نووسەر و رووناکبیر و که‌سایه‌تییه کورده‌کانی ئوسترالیا به‌توندیی ئیدانه‌ی قه‌سابخانه‌که‌ی سلێمانیی ده‌که‌ن
Friday, 18/02/2011, 12:00
نا بۆ خوێنڕێژیی و سەرکوتکردنی خەڵکی کوردستان
دیمەنە دڵتەزێنەکانی لاوانی لەخوێن خەڵتانکراوی کوردستان لە لایەن میلیشیاکانی پارتیی دیموکراتی کوردستانەوە هەموو کوردێکی ویژدان زیندووی تاساند. ئەو شێوازەی کە گەنجانی سیڤیلی سلێمانیی لە ١٧/٢/٢٠١١ تێیدا خەڵتانی خوێن کران رووی دیکتاتۆرە هەڵاتووەکانی وەک موبارەک و بنعەلی سپیی سپیی کردەوە. ئەم کارو رەفتارە سەرکوتگەرییە ئەوە دەسەلمێنێ کە بنەماڵە و حیزبە حاکمەکانی کوردستان لەپێناو پاراستنی کورسی دەسەڵاتیاندا سڵ لە قەتڵوعامی خەڵکی بێدیفاع و لەباربردنی ئەزموونی کوردستان ناکەنەوە و گەواهیی ئەوەش دەدەن هاوشێوەی عروبەکەی بنعەلی و موبارەک، کوردایەتیی حیزب و بنەماڵە حاکمەکانی کوردستانیش تەنها ئامرازێکە بۆ ئه‌وه‌ی درێژه به‌گه‌نده‌ڵیی و بەدەسەڵات بده‌ن. ئه‌و حیزبانه‌ی کە بەردەوام لە ماسمیدیاکانییانه‌وه کوردایەتییمان پێدەفرۆشنه‌وه دوور لە هەر بەهایەکی ئینسانیی و مۆڕاڵێکی سیاسیی، گه‌نجانی خوار هه‌ژده ساڵ و نه‌وه‌ی دوای راپه‌ڕین خەڵتانی خوێن ده‌که‌ن.
ئه‌و به‌یانه‌ی سه‌رۆکی هه‌رێم سه‌باره‌ت به‌و قه‌سابخانه‌یه، نه‌ک وه‌ک سه‌رۆکێکی نیشتمانیی ، به‌ڵكو وه‌ک سه‌رۆکی حیزبێکی سیاسییش نه‌نووسراوه. لەبری ئەوەی وه‌ک سه‌رۆکی هه‌رێم، نیشتمانییانه مامه‌ڵه له‌گه‌ڵ رووداوه‌کاندا بکات، نه‌غمه و ئه‌جێندای ئه‌و راگه‌یاندنه بۆنی خوێنی زیاتری لێدێت. بۆنی شه‌ڕێکی ماڵوێرانکه‌ری ناوخۆیی تری لێ دێت. جارێکی تریش سه‌رۆکی هه‌رێم سه‌لماندییه‌وه، که سه‌رۆکی حیزبێکی میلیشیاییه‌و هه‌ر کاتێ بیه‌وێ ده‌ستوور به میلیشیای حیزبه‌که‌ی ده‌دات قه‌سابخانه‌ی له‌م چه‌شنه بخوڵقێنن.
کاتی ئەوە هاتووە پارتیی لە گەڵ جیاوازییەکاندا هەڵبکات. پارتیی نە ئەو مافەی هەیە خەڵک بەوشێوەیە قەتڵوعام بکات و ئاساییشی کوردستان بخاتە دووڕێیانێکی مەترسییدارەوە و نەدەتوانێت هیچ پاساوێک بۆ ئەم سەرکوتکارییە بهێنێتەوە. پارتیی ئەگەر بەبیانووی بەرگرییکردن لە بارەگاکانی خۆی بەدەستڕێژی گوللە وەڵامی خۆپیشاندانێکی هەڕەمەکیی هه‌زاران گه‌نجی خوێنگه‌رمی کوردستان دەداته‌وه و شارێک خه‌ڵتانی خوێن دەکات، ناتوانێ هیچ شه‌رعییه‌تێک بۆ تاوانی کوشتنی خۆپیشانده‌رانی سیڤیل دابتاشێ. هاوکات هێشتا ته‌قه‌ی میلیشیاکانی له ئاسمانی سلێمانییدا ده‌نگی ده‌دایه‌وه ،کاتێک بە شێوەیەکی سیستماتیک و بەرنامە داڕێژراو لە هەولێر و سۆران و دهۆک(به موباره‌که‌ی حکومه‌تی هه‌رێم) میلیشیاکانی پارتیی هێڕشیان کردە سەر بارەگاکانی گۆڕان وگڕیان تێبەردان و تاڵانیان کردن. ئه‌مانه هه‌مان مێنتاڵیتیی و ئه‌ته‌کێتی میلیشیایی شه‌ڕی ناوخۆی 1994 له یاده‌وه‌رییماندا زیندوو ده‌کاته‌وه.
پارتیی دەبێت جیاوازییش بکات لەنێوان شکاندنی دەرگە و پەنجەرەی بینایەک و رشتنی خوێنی دەیان گەنجی مه‌حروم و دڵ پڕ له‌هیوای کوردستان. کاتی ئەوە هاتووە کە سه‌رانی پارتیی و یه‌کێتیی عیبرەت لە بنعەلی و موبارەک وەربگرن و واز لە گوتاری "دەستبڕینی" خەڵکی تاسەر ئێسقان دژبه گەندەڵیی بهێنن. کاتی ئەوە هاتووە کە سەرۆکی پارتیی لەبری رستەی بریقەداری "ناهێڵم جارێکی تر خوێنی کورد بڕژێت" چیتر به‌کرده‌وه فه‌رمانی خوێنڕشتن بە میلیشیاکانی نەدات. کاتی ئەوەش هاتووە کە هه‌لومه‌رجی میلیتاریزەی کوردستان سنوورێکی بۆ دابنرێت و بارەگای هەموو حیزبە خاوەن میلیشیاکان لە شارەکان به‌گشتیی و له هه‌ولێری پایته‌خت به‌تایبه‌تیی، بچنە دەرەوە و چیتر نەبن بە هەڕەشە بۆسه‌ر ئازادیی و ئاساییشی هاوڵاتیانی کوردستان.
ئێمه دژی هه‌موو توندوتیژییه‌کین، به‌تایبه‌ت توندوتیژییه‌ک دژ به خۆپیشانده‌ران و خه‌ڵکی مه‌ده‌نیی بێچه‌ک بکرێت. به‌ڵام جیاوازییه‌کی زۆر گه‌وره له‌نێوان به‌رده‌فڕکێی گه‌نجان و ده‌ستڕێژی چه‌کداره‌کانی پارتییدا هه‌یه. وێڕای ئیدانه‌کردنی ئەم تاوانە دڕندانه‌یه، داوای دادگایەکی عادیلانە و بێلایەنانەی ئەوانە دەکەین کە دەستیان لە رشتنی خوێنی گەنجانی سلێمانییدا هەیە. لەهەمان کاتیشدا، دەزگا ئەمنییەکانی یەکێتیی نیشتیمانی کوردستان بەبەرپرس دەزانین که نه‌یانتوانیوه گیانی خۆپیشاندەرانی سیڤیل له ده‌ستدرێژیی چه‌کداریی بپارێزن. هه‌روه‌ها بێده‌نگیی حکومه‌ت له‌ئاست ئه‌و کرده‌وه میلیشیاییانه‌ی پارتییدا و جه‌ختکردنه‌وه له‌سه‌ر ئاژاوه‌گێڕیی خۆپیشانده‌رانی بێدیفاع ، سه‌لماندییه‌وه ئه‌م حکومه‌ته چه‌ند حکومه‌تێکی حیزبییه. له کۆتاییدا، سەری ڕێز و نەوازش بۆ گیانی فریشتەیی رێژوان و رۆژنامه‌نووس سه‌رده‌شت عوسمان و سۆرانی مامه حه‌مه‌و .......تاد دادەنەوێنین. دڵ و ویژدانیشمان له‌گه‌ڵ برینداره‌کاندایه‌و هیوای ساڕێژی برینه‌کانیان ده‌خوازین. هاوکات ئێمه له هه‌نده‌ران هه‌وڵ ده‌ده‌ین له ئاستی ناوه‌نده نێوده‌وڵه‌تییه‌کان و حکومه‌تی ئوسترالیا و رێکخراوه‌کانی مافی مرۆڤ و حیزب و لایه‌نه سیاسییه‌کانی ئه‌م وڵاته‌دا ئه‌وپه‌ڕی توانای خۆمان بۆ ریسواکردنی ئه‌م قه‌سابخانه‌یه به‌گه‌ڕ بخه‌ین.
1. ئارام ره‌فعه‌ت
2. عه‌دنان که‌ریم(ئه‌حمه‌د موعین)
3. کامیار سابیر
4. د.نه‌وزاد ره‌شید
5. د.پشتیوان عه‌بدوڵا
6. به‌هرۆز قادر
7. مه‌نسور ره‌زاقیی
8. ئاران عوسمان
9. ئاری عه‌لی
10. ئاریاس ئه‌حمه‌د
11. ئاشتیی که‌مال مه‌ولورد
12. ئاشتیی ئیبراهیم ئەفەندیی
13. ئومێد ڕەسوڵ
14. حه‌سه‌ن عوبێد
15. رامیار عبداللە تۆفیق
16. رۆزا بۆکانیی
17. رێبوار عەزیز
18. رێبواری موهەندیس
19. رۆژ بۆکانیی
20. شێروان مه‌ولود
21. شیرین عبداللە
22. سه‌عد عه‌بدوڵا ئاغجه‌له‌ریی
23. عوسمان جەلال ئەحمەد
24. کاڵێ بۆکانیی
25. کانیی موسته‌فا(خوشکه‌زای شه‌هید حه‌مه حه‌لاق)
26. کانیی بۆکانیی
27. مامۆستا ئیسماعیل عه‌سکه‌ریی
28. مەریوان جەوهەر
29. نیشتمان عه‌بدوڵا
30. هەنار عه‌بدوڵا
31. فه‌یسه‌ڵ عه‌زیز
32. عه‌باس بۆسکانی
33. محه‌مه‌د پشده‌ریی
34. یوسف مورادیی
35. لالۆ سیانیی
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
