوو به‌پاره‌که کرد و پرسی ئه‌مه‌تان بۆوا سوتاندوه ؟ ئێمه نه‌بووین زۆر ترساین لێمان توڕه‌بێت ، سه‌ره‌تا وتی ناچێ ، منیش ووتم ده‌باشه بۆخۆت ، ئه‌ویش ووتی قاپێ شێلمتان ده‌ده‌می . له‌خۆشیاندا هه‌موو گیانم بوو به‌چاو له‌ناو سه‌تڵێکی زەرد باوی هه‌ڵواسراودا بە قه‌راغی داشقه‌که‌دا، قاپێکی سوری په‌لی ده‌رهێنا وبه‌ده‌ستی ڕاستی که‌چه‌قۆیه‌کی له‌سه‌ر مێزی داشقه‌که دانابوو ده‌ستی کرده تێکردنی شێلمی کوڵاو و به‌که‌وچکێکی قوڵ که‌له‌ناو ته‌شتی شێلمه‌که‌دا بوو هه‌ندێک ئاوی شێلمی کرد به‌سه‌ر قاپه‌که‌داو دایناو چنگاڵێکی له‌سه‌ر ناو دوای کردی به‌دوو چنگاڵ و به‌بزه‌یه‌ک پێ ی ووتین فه‌رموون، منیش تۆزێک خوێ ی زبری بۆرم پیا ڕژاندو ده‌ستم کرده خواردنی خوشکه‌که‌م نه‌ی ده‌ویست بی خوات به‌ڵام من هێنده به‌له‌زه‌ته‌وه خواردم ئه‌ویش ناچار بوو ده‌ست بەخواردنی بکات ، دوایش ئاوی شێلمه‌که‌مان به‌دوقۆڵی هه‌ڵقوڕاند و ناوسکمان گەرم داهات و به‌ره‌و ماڵه‌وه بوینه‌وه ، ئه‌گه‌ر چی دایکمان توڕه‌بوو بۆ هێنده‌مان پی چووه‌و بۆ دواکەوتووین ؟
ئێمه‌ش به‌فانتازیای منداڵی باسی ژنه پشت کۆمه ڕه‌ق بوه‌که‌مان له‌نوکه‌وه بۆ گێڕایه‌وه .. به‌ڵام قه‌ت چاره‌که دیناره سوتاوه‌که‌و شێلمه‌که‌مان بۆ باس نه‌کرد. دوای ئەو هەموو ساڵە ئێستاشی لەگەڵدا بێت کوێر نەبووم ،ڕەنگە ژنە سواڵکەرەکە مردۆکەش کۆڵێ بەو کارەی من دڵخۆش بووبێت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
