حەمە ئاوات:" مەلا بەختیار لەروویی سیاسیەوە پیاوێكی نەخوێندەوارە."

Thursday, 10/09/2009, 12:00

چاوپێكەوتن: عەبدوڵا گۆران
(حەمە ئاوات) لە دایەكبوی هەڵەبجەی شەهید ساڵی 1953 خوێندنی سەرتای لە هەڵەبجە تەواوكردوە، ناوەندی لە سلێمانی تەواوكردوە، پەیمانگای تەندروستی بەشی تیشكی لە بەغداد ساڵ1971 بۆ 1973 تەواوكردوە، سەرەتا یەكیەتی قوتابیان بوە سەر بە باڵی مەكتەبی سیاسی ئەو كاتەبوە، یەكەم سكرتێری دەرچوی ئاڵای شۆرش، كەسێكی دیای ئێستای لیستی گۆڕان لە هەڵمەتی بانگەشەی هەڵبژاردندا.

سەرەتاكانی ژیانی شۆرشگێری
سەره‌تا لە یەكێتی قوتابیانەوە دەستی پێكردوە، كە بە وتەی خۆی:" یەكێتی قوتابیان بوم لە ساڵەكانی حەفتاوە كە سەر بە باڵی مەكتەبی سیاسی، ئەو كاتە بوو، كە پێیان دەگوت باڵی جەلالیەكان. دوای تەواوكردنی پەیمانگا رۆیشتمە دەرەوە بەشداریم لە شۆرشی حەفتا و چواردا كرد، ئەو كاتە لە ناو باڵی جەلالیشدا فیكرەی ماویمان هەبوو، كە لەگەڵ پارتیشدا یەكمان گرتبوەوە فیكرەمان جیاواز بوو، لە هەموو شتێكدا پارتیمان بە قیادەی خۆمان نەدەزانی، تا دوای ئاشبەتاڵ، كە پێویستە ئەو وشەیە بەكار بهێنرێت لە ئێستادا كە هیچ ترسێك لەسەر كوردستان نەماوە .
دوای ئاشبەتاڵ هاتمەوە كوردستان پەیوەندیم كرد بە كۆمەڵەی رەنجدەرانی كوردستانەوە، لەوانەی كە بەر پرسیاریەتی منیان كردوە، ئامادە نیم ناوی زیندو بهێنم، بەڵام ئەوانەی نەماون، كە لێپرسراوی ڕاستەوخۆی من بوون شەهید (ئەنوەر حەمەمینی ئەندازیار) كە ئیعدام كرا، لە ساڵی 1978 چوومە دەرەوە و پەیوەندیم كرد بە مەفرەزەكانی كۆمەڵەی رەنجدەرانی كوردستانەوە، لەگەڵ چونە دەرەوەم كرام بە ئەندامی ناوچەی یەكێتی و رابەر سیاسی مەفرەزەی شەهید (فه‌رەج تریفەی بووم) .
لە ساڵی 1978 لە گەڵ پارتیدا بەسەختی لە ناوچەی تاوگۆزی بە سەختی بریندار بووم، دواتر جەلال تاڵەبانی ناردمی بۆ ئێران لە تارانەوە جیهازێكی تیشكم هێنا بۆ نەخۆشخانەكەی سەركردایەتی لە قوڵە هەرمێ، لەوێ دەست بەكار بووم تاوەكو دروستبوونی مەڵبەندەكان.
 پاش كۆنفرانسی دوو هاتینە خوارەوە كە (مەلا بەختیار) بەرپرسی مەڵبەندی یەك بوو، ئه‌و کاته‌ من لە پاڕەزان بووم، ئێمە ئەو كاتانە كۆمەڵێك بوین كاری سیاسی جدیمان نەدەكرد لەوانە (سالار عەزیز و پشكۆ نەجمەدین و بەكری حاجی سەفەر و شێخ عەلی) بە حساب (مەلابەختیار) تەكەتولی ئێمە بوو، بەڵام ئەو بەرپرسی مەڵبەندی یەك بوو، ئێمە ئەو كاتە نارەزا بووین و خۆمان خەریك كردبوو بە خوێندنەوە و دیراسەكردن بە فیكرەوە، كە درێژەمان بەو كارانەمان دا تاوەكو مفاوەزات دروست بوو، گەڵاڵەی رێكخراوێكی لە بابەتی ئاڵای شۆرش دروست بوو، من یەكێك بووم لەسەرەتاوە لەگەڵ دروستبوونی ئاڵای شۆرشدا بووم وەك درێژە پێدەرێكی ئەو ناكۆكی و مل ملانێیانەی لە نێوان ئێمە که‌ له‌ یەكێتیدا هەبوون. پاش بەربوونی(مەلابەختیار) من دەستم لە كار كێشایەوە."

پاڵنەری ڕاگەیاندنی ئاڵای شۆرش
سەره‌تای دروستبوونەكەی ده‌گەڕێتەوە بۆ لاوازی سیاسی یەكێتی و خودی جەلال  تاله‌بانی.
"سەرتا كۆمەڵەی رەنجدەران كە لە حەفتاكاندا سەری هەڵدا، ئەو سەردەمە سەردەمی ئینهیاری جەلالیەت بوو، چ لە رووی سیاسیەوە، چ لە رووی تاكە كەسی جەلال تاڵەبانیەوە كە توشی بوو بوو، كۆمەڵە دەیویست نە باڵی جەلالی بێ و نە باڵی مەلایی. تا بەیانی یانزەی ئازاری حەفتا، كە جەلالی و مەلایی یەكیان گرت، ئەو تەرتیبەی كۆمەڵەی لێدروست بوو كێشەكانی لەسەر بنەمای فیكری بوون، كێشەكانی ناو كۆمەڵە هەمووی فیكری نەبوو، بەڵكو لە سەر كارەكانیش كێشە هەبوو، ئێمە زۆربەمان پێمان وابوو كۆمەڵەی رەنجدەرانی كوردستان داشی عێراقه‌، چونكە ئێمە پێمان وابوو كوردستان لكێنراوە بە عێراقه‌وه‌، نەوشیروان مستەفا پێی وابوو ناكرێ كۆمەڵە بە تەنها رێكخستنێكی كرێكاریی بێ، چونكە كرێكاری پیشه‌سازیی لە كوردستاندا نەبوو، پێی وابوو رێكخستنێكی كرێكاران و زەحمەتكێشان و وردە بورجوازی شار و لادێ و رۆشنبیران بێت، ئەو كاتە كۆمەڵێك بۆچوونی جیاواز هەبون دژ بە بۆچوونەكانی كاك نەوشیروان، بەڵام واقع ئیسپاتی كرد بۆچونەكانی كاك نەوشیروان راستر بوون بۆ واقعیەتی كوردستان، ئەو كێشانە ئەگەر بە چاویلكەی ئێستا سەیریان بكەین كێشەكان ئەوەندە گەورە نەبوون كە قابیلیەتی چارەسەر كردنیان نەبێ، بەڵام لە شاخ دنیامان لە خۆمان هێنابوە یەك كە كێشە فیكریەكانمان زۆر بچوك بوون، كە بەچەند سیمینارێك و گفتوگۆیەك چارەسەر دەكران وەك ئێستا، كە هەیە بە شێوەی مەدەنیانە و شارستانیەتیانە، ئەو كاتە (مەلابەختیار) لە هەرە كەسە موتەتەریفەكان بوو، كە كاك نەوشیروان دەیوت من بۆ خزمەتكردنی نەتەوەكەم ماركیسم و سۆسیالیتیم قبوڵە، بەڵام (مەلابەختیار) بەو پەری تەتەروفەوە پێچەوان قسەی دەكرد، كەچی دوای چەندین ساڵ (مەلابەختیار) بە ناچاری نەك لەبەر ئەوەی خاوەن مەبده‌ بێت سۆسیال دیموكراتی قبوڵ دەكات، لەبەر خاتری ئەوەی یەكیەتی سۆسیال دیموكراتە، پێم وایە مەلابەخیتار نە لینیزم ئەزانێ نە سۆسیال دیموكرات چیە، بە قەناعەتی من ئەو پیاوە لە رووی سیاسیەوە پیاوێكی نەخوێندەوارە، گەورەترین شت كە هۆكار بوو ئەوە بوو ئایا جەلال تاڵەبانی كە رابەرایەتی یەكێتی دەكرد خەتەرە لەسەر كۆمەڵە یان نا؟ یا جەلال تاڵەبانی دەیەوێت كۆمەڵە بتوێنێتەوە یان دەیه‌وێت ببێت بە حزبێكی هەمان جەلالی ؟ كە بەراستی بە واقعی ئەوەی سەلماند كە ئەوەی دەویست ئەمانە بونە هۆی دروست بونی ئاڵای شۆرش، ئێمە دەمانویست سەربەخۆی كۆمەڵە بپارێزین بێجگە لە (مەلابەختیار) چونكە مەلا بەختیار ئیسپاتی كرد بۆ پلە و پایە شۆرشی كردوە، ئەو هەڵسوكەوتانەی ئێستا مەلا دەیانكات راستی قسەكانم دەسەلمێنن، ئێمە دەمانویست سەربەخۆی كۆمەلەَ بپارێزین و لە ژێر ركێفی جەلالیەت بیهێنینه‌ دەرەوە، دەمانویست كۆمەڵە دووربێ لە ئەفكاری جەلالیەت تەنانەت تەسفیەی ئەو كەسانە بكرێ كە لە ژێر فكری جەلالیدا بوون، ئێمە گۆران خواز بوین هەر بۆیە لە سەدا نەوەد و نۆی ئەندامانی ئاڵای شۆرش و كۆمەڵە لە گردەكەین و پشتگیری لیستی گۆڕان دەكەین، لێرەوە دەڵێم مەلابەختیار موجەرەدە لە ئێمە هەڵبەتە قسەم لەسەر عیماد ئەحمەد نییە، چونكە سەربازێكی فیراربوو هیچ دەورێكی نەبوو، هاتبویە دەرەوە بچێت بۆ خاریج مەلابەختیار نەی هێشت بروات، نامانەوێ مەلابەختیار و عیماد ببنە قسەكەری ئاڵای شۆرش."

فیكرو ئاڕاستەی ئاڵای شۆرش

فیكری ئاڵای شۆرش فكرێكی گۆرانخواز بووە و كار بۆ گۆرانخوازی كردوە بەڵام ئەوەی سەیرە ئەوەیە كە كۆمەڵێك لەو كەسانه‌ی تا دوێنێ لافی گۆرانیان لێداوە ئێستا نەك لەگەڵی نین بەڵكو دژایەتی دەكەن لەو بارەوە (حەمە ئاوات) ووتی:"ئەوەی ئێستا توشی گەندەڵی بووە ئەوە سیفەتی ئێستای نیە، بەڵكو ئەوە مەعدەنیەتی راستی خۆیەتی، بەڵام ئێستا دەركەوتوە، مەلا بەختیار ئێستا كە كەسێكی گەندەڵە، رەنگە لە شاخ هیچی لەبەر دەمدا نەبووبێ، شەخسی مەلابەختیار زیندانی كراوە، ئەگەر بیریبێ، ئێمە بە كردوە ئیسپاتمان كرد گۆرانخوازین كە وازمان لە بەرژەوەندی تاكە كەسی هێناوە لە پێناو گۆڕاندا، ئەوانە دەیانەوێ میللەت توشی چەواشەكاری بكەن لەبەر پاراستنی زیاتر دەوڵەمەندکردنی گیرفانی خۆیان، مەلا ئێستا هەرە گەندەڵترین كەسی ناو یەكێتییە، لێرەوە پێی دەڵێم ئامادەیە با بێت موناقەشە بكەبن بەو دیكۆمێنتانەی كە زۆربەیان دەستنوسی خۆین پاش بەر بوونی و بە نامەكانی سجنیەوە بە شاهیدی میللەت كە چ گەندەڵێكە، ئەوەتا ئێمە بەسەر شەقامەداندا دەرۆین خەڵك سلاو و ماچمان بۆ هەڵدەدات، بەڵام ئەوان جامەكانیان رەش كردوە، تەحەدای مەلابەختیار دەكەم بە ئاشكرا بە شەقامی سه‌هۆڵەكەدا تێ بپەرێ."

ئاڕِاستە و باڵەكان و بەرژەوەندیە تاكەكەسكانی ناو ئاڵای شۆرش
ئەو فیكرە و بریاردانانەی بۆ رێكخستنی ناو ئاڵای شۆرش جیاواز بوون هەر گروپ یان كەسێك لە پێناو فیكر و بەرژەوەندیەكانی بریاری دەدا، حەمە ئاوات لەو بارەیەوە ووتی:"بۆ جیا بوونەوە و دروستکردنی رێكخستنكەمان تەوەجوهاتمان جیاوازبوو، شەخسی مەلابەختیار بۆچوونی وابوو لە ناو یەكیەتیدا بین و رێكخستنی خۆمان هەبێ لە پێناو ئەو بەرژەوەندیانەی، كە خۆی مەبەستی بوون، چونكە ئیحتیمالی یەكگرتنی باڵی كۆمەڵە و ئەو باڵەی ئێمە دەما و دەیویست ئەعتفی جەلال تاڵەبانی بەلای خۆیدا رابكێشێت و ببێت بە سكرتێری كۆمەڵە، ئەو بۆچونانەیمان بە خەونێكی موراهیقانەمان دەزانی كە كەسێكی موراهیقی سیاسی بوو، هەمیشە كاك سالار عەزیز دەیوت مەلا بەختیار تەرە مەكەن لە تەكەتولەكەمان چونكە ئەگەر دوری بخەینەوە پیسترین جەلالی دەردەچێت لە هەموو كەس زیاتر شەرمان لەگەڵدا دەكات، هەندێ هاورێ وەك (سالارعەزیز و مامۆستا جەعفەر و مامۆستا سەلام عەبدوڵا و تالیب) دەیان ویست رێكخستنەكە هەر ناوی كۆمەڵە بی، بەڵام دوور لە جەلالیەتەوە بە كولی جەلالیەت لامان رەفز بوو."

هۆكاری گیرانی مەلابەختیار لە لایەن یەكێتییەوە
دوای ئەوەی ئاڵای شۆرش دەستی كردوە بە كاركردن یەكێتی بریاری دەستگیركردنی چەند كەسێكی كەمی داوە لەوانە مەلابەختیار بووە (حەمەئاوات) ئەوەی روونكردوە و ووتی:"مەلابەختیار ئەگەر وا بزانێ خۆی سەرقافڵەی ئاڵای شۆرشە، ئه‌مه‌ وا نیە، ئاڵای شۆرش كە كۆبوەتەوە ئەڵقەی ناوەندی نووسەرانی داناوە لەوانە (مەلابەختیار و مامۆستا پشكۆ و شێخ عەلی و ئاسۆعلی و مامۆستا موحسین) مامۆستا موحسین كە خاڵی عیماد ئەحەمەدە پێش گرتنی مەلا بەرائەتی دا و لێچویەوە و پاكانەی دا پێش ئەوەی مەلا پاكەنە بدات بە یەكێتیی، ئەم ئەڵقەی ناوەندی نووسەرانە بەرپرسێكی راستەوخۆی نەبووە، بەڵام گیانێكی موراهیقی سیاسی هەبوو، مەلا بەردەوام خۆی بە كەسی یەكەم دەزانی، مەلا دەیزانی ئەگەر لەناو یەكێتیدا حسابی بۆ بكرێت لەبەر ئێمە بوو، بۆیە هەر دەیزانی ئێمە هەر دەرۆین، بە رۆیشتنی ئێمەش گورگان خواردیان دەكرد، بۆیە دوامان دەكەوت بە ناچاری نەك بە قەناعەتی فیكری و سیاسی لەگەڵمان بووبێ، ئاڵای شۆرش پێش راپەرین یەك پلینیۆمی گرتووە لە خواكوره‌ك، من دەنگی یەكەمم هێناوە عیماد ئەحمەد دووەم و شەهید شێخ حسێنە سور سێیەم و سەلاحی شێخ سدیق چوارەم و كاردۆ پێنجەم، ئەو كاتە مەلا سجن بوە تاوەكو راپەرین، عیماد حسابمان بۆ نەدەكرد، ئەمە شتی تاكە كەسی نییە نەك كێشەی تاكە كەسیم لەگەڵی نیە، بەڵكو قەرزارمە، عیماد ئەحمەد دژایەتی من و سالار عەزیز و چەند كەسێكی تری دەكرد، كە هیچ پلەیەكی نەبوو،  ئەو تەنها كاری بۆ خۆی دەكات نەك بۆ نەتەوە و گەل، ئەوەندە خراپ بوو لەگەڵ تەكەتولەكەی خۆی لێیان دابوو، باڵێكیان شكاندبوو، تەنانەت دوای ئەو شەرەی دەیان ویست دەری بكەن لە ئاڵای شۆرش، بەوەش رازی بوو بە مەرجێك لە مقەرەكە شوێنی بكەنەوە، من نەمهێشت دەریشی بكەن و هێشتیشمەوە لە مقەرەكە، بەیانی تەلەفۆنم بۆ كاك سالارعەزیز كرد بۆ سوید پێم وت: تەكەتولەكەی خۆی لە عیمادیان داوە كاك سالار پێی ووتم بیقۆزەرەوە عیماد ئینتیهازیە بای دەداتەوە بەلای ئێمەدا فعلەن وا دەرچوو، بەیانی مەقالێكی نووسی لەوەی سۆڤیەتی كرد بە قەڵای ئیشتراكی ئەم شەخسیەتی عیماد ئەحمەدە، هەر لە رۆیشتنی برادەرانمانەوە بۆ زێوێ گومانمان هەبوو لەوەی یەكیەتی كەسێكی لەناوماندا دروست كردبێ ئەویش شەخسی عیماد ئەحمەد بوو، نامەی مەلا بەختیارم لایە لە سجنەوە بۆی ناردووم نوسیویەتی كۆبونەوەكانتان دەگاتەوە بە مەكتەبی سیاسی یەكیەتی نیشتیمانی كوردستان، ئەوە سەلام عەبدوڵا و كاك سالار شایەتن، دواتریش بەكردەوە هەندێ پێشنیاری دەكرد بۆمان دەركەوت كە كار بۆ یەكێتی دەكات، ئەو كاتەی مەلا گیرا كە تاوەكو ئێستاش نامەیەكی لامە كە تێیدا نوسیویەتی ئێمە بە ناچاری چووینە سەرەوە، واتە بۆ لای جەلال تاڵەبانی و كە نووسیویەتی خۆمان تەرح كرد، لە نامەكەدا نوسیویەتی مام جەلال بەڵێنی ئەوەی داوە تا ماوەی سێ مانگ مەسروفاتمان بكات تاوەكو خۆمان راگەیەندنی رێكخستنێكی سەربەخۆ بكەین، زۆربەمان بڕوامان بە بەڵێنەكانی جەلال تاڵەبانی نەبوو، دوای نامەكە كۆبوینەوە مەلا لە كۆبونەوەكەدا ووتی :"مەترسن یەكیەتی هیچی پێ نەماوە وەكو عەلەشیش وایە بەس خۆی فش ئەكاتەوە." ئەمە بۆچونەكانی مەلا و لە خۆرازینەكانی بون، تا وای لێهات دەستگیری بكەن و سوكایەتی زۆری پێبكەن، جێی پێكەنینە لە چاوپێكەوتنێكی مەلا لە گەلی كوردستان بەو تێكۆشەرانی ئێستا لە لیستی گۆرانن دەڵێت مێژوی سیاسی خۆیانیان كردەوە بە سفر و دەبێ لە سفرەوە دەست پێ بكەنەوە، بۆیە لێرەوە دەڵێم مەلا بەختیار بە جێهێشتنی ریزەكانی یەكیەتی مێژو ناكاتەوە سفر ئەوە بەرائەت و پاكانەیە مێژوو دەكاتەوە سفر."

سەردەمی راپەرین مل ملانێكانی نێوان شۆرشگێران
لەگەڵ گیرانی مەلابەختیار و بەربوونی كێشەی گەورە لە نێوان ئەندامانی ئاڵای شۆرشدا سەری هەڵداوە لەو بارەیەوە حەمە ئاوات ووتی:"لەگەڵ بەربونی (مەلابەختیار) دەستم لەكار كێشایەوە لە بەر كۆمەڵێك هۆكار، دوای راپەرین لەبەر برینداریەكەم لە ساڵی 1992 سەفەری سویدم كرد بۆ عیلاج، دواتر بووم بە حیزبی زەحمەت كێشانی كوردستان، لە كۆنگرەی دوودا لە ساڵی 1994 بوم بە ئەندامی كۆمیتەی ناوەندی حزب و بەرپرسی لقی سلێمانی، پاشان بووم بەرپرسی لقی وای ئەوروپای حیزبی زەحمەت كێشان، لە2005 دا دەنگی یەكم هێنا قادرعەزیز و ئەوان پێیان قبوڵ نەكرا، هۆكاری ئەمەش دەگەرێتەوە بۆ عەقڵیەتی سیاسی ئەم وڵاتە كە سەرچاوەكەی پارتی دیموكراتی كوردستانە كە حزبە كوردیەكانی كوردستان لەو حزبە جیابوونەته‌وە و بەهەمان عەقلی ئەو حزبەش كار دەكەن، ئەم قبوڵ نەكردنە بوە هۆی ئینشیقاق و جیابوینەوە و رەوتی نیشتیمانی كوردستانیمان راگەیاند، پێش چەند رۆژێك جەلال تاڵەبانیم بینی لەوێوە ئاگادار كرد ئێمە جیادەبینەوە و تەنانەت مەكتەبی سیاسی پارتیشم ئاگادار كردەوە، چونكە لە زۆربەی ئەو شوێنانە بارەگامان هەبوو، جەلال تاڵەبانی لەگەڵ ئەوە نەبوو ئێمە ببین بەیەكێتی، پێی وابوو ئێمە ببین بە حزبێكی سەربەخۆ و جیا لەیەكیەتی، دوای ماوەیەلەژێر كاریگەری قادر عەزیز و چەند كارێكی تر كە مەبەستی بوو فشاری بۆ هێناین ئەگەر نبین بە یەكیەتی موچەكانمان دەبرین، دواتر بە ناچاری پەیوەندیمان كردوە بە یەكیەتی نیشتیمانیەوە، باشتر وایە بڵێم نەك بەو یەكیەتیە كە جەلال تاڵەبانی سكرتێری بێ، بەڵكو هاتینە لای ئەو باڵەی تازە نەوشیروان مستەفا موزەكەرەیەكی چاكسازی دابوە مەكتەبی سیاسی ئێمەش ئەمەلی چاكسازیمان هەبوو بەو برادەرانەی كە ئەو مزەكەرەیان نوسیبوو."

پەیوەندی پتەوەكانی لەگەڵ مەلابەختیاردا
لە بارە ئەوەی كە لەكاتی گیرانی مەلا بەختیاردا پەیوەنی پتەوەی لەگەڵیدا هەبوە لە رێگەی نامە ناردنەوە لە حەپسخانەوە بۆ منداڵەكانی حەم ئاوات ووتی:" من لە ساڵی 1978 كە مەلا هات بۆ ناوچەكەی ئێمە بە زووی یەكمان ناسی و بوین بە برادەر و دواتر تێكەڵ بوین بە بنەماڵە، كە زیندانی كرا دواتر روناكی ژی چەندین جار لەماڵی ئێمە خۆی ئەشاردەوە، توانیمان لە رێی كەسوكاری خۆمەوە یان كەسوكاری روناك خانەوە كەناڵێك دروست بكەین لەگەڵ مەلا كاتی لە زینداندا بوو، تاكە كەس بوم لە ئاڵای شۆرشدا كە مەلا بەختیار پەیوەندی لەگەڵمدا هەبوو، یەكەم نامەی ئێستاش ماوە كە بەوە دەستی پێكردوە كە نوسیویەتی هاورێی هەر خۆشەویستم، منیش بۆخۆم دڵسۆز بوم بەرامبەر ماڵ و منداڵی، بەڵام نە ئەو لەناخیدا من بە هەرە دڵسۆز زانیوە و نە من خۆشەویستی ئەو بوم بەراستی، چونكە پاش كاتێكی كەم لەبەر بونی تەقینەوە بەیوەكەوەو تەنانەت گەشتە پەلاماردانی یەكتر، لە ژیانی سیاسیمدا یەك مرۆڤم نەدیوە بەقەد مەلا بەختار بێ وەفا."

هەنگاوەكانی ئاڵای شۆرش و لیستی گۆرانی ئێستا یەكن
دەگوترێ هەنگاوەكانی ئاڵای شۆرش بۆ گۆڕان و چاكسازی ناو یەكیەتی و هێشتنەوەی كۆمەڵە بوە لەسەر رێرەوە پاكەكەی خۆی لەو بارەیەوە ووتی:" لەو كاتەوە ئێمە خەڵكانی گۆڕان خوازی بوین، هەر بە هۆی لێك نزیكیمانەوە لە بیرو بۆچونەكانی كاك نەوشیروانەوە ئێمە هاتوینەتە لای لیستی گۆڕان و پشتیوانی لێ دەكەین، بەڵام ئەو گۆڕانەی ئێمە ئەو كاتەی لە شاخ بوین كاڵ و كرچ تربون، بەڵام ئێستا سەردەمی شارەو دونیا گۆڕاوەو گۆڕانی دەوێت، چونكە دەسەڵاتی كوردی دەسەڵاتێكی گەندەڵە، دەبێ گۆڕان بكەین دژ بەگەندەڵی، لێرەوە باسی جەلال تاڵەبانی دەكەم كە باسی دەكات كە گوایە خزب و حكومەت جیا دەكاتەوە، ئەو نەك تەنها قسەی گەندەڵەكانی پێ ناكرێ، بەڵكو خەتەر ترین شت ئەوەیە كە ئەو بوە بە بانگەشە كەری مەسعود بەرزانی و ئەو تەخشان و پەخشانەی كە بە پارەی خەڵكەو دەدزرێ، خۆ ماڵی خۆیان هەموویان بە پاتەی لاستیكەوە هاتنە خوارەوە، ئەو پارە دزینەی كە لە ماوەی دوو مانگدا دەیدەن بەخەڵك بۆ پێشتر ئەو پارەیان نەدەدا، ئەو بانگەشانەی جەلال تاڵەبانی بە گەندەڵ كردنی تاكی كوردە نەك چاكسازی كە باسی لێوە دەكات، تاكی كورد فێر دەكات هەمیشە فێری دەست پانكردنەوە بكات، بۆ ئەوەی هەمیشە تاكی كورد دەروێشی ئەو بێت، دواترین كەس لە كۆمەڵگای كوردیدا جەلال تاڵەبانیە بۆ باس كردنی چاكسازی، حەقە ئەو باسی بەرە گەندەڵی بكات نەك چاكسازی كردنی كۆمەڵگا، ئێمەی گۆڕان خوازەكان دەمانەوێت ئەزموونی گەندەڵی دزی لەو گەندەڵانە تێك بدەین بۆ هێنانەدی ئەزمونێكی جوان بۆ كۆمەڵگاكەمان، ئەزمونی بنەماڵەو خێڵ تێك دەدەین و دەسەڵات دەگێرینەوە بۆ گەل، ئێمە نامانەوێ ئەندام پەرلەمانەكانمان لە هۆلی پەرلەماندا تەنها لە بەرژەوەندی حزبدا دەست بەرزبكەنەوە یان وێنە بكەن لەناو هۆڵی پەرلەماندا بە دەستێكی بە دەستەكەی تری دەست بەرز بكاتەوە بە بڕیاری حزب بە بێ ئەوەی بزانێت بۆ چیە ئەوەش خانم (سۆزانی خاڵە شەهابە)، ئەندامە كانی ئێمە ئەوە نابن، ئێمە پەنجە بكەن بەچاویاندا بۆ بریارەكان لە بەرژەوەندی هەموو كۆمەڵگادا نەك بۆ بەرژەوەندی دوو بنەماڵە بێ، نازانم بۆچی ناوی خۆیان ناوە لیستی كوردستانی بۆچی ئێمە كوردستانی نین، وەكو جەلال تاڵەبانی ووتی :"ئێمە گوێ لەكەسانێك ناگرین نە ناسراو بن." پێ دەڵیم ئێمە نە ناسراوین یان تۆ كە ئەوانەی لەگدەكەن لە مەفرەزە سەرتایەكانەوە تا ئێستا شۆرش دەكە یان تۆ، تۆ تێشكاوترین كەسایەتی سیاسی بویت لە حەفتاكاندا ئەوە كۆمەڵە بوو تۆیان هێنایەوە ناو سیاسەت، تۆ لە بەیانی یانزەی ئازاری حەفتادا تۆ كوژایتەوە و مێژووی سیاسیت بە شكست كۆتای هات، چەند ساڵ لە پاڵ بەعسدا ژیانی سیاسیت گوزەراندن، ئێستە ئێمە بەكەسانی نەناسراو ناو دەبەیت جەنابی جەلال تاڵەبانی."

لیست گۆڕان و رۆڵی لە ئۆپۆسزیۆن بوندا
لە بارەی ئەوەی لیستی گۆڕان كارێكی گرنگی كردوە لە ماوەیەكی كەمدا لە چاو ئەوە ئۆپۆسزیۆنانەی پێشتری ساحەی سیاسی كوردستان حەمە ئاوات ووتی:" ئۆپۆسزیۆنانی پێشو كۆمپانیایەكی بچوك بون بۆ وەرگرتنی پارەو بەهێز كردنی خۆیان بون لە كۆمپانیا گەورەكانەوە كە پارتی و یەكیەتین، ئەوانە هەرگیز نەیان توانیوە ئۆپۆسزۆنێكی راستەقینە بن، هەمیشە بە كورسەك یان وەزارەتێك بێ دەنگ بون، ئێمە ئەگەر دەسەڵاتیش نەگرینە دەست كورسیەكانی ئێمە زۆر زیاتر دەبێ لە ئۆپۆسزیۆنەكانی پێشو، لێرە لێیان دەپرسم بۆچی ماوەی هەژدەساڵ نەیان توانی بەقەد بیست و پێنج رۆژی لیستی گۆڕان ئۆپۆسزیۆن بن، ئۆپۆسزیۆن پێویستی بە هێزی جەماوەریە، جەلال تاڵەبانی وا نەزانی سەردەی ئێستا ئەوەیە لە رادیۆیەكەوە قسەبكات خەڵكی بروای پێ بكەن، چونكە ئێستا خەڵك هۆشیارە دەبێ هەموو شتێكی بۆ بسەلمێنی ئینجا بەڵێ دەكات، ئەو رۆژانێك هەبوو بنەماڵەی بەرزانی كردوە بە ینەماڵەی ئاشبەتاڵ، رۆژانێك بوە وتویەتی من كوردایەتی لە بەرزانیەوە فێر بووم، تەنانەت سەری لە جەماوەرەكەی خۆی تێكداوە كە نازانن بنەماڵەی بەرزانی بنەماڵەی ئاشبەتاڵن یان مامۆستای جەلال تاڵەبانین، ئێستا بوەتە دەهۆڵژەنی مەسعود بەرزانی كە من پێم وایە ئەو یەكیەتیەی كە ئێستا لە لای ئەون زۆر سوكو سولیمی كردون لە بەردەم پاتیدا، هێزی ئێمە هێزی جەماوەرە بە هەموو توێژەكانیەوە و بە تایبەتی هێزی گەنجانە، لێرەوە وەڵامی ئەو قسانەی سەعدی پیرە دەدەمەوە كە بە ئێمە دەڵێت:" ئەوانە تابوری پێنجن."هەموو كەس دەیتوانی ئەو قسەیە بكات نەك سەعدی پیرە، ئەو فایلەكەی جوانە ئەگەر ئێمە تابوری پێنج بوینایە ئەبوینە چڵكاوخۆرو بەكرێگیراو تابوری پێنج لە ریزی گەندەڵەكاندا دەماینەوە، ئەبوو پشگیریمان لە ئەو بكردایە بۆ داپۆشینی كارە جوانەكانی، با ئەو بە مەلەفەكیدا بچێتەوە باشتر لەو قسە بێ بنەمایانەی."