ئەو ناوەی میدیا ئەهلیەكان بە خۆیانەوە لكاندوە "سەربەخۆو ئازاد" لە تاقیكردنەوەی مندا كەوتن .. نمونەشم زۆرە بۆ ئەم تێبینیەم. ئەوە بۆ دووەم جارە بابەتیان بۆ دەنێرم لەسەر ئیسلامی سیاسی بەلام هیچ كامیان بلاوی ناكەنەوەو هەندێكیان بە بیانووی جیاواز خۆیانی لێقوتار دەكەن و منیش تەنیا كەس نیم خاوەن ئەم ئەزمونە بێت ، ئەو نوسینانەم بۆ ئاوینە ، هاولاتی ، لڤین برێس ، میدیا ، سپی نیوز ، هەروەها بۆ سایتی سبەی و چاودێر...تاد. ناردوە.

لێرەدا وەلامی یەكێك لەو میدیا "ئازادو ئەهلیانە" دەنوسمەوە كە بریتیە لە میدیای ئاوێنە بۆ بابەتێكم لەسەر ئیسلام و ئیسلامی سیاسی ، لە وەلامی ئاوێنەدا بۆ هۆكاری بلاو نەكردنەوەی دەنوسن بۆم: (كاك دكتۆر سالار، ته‌شهیری‌ شه‌خسی‌ تێدانییه‌، به‌ڵام ته‌شهیرو سوكایه‌تی‌ به‌خواو پێغه‌مبه‌رو ئیسلامی‌ تێدایه ... بابه‌ته‌كه‌ت بۆ ده‌نێرمه‌وه‌، تكایه‌ سه‌رنجی‌ ڕسته‌و په‌ره‌گرافه‌ سووركراوه‌كان بده‌!

به‌شی‌ بیرورای‌ ئاوێنه‌نیوز

لەناو هەندێك لە ڕستە سوركراوەكانی نوسینەكەمدا لای ئەوانەوە هاتوە : " پێویستیەكانی سەردەم وا دەخوازن قورئان رێفۆرم بكرێت وەك ئینجیل لەگەل سەردەمدا بگونجێندرێت چونكە هەموو ئەوانە مرۆڤ نوسیویانەو بۆ قۆناغێكی كۆنی مێژو، و كۆمەلایەتی بووە ... هەروەها "ئیسلامیەكان كە دەیانەوێ بەتەنیا شەرع بكەنە دەستور بۆ كۆمەلگا كە دونیایەك ناعەدالەتی تێدایە، ئەو كاتە مافی هەموو ئەوانەشی تێدا دەخورێت كە وەك ئەوانە بیرناكەنەوە.... (خۆ لەسەر سەكۆی مزگەوتەكان باسی زانست و پێشكەوتنی زانست و گەردونناسی و زانستە كۆمەلایەتیەكان و فیزیاو كیمیاو شۆڕشەكانی كوردو كوردایەتی بۆ مندالان و لاوانی كوردستان ناكرێت. ئەوانە دژی هەوو شتێكی ڕەسەنی كوردەوارین ، دژی جل و بەرگی جوانی ئافرەتانی كوردن ، دژی سروودی نیشتیمانی و ئالای كوردستانن و پێیان وایە ئالای كوردستان كفری تێدایەو پێشنیازی گەوجانە دەكەن اللە اكبری عەرەبی لە شوێنی ئەو ڕۆژە بنوسرێت.) هەروەها لە شوێنێكی تری سوركراودا هاتوە (بەیانیان زوو خەلك بێزار كردن بە بانگ لە دەیان موكەبەرەی مزگەوتەكانەوە بێئەوەی ڕەچاوی ئارامی و خەوی تەندروستی بەیانیان و بیڕورای جیاواز بكرێت ، هەموو ئەوانە هیچیتر نین لە دیكتاتۆریەت و سەپاندنی بەزۆری ئاین بەسەر خەلكیدا. بەو جۆرە خەلكی بێزار دەبێت لێیان...). 

(سورەی النساو 15: ئەو ئافرەتانەی كە زینا دەكەن ئەوە چوار شایەتیان لە خۆتان لەسەر بگرن جا ئەگەر شایەتییاندا ، ئێوە لە مال بەندیان بكەن تا مردن یەخەیان پێدەگرێت ..." بەلام بۆ پیاو باسی بەندكردن و زیندانیی تێدا نیە ئەگەر هەر خیانەتێكی هاوسەرگیریی بكات. ئایا ڕاستگۆیی و بێلایەنی ئەو شاهێدانە دەبێت لە كوێدا بێت؟ چارەسەری ئەم دیاردانە پێویستیی بە یاسای مەدەنی و شارستانی و لێكۆلینەوەی یاسایی هەیە (یاسای تەندروست) نەك بەو شێوە هەڕەمەكیەی لەو سورەتانەی قورئاندا هاتوون. تەنانەت ژن بە نیوەی پیاو حیساب دەكرێت لە ئیسلامدا بۆ گەواهی و شایەتیدانیش. ئەوە چ سوكایەتی و ناهەقیەكە بە ژن كراوە لەم ئاینەدا). 

بەشێكی تری سوركراو (لە سورەتێكی تری النساو 24 هاتوە: "پیاوان بەهۆی مال و داراییانەوە بۆیان هەیە هەتا چوار ژن بهێنن و گوناهیش نیە لە كەمكردنەوەی ئەو مارەییەی لەسەری رێكەوتبوون ...". لێرەدا بە ڕوونی دەردەكەوێت كە پیاوان بە حوكمی پارە دەتوانن بە ناوی شەرع و ئاینی ئیسلامەوە لەگەل چوار ئافرەتدا كاری سێكسی بكەن و بە ئارەزوی خۆیان بەسەریانەوە بنیشنەوە ، كەچی لە سورەتی النساو 40 نوسراوە "بەڕاستی خوا بەقەدەر تۆزقالێك ستەم لە ئادەمیزاد ناكات". لێرەدا عەدالەتیی خودا دەكەوێتە ژێر پرسیارەوە).

با لێرەدا ئەوەندە بەس بێت چونكە نیوەی زیاتری نوسینەكەیان سوور كردوە ، من لێرەدا ڕوونكردنەوە نادەم لەسەری و بۆ خوێنەر خۆی جێدەهێلم ، بەلام ئەوەندە دەلێم ئیسلامیەكان بچوكترین رەخنە بە تەشهیرو دژە ئیسلام وەردەگرن و بە قسەی ناشیرین و هەڕەشە وەلام ئەدەنەوە. هەروەها میدیایەكی "ئەهلی و ئازاد" بە چ مافێك خۆی دەكاتە نوێنەری خوداو قورئان لەسەر زەوی و ئامادە نیە ڕەخنەیەك لەسەر ئیسلام بلاو بكاتەوە؟ ئەی میدیای ئازاد لێرەدا چ واتایەكی بۆ دەمێنیتەوەو ئازایەتیەكەی لە كوێدایە ئەگەر من بۆم نەبێت توندیش تێیدا بنوسم بەلام بە زمانی ڕەخنەو ئەدەبیی ، لایەنەكەی كەش دەتوانێت وەلامی خۆی بداتەوەو بابەتەكە بكرێتە بابەتی دایەلۆگێكی گشتی.. سەبارەت بە ڕۆژنامەی هاولاتی بۆ هەمان بابەت دەنوسن بۆم: (..."لەڕاستیدا خاڵی (8)ی وتارەكەت ناتوانرێت بڵاوبكرێتەوە لە هاوڵاتی، بەهۆی ئەوەی پێمانوایە هێرشە بۆ سەر مسوڵمانان‌و خودی پێغەمبەر محەمەد...". 

وەلامی من بۆیان / من ئامادەم خالی 8 ی نوسینەكە لابەرم ، بەلام هەر ئامادە نەبوون بلاوی بكەنەوە. لەگەل ئەوەشدا هاولاتی بابەتێكیان بلاو كردمەوە لەژێر ناونشانی "كانتۆنی جەزیرە ئیسلامە سیاسیەكانی تەنگەتاو كردوە" ، بەلام ئەوە هەرگیز بەس نیەو پێویستە ئەم باسە بەردەوامیی هەبێت. ئایا بۆچی من بۆم نەبیت ڕەخنە لە محەمەد و لە شەریعە نەگرم؟ ئەگەر ئەم وەلامانەم هەمووی لە میدیایەكی سەلەفی و حیزبێكی ئیسلامیەوە بۆ بنێردرایە ، بە ئاسایی وەرم دەرگرت ، بەلام نەك لە میدیایەك بە خۆی بلێت "ئەهلی و ئازاد". بەلام ئیسلامیەكان و مەلاو بەناو زانا ئاینیەكان ڕۆژانە زۆرترین سوكایەتی بە ئافرەتان و ئەندامانی كۆمەلگاكەمان و بۆنە نەتەوەییەكانمان دەكەن لە تۆڕی میدیاوە كەچی میدیا ئەهلیەكان بێدەنگن لێی. بابەتی ناوبراوم لەژێر ناونیشانی "سیراتی موستەقیم ، سیراتی عەلمانیەت و حوكمی دیموكراتیە" نوسیبوو كە دواتر لە 10 سایتدا بلاو كرایەوەو بە تەنیا لە كوردستان پۆستی بوێردا نزیكەی 6000 كەس بینیویەتی.

نووسینی دوەمم

نوسینی دوەمم بۆیان پەیوەندەی بە ماڵپەری ئیسلام پەیكی كۆمەَلی ئیسلامی و هاورێكەی مەلا كریكارەوە هەیەو لە مالپەڕەكەیاندا لەسەر نوسینێكی ڕەخنەییم لەسەر ئیسلامی سیاسی لەسەر من دەنوسن "سەگێكی تری بەردەم دەرگای عەلمانیەت كەوتە وەڕین". هەروەها لە نامەیەكیاندا بۆم دەنوسن: 

بڕوانە ئەو هەموو سوكایەتی و هەڕەشەو فكرە تۆتالیتاریەی ئەم مالپەرە ئیسلامیەو هەروەها جودی نیوزو هاوشێوەكانیان بە نوسەران و فكری ئازاد و عەلمانیەكانی دەكەن. من بۆ سایتی ئاوێنەم نوسی ئەگەر ئەم بابەتەشم بلاو ناكەنەوە چونكە ئەمیشیان ڕەت كردۆتەوە لانی كەم رپَۆرتاژێكی لەسەر بكەن و ڕای هەردولامان وەربگرن ئەوەش بێئەنجام بوو ، ئەوە بۆ میدیاكانی كەشە بە حیزبیەكانیشەوە.. لە نامەیەكی ناڕەزاییم بۆ ئاوێنە نوسیبووم كە لە كەسێكی ناو حیزبێكی ئیسلامیەوە لەسەر ئاستێكی شەخسیی پێم ڕاگەیەندرا كە بەشی بیروڕای ئاوێنە پێیان ڕاگەیاندوون ڕێگربوون لەبەردەم بلاو كردنەوەی ئەو نوسینەم بەلام وەلامیان نەدامەوە.

سایتی سبەی وەك سایتێكی حیزبیی پێیان ڕاگەیاندم كە بابەتەكە گرنگ و بە سوودە بەلام لەبەر ئەوەی پەیوەندیەكانیان لەگەل حیزبە ئیسلامیەكان باش نیە بۆیە بلاوی ناكەنەوە ، بەلام ئەگەر پەیوەندیەكانیان لەگەل ئیسلامیەكان باشیش بوایە قەناعەتم وایە ئەو كاتە بەو بەلگەیە بلاو نەدەكرایە چونكە پەیوەندیەكانیان لەگەل ئیسلامیەكان باشە ، من لێرەدا بۆم نوسینەوە كە من هۆكاری بلاو نەكردنەوەی لەوەدا دەبینمەوە چونكە بزوتنەوەی گۆڕان بۆ سەوابیتی ئیسلامیەو ئەوەش لە زاری رێكخەری گشتیانەوە دووپات كراوەتەوە.

یەكیكی تر لە میدیا ئەهلیەكان ناوی ناهێنم بۆی نوسیم دوكتۆر سالار ئێستە تێدەگەیت بۆچی ئەو نوسینەمان بلاو نەكردەوە بڕوانە ئیسلامیەكان لە فەرەنسا لەسەر كاریكاتۆرێك لەسەر پێغەمبەری ئیسلام ئەو كوشتارەیان بەرامبەر شارلی هیبدۆ ئەنجامداوە. ئەوە هەرچەندە بریاری بلاونەكردنەوەی نوسینەكەم پێش ئەو ڕوداوە درابوو. 

لێرەدا بە گشتی دەگەمە ئەم دەرئەنجامانەی خوارەوە

ترس لە توندوتیژی و دڕندایەتی ئیسلامە سیاسیەكان هەیە بۆ كاردانەوەیان.

لەوە دەچێت دەستی هەندێك لە ئیسلامیەكان گەیشتبێتە ناو ئەم میدیایانەش.

میدیا ئەهلیەكان ترسیان هەیە لە تۆمار كردنی سكالا لەسەریان ، ئەم ترسەش وایكردوە بابەتی لەم جۆرانە بلاو نەكەنەوە.

بە گشتی ئەو بابەتانە بلاو دەكەنەوە كە باجیان لەسەر نیە.

میدیا ئەهلیەكان زۆربەی بابەتەكانیان بۆتە بلاوكردنەوەی هەوال و وتەی بەرپرسەكان. 

هەَلوێست و شیكرنەوەی خۆیان نیە لەسەر بابەتە هەستیارەكان بۆنمونە لەسەر بابەتی عەلمانیەت و ئیسلامی سیاسی.

زۆربەی ئەم میدیایانە بەرپرسێكی حیزبییان لە پشتە كە دەنگ و ڕەنگی ئەوانە لە میدیاكانیاندا بلاو دەكرێنەوەو هەروەها پشتگیریی مادییشیان لەوانەوە پێئەدرێت ئیتر بەهەر شێوەیەك لە شێوەكان بێت.

هەَلوێست و سیاسەتی میدیا ئەهلیەكان هەندێكجار بەندیشە بە خاوەن ئیمتیازو سەرنوسەرو ژوورە بەرپرسەكان بەلام بە گشتی هەمویان تووشی پەتاكە بوون و لە خەمی دەستكەوتە مادیەكانیشیانن.

من بۆخۆم ناڕازیم لە ئەدای كارەكانی میدیا ئەهلیەكان و قەناعەتم وایە وشەی "ئازاد"ی لێبكەنەوە باشترە. 

سەرنج : وەلام و ڕونكردنەوەی من بۆ ماڵپەری ئیسلام پەیكی كۆمەڵی ئیسلامیی ، بڕوانە سایتی كوردستان پۆست.