پۆستاڵى گــۆڕان و كالەى ئیسلامى وەك دەردەنێكى مــانۆڕى هـــاوڵاتى

Wednesday, 09/09/2009, 12:00

لەنێو رەهەندەكانى باسى هەڵبژاردن رێژەیەك لە بابەت و نووسینى رۆژنامەى (هاوڵاتی)دا وەك مانۆڕێكى رۆژنامەوانى، لە بەرامبەر ئەم ئایدیالزمەى كە بەتەماى ئەوەن بە رێگاى كارى چەندساڵەى چاندنى كارى دەنگى ناڕەزایى و نەیارى و تۆراوى و جورئەتى قەڵەم وەك چەكێكى بەكارهاتوى ناو مانۆڕ لەناو هەناوى خەڵكدا بەكاربهێنن، لەتەك رووێكى ترى پاڵپشتى قەوارەیەك كە لە مێژووى سەردەمى نوێماندا لە بەشكردنى گەندەڵییەكان پشكی هەیە، سەرەڕاى لەگەڵ دیوەكەى ترى وەك نوێنەرى جەماوەر بەتەماى ئەون: ئەمڕۆ بگۆڕن بۆ یاسایەكى بنەڕەتى سیاسى كە بتوانێ بنەمایەك بۆ رەوایى بڕیارێك بۆ دامەزراوە دابمەزرێنن وەك رێكخراوەیەكى ئۆتۆكرات، دروشمێكمان بۆ زیندوو بكاتەوە هەموو شتێك لە پێناوى سەركەوتن.

مانۆڕى چاوپێكەوتن لەگەڵ (ئەبوبەكر كاروانى)
رۆژنامەى هاوڵاتى لە ژمارە (554)دا لە چاوپێكەوتنەكەى لەگەڵ (ئەبوبەكر كاروانى -ئەندامى مەكتەبى سیاسى یەكگرتوو) كە تیایدا رۆژنامەى ناوبراو لە قسەكانى بەڕێزیان مانشێتێكى بۆ خوێنەر هەڵبژاردووە (شكاندنى دەرگا كلیلدراوەكان پۆستاڵى گۆڕانى دەوێت، بە كالەى ئیسلامییەكان ناكرێتەوە) بەرامبەر ئەم نووسینەش ناوى (ئەبوبەكر كاروانى) نووسراوە و، لە ناوەڕۆكى بابەتەكەش بەناوى كەسانى ترەوە كردویەتى!
سەرەتا من دڵنیام بەڕێز (ئەبوبەكر كاروانى) ئەم چاوپێكەوتنەى وەك رۆشنیرێك ئەنجامداوە نەك وەك ئەندامێكى مەكتەبى سیاسى یەكگرتوو، كە راڤە لە بیروبۆچونى سەركردەیەكى باڵاترین مەكتەبى حیزبمان بكات، چونكە هاوڕایە لەگەڵ پرسیار و ئەم سەرسوڕمانەمان كە بەدەم ناوى نوێنەرانى ئێمە بەسەر شان و باڵى قەوارە و لیستێكى تردا هەڵبڵێت لەسەر حیسابى بچوك كردنەوەى هەوڵ و تێكۆشانمان و، پاشەكشەى ئێمە (كە راستە و جێگاى شانازیمانە وەك خاڵێكى دووبارە دەرچوونمان) بكاتە خاڵى سەركەوتنى قەوارەیەك و ئێمە هەردەم لەناو رێخستندا بە پێشەوایەتى ئەنجوومەنە سەركردایەتییەكانمان كە خۆى ئەندامێكى كارایە لێى ئەم دەرگایەى (هاوڵاتى) بە مانشێتە گەورەكەى باسى لێوە دەكات هیچ كاتێك وەك ئیسلامى قەبوڵمان نەبووە سەركردەیەك بە كالە دەرگا داخراوەكان بشكێنێت زیاتر لەوەى پێڵاوێكى ئاسایى لەپێدابێت بە گوێرەى متمانە و چوارچێوەى نوێنەرایتى ئێمە، كە بە دەنگەكانمان لە كۆنگرە هەڵمانبژاردون كلیلى ئەم دەرگایانەمان بۆ بدۆزنەوە نەك بە مەنتیقى لەپێكردنى كالە دەرگاكانمان بۆ بشكێنێنن و، ئەگەر ئەمجارەش سەركەوتوو نەبوون لە دۆزینەوەى كلیلەكان ئەوا هیچ كات رێگاى تێناچێ بۆ ساتێكیش پۆستاڵێك لەبەر بكەین بە خوێنى براكوژى سور بێت تا دەرگاكانى پێ بشكێنین، ئەوا وەك رێزێك بۆ هەست و ماندوبوون و ستراتیژیەتى كارى یەكگرتوو، ئێمە بەرین لەوەى بەسەر شان و باڵى پۆستاڵێكدا بڵێین كە لە خوێنى برا كوژى پشكى باش و خراپى حیزبى دایكى بەركەوتووە، كە ئەمەش هاوكاتە لەگەڵ درێژەپێدانى مانۆڕە رۆژنامەوانییەكەى رۆژنامەى (هاوڵاتى)، كە دەمێكە لەگەڵ دەستپێكردنى هەڵمەتى هەڵبژاردنى (25/7) میسداقیەتى بێلایەنى لەدەست داوە كاتێك نەیتوانى بابەتەكانى بە بێلایەنى بخاتەڕوو، دەربڕینەكان و زۆربەى وتارەكانى دیاربوو زیاتر خزمەت بە كێ دەكات! دواتریش بەداخەوە رووخسارى سەربەخۆیى و بێلایەنى چەند ساڵەى بۆ هەمان بەرژەوەندى بەكارهێنا.

(لڤین) و (فەرهاد پیرباڵ) و (هاوڵاتى)
ئەگەر سوتانى گۆڤارى (لڤین) بەهۆى قبوڵ نەكردنى بابەتێك بێت كە دژ بە رەوتێكى فیكرى دەستەڵاتە و، سوتانى كتێبەكانى (فەرهاد پیرباڵ) بەهۆى تۆڵەى هاوڵاتیان بێت بە بیانوى گواستنەوەى ئەم بەڕێزە لە سەنگەرى گەلەوە بۆ سەنگەرى دەستەڵات، ئەوا رۆژنامەى (هاوڵاتى) هەردوو حاڵتى بەزاندووە و، من پێم وایە بەرامبەر ئەم رۆژنامە بەڕێزە بۆیە تا ئێستا هەڵوێستێكى ئاوا وەرنەگیراوە، چونكە لە ناخى زۆربەى هاوڵاتیانەوەیە كە رۆژێك لەڕۆژان ئەم رۆژنامەیە مامەڵەى نوێنەرایتى دەنگى مەزلومیەت و هاوار و ناڵەى زەرەرمەندانى ئەم هەرێمەمانى بۆ دەكرا، ئێستا لە ناخى زۆربەیانەوە تەنیا خۆڵەمێشەكە ماوە و رێژەى نوێنەرایەتیەكەى ئەگەر لە (75%) بێت پێش هەڵبژاردن ئێستا تەنیا نوێنەرى دەنگى رێژەى كورسییەكانى لیستى بەڕێزى (گۆڕان)ـە و، ژماردنى بەرەوخوارى رۆژنامەى هاوڵاتى دەستى پێكردوە بۆ مۆركى رۆژنامە بێلایەنەكان و، ئیتر رۆشنبیر دڵى بەچى خۆشبێت كاتێك هیوایەكى بە رۆژنامەیەكە كە ئازادە و پشكى جاماوەریەتى و سەربەخۆیى بەیەكسانى بەر نووسین و بابەتەكانى رۆشنبیران دەكەوێت وەك مینبەرێكى بێلایەن! كەچى ئێستا ئەم سیفەتەى وا لەدەست دەدات و جیاوازییەكى ئەوتۆ نابینرێ لەگەڵ بابەتەكانى رۆژنامەى (رۆژنامە).
ئێمەى رۆشنبیرانى ناو حیزب و، دەتوانم بڵێم رۆشنبیرانى دەرەوەى حیزبیش هەردەم لە قازانجمانە رۆژنامەى ئازاد و سەربەخۆ هەبێت، هەر ئەم خاڵە هاوبەشەیە لەگەڵ بۆچوونى خوێنەرەكانى گەل و جەماوەر یەك دەگرێتەوە، چونكە هەردەم چاودێرێكى بێلایەن شك دەبرێ بۆ یەكلایی كردنەوەى شتەكان بەبێ ئەوەى بكەوێتە ژێر فشارى هیچ رەوت و لایەنێك و، ئەگەر مایەى پیرۆزی سەركەوتووەكانى لایەن و قەوارە سیاسییەكان بێت لەم هەڵبژاردنە، ئەوا لە هەمان كاتدا خاڵى پاشەكشێ و كوڵى قەڵەمەكان بۆ هەندێك لە دەزگاى راگەیاندن و رۆشنبیر كە خۆیان گواستەوە لە سەنگەرى گەلەوە بۆ سەنگەرى لیست و قەوارەكان بەدیار كەوت، كاتێك تەنیا خۆیان بۆ سەنگەرى گەل و میللەت یەكلایى كردبویەوە و تەنیا بەم هۆیەوە جورئەت و ناوبانگى قەڵەمیان بەدەست هێنا بوو، كە ئەمیشیان نەما ئیدى چى جێگاى بگرێتەوە؟

(گۆڕان یەك) و (گۆڕان دوو)
لە هەواڵێكى بێ بنەماى ژمارە (555) (هاوڵاتى)دا هاتووە، كەوا رەوتێك لەناو یەكگرتوودا دروست بووە بەناوى گەشە وەك رەوتى گۆڕانى ناو (یەكێتى نیشتمانى كوردستان) وبەهەمان ریتم لە ژمارەى (540)لە 8/7هەمان جۆرى هەواڵى خستبووە روو ولە ژمارەى (556)دا بەیاننامەیەكیش بڵاوكردەوە، بەپێى هەواڵەكە كە هەردووكیان ریفرۆمخوازن، بەڵام ئەوانى ناو یەكگرتوو رەخنە ئاراستەى سەركردایەتى دەكەن وەك چاودێریش دەبن لەسەر ئەدایان و، ئەوەى باش بوو نەوترا كە ناكۆكیان لەسەر بەشكردنى داهات و پۆستى سیاسى ناو حیزبیش هەیە وەك گۆڕانەكى ناو یەكێتى.
سروشتى پێكهاتەى رێكخستنى ناو یەكگرتوو نە پێویستى بە گەشە و نە گۆڕانى دوو هەیە وەك پاساو و بیانوێك بۆ هەندێك وتارى خۆناساندن یان وەك كاردانەوەیەكى توڕەى نووسەرانى، لەگەڵ وێڕاى سوپاس و رێز بۆ گشت ئەو نووسین و تێبینى و وتارانەى كە بە رێگا جیاجیاكان ئاراستەى یەكگرتوو كران و دەوڵەمەندترى كرد لە بینینى خاڵە بێهێزەكانى، كە لە دۆسیەیەكى تایبەت ئەرشیف كراون، لەگەڵ دڵفراوانى بۆ ئەم نووسەرانەى كە بەدەرفەتیان زانى بەسەر سكى یەكگرتوو بكەون بە نووسینەكانیان، جگە لەمانە ئەندامانى یەكگرتوو هەموویان خاوەن رەخنەى بنیادنەر و چاودێرشن لەسەر ئەداى حیزب و دوا هەنگاوى مەكتەبى سیاسى لە زنجیرە بەخۆداچوونەوە و هەڵسەنگاندنى ئەنجوومەنەكانى سەركردایەتى تا ئەنجوومەنەكانى خوارتر، ئەوەبوو وەك قۆناغى یەكەم كە هەموو مەڵبەندەكانیان بەسەركردوە و بە راشكاوانە باس لە هەموو شتێك كرا، مەڵبەندى دوو بۆ نموونە كە خۆمان تیایدا لە خزمەت ئەندامانى مەكتەبى سیاسى بووین، بەچاوى ئێمەوە خاڵى لاواز و هۆكارى پاشەكەشەكەمان خرایەڕوو و تیشك خرایە سەر درز و رەخنە و پێشنیارەكان و رێگاى چارەسەر و هەنگاوى داهاتوو تۆمار كرا و، هیچ شتێك نەما باسى لێوە نەكرێت، كەواتە ئیتر پێوست بەوە دەكات دواتر بخرێتە دەرەوەى ماڵى یەكگرتوو؟ ئەگەر حیزبێك بەیەك چاو و بەیەك رۆح و بەیەك دیدى كارى داهاتوو هەڵسەنگێنن و بەیەكەوە بەرەنگارى كۆسپ و تەگەرەكان ببێتەوە (گۆڕانى دووى) بۆ چییە! مەگەر ئەمەش تاكتیكى مانۆرێكى تر بێت لەلایەن مانۆڕچییەكانى هەندێك كەس و رۆژنامە.
پێویستە بزانرێ كە ئێمەى ناو یەكگرتوو ئەوەندى بیر لە خۆكۆكردنەوە و هەنگاوى داهاتوو دەكەین، بیر لە شت هەڵدانى بەرەو سەر ناكەین و، ئەم پاشەكشەیە وەچەرخانێكى زۆر بەهێز دەبێت بۆمان و، ئەگەر كورسییەكانمان بەگوێرەى مەعقوڵ و بۆچوون بووایە، نەك وەك دەردەنى واقیع، ئەوا بەم شێوەى ئێستا بیرمان لە داهاتوو نەدەكردەوە ئەوەندەى ئێستا بیرى لێ دەكەینەوە و، دووپاتى ئەومان نەدەكردەوە كە بەدەستهێنانى كورسى ئامانجى سەرەكیمان نییە زیاتر لەوەى رێگایەكە بۆ جێبەجێكردنى ستراتیژیەت و، ستراتیژیەتیش وەحى نییە كە دەبێت دەقاودەق لە كات و شوێنى خۆى جێبەجێ بكرێت.