دیوەکەی تری هەولێری دوبەی!
Tuesday, 28/01/2014, 12:00
2030 بینراوە
(مایا مستەفا سەباح) كچە گۆرانیبێژێكی لوبنانییە و نزیكەی 20 رۆژە لە هەولێرە و گرێبەستی لەگەڵ یەكێك لە هۆتێلەكانی شاری هەولێر كردووە وەكو گۆرانیبێژ، ده‌ڵێت، خه‌ریك بووه ده‌ستدرێژی سێكسی بكه‌نه سه‌ری. رۆژنامه‌ی رووداو بڵاویكرده‌وه، ئه‌و كچه گۆرانیبێژه، لە پرسگەی هۆتێلەكە دانیشتبوو، دەستێكی خستبووە ژێر چەناگەی و لە رێگەی مۆبایلەكەی دەستییەوە سەیری برینەكانی سەر دەموچاوی خۆی دەكرد. مایا باسی دوو هەفتە مانەوەی لەو هۆتێلە دەكات و دەڵێت: "بەڕاستی شۆك گرتمی كە بینیم هۆتێلەكە لە ئاستێكی باش نییە و پڕە لە سۆزانی، بەداخەوە كە كچی تێدابوو تەمەنی 11 ساڵ بوو . من خۆم دەیان جار بۆ سیمنار و کۆڕی پزیشکی لە ئوتێلی چوار و پێنج ئەستێرەیی لە هەولێر ماومەتەوە و هەمان سەرنجی (مایا مستەفا) م هەیە لە سەر ئۆتێلە گرانەکانی هەولێر، دواترین دو ئوتێلی چوار ئەستێرە کە پێش ٢ هەفتە تێیاندا مامەوە، لە یەکێکیاندا هەمو ئەوانەی لە پرسگە دانرابون کچی عەرەبی جوان و گەنج بون، هەمو پاککەرەوەکانیش لە یەکێ لە وڵاتانی ئەوروپای خۆرهەڵاتەوە هاتبون،ئەمانیش جوان و گەنج بون. نە عەرەبەکان نە ئەوروپیەکان نە ئینگلیزی نە کوردیان نەدەزانی، تەنانەت نەیاندەتوانی وەک کەڕولاڵ بە هێمای دەست و دەموچاو پردێکی تێگەیشتن لەگەڵت دروستبکەن. ئەمە لە کاتێکدایە کە سەدانهەزار کوڕ و کچی لاو ، بەتوانا، بەڕومەت، بەڕێز، بەڕەوشت، نەدار و هەژار کە لە دەرچوی شەشی سەرەتاییەوە تیایاندایە هەتا دەرچوی زانکۆ، وە ئەمانە هەمویان تینوی کارکردنن، دەیانەوێ کۆمەکی خۆیان و خێزانەکانیان بکەن و چیتر نەبنە بار بەسەریانەوە،دەیانەوێ شوبکەن و ژنبهێنن و خێزان دروستبکەن. سەرمایەدارە مشەخۆر و گەندەڵەکانی کوردوستان نەک هەر بە تەنیا لە بو اری خزمەتگوزاری بەڵکو بەگشتی لە بواری نەوت و گاز و خانوسازی و ... لە ژێر دەیان بەهانەی پوچ و بێبناغە کار نادەن بەم گەنجانە، بۆنمونە دەڵێن کرێکارە کوردەکان ئیش ناکەن، تەمەڵن، پیشەیان نیە،بە پێی ڕێنماییەکان کارناکەن، بێسەروبەرن، ژنی کورد پێێ عەیبە کاربکات(بێگومان کەس و کاری کچ نایانەوێ کچەکەیان بخەنە بەردەست پیاوێکی شەهوەتبازی داوێنپیسی بێویژدان) . ڕەوشتی کارکردن و دڵسۆزی بۆ کار و پیشە لە کوردوستانا بە بەراورد لەگەڵ ئەوروپا و کۆریای باشور.. لە ئاستێکی باشدا نیە، بەڵام ئەم ڕاستیە تاڵە سەرمایەدارە نەهەنگ و خاوەنکارە بێویژدان و تێرنەخۆرەکان بەکاریدێنن بۆ ئامانجێکی ناڕەوا کە دورخستنەوەی کرێکار و پیشەوەری کوردە لە بازاڕی کار، بەمە چەند ئامانجێک بەدەستدێنن: هێزی کاری هەرزانتر لە هی کورد لە نیپال و ڕۆمانیا و ئۆکرانیا و بەنگلادش و عێراقی عەرەبی و سوریا و ئێران و میسر و لوبنانە... وە دەهێنن بۆ بازاڕی کار لە کوردوستان. بێگومان ئەمانە لە بەر هەژاری و نەشارەزایی و زمان نەزانینیان و لە ترسی دەرکردنیان ناتوانن وەک کرێکارێکی خۆماڵیی کورد بەرگری لە شکۆ و ڕێز و کەرامەت و مافەکانی خۆی بکات. یاسای کاری ئەم وڵاتە نەک بۆ پاراستنی کرێکاری بێیانی لە زوڵم و دەسدرێژیەکانی خاوەنکار بەڵکو بۆ کرێکاری خۆماڵیش یا پیادەناکرێت یا ئەوەندە کەم و کورتیی تێدایە کە ئەگەریش لە دادگاکان پیادەکرا لە کۆتییدا هەر بە سودی خاوەنکار دواییدێت. بونی سەدانهەزار گەنجی بێئیش و بێزار لە دەسەڵاتی کوردی ئەو سەرچاوە بەخوڕەیە کە هەمو جۆرەکانی توندوتیژی (دینی، سیاسی، چینایەتی..) وزە و توانای لێوەردەگرن. بەڕای من دەبێت سەندیکای کرێکاران و هەمو ئەو پارت و ڕێخراوانەی کۆمەڵگای مەدەنی کە ئیدیعای بەرگری لە مافی مرۆڤ و مافی کرێکاران دەکەن خۆیان کارابکەن و بەرنامەی جۆراوجۆری کاری هاوبەش دابنێن لەسەر زەویی بازاڕی کار لە کوردوستان، بۆ دروستکردنی پەستان و گوشین لە سەر خاوەنکاران و پەرلەمان و حوکومەت و دادگاکان بۆ بەرەنگاربونەوەی بێکاری لە کوردوستان، وە بۆ زیادکردنی توانا و زانین و پسپۆڕیی کرێکار و کارمەندی کورد بە کردنەوەی خولی ڕاهێنان و پەیمانگەی پیشەیی لە دەڤەرە جیاکنی کوردوستان نەک بەتەنیا لە شارەکانی دهۆک و هەولێر و سلەیمانی.
