ئەوکاتەی ڕۆشنبیر هەڵە ئەکا،ئاسۆس هەردی وەك نمونە

Sunday, 18/09/2011, 12:00

دیارە هەمومان هەڵە ئەکەین، تەنها جیاوازیەك بەدی بکرێ لەنێوان ئێمەدا کاتێ هەڵە ئەکەین ئەوەیە، ئەو مرۆڤانەی هەڵە ئەکەن ڕەنگە هەڵەکانیان لەنەزانیەوە بێ، لێ کاتێ ڕۆشنبیران هەڵە ئەکەن، ئەوا لە زانینەوەیە و ئەمەش کارەساتە.

یەکێ لەو ڕەخنە زۆرانەی ئێمە لەدەسەڵاتی ئەگرین ئەوەیە کە ئەم دەسەڵاتە خۆی لەسەرو یاساوە داناوەو دادگاکانی وەك ئامرازێکی بێ نرخ لێ کردوەو ، هاوڵاتی ئاسایی هیچ متمانەیەکی بەم دەزگا گرنگە نیە کە لەبنچینەدا یاسا و دادگان بەردی بناغەی هەموو سیستمێکی دیموکراسیە. بەداخەوە لەکوردستان تا ئێستا کار نەکراوە بۆ باڵا دەستکردنی یاسا و دادگاکان . وە ئەمەش تا ڕادیەکی زۆر ئەگەڕێتەوە بۆ کەمتەرخەمی چینی ڕۆشنبیران بەتایبەتی کە نەیانتوانیوە برەو بەچەمکی بەیاسابوون بدەن ، تا یاسا و دادگاکان ڕێچکەی خۆیان وەربگرن و هەموان لەبەردەم یاسادا یەکسان بن و ببێتە سەرچاوەی باوەڕو متمانەبوون.

لەدوای ڕاپەڕینەکانی ١٧ شوبات و دواتر، کاتێ (ڕێبین هەردی) لەلایەن دەسەڵاتی دۆڕاوی جەلالیەکان فەلاقە کرا و خەڵتانی خوێن کرا، کەچی هەنووکە بەزەیی بەو خوێڕیە ئەهاتەوە کە هیچ بەزەیی و ڕێزێکی لەو دانەناو ئەوەی پێی کرا دژی کردی و کەچی ئێشتا کاکە ڕێبین ئەڵێ، حەز ئەکەم دەعوەتێکی بکەم و هیچ کێشەیەکی شەخسیم لەگەڵیدا نیە. ئەمە لەکاتێکدا ئەبوو ڕێبین هەرچی ڕێگایەکی یاسایی بوایە بیگرتایەتە بەر و لەو دەست درێژیە خۆش نەبوایە.

هەمان هەڵە و بەقەوارەیەکی گەلێ گەورەتر، ئاسۆسی برای بەهەمان شێوە کە هەوڵی کوشتنیان داو سەریان لەچەند لاوە تێکشکاند، کەچی هاتوەو ئەڵێ، با تاوانباران دان بەتاوانەکەی خۆیاندا بێن و ئێمە لێیان خۆش ئەبین،، ئەم کارەی هەردوو برا وەك خۆیان باسی لێوە ئەکەن گوایا لەدڵ و سنگ فراوانیەوەیەو ئەیانەوێ پەیامی (عیسا) بدەن بەگوێی کۆمەڵگای کوردی کەلەلایەن دوو جەللادەوە پڕ شەق کراوان و جگە لەقامچیەکانیان خاوەنی زەڕەیە بەزەیی و مۆڕاڵ نین.

بەبڕاوی من، گەر بێتو ئەو کارە قێزەوەنەی دەرهەق بەم دوو برایە کرا لەلایەن کەسێکی هەژارو بێ پشت و پەنا و بێکەس بوایەو ئەوان لێێ خۆش بونایە ، دڵنیام ئەوسا ئەم ووت بەهەق ئەم دوو برایە خاوەنی گەلێ خەسلەتی لێبوردن و سنگ فراوانین، لێ لەگەڵ کەسانی خاوەن پلەو پایەو خاوەن میلیشیا و باندی مافیایی ئەوە بەدڵنیاییەوە ئەو کارەیانەی تەنها ئەچێتە خانەی ترسەوە. بەواتایەکی تر، جگە لەوەی ئەم دوو ڕۆشنبیرەی شار کەنایەڵن یاسا ڕێچکەی خۆی وەربگرێ لە هەردوو کەیسەکەیاندا، لەهەمان کاتیشدا پەنا بۆ ڕێگەی عەشایری و لێبوردنی پێش وەخت ئەبەن کە ئەمەش بەهیچ شێوەیەك نەئەبوو کەسانی ڕۆشنبیر بەم کارە هەڵبستێ.

دیارە وەك ئاشکراشە کەیاسا و دادگا لەکوردستاندا لەگەڵ دەسەڵاتدا عاشقەو ماشقەن و تەنها بۆ بەرژوەندی دەسەڵات کار ئەکەن، لێ ئەبوو (هەردیەکان) هەرگیز پەلەیان نەکرادایە لەو جۆرە پەیامەیان و ڕازی نەبن بەو دەست درێژی و ئیهانەیەی لەئاستیان کراوە.. گەر لەکوردستانیش مافیان بۆ نەسێنرێ، ئەوا ئەتوانن وەك قەرزێك دای نێن بۆ ڕۆژی خۆی. کاتێ دەسەڵات گوێ بیستی شتی وا ئەبێ، هەست بەبەهێزی ئەکا و لووتی ئەوەندەی تر بەرزتر ئەبێتەوە.. لەڕاستیدا گەورەترین کارەسات ئەوەیە نەیەڵی یاسا سەروەر بێ و پەنا بردنە بەر کاری عەشایرو لێ خۆشبوونی پێش وەخت کارێکی گەلێ هەڵەیەو کۆمەڵگا چەند مەترێکی تر دوور ئەخرێتەوە لەوەی ببێتە کۆمەڵگایەك کە یاسا بتوانێ کاری خۆی بکا.

کابرایەکی چەپەڵ و هیچ لەبارانەبووی وەك عومەر مورتاح و هاوشێوەکانی نەك شایەنی ئەوە نین عەفو بکرێت، بەڵکە پێوستە باجی هەموو ئەو لووت بەرزییەیان وەربگرن لە پێشێل کردنی یاسا و داپۆڵسینی ڕۆژنامەنووسان و ڕۆشنبیرانی گەلەکەمان .. بەو هیوایەی هیچ کەس لەخوێنی خۆی خۆش نەبێ و پەنا ببرێتە بەر یاسا و دادگان، جا گەر ئەو دادگایانەی کوردستان شوێنی ئەوە نەبوون بۆ وەرگرتنەوەی مافی مرۆڤی زەوتکراو، ئەوا پێوستە پەنا ببرێتە بەر شێوازی تر بۆ سەندنەوەی ماف و کەرامەتی مرۆڤ.