Wednesday, 07/12/2011, 12:00
دانانی لیژنە و بۆشایی دەستەڵات
لە هەر شێوە دەستەڵاتدارییەکی دیموکراتییدا، ئەگەر دەزگاکانی بەڕێوەبردن و ئیدارەکردن ئەکتیڤ بێت، هیچ پێویست بە پێکهێنانی لیژنە و لیژنەکاری ناکات، تا ببێتە ئەڵتەرناتیڤی دەستەڵاتی سیاسیی. دروستکردنی لیژنە پەککەوتەیی حکومەت و ئیفلیجی دەستەڵاتی دادگا و حکومەت و پارلەمانی لێدەکەوێتەوە. ئەو لیژنانەی بە فەرمانی سەرۆکی هەرێم و بە ڕەزامەندی ئۆپۆزسیۆن پێکدەهێنرێت، هیچ کام لەو لیژنانە تا ئەمڕۆ نەیانتوانیوە بگەنە ئەنجامێک، جگە لە هێشتنەوەی کارەساتە سیاسییەکان و رەخساندنی دەرفەت بۆ بیرچونەوە و تێپەڕاندنی تاوانەکانی خۆیان.ڕووداوەکانی بادینان و هەڵوێستەکانی ئۆپۆزسیۆن
پارتەکەی بنەماڵەی بارزانی ماوەیەک لەمەوبەر ئەنجامی ڕاپرسییەکی خۆیانی بڵاوکردەوە، ئاماژەی بە ڕێژەی جەماوەری پارتە سیاسییەکانی کوردستان کرد. بە پێی ئەو ڕاپرسییەی خۆیان لە دەڤەری بادیناندا، رێژەی جەماوەری پارتی بە پلەی یەکەم، جەماوەری یەکگرتووی ئیسلامی بە پلەی دووەم دانرابوو، ئەمەش لە سەروبەری نزیکبوونەوەی هەڵبژاردنی شارەوانییەکانی هەرێمی کوردستاندا ئەو راپرسییەیان کردبوو. هەرچەندە ئێمە پێشتر هەڵوێستی خۆمان ئاشکرا کردووە، کە بەشداریکردنی هەڵبژاردنەکان، تەنیا لە خزمەتی بنەماڵەی سیاسیی کوردستاندایە، بۆیە داوامان کردووە بایکوتی هەر هەڵبژاردنێک بکرێت، کە لە سایەی ئەو جۆرە فەرمانڕەوایەتییەدا ئەنجام دەدرێت، بەڵام ئۆپۆزسیۆن بە گشتی و یەکگرتووی ئیسلامیی، کە خۆیان کردۆتە بەشێک لە هاوکێشە سیاسییەکانی کوردستان و لە پشتی دەسەڵاتی فەرمانڕەوای بنەماڵەی سیاسیی کوردستانەوە وەستاون، بۆیە کاتێک پارتی لە زاخۆ ئەو کارەساتە دەقەومێنێت و لەو جۆرە سینارۆیە دروست دەکات. ئەو ڕووداوانە پێشوەخت هیچ مسداقیەتێکی بۆ ئەو هەڵبژاردانە چاوەڕوان کراوانە ناهێڵێتەوە، ئەمەش سەنگی مەحەکی ڕاستیی و دروستی ئۆپۆزسیۆن بوونی ئەوان دەردەخات. هەرچەندە ئێمە پێمان وایە دوای ئەمانە ئۆپۆزیسیۆن دێت و لەگەڵیاندا هاوبەشی هەڵبژاردن و سەرەنجامەکەی دەکەن، تا ئەو رادەیەی لە دەسەڵاتییشدا هاوبەشییان ده‌بن. بەڵام ئێمە لە پاش 17 شوباتەوە لاوازی و بێ هەڵوێستی ئۆپۆزیسیۆنمان خستۆتە ژێر ڕەخنەی چەکوشەکەمانەوە، جەماوەریی کوردستانیش گومان و پرسیاری لەسەر بوونی ئۆپۆزیسیۆن و هەڵوێستیان به‌رامبه‌ر به ده‌سه‌ڵات لا دروست بووە، بۆیە پێمان وایە ئەو هەڵویستە دووفاقەییەی ئۆپۆزیسیۆن هۆکار بوو بۆ سەرکوتکردنی بەهاری کوردیی. لە پاش ڕووداوەکانی بادینانیش ئەوەندەی تر ئەو راستییانە لە وەڵامی ئەو پرسیارەدا ڕوون بوویه‌وه، کە ئایا ئۆپۆزیسیۆن بەشێکە لە خواستی ئازادیی و دادپەروەریی و سەروەریی کورد، یان بەشێکە لە پتەوکردنی دەستەڵاتی بنەماڵە؟!مانەوە بەسەر پردی سیراتەوە
لە نێوان بڕوا و درۆدا، لە نێوان ئامانج و فەشەلدا، لە نێوان ئازادیی و ملکەچییدا، ڕووبەرێکی ترسناک هەیە، کە ئەم دوو جەمسەرە لە یەکتر جیادەکاتەوە. فەرامۆشکردنی ئەو رووبەرە، ئەگەر تاڵەمویەکیش بێت، بە واتای تێکەڵاو بوونی ڕاستی و درۆیە، وەستانە لە نێوان سەرکەوتن و دۆڕان. ئەو نێوەندەی، کە پردی سیراتی یەکلاکەرەوەی هەڵە و ڕاستییەکانە، هەمیشە پارتە کوردییەکان بۆ تێکشکاندنی کەسایەتیی کورد کاریان لە سەر کردووە، ئەمەیش بۆ ئەوەی تواناکان کۆنەبێتەوە و خۆیان نەخەنە سەر هێڵی بڕیاری چارەنووسی سیاسیی خۆیان، بۆیە دەسەلاتی کوردی، هەر وەک داگیرکەرێک مامەلە لەگەڵ دانیشتوانی کوردستاندا دەکات، هەمیشە هەوڵیداوە بەو شێوە هەڵپەستراوەیە پرسە سیاسییەکان بمێنێتەوە. هەر لەوێشەوەیە رۆژانە مرۆڤی کورد، کاتە سەخت و کارەساتەکان بەسەر دەبات، هەر ئەم جۆرە ژیانە سیاسییەیە، ناهێلێت ئیرادەیەکی سیاسیی پتەو دروست بێت. ئەوەی ئەمڕۆ لە کوردستاندا دەبینرێت، ئەو گۆرەپانە بێ ئاسمان و زەمینەیە، کە ژیانی پڕ لە ترس و دوودڵیمان بەسەردا دەسەپێنێت. پارتی سیاسیی کوردی، بە مەبەست کوردیان خستۆتە سەر ئەو پردە و وەستاندوویانە، ئەوان بۆیان هەڵبژاردووین، تا نەتوانین پێیدا بپەڕێینەوە، نەهێڵن توانا و هەوڵەکانمان بینین و ویستی سیاسیی خۆمان ڕادیکالانە یەکلا بکه‌ینه‌وه. ئەو پردە، بێ جەمسەرە، پڕە لە نائومێدیی و له چاوەڕوانییەکی هەمیشەیی، ژیانیان بۆ خۆیان و مەرگیان بۆ میللەت هەلبژاردووە. ئەو پردە شوێنێکە بێ جوگرافیا، پڕە لە تاریکی و بێ ئیرادەیی، تێیدا توانای بیرکردنەوە و بڕیاری دروستی تیادا نادرێت. پارتە دەسەلاتدارەکانی کورد ئەو تاریکستانە بە رەوا و بە شیاو دەزانن بۆ مرۆڤی کورد، تا هەمیشە تاکی کورد سەرکز و دووربێت لە بڕیار و بەگەڕخستنی تواناکانی خۆی، بۆ هەمیشە لە نێوان دوالیزمی مان و نەماندا، لە نێوان ئازادیی و ملکەچییدا، لە نێوان بەڵێ و نەخێردا، بوەستێت، نەتوانێت هەڵبژاردن و قسەی خۆی هەبێت.نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
