هۆڵی تەلاری هونەر لەسلێمانى یان هۆلی كۆبوونەوەى حزبی؟

Sunday, 03/05/2009, 12:00

عەجایەب لەو هۆڵی هونەرەى كە لەسلێمانی دروستكراوەو هەر لەدواى تەواوبوونیەوە چەند كۆبوونەوەیەكی تێدا ئەنجامدراوە كەچی هەموو ئەو كۆبوونەوانە كۆبوونەوەى حزبی بوون بە مەبەستی پرۆپاگەندەى هەڵبژاردن و خۆدەرخستنی بەرپرسەكان، كەچی ناوی لێنراوە تەلارى هونەر، خۆش هونەر!!.
جارێ مەلا بەختیارو ئەرسەلان بایز جارێ كۆسرەت رەسول و جارێ جەلال تاڵەبانی و جارێ دكتۆر بەرهەم، جگە لەوەى ئەو پرۆژەیە چەندین ساڵ تەواونەركاو لەوادەى تەواوبوونى خۆی دواكەوت، بە قەد شاخی ئەزمەڕ خەفەت و ئازارى كردە دڵی هونەرمەندانەوە، كە لەئەوروپاوە دەهاتنەوە جگە لەهۆڵی سلێمانی كە 300 كەس زیاتر تێیدا جێگەى نابێتەوەو دواى نیو كاژێر دەبێتە حەمامی خانەقا، هیچ هۆڵێكی تر نەبوو لەسلێمانیدا، بەڵام ئەوەتا دواى 18 ساڵ تلانەوە شكور لەحكومەتی هەرێمی سلێمانی هۆڵێك لەدایك بوو، كەچی ئەوەتا بووەتە سێنتەرى ریكلامكردن و پرۆپاگەندەى كاریزمابوونى سەركردەو بەرپرسەكان و هەڵبژاردنەوەیان، نەك ئاهەنگ گێڕانی هونەرمەندان و كۆڕو كۆبوونەوەیەكی هونەرى.
ئەوە باسی ئەوە هەر مەكە كە ساڵانە هەزاران خوێندكارى زانكۆ لەكاتی تەواوبوونیاندا پێویستیان بە هۆڵێكی ئاهەنگ گێڕان بوو كەچی بەهۆی نەبوونى هۆڵێكی گەورەوە نەیاندەتوانی دوو هاوڕێیان بانگهێشت بكەن، جاری وا هەبوو بە خوێندكارانیان وتووە بۆتان نییە خێزان و كەسوكاریش لەگەڵ خۆتاندا بهێنن، مەخابن ئەوەتا هۆڵێكی لەو شێوەیە (تەلاری هونەر) دروستكراوە كەچی بووەتە جێگەى كۆبوونەوەو گردبوونەوەى بەرپرسانی حزب.