بانگەواز بۆ كەسایەتیە نیشتمانیەكان وسەرانی دەسەڵات

Sunday, 20/02/2011, 12:00

سەرەرای ئەو هێزە زۆرەی یەكێتی لە ناو شاری سلێمانیدا بڵاوی كردۆتەوە خۆپیشاندانەكان زۆر بەربڵاوتر و زۆر فراوانتر و زۆر تورە تر، نەك هەر لە ساحەی تەحریر هەروەكو گەنجانی تورە ناویان ناوە، بەڵكو لە چەندین شەقامی تر سەری هەڵدایەوەو سەرەرای داوای بێهودەی لایەنەكانی ئۆپۆزیسۆن و بازرگانان و مامۆستایانی ئایینی بۆ هێوربونەوە گەنجانی یاخی لە سیستمی گەندەڵی بە هاواری (برووخێ) بەرسەراو شەقام وگەرەكەكانی سلێمانیان خرۆشاندبو، ئەم واقیعە شۆرشگێریەی جەماوەری راپەریو لەسیستمی گەندەڵی، ئەمرۆ چوارەم رۆژی راپەرینە شكۆدارەكەی لاوانی بێ بەش لەژیانی كوردستان كاك فاروق رەفیق بەچاوی خۆی بینی، هەموكەس بینی كە جەماوەر چەند رادیكاڵن كاتێك بەهاوار هاوار بەرپەرچی هەر داوایەكی هێوربونەوە یان دەدایەوەو تەنانەت ئامادە نەبون بۆ یەك رۆَژیش مۆڵەت بدەن بە دەسەڵات گوایە داواكاریەكانیان جێبەجێ بكات، كاتێك هەوڵدرا بەرێزەوە و بەناوی رەسمی خۆیانەوە ناوی دوزلحیزبەكە ببرێت هەموكامێراكان بینیان جەماوەری گەنجان توشی چ هیستیریایەك بون كە نەمانی رەسید وشەرعیەتی ئەو دوحیزبەی بۆ هەمو بونەوەرێكی عاقڵ سەلماند.
لەهەموی گرنگتر تورەییەكە و ئیرادەی رزگاربون ئەوەندە بەهێزە، لە مەیدانی خەباتدا لەسەرشەقام و ساحەكان بەبێ بونی سەركردایەتیەكی رێنماییكەر و بەبێ بونی مجال بۆوەرگرتنی رێنمایی لە فەیسبوك، دوای هەر بڵاوە پێكردنێكیان بەعەزم و تەوژمێكی بەتینترەوەدێنەوە و لە چەندین شەقام و جادەی ترەوە خۆیان كۆدەكەنەوە ودێنەوە بەرلوتی هێزە ئەمنیەكان، پاڵنەرو رێكخەری ئەم بزوتنەوە مەزنە شتێك نیە جگە لە تورەبون تائاستی تەقینەوە و ئیرادەی پۆڵایین بۆ قبوڵ نەكردنی یەك رۆژی تر ژیان لە سایەی ئەزمونی قێزەونی ئیدارەی دو حیزبەكە بۆ كوردستان لە بیست ساڵی رابوردودا.
لە روانگەی ئەم بارو دۆخەوە پەیامێك دەنێرین بۆ دولایەن كە ئۆپۆزیسۆن و رۆشنبیران و كەسایەتیە نیشتمانیەكانن لەلایەك وەدەسەڵاتە لەلایەكی تر.
1-بانگەواز بۆ ئۆپۆزیسۆن، رۆشنبیران وكەسایەتیە نیشتمانیەكان:
راپەرینی 17ی شوباتی كوردستان بەشێكە لەراپەرینی گەلانی ستەمدیدەی رۆژهەڵاتی ناوەراست، رژێمی گەندەڵی دوزلحیزبەكەی بەرێوەبەری كوردستان لەهیچ رژێمێكی ملهوری ناوچەكە دەستپاك ترو دیموكراتی تر نیە، خۆشبەختانە توانای فیداكاری و هۆَشیاری لاوانی ئازیزیشمان هیچی كەمترنیە لەتوانای لاوانی گەلانی تر لەبەر ئەوە سەركەوتنی راپەرین وەك رۆژی روناك دیارە، بەڵام هەڵوێستی ئێوە دەبێتە هۆی گەرمتر كردنی لاوان و گۆشەگیرتركردن و روخاندنی معنویاتی سەرانی دەسەڵات ئەمەش یانی كەمترین ئازار وكەمترین رژانی خوێنی بێ تاوان، بۆیە زەمیری میللەت داواتان لێ دەكات هەركەس بەگوێرەی توانای خۆی بەئەركی نیشتمانی خۆی هەستێت، پاڵپشتی خۆتان دەربرن بۆ راپەرین و هەرچی زوتر (كۆمیتەی رینمایی راپەرین) پێك بهێنن.
2-بانگەواز بۆ سەرانی دەسەڵات:
سەد ئەوەندەی تر هێز كۆكەنەوە و خوێنی لاوانی كورد برێژن دۆرانتان مسۆگەرەچونكە ئێمە گەلی كوردی كۆڵنەدەرین بەڵام ئێوە تەنیا كۆمەڵیك چەكداری هەلپەرستی دەم لوسن، شەرعیەتی ئێوە، كارتی یاری ئێوە تەنیا چەكەكانتانە دەنا هیچ شەرعیەتێكی ترتان نەماوە بەڵام ئێمە شەرعیەتی میللەت بونمان هەیە و كارتی خۆ پیشاندانی ئاشتیانەمان هەیە، لە قۆناغی داهاتودا مانگرتنی گشتی ئەكەین، كەمپینی ئیمزا كۆكردنەوە ئەكەین، ئەگەر وەكو قەزافییە قێزەونەكەی هاوپەیمانتان بۆ پاراستنی ئیمتیازاتتان بە ناوی شین بۆ ئەزمونە فاشلەكەتانەوە شێتانە خوێنتان رشت داوای تەدەخولی ئینسانی لە ئەنجومەنی ئاسایشی نەتەوەیەكگرتوەكان و كۆمەڵگای نێودەوڵەتی دەكەین، ئەگەر بۆ پاراستنی دەستكەوتەكانتان بە نیازن لە حوسنی و بن عەلی و قەزافی توندو تیژ تربن بیرتان نەچێت ئێمە رۆڵەی وڵاتێكین بەرامبە ملازم موحسین خۆپیشاندانمان كرد، هەتا ئێوە بەشەكەتی گەیشتنەوە سلێمانی ئەمنە سورەكەمان كۆنترۆڵ كردبو، جگە لە كارتە براوەكانمان ئەزمونەكانی مێژو دەیسەلمێنێت ئێمە براوەین چونكە هەستاوین، لەكوێی دنیا میللەتێك هەستاو شكستی خوارد بەتایبەتی دنیای عەولەمە و یەك جەمسەری؟ هەرلە ئیرانی دراوسێ ساڵی 1979راپەرینی جەماوەر رژێمی شای روخاند، ساڵی 1986 لەفیلیپین رژیمی دیكتاتوری فردیناند ماركوس بەهەمان شێوە روخا، كوتایی هەشتاكان و سەرەتای نەوەدەكان 6 وڵاتی ئەوروپای رۆژهەڵات بەهەمان شێوە روخان، لەم دەساڵەی رابوردودا ئۆكرانیاو جورجیا و بەم زوانەش تونسو میسر بە هەمان شێوە لە دیكتاتۆرە دزەكان رزگاریان بو، كە خۆتان باش ئە زانن دەزگای داپڵۆسێنەری ئە وڵاتانە هە رزۆر زۆر لە وانەی ئێوە بەهێزتربون دڵنیابن كە ئێوە دۆراون، ئەوەتا هەمو نمونەكانی مێژو ئەڵێت سەركەوتن بۆ ئێمەیە، فەرمون ئێوە یەك نمونەی مێژویی بهێننەوە كە خەڵكی راپەریو لە وڵاتێكدا بەرامبەر دیكتاتۆرێك شكستی خواردبێت؟ بۆیە هەتا زوە لەپاڵ حوسنی و زەینەلعابدین و قەزافیدا پەناگایەك بۆ خۆتان پەیداكەن و میللەتی كورد لە ماڵ وێرانیەكانتان رزگاركەن.