نەوشیروان مستەفا"کاروانی ڕابردوو ناتگەیەنێتە هیچ شوێنێک"

Wednesday, 20/06/2012, 12:00

مەلایی و جەلالی، هەمیشە ئەجینداو پڕۆژەی بەرژەوەندیەکانی داگیرکەران و، تەنها بەربەست و تاکە دوژمنی مەترسیداریش بووینە دژ بە کوردو مافەکانی.
لە بارو دۆخێکی سیاسی داتەپیووی سەرتاپا بێ مۆڕاڵکراوی هەڵپەرستانەو، بە ئانقەست، شێوێندراوو، ئاژاوە گێڕکراودا، کە تەواوی قەیرانە سیاسیەکانی، بە دەستی مەلایی و جەلالی، بە تایبەتیش، مەسعودی سەرۆک خێڵ، تیادا دروستکراوە. لە دۆخێکدا، کە نەوەک هەر پڕۆسە سیاسی و، ئابووری و، کۆمەڵایەتیەکە، بەڵکو کۆمەڵگای کوردستان و، تەواوی لایەنە سیاسیەکانیش، خراونەتە ناو تەڵزگەیەکی داخراوی، ڕێگە نادیار. جا لە ساتە وەختێکی ئاوادا، بێدەنگی نەوشێروان مستەفاو بزوتنەوەی گۆڕان، چ نەهێنیەکی تیایە؟ بۆچی لەمکاتە هەستیارەی، کە سەروبەندی تەقینەوەی، بورکانی ڕق و، توڕەیی جەماوەری کوردستانە، ڕۆڵی تلیاک دەگێڕن، لە بێهۆشکردن و سارکردنەوەیان؟ ئەمەشیان، لەکاتێکدایە، هەنووکە، خەڵکە، کەرامەت پێشێلکراوەکانی بەرەی گەلی، دژ بە دەستەڵاتی، مەلایی و جەلالی دزو تاڵانچی، وەک سوپایەکی گەورەی بێ سەرکردە، لە هەموو کاتەکانی پێشتردا، بە ژمارە زیاترو بەرفراوانتر بووە. دوای ئەوەی، ناڕازی بوون و توڕەییان، لە ناو شەقامەکان، بۆ ناو گەڕەکان و دواتر ناو ماڵەکان، تا گەیشتۆتە، تاک بە تاکی، هەموو خێزانێک و، تەواوی کۆمەڵگای کوردستان. دەستەلاتی مەلایی و جەلالیش، بە هەمان ئەقڵیەتی نەگۆڕانەی خێڵەکیانە، بە هەمان سیاسەتی دیکتاتۆرانەیان، لە هەموو کاتێک زیاتر، بارو دۆخی ئابووری، کۆمەڵایەتی، سیاسی، دیموکراسی، ئازادیەکان و، ڕۆژنامەگەریان، لە خراپیەوە بۆ هەرە خراپتیرینیان بردووە، بەبێ گوێدانە هیچ شتێک. هەنووکە، بارو زروفی ڕاپەڕین، لە هەر هەموو کاتێک، تەواو ترو، پێگەیشتوو ترە، کەچی واخەریکە، کڵپەی چەخماکەی ١٧ی شوبات، تەواو دەکوژێنرێتەوە! ئۆباڵی بەدەنگ نەهاتن و، ڕانەپەڕینی خەڵاکانی کوردستان، لە ئەستۆی کێ دایە؟ ئۆپۆزسیۆن، یان خەڵکانی کوردستان خۆیان؟ ئایا خەڵکانی کوردستان گۆڕان و چاکسازی و، بەرەوپێشەوە چوونیان ناوێت؟ یان ئۆپۆزسیۆن، بە تایبەتیش بزوتنەوەی گۆڕان، گۆڕاوەو، ڕووەو هەڵپەرستی و لادانە، لە پێناو بەرژەوندیە تایبەتیەکان؟ ئایا نەوشێروان مستەفاو بزوتنەوەی گۆران، گۆڕاون؟ یان دەستەڵاتی مەلایی و جەلالی، بۆتە دەستەڵاتێکی دیموکراسی، گۆران و چاکسازیدەکات؟ یان هێشتاکە، ئۆپۆزسیۆن ساوایەو، توشی هەمان سەقەتی (نەخۆشی ساوایەتی) دەستەڵات بووە؟
گەر،دەستنیشانی ڕاستەقینەی، ئەو هۆکارو ئاستەنگانە نەکەین، کە بوونەتە بەربەست و ساردکەرەوەی، ڕاپەڕینی خەڵکانی کوردستان، ئەوا هەر خۆمان، دەبینە بکوژو جەلادی، ڕزگاری وئازادی خۆمان و، دەیانخنکێنین. لە هەمانکاتیشدا، زۆر ترین و چاکترین، خزمەتی بە خۆڕایی، مەلایی و جەلالی دەکەین و، خوێنی خۆشماندەکەینە، کاسەی تەمەندرێژیان. ئاخر لە دونیادا، نەبووەو نیشە، هیچ هێزو سوپایەک، هەرچەندە گەورەو، بەهێزو پارەدار بێت، بگرە نوێترین تەکنەلۆژیاو چەکی سەردەمیانەشی هەبێت، گەر، سەکردەیەکی لە بارو لێهاتووی نەبێت، مەحاڵە، نەوەک هەرناتوانێت، بەرامبەر بە هەرە لاوازترین دوژمنەکانی، هیچ شەڕێک بباتەوەو، سەرکەوتن بەدەستبێنێت، بەڵکو بە تێپەڕبوونی کات، ڕیزەکانیشی لەبەر یەک دەترازێت و نامێنیت. بۆ شۆڕش و ڕاپەڕینیش هەروایە، مەحاڵە بەبێ ڕێکخستن و سەرکردایەتیەکی بە هێزو لێهاتوو، بگات بە سەرکەوتن و ئامانجەکانی. ئەوە تەنها و تەنها، بەناو ئەو زڕە ڕۆشنبیرانەو، سەرکردە سیاسیەکان و، حزبە هەڵپەرست و فاشیلەکانن، کە هیچ لەبار نەبوویی و، بێ جورئەتی و ترسنۆکی خۆیان، دەخنە ئەستۆی میللەت. ڕاستە کۆمەڵگەی ئێمە دواکەوتووە، بەڵام هەرگیز، بەو مانایە نایەت، کە ناتوانێت شۆرش و ڕاپەڕین ئەنجامبدات، ناشکرێت دواکەوتووییەکەی، بکرێتە، ئەو شەمماعەیە، ئۆپۆزسیۆن، هەر هەموو جل و، پەڕۆو، پاتاڵە پیس و شڕەکانی خۆی، پێوە هەڵبواسێت. ڕاپەڕینەکانی دوێنێی خەڵکانی کوردستان، کە دژ بەڕژێمی بەعس، ئەنجامیاندا، شایەتی، ئاستی وشیاری و، شۆڕشگێری ئەو میللەتەیە. سەرکردە ئەو کەسەیە، کە لە هەموو کاتێکدا، جیاوازی لە سەرکەوتن دروستدەکات، هەروەکوو ئەسکەندەری مەکدۆنیش دەڵێت:"ناترسم لە سوپایەک، لە شێر، کە بەرخێک سەرکردایەتیدەکات، بەڵام دەترسم لە سوپایەک، لە بەرخ، کە شێرێک سەرکردایەتیدەکات". بۆیە دەبێت، ئێمەی بەرەی گەل، پرسیارە ڕاست و دروستەکان، بە ڕووە ڕاستەکەیان، ئاراستەی خۆمان و ئۆپۆزسیۆن و، هەموو لایەکی بکەینەوەو، بپرسین: کێ و، چ، لایەنێکە، بەرپرسە و، بۆتە ئاستەنگ و ڕێگر، لە ڕاپەڕینی خەڵکانی کوردستان، دژ بە دەستەڵاتی مەلایی و جەلالی؟ ئایا نەوشێروان، دەیەوێت بەشێوەیەکی، ڕادیکاڵانە، ئەو سیستەمە سیاسی و ئیدارییە، سەقەت و بۆگەنەی مەلایی و جەلالی بگۆڕێت، یان بە ئاشتی، بە ئاشتی، ئەقڵیان بگۆڕێت و ڕوخسارەکانیان جوانبکات؟!
هەرچی دیکتاتۆر هەیە، بە درێژایی مێژوو، بەمڕۆشەوە، بە بێ خوێن ڕشتن لانەدراوەو نەڕۆیشتووە، ئەو خوێنڕشتنەش، هەردەم دیکتاتۆرەکان، دەستپێشخەربووینە تیایا. هیچ کاتێک، خوێنڕشتن بڕیارو حەزو ئارەزووی خەڵکانی ڕاپەڕیوی دژ بە دیکتاتۆرەکان نەبووە. سەیرکەن دیکتاتۆرەکانی ناوچەکەو دەروبەرمان، ئەوانەی ڕوخاوون، وە ئەوانەی بەرەو ڕوخانن ، هیچ کامێکیان، چ کەم، چ زۆر، بەبێ خوێن ڕشتنی میللەتانی خۆیان، نەڕۆێشتوون و ناشڕۆن. مەلایی و جەلالی، دوو هێزی مێلیشیای، مافیایی کورد کوژن، بەدەرن لە هەرچی لۆژیک و یاسادا هەیە، دیاردەیەکی، شازو سەقەتی، بێ وێنەن، بوونیشیان، بێجگە لە ناو کورد، نەبێت، لە ناو هیچ نەتەوەیەک و سەرتاپای مێژووی مرۆیەتیدا، نەبووەو، ناشبێت، بگرە لە سۆماڵ و ئەفغانستانیش، شتی لە بابەتی ئەوانەیان، تیادا نیە. لە وەتای هەشن، دەست و چاوساخی، داگیرکەران و دوژمنانی کوردستان بووینە، لە جێبەجێکردنی ئەجینداکانیان، دژ بەکورد. ئەمڕۆی کۆمەڵگای کوردی و کوردستانیش، بەڵگەیەکی نکۆڵهەڵنەگری، بەردەوامیەتی خیانەتەکانیانە. نەوشێروان مستەفاش زۆر باشتر، لە هەموو کەسێک، بە هەرچی کون و کەلەبەری شاراوەو نەهێنیان هەیە، دەزانێت و، چاکیش دەیانناسێت، وە زۆر باش دەشزانێت، کە ئەوانە دوو حزبی ملهوڕی دیکتاتۆرن، بە ڕاپەڕین و بە هێز نەبێت، بە ئاشتی، بە ئاشتی، دەستەڵات تەسلیم ناکەن و، دەستیلێهەڵناگرن. کەچی لە بری ئەوەی ئامادەکاری ڕاپەڕینبکات، بۆ کۆتاییهێنان بە دیکتاتۆریەتیەکەیان، هاتووە، خەریکی فۆڕماتکردن و کۆپیکردنی خۆی و بزتنەوەی گۆڕانە، بە ئەقڵیەت و سیاسەتی خێڵەکیانەو سۆسیال سەقەتیان. ئەقڵی خۆشی داوەتە، دەست مەسعودی سەرۆک خێڵ، هەروەک" سانشۆ بانزا" جوتیارە ساوێلکە، هەوادارەکەی دۆنکیشۆت. پەرادۆکیسیەتە، سەیروسەمەرەکەی، بە هیچ ئەقڵێک، نەچووشدا لێرەدایە، سانشۆ بانزا، نەزانین و ساوێلکەیی وهەژاری، هۆکار بووینە، کە بڕوا بە سوارچاکی و پاڵەوانیەتە ، وەهمیانیەکەی، دۆنکیشۆت بکات و، بەدوایکەوێت. کەچی نەوشێروان مستەفا، ئەوەتا لەسەدی بیست ویەکدا، لەسەردمی، ترۆپکی تەکنلۆژیاو زانستدا، دێت و ئارەزومەندانە، دەکەوێتە دوای مەسعودی سەرۆک خێڵی بنەماڵەی بارزانی، بڕوای پێهێناوە، کە مەسعودیش (دۆنکی بارزانی) کوردە، وە لە سەر، هەڵپەو سەرە ڕۆییە، حیساب بۆنەکراوەکان و درۆکانیشی، دێت خەیاڵ پڵاوانە، بینای گۆڕان و چاکسازی و، جێبەجێکردنی پاکێجەکەی دەکات!!
ئەو پرسیارە بێ وەڵامانە جارێکی تریش دێنەوە پێش لەوەی: ئایا ستراتیژیەتی نەوشێروان مستەفا، گۆڕان و چاکسازیە، لە کۆمەڵگای کوردیدا، یان سەرکەوتنە بەسەر جەلال تاڵەبانی و، شوێنگرتنەوەیەتی، لەسەر ئەو، یەکیەتیەی کە ئێستا بۆتە کۆمپانیای دزی و تاڵانی؟ ئایا بنەماڵەی بارزانی خێڵەکی کوردکوژ، ئەو هێزە دیموکراسیەن، ئەو گۆڕان و چاکسازییەی، کە نەوشێروان عەوداڵیەتی، بە هاوکاری و ڕێگەی ئەوان نەبێت، نایەتە دی؟ باشە ئەگەر، کێشەی سەرەکی نەوشێروان، دژایەتی و ململانی نیە، لەگەڵ یەکیەتیدا، خێرە ئاوا لەگەڵ بنەماڵەی مەلا مستەفای ئاشبەتاڵچی، بوونەتە هەنگوینی سەر لێوی یەکتری؟ بۆچی لە ئاستی، ئەو حکومەتەی ئێستای نێچیر، تەقەڵیداوە، لە دەمی بزوتنەوەی گۆڕان؟ کە چی شەوو ڕۆژیشیان، لە ڕەخنەگرتن و هێرشکردنە، سەر حکومەتەکەی بەرهەم ساڵح، بە یەکەوە گرێدەدا؟ بە دڵنیاییەوە، ئەم بێدەنگیە و متبوونەی نەوشێروان و گۆڕان، بەبێ ڕێکەوتن و هەروا لە خۆڕانیە. پرسیارەکە لێرەدا ئەوەیە، تەنازول لەسەر چیکراوەو، چیان بەچی گۆڕیوەتەوە؟ بێئومێدکردن و ساردکرنەوەی خەڵکانی تووڕەی دژ بە دەستەڵات و ڕێگریکردنیان، لە ڕژانە ناو شەقەماکان، لە پێخەمەتی چیدایە؟ لە چاوەڕوانی جێبەجێکردنی چ، بەڵێنێکی نێچیردایە؟ کۆبونەوەکەی نەوشێروان مستەفا، لەگەڵ ئاشتی هەورامیدا، ڕێکەوت بوو، یان بە ئیتفاق و بەرنامەی پێشوەختەکی بوو لەگەڵ، دۆنکی بارزانی؟ یەکێک لە جیاوازیەکانی، کەسایەتی سیاسی نەوشێروان مستەفا، ئەوە بوو، خۆی دوور گرتبوو لە حکومەت و، خۆ هەڵقورتاندە ناو کاروبارەکانی، وەکوو ئەوەی مەسعودو جەلال تاڵەبانی دەیکەن. بەڵام لە ناکاو بە پێشوازیکردنی، لە ئاشتی هەورامی، چەرچی سووک و چروکی دز، خۆی بردە ڕیزی مەسعودو جەلال بارزانی. کە ئەمە دوورو نزیک، نە ئیشی ئەو بوو، نە هی ئەوەش بوو، خۆی بباتە ئەو ئاستەوە. ئەمە بێجگە لەوەی هەڵەیەکی سیاسی گەورەیەو، تێیکەوت، لە هەمانکاتیشدا سەرەتای، لادانە(ئینحیرافە) لە نەهجی گۆڕان و چاکسازی. ئەوە نەکاری نەوشیروان بوو، وە نە ئیشی بەو جۆرە کۆبونەوانەشە، بە هیچ شێوەیەک. چونکە ئەم کۆبونەوەی زۆر خراپتر بوو، لەو پەندە ئەڵمانیەی، کە دەڵێت" ئەوەی پەیژە بۆ دز دەگرێت، لە بەدی و خراپەکاریدا، هیچی کەمتر نیە لە دزەکە" نەوشێروان بەو پێشوازییەی " حەسانەی" بەردەوامیەتی دزی و تاڵانی نەوتیدا، بە ئاشتی هەورامی.
خەڵکانی کوردستان، گۆرانی ڕەگ و ڕیشەییان دەوێت، لە تەواوی سیستەمە سیاسیەکەدا، بۆ کۆتایی هێنان، بە مەلاییەت و جەلالیەت. خوازیاری ئەو گۆڕانەن، کە نەوشێروان، کورد لە هاوکێشەی سیاسی، ناوچەکەو جیهانیدا، بخاتەوە خانەی سروشتی خۆی، کورد بڕیاردەر بێت تیایا، یاریزانی کاریگەرو کارتێکەر بێت، نەک هەمیشە بڕیار بەسەرادراو کارتێکراو بێت، بۆ خزمەتی داگیرکەرانی، وەک ئێستا. خەڵکانی کوردستان، گۆڕانێکی کۆپیکردنەوەی دەستەڵات، بە بەرگی گۆڕان و، بە ناوەرۆکیش هەمان سیاسەت و ئەقڵیەتی مەلایی و جەلالیان ناوێت. ئەو سیاسەتەی ئێستای بزوتنەوەی گۆران،هیچ جیاوازییەکەی ئەوتۆی نەهێشتۆتەوە، لە نێوانی خۆیان و دەستەڵاتدا. تا ئەو ئاستەی، لە ناو جەماوەریشدا لێکردنەوەیان، ڕۆژ بە ڕۆژ ئاڵۆزتر دەبێت. ڕێک بوونە بەو"ئۆپۆزسیۆنە ئیجابییەی" کە مەلایی و جەلالی، لە سەرەتاوە داوایانلێدەکردن. دەستەڵاتی بەناو کوردی، لە ١٧ی شوباتەوە، بە دڕندایەتی خۆی، هەموو بارو زروفێکی ڕاپەڕینی خەڵکانی کوردستانی دژ بەخۆی، چاکترو باشتر، خوڵقاندووەو زیاتری پێگەیاندووە. هەر لە سەرەتای ڕادەستکردنەوەی ، بەناو حکومەت، لە یەکیەتی بە بنەماڵەی بارزانی، لە هەموو کاتێک زیاتر، بە پاڵپشتی داگیرکەران و دوژمنان، مەسعودی سەرۆک خێڵ، خەریکی تێکدان و لاوازکردنی هەست و ئینتیمایە، بۆ نەتەوەو نیشتمان و، پیرۆزییەکانیش دەکاتە گاڵتەجاڕی. هەر ئەوکات لە بابەتێکمدا، باسی ئەوەمکرد، کە داواکاری ڕادەستکرنەوەی حکومەت لە یەکیەتی، داواکارییەکی ئێران بوو، زیاتر لەوەی داواکاری بنەماڵەی بارزانی بێت، ئەمەش پەیوەست و گرێدراوە، بە ململانێی نێوانی ئێران و ئەمریکا، لە سەر سوریا. هەرواش دەرچوو، نێچیر، تەنها بە ٢٤ کاتژمێر، لە تاران بوو، بۆ وەرگرتنی دوا موافەقەوئیمزای ئێرانیەکان. مەسعود هەر لە سەرەتاوە، بۆ دروستکردنی ئاژاوە گێڕی و، تێکدانی بارودۆخی سیاسی کوردستان و، دواتریش عیراق، بە هێرشکردنە سەر بارەگاکانی یەکگرتوو، دەستیپێکرد، تا ئێستا گەیشتۆتە بەزمی گاڵتەجاری متمانە وەرگرتنەوە لە مالیکی، بە هاوکاری موقەتەدا سەدر! ئەوەی ئێستا لە ڕەوشی سیاسی عیراقدا دەگوزەرێت، بی ئەلاو ئیملا، سیناریۆو پلانی، سەد دەرسەدی ئێرانە، وە ڕاستەخۆش هاتوونەتە ناوکایەکەوە. تێکڕای مەسەلەکەش، پەیوەندە بە ڕەوشی سیاسی ڕژێمی بەشار ئەسەد، هەر چەند لە ڕووخانی نزیکبێتەوەو، پاڵەپەستۆو کۆدەنگی سیاسی جیهانی، لەسەر زیاتر بێت، ئێرانیش لە بەرامبەردا، بۆ بەرگریکردن لێی ئەوەندە، کارتە سیاسیەکانی دەخاتە گەڕ.ئەمەش هەر هەمووی لەسەر خوێن و کەوڵی گەلانی عێراقە، بە تایبەتیش گەلی کوردو خاکەکەی. لەم ڕەوشە سیاسیە تێکقژقژاوەی ئێستای کوردستاندا، کە هەر موو شتێک، مرۆڤەکان لە پێش هەموویاندا، خراونەتە، نێوان بەرداشی بێ بەهاکردن و بێ مۆڕاڵکردن،بە شێوەیەکی کارەساتاویانە. مەسعودی خێڵەکیش، سەڕای ئەوانەش، لە لایەک، لەگەڵ عەرەب، لە لایەکەی تریدا، لەگەڵ یەکیەتی، ناو بەناو، ئەژدیهای شەڕی کورد کوژی نیشاندەن. لەوەتای هەشن، چ خۆ بەخۆ، وە چ لەگەڵ ئاغاکانیان، داگیرکەرانی کوردستان، شەڕ دەکەن و، جگە لە کورد نەبێت، هەرگیز، یەکتریان نەکوشتوە، وەک پۆل ڤالیری دەڵێت:" شەڕ کوشتارگەیە دەگەڕێت، لە نێوانی کەسانێک یەکتری ناناسن، لە پێناو بەرژەوەندی کەسانێکی تر، کە یەکتری دەناسن و هەرگیزیش یەکتری ناکوژن"
دوا پرسیار بۆ نەوشیروان مستەفا، بە ئاشتی، بە ئاشتی، پرێنسیب و قەناعەتە لات، بڕوات پێیەتی، لە بەرامبەر مەلایی و جەلالی؟ یان ئەستۆپاککردنەوەی خۆتە، لە بەرامبەر خەڵکانی کوردستان، لەسەر سیاسەتەکانی ڕابردووت، لە ناو یەکیەتیدا، لەوەی کە تۆ هەردەم ئاشتیخواز بوویت؟ هەر لەو ڕۆژەی هاتیە دەرە لەناو یەکیەتی، جەلال تاڵەبانی، زۆر سەرکەوتووانە توانی، هەر هەموو شەق وەشان و توندوو تیژی و پیاو کوشتن و شەڕانگێزییەکانی یەکیەتی، بە تۆوە هەڵبواسێت، تۆی پێتاوانبار بکات. لەمەدا جەلال تاڵەبانی سەرکەوتوو بووە تا ئێستا. لەبەر ئەوەی خۆشت، چاوت هەر بەدوای یەکیەتیەوەیە، نەتتوانیوە، خۆت لە تارمایی مێژووە کۆنەکە دەربازبکەیت. نەوشێروان مستەفا، دڵنیابە تا جەلال و جەلالیەت، دەستەڵات بێت، ناتوانیت، ئەستۆ پاکی خۆت بسەلمێنیت، بۆ خەڵکانی کوردستان، لەوەی ئەو سیاسەتی ڕابردووی ناو یەکیەتی، تەنها تۆ نەبوویت، یان تۆ بڕیاردەری نەبوویت. خەڵکی کوردستان زۆر چاک دەزانن، کەوا نزیکەی ٥٠ ساڵە مەلایی و جەلالی، جگە لە کورد کوژی و خیانەت، هیچ سوودو بەرهەمێکی تریان نەبووە، جگە لە کارکردن بۆ هێشتنەوەی داگیرکەران، لە کوردستان و خیانەت لە کورد، شتێکی تریان نەکردووە. ئێستاش بە بودجە، داواکاریەکان و ئامانجەکانی خەڵکانی کوردستان بچووک مەکەوە، ئەوەی ئێستا قۆناغێکی هەستیارو بەرپرسانەیە لە مێژوو، جا ئایا دەتەوێت بە ڕاپەڕین، ڕاپەڕین بۆ ڕووخانی مەلایی و جەلالی، لە مێژووی کورد نەمر بمێنیتەوە، یان بە ئاشتی، بە ئاشتی، بمریت و ببیتە مایەی نەفرەتی ئەبدیانە؟