مێ كێش لە ناو دەسەڵاتی هەرێمی كوردستاندا

Saturday, 26/09/2009, 12:00

لە وتاری پێشوو (چاخی ناو گەڵ لە هەرێمی كوردستاندا) وادەم دابوو باسی مێ كێش بكەم، كە بەڕای من پانترین پشتە بۆ كورتانی دەسەڵات و، هەڵگر و ڕاگری گەورەترین كۆڵەگەی ئەو تۆڕە پیسە ژەهراویەیە، پێی دەگوترێ "حكومەتی هەرێم"! واتە گەورەترین پاسەوانی گەندەڵی و دەسەڵاتی زوڵم، مێ كێشە!
مێ كێش لە داتاشینی خۆمە بۆ ئەوەی لە جیاتی وشەی (گەو...) بە كاری بێنم. چونكە ئەم وشەی دواییە بۆ جوێندان بە كار دێ و ئێمەش لێرە خەریكی جوێندان نین، بەڵكو تیشك دەخەینە سەر لایەنێكی لەبیر كراو و، شیكردنەوەی هۆكار و ئاكامەكان دەدوێنین، كە ئەم كائینە نزمە (مێ كێش) چۆن بووەتە هۆی دەردێكی كوشندەی "میللەتی كورد".
بۆ ئەم وشەیەش، پاساوی عەقڵی هەیە. چونكە ئێمە ئێستا لە سەردەمێك دەژین، بە چركە داتا و زانیاری دێتە بەر دەستی خوێنەر. نە سەردەم سەردەمی ئەوەیە و نە خەڵكیش كاتی ئەوەی هەیە ڕاستیەكی ڕووت، زانیاریەكی سادە بە پێناسەیەكی تەماوی یان وەسفێكی هێما، یان ئاماژەی ناڕاستەوخۆ، بخوێنێتەوە.
كە مەسولێك ئیستغلالی كچێك دەكا لە ژێر دەستیا كار دەكا، ئینجا بۆ كاری سێكسی خۆی زوڵمی لێدەكا، كاڵكردنەوەی جەوهەرێكی مەزنە و تفكردنە لە دادگەری، گەر یەكێك بیەوێ بە داپۆشینێكی فێڵبازانە باسی ئەم تابلۆیە بكا لە ژێر ناوی ئەدەب. یان بەناوی پاراستنی ناو و دەنگ، بیەوێ ئێمە ڕاستەوخۆ خاڵ نەخەینە سەر حەرف و، بە هێما باسی ئەم شتانە بكەین بۆ ئەوەی مێ كێش و گەورەكەی بتوانن ئەو شۆكە لەناو ناخی ئەم ڕەوشەدا هەیە بە باسكردنی نەبێتە كێشەو، شۆكەكەش، لە ناو دەروون و هەستی مرۆڤدا بكوژن، بۆ ئەوەی ببێتە شتێكی ئاسایی. لە بەر ئەوە یەكێك لە گەورەترین كارەكانی مێ كێش لە ناو دەسەڵاتی هەرێمدا، شكاندنی ئاوێنەكانە. لە جێی ئاوێنە، تابلۆی درۆ و تەزویر و فێڵ دەخرێتە ڕوو بۆ بەڕێوەبردنی كاروباری ڕۆژانە! لێرەوە داواكاریەك هەمیشە خراوەتە ڕووی نوسەرانی ئازاد كە بە (زمانی زبر!) شت نەنوسن. ئەم جۆرە داخوازیە سەپاندنی جۆرێكە لە داوێن پیسی بە ناوی ئەخلاق و مەزنترین پیشەی مێ كێشە! چونكە وەك گوتمان تەنانەت مێ كێش ئەوە ڕەت دەكاتەوە بە ناوی خۆیەوە بانگ بكرێ (گەو...) و سۆزانیش ڕازی نابێ بەو ناوەی بە دوایەوەیەتی بناسرێ. لە بڕی ئەوە نازناوی تر پەخش دەكەنەوە وەك: "هونەرمەند، ڕۆشنبیر" و شتی تر! بەڵكو وەك بەرگریەكیش ئەوان جار جار بۆ بەرگریكردن لە خۆ پەنا دەبەنە بەر هێرش و جوێندان بە پێكهاتەكانی كۆمەڵگا!
ئەمەش یەكێكە لە پیشەی مێ كێشەكانی دەسەڵاتی هەرێم. چونكە هەم مێ كێش و هەم سۆزانیش، بەو ناو و ناتۆرانەی خەڵك لێیان دەنێن ڕازی نین و ناوی دی بە خۆیانەوە دەلكێنن، وەك: "هونەرمەندی نمایش ـ فنانە استعرازیە ـ، سەماكەر، یاریدەدەری هونەرمەندی نمایش، مەساج زان ...هتد)!
مێ كێشەكانی دەسەڵاتیش ئاوا كار دەكەن بۆ خۆ پاراستن لە پۆلێنكردنی خەڵك بۆیان و، ئنجا هەوڵدانیان دێتە ئاراوە، بۆ گێلكردنی هێزە چاوساغەكان كە ڕەتی ئەم ڕەوشە پڕ داوێن پیسیە دەكەنەوە!
باڵاترین دەست لە ناو دەسەڵاتی هەرێم دەستی مێ كێشە. كاریگەرترین پاسەوانی دەسەڵاتی گەندەڵیش ئەم جۆرە زیندەوەرەیە!
كەڵك و سودی گەورەش لە نێوان كۆیلەكانی ناوگەڵ (دەسەڵاتدار) و، مێ كێشەكان (ڕۆشنبیری دەسەڵات) دابەش دەكرێ.
بەشێكی زۆری ئەو پانتایەی پێی دەگوترێ "ڕۆشنبیران"، تەنها فۆڕمێكی گرنگی نێو بازنەی مێ كێشیەتیە. واتە ئەوەی پێی دەڵێن ڕۆشنبیر (مەبەستمان ڕۆشنبیری دەسەڵاتە) بەشێك لە كارەكانی مێ كێشیەتی پێ ڕاسپێردراوە. چونكە داپۆشینی فەزیحەت و باس نەكردنی ڕاستەخۆی كارەساتە گەورەكانی گەندەڵی و، هێرش كردنە سەر نوسەرانی ئازاد، كە نوكی تیژی پێنوسەكانیان ئاراستەی چاوی زاڵمان دەكەن، هیچ جیاوازی نیە لە گەڵ ئەو مێ كێشەی پێش سۆزانی دەكەوێ بەرەو ژووری سووری ئامادەكراو بۆ دەسەڵاتدار!
بەڵام تەنانەت هەندێك لەوانەی بە ناوی ڕۆشنبیریەوە خزمەتی دەسەڵاتی هەرێم دەكەن، ئەركی پێشكەوتنی سۆزانیشیان بینیوە بۆ لێپرسراوان و، بەدوایانا بەرماویان لێساوەتەوە!
لە ناو دەسەڵاتەگەندەڵەكانیش، زیاترین كەس كە پێداویستیەكانی لێپرسراو جێ بە جێ دەكا مێ كێشە. لە بەر ئەوە سەیر نیە كە مێ كێشەكان زیاترین پۆست وەرگرن و، ڕۆڵی سەرەكی ببینن و، بە ناوی ڕۆشنبیری ژمارەیەكی زۆر زۆر لە پارە و كاغەز و كەل و پەل و ئیمكانیات خەسار بكەن بۆ توڕەهات و خوزەعبەلات و شتی پڕو پوچ، كە بە ناوی گۆڤار و ڕۆژنامە و كەناڵی تەلەفزیۆن و ڕادیۆ و شتی تر پەخش دەكرێ.
ئا ئەمەیە نهێنی لە پشت هێرشە پوچەكانی مێ كێشەكان بۆ سەر نوسەرانی ئازاد و پێگەی ئازادی وەك كوردستانپۆست، گوایە زمانیان زبرە، یان بێ ڕەوشتانە شت دەنوسن!
كەواتە بە ناوی ئەخلاق، هێڕشێكی بەناو ئەخلاقی هەیە بۆ سەر ئازادی و ئازادەكان. بەڵام هەمان ئەم مێ كێشانە بە تەواوی خۆیان ڵاڵ و كوێر كردووە لە ئاستی تاوان و بێ ئەخلاقی دەسەڵاتدارانی هەرێم!
كەس بینیویەتی، لە میدیای دەسەڵاتی هەرێم باسی فەزیحەتی مەسولێك كرابێ؟!
كەس، لە ڕۆژنامەی دەسەڵاتی هەرێم گەندەڵیەكی خوێندووەتەوە؟!
نەخێر، ئەوە تەنها پێگەیەكی وەك كوردستانپۆستە، كە ڕۆژانە دەیان فەزیحەت و دزی و داوێن پیسی ئەم دەسەڵاتە دەخاتە ڕوو.
سەیرە، دەبێ لە پێگەی نەرویجی دزیەكانی دەسەڵاتی هەرێم بخوێنینەوە، یان میدیای ئەمریكی و مایكڵ ڕۆبن!
باشە با پرسیار بكەین كوا دەوری میدیای بە ناو ئازادی هەرێم، لەم فەزیحەتە گەورەیەی وەك مەسەلەی ئاشتی هەورامی و 43 ملیۆن دۆلار؟!
گەلێك تەواوی سەروەت و سامانی خراوەتە دەستی چەند نەفامێكی ساختەچی داوێن پیس، ئەوە خێرە هێزی بەناو ڕۆشنبیر لە هەرێمدا تا ئێستا نەیتوانیوە جوڵەیەك بكا، یان شەقام ببزوێنێ، یان بۆ پرەنسیپە مەزنەكانی وەك نەتەوە و بەرژەوەندی گشتی بە لایەنی كەم خۆی دوورە پەرێز بكا لەم بازنە پیسەی دەسەڵات، كە یەكێكە لە نزمترین دەسەڵاتەكانی "جیهانی سێیەم"؟!
ئەوە بۆ، بۆ خۆ جوانكردن باسی ڕۆشنگەری، مۆدێرنیزم، دیموكراسی، مافی مرۆڤ، مافی ئافرەت، پۆست مودێرنیزم، ئازادی و ...هتد دەكرێ و، پێشبڕكێ هەیە لە نێو بەناو ڕۆشنبیران تا چۆن وتە و قسەی ڕۆشنبیرانی ڕۆژئاوا بخەنە نێو قسەو باسەكانیان (تەنها بۆ خۆ جوانكردن) بەڵام تێكڕا بە گشتی لە یەكەم ڕوو بە ڕوو بوونەوە دەكەون و دەبنە كۆیلەی دەسەڵاتدارانێكی شەهوەتباز؟!
بۆ تا ئێستا نەیانتوانیوە بە كەمترین ئاست بیرۆچكەیەك بكەن بە كردار، لەو بیرۆچكە ڕۆژئاواییانەی باسی دەكەن؟! ئایا تا ئێستا بە گشتی هەوڵیان داوە بێنە سەرجادە دژی ئیستغلال كردنی ئافرەت، یان گەندەڵی، یان دزی بەناوی دەسەڵات، یان پێشێلكردنی مافی مرۆڤ بە گشتی؟!
نەخێر! بۆ؟!
چونكە هەروەك دەسەڵاتداری هەرێم ناوگەڵ پەرستە، سەروەت و سامانی وڵات بۆ ئەم مەبەستە تەرخان دەكا، مێ كێشیش بە هەمان شێوە ناوگەڵ پەرستە و خەمی گەورەی تێركردنی حەزە جەستەییەكانیەتی و، بۆ ئەم مەبەستە چاوی هەمیشە بڕیوەتە دەستی دەسەڵاتدارەكان/ كۆیلەكانی جەستە (گەر حەز بكەیت بگەڕێوە سەر وتارێكی نوسەری ئەم بابەتە بە عەرەبی بە ناونیشانی: عبد الجسد الزعیم الاوحد الی الابد، لە سایتی ئیلاف).
لەم حاڵەتەشدا ئەم جۆرە كائینە چاو شۆڕە لە ئاستێك نیە بە ڕۆحێكی ئازادانەی مرۆڤ دۆستی و نیشتمان ویستی بێتە مەیدان و بڵێ نا. چونكە ڕۆحی "نا" لە نێو ناخیا مردووە، مەردایەتی و مرۆڤ بوون لە ناخیا سەری بڕاوە، وەك قوربانی لە قەسابخانەی حەزە جەستەییەكان لە زەوی دراوە.
ئا ئەم جۆرە زەلامەیە كە دەسەڵاتی هەرێم پێویستیەتی و، هەر ئەم جۆرەش لە دەورەی سەركردە و مەسول كۆ دەبنەوە.ٍلە بەر ئەوە پەیوەندی ئەم دوو تەرەفە دەبێتە پەیوەندیەكی میكانیزمانەی پتەو، كە هەر یە كێكیان بۆ مانەوە، خۆی بەویترەوە هەڵدەواسێ (تكایە بگەڕێوە سەر بابەتی: ڕۆڵی ڕۆشنبیری دەسەڵات لە داڕوخانی كۆمەڵگادا).
ئەوەی سەرنجیش دراوە لە هەرێمی كوردستان ئەوەیە، كە دەسەڵاتداران هەمیشە مێ كێشیان لە دەوری خۆیان كۆ كردووەتەوە و جۆرەها ئیمتیازاتیان بۆ تەرخان كردوون و، پلەی بەرزیان پێ بەخشراوە. چونكە لە ئاست تاوان و زوڵم و گەندەڵی و داوێن پیسی نەك هەر زمان ڵاڵن و چاویان كوێرە، بەڵكو خۆیان بەشێكن لە پرۆسەكە!
لێرەدا سەیر نیە كە سەدان گۆڤار و ڕۆژنامە و بڵاو كراوە هەیە لە هەرێمدا، بەڵام باسی ئەو هەموو سەفەرە زۆرانەی دەسەڵاتداران ناكرێ بۆ وڵاتانی دراوسێ بۆ ڕابواردن، یان بوونی هەرێم بە قیبلەی سۆزانی و مێ كێشەكانی وڵاتانی دراوسێ!
تەنانەت قسەو باسی ئەوە هەیە كە بە پلانێكی داڕێژراو، لێپرسراوانی هەرێم خزابنە نێو داوی كچە هونەرمەندە بە نێوبانگەكانی وڵاتانی دراوسێ، لە لایەن دەزگا موخابەراتیەكان و، بەزمەكان بە فیدیۆ گیرا بێ و وەك وەرەقەیەك بەكار دێ دژ بەم خائینانە، كە جاری وا هەیە مرۆڤ سەری سوڕ دەمێنێ لە هەڵوێستی لاواز و ترسنۆك و مێ كێشانەی دەسەڵاتدارانی هەرێم بەرامبەر بە ناحەزانی دراوسێ!!
مێ كێشیش وەك بڵێی لە وڵاتێكی بەهەشت ئاسا بژیێ، ئەم ڕەوشە بە تەواوی بزر دەكا لە نێو باس و خواسدا و، دێ لە میدیایێك بە پارەی دزراوی گەل سەنگەر لە نوسەرانی ئازاد دەگرێ و، گەندەڵیی گەورە بە باسكردنی گەندەڵیەكی بچوك پەردە پۆش دەكا و، باسی شتی لاوەكی و هیچ و پوچ دەكاتە كێشەیەكی گشتی و جەوهەری!
هۆكاری سەرەكیش كە كۆیلەی ناوگەڵ (دەسەڵاتدار) و مێ كێش (ڕۆشنبیری دەسەڵات) بەرەو ئەم ئاكامە لێدەخوڕێ، تەنها و تەنها حەزە جەستەییەكانی ئەمڕۆیە (پارە، نان، سێكس و ڕەفاهیەت) و سست بوون لە ئاقار بەرژەوەندی گەل و، بە تەواوی پشت گوێ خستنی كێشە جەوهەریەكان و وەڵامی پرسیارەكانی ئایندە و تەحەددیاتەكانی ژیان، لە داهاتووێكی زۆر سەخت و دژوار.
گەر لە داهاتوو ماوەمان بوو زیاتر باسی ناوەڕۆكی مێ كێش دەكەین.