دوای تۆ هیچ بارانێ تێنوێتیم ناشكێنێ

Sunday, 29/09/2013, 12:00

1




ده‌ریایه‌كم...

شه‌پۆلم عیشقی تۆیه‌

له‌تاریكی ئه‌ستێره‌و مانگ

ده‌گرمه‌ خۆم

ئه‌ی بۆ جارێك

تۆ ده‌رناكه‌وی

له‌دڵی تۆ...

خۆم ببێنمه‌وه‌؟!.




2




كه‌ ده‌تبێنم

بێده‌نگ

لێم مه‌ڕوانه‌

تۆ نازانی

كه‌ ده‌دوێی

نیگاكانم

وه‌كو ماسی

له‌ناخمدا

سه‌ما ده‌كه‌ن.




3




ئه‌و ده‌ریایه‌م

تێنوێتی باخه‌كان

ده‌شكێنم

ئه‌ی بۆ نایه‌ی

ته‌نها جارێك

تێنوێتی تۆ بشكێنم؟!




4




كه‌ ده‌نگی (با) دێ

له‌رز ده‌مگرێ و

نابم به‌سه‌هۆڵ

كه‌ناره‌كانیش

نامگرنه‌ خۆ

تۆش ده‌رناكه‌وی

له‌باوه‌شت ئارام ببمه‌وه‌

ده‌بێ عیشقی تۆ

چه‌ند مه‌زن بێ

له‌ناخی ده‌ریا؟!




5




ده‌زانم...

دوای تۆ..

هیچ بارانێ

تێنوێتیم ناشكێنێ

گه‌ر تۆ نه‌بی

هیچ كه‌شتیه‌كی عیشق

ناتوانێ

له‌كه‌نارم له‌نگه‌ر بگرێ!.




6




وه‌ره‌ ته‌مه‌نمان

به‌ش ده‌كه‌ین

ئه‌وه‌ی منیش

بخه‌ره‌ سه‌ر ته‌مه‌نی خۆت

تۆ بژی

من هه‌ست به‌بوونی خۆم ده‌كه‌م!.




ده‌ریا ره‌واندزی