تراژیدیای ژیان لە ناوچەی سەوز و زەرد
Wednesday, 30/10/2013, 12:00
2287 بینراوە
زۆرجار سەرباری سەرقاڵیم بە تاڵی و قورسی ژیانم ، داڵغەم دەروات ، وایلێهاتووە ماوەی کاژێرێک بۆ کاژێر و نیوێک داڵغەکانم بۆ دوورم دەبەن و تیایدا زۆر بێ هیواو و بێزار دەبم ، کاتێک بیر لە واتاکانی ژیان دەکەمەوە لە کوردستان هەست دەکەم هیچ مانایەکی نیە و وەک وڵاتان لە هەوڵی ناسینی وڵاتەکەمان و پێشخستن و خاوێن راگرتنی نین و کەسێک بەدی ناکەم و تا ئەمرۆ نەمبینویوە کە غەمخۆری ئێرە بێت ، هەستی نەتەوایەتی و مرۆڤایەتی هیچ بونێکی نەماوە و ئەوەی پێی دەوترێت (ئینتیما) لای کەسی کوردی بەدی ناکەم بۆ ئەم وڵاتە ، کوان ئەو خەڵکانەی کاتی خۆی ؟ کوان ئەو کەسایەتیە پر بەهاو بەهەیبەتانەی کوردستان ؟ ئێرە و ئێمەش بۆ وامان بەسەرهات ؟ رۆژگار بۆ وامان لێدەکات و بۆچی ئێمە دەبێت بمانەوێت و نەمانەوێت پەیوەست بین بە سیاسەتەوە و چۆن سیاسەتێکیش ، تا سەر ئێسقان نالەبار و ئیفلیج ، بۆچی دەبێت ژیان لەم وڵاتە دابەشبوبێت بەسەر دوو ناوچەدا کە بە دوو رەنگ ئاماژەی بۆ بکرێت (سەوز و زەرد) ! واتای ئەم دوو ناوچەیە کوا هەرگیز و پێشوەخت لەم وڵاتەدا بونی هەبووە ؟ گەر ئێستا ئەو خەڵکەی کاتی خۆی بە ئەسپ و عەرەبانە بەناو شەقامەکانی کوردستاندا هاتونو چوون و پیاوی یەکی یەکی ئەک ولاتە بوبن رۆحیان بکرێتەوە بەبەردا چی دەڵێن و لەسەر مەسەلەی هەردوو ناوچەی سەوز و زەرد چ هەڵوێستێکیان ببێت ؟ بونی ناوچەکانی سەوز و زەرد خەڵکانی سەوز و زەردیشی لێکەوتۆتەوە هاو و هەوا و جوگرافیای سەوز و زەردی دروستکردووە ، شێوازی مامەڵە و پەیرەوی پیادەی ژیانی سەوز و زەردی هێناوەتە ناوەوە ،دوو ئیدارەی سەوز و زەردی دروستکردووە ، گەلی برادەرینە ژیان لە کوردستان بریتی نیە لە سەوز و زەرد و هەر رەنگێکی دیکە ! ژیان لە کوردستان بریتی نیە لە مەرجی حیزبی بوون و دەسەڵاتدارێتی و زۆر و زەوەندی لە سامان و داهات و پاسەوان و تەلار و باڵەخانەی رەنگاو رەنگ و هەوری ! ژیان لێرە لە کوردستان وێنە کۆنەکانی شارەکانی سلێمانی و گەرەکەکانی سەرا و مەڵکەندی و گەرەکەکانی دیکە و هەولێر و قەڵاکەی و دهۆ و زاخۆ و پردی دەلال و هەموو شار و شارۆچکەکانی دیکە و ناوچەکانی تر بەدەر لە زمان و ئایین و رەنگ ژیان تیایدا نەک هەر ئاسایی بووە بگرە زۆر زۆر سادە و رەشۆکی بووە ، ئەم جیاکاریەی ئەمرۆ وتەیەکم بیردێنێتەوە کە کاتی خۆی لە سالەکانی هەشتاکاندا لە وانەی مێژوودا دەمخوێند و لە باسی ئیستعماردا مامۆستا دەیوت هەمیشە دەوڵەتانی ئیستیعمار سیاسەتی پەرتەوازە بکە سود دەبینیت بە زمانە عەرەبیەکەی (فرق تسد) ، واتە گەر هەرکات ئیستیعمار ویستبێتی ملی میللەتێک بشکێنێت و چۆکی پێ دابدات ئەم سیاسەتەی پەیرەو کردووە تا بێهێزی بکات و تا رادەیەکی زۆرباشیش تیایدا سەرکەوتوو بووە و هەر لەو کەلێنەشەوە گەلانێک بۆ چەندین ساڵ ژێر دەستە و خامۆش و خاپوور بوون ، ئەوەی ئێستا هەستی پێدەکرێت هەموو حیزبە کوردیەکان بە زلهێز و دەسەڵاتدارەکانیشەوە بە واتایەکی تازە و بە تەنسیق لەگەڵ دونیای تەکنەلۆژی و پێشکەوتن هەمان سیاسەت دەسەپێنن و گێلانەش میللەت ملی بۆ زۆریان داوە و ئەمەش حالێتی کە دەبینرێت ، لەسایەی دابەشبوونی وڵات تاکی کورد هیچ حەز وئارەزویەکی بۆ ژیان لێرە نەماوە و ئێستا هێندەی خەلکانی بیانی لە کوردستان نیشتەجێن خەلکی کورد نین ، کوردی ئەم وڵاتەی خۆمان لە ساڵی 1991 تا ئێستا ئەوەی توانیبێتی کورستانی جێهێشتووە و ئەوەشی ماوەتەوە تا ئەمرۆ بەرەوام لەهەوڵ و لە چاوەروانی فرسەتی دەرچونە لەم وڵاتە ، کوردستان بەهۆی سیاسەتی حیزبایەتی کوردایەتی فرۆشتنەوە و منەتبارکردنی جیلی کۆن و نوێ ئێرە و ژیانی ئێرەی لابۆتە کابوسێکی تاڵ و قوڵ و لە بنی پێی تا تەوقەسری نائومێدی و بێ هیوایی دایپۆشیوە ، ژیان لێرە تا کاتی ئەم نوسینەم تایبەتە بە چەند کەسانێک و چەند تاقم گروپێکی حیزبی خۆسەپێن و وەک مێروو کەوتونەتە مژینی خێر و بێری و ئەوی دەمێنێتەوە زەقەی چاوەکانی دێت ، لەگەڵ ئەوەشی کە ئەم میللەتە بەو حاڵەشەوە قەناعەتی گرتووە و گوێ نادات بە بارگرانی و ناعەدالەتی لەقەفەس کردنی ، ناوە ناوە گرفت و کێشەی هەڵبژاردن و تاوانی لایەنگیری ئەم و ئەو و خیانەتی دەخەنە پاڵ و کێ بە کێ و خۆ بەخۆیەکیان لە ناوەوەی ئەم وڵاتە دروستکردووە هەر مەپرسە ، وامان لێهاتووە یەکتر ناناسینەوە وهیچ نوێبونەوەیەکی سیلەی رەحم و مرۆڤایەتیمان نەماوە ، ئەم وڵاتە کە بەناوبانگ بوو لە تەواوی ناوچەکە بە سادەیی و لەخۆبوردویی و بەتوانایی و مەردایەتی لە داب و نەریت و کەسایەتی بەرز ، وایلێهاتووە بچێتە خانەی ناوچە گەندەڵ و بێ سەرەو بەرە و بێ گەورە و بێ چوارچیوە و نەزان و پارە پەرست و هەل پەرست ، ئەفسوس هەزاران حەیف و ئەسەف بۆ پیرەمێرد و بێکەس کەریمی ئەلەکە و نەجمەدینی مەلا و سەیدا ئەمین زەکی و یوسفی و ویلیەم یۆحەننا و شێخ رەزا و چەندینی تر لە کەڵە پیاوانی دیار و خۆش مەشرەفی کوردستان هەزاران ئەفسوس و داخ بۆ کوردستانی ئەو سەردەمانی ئەم بیرمەندو میهرەبان و زانایانەی تایدا دەژیان و دەگوزەران .
