سیناریۆیه‌كی چاوه‌ڕوانكراو!
Wednesday, 03/07/2013, 12:00
1164 بینراوە
ئایا ئێوه بیرتان بۆ ئه‌وه ناچێت، ئه‌م كاره‌ی دوێنێی پارله‌مان، سیناریۆیه‌كی تایبه‌تیی بنه‌ماڵه‌ی بارزانی بێت؟
من ده‌ڵێم ڕه‌نگه یه‌ك دوو كه‌سی بنه‌ماڵه‌ی بارزانی (بۆ نموونه مه‌سعوود بارزانی و نێچیرڤان یان مه‌سعوود و مه‌سروور و نێچیرڤان) ئه‌م سیناریۆیه‌یان داڕشتبێت و ته‌نانه‌ت مه‌كته‌ب سیاسیی پارتیشیان لێی ئاگادار نه‌كردبێته‌وه و كڵاویان نابێته سه‌ر ئه‌ندامانی پارله‌مانی سه‌ر به فراكسیۆنی كوردستانییش (به‌وانه‌ی پارتییشه‌وه).
ناوه‌ڕۆكی سیناریۆكه
مه‌سعوود بارزانی ده‌چێته ده‌ره‌وه، ڕێك له‌و كاته‌دا هه‌ردوو مه‌كته‌بی سیاسی پارتی و یه‌كێتی كۆده‌بنه‌وه و له‌سه‌ر درێژكردنه‌وه‌ی ماوه‌ی ده‌سه‌ڵاتی سه‌رۆكی هه‌رێم ڕێكده‌كه‌ون، دوای ڕۆژێك ده‌یكه‌ن به پرۆژه یاسا و له په‌رله‌مان به شێوه‌یه‌كی هه‌زه‌لی و به په‌له‌پروزێ تێیده‌په‌ڕێنن. هه‌را له میدیاكاندا دروستده‌بێت و گه‌وره و بچووكی ئه‌م وڵاته ده‌می بستێك داده‌چه‌قێت، به جه‌ماوه‌ری پارتی و یه‌كێتیشه‌وه. پارته‌كانی ئۆپۆزسیۆن به‌یاننامه‌ی ناڕه‌زایی ده‌رده‌كه‌ن، قاعیده‌ی یه‌كێتی نیشتمانی هه‌ست به شه‌رمه‌زارییه‌كی زۆر ده‌كه‌ن و له سه‌ركرده‌كانیان زویر ده‌بن...
ئێستا ئیتر پرۆژه یاساكه له په‌رله‌مان ده‌رچووه و ته‌نها چاوه‌ڕێی مه‌رحه‌مه‌تی ده‌ست و په‌نجه‌ی موباره‌كی سه‌رۆكه، قه‌ڵه‌مێكی لێبدات و ئیمزای بكات.
دوای چه‌ند ڕۆژێك سه‌رۆكی هه‌رێم دێته‌وه و وه‌ك ئه‌وه‌ی ئاگای له هیچ نه‌بێت، پرس و ڕاوێژ به ده‌وروبه‌ری خۆی ده‌كات و یه‌ك دوو كۆبوونه‌وه ئه‌نجامده‌دات و له‌ناكاو ڕایده‌گه‌یه‌نێت، من به هیچ شێوه‌یه‌ك ئه‌م پرۆژه یاسایه ئیمزا ناكه‌م و به كارێكی باشی نازانم! خه‌ڵكی جارێكی تر بستێ ده‌میان داده‌چه‌قێت و ده‌یكه‌ن به خۆشی و فیكه‌لێدان.
سوودی ئه‌م سیناریویه بۆ كێیه و چییه؟
1. بارزانی بازووی گه‌وره‌یی و به‌خشنده‌یی و لێبورده‌یی خۆی پیشانی جه‌ماوه‌ر ده‌دات و زۆر خه‌ڵكی ساده پێی ده‌خه‌ڵه‌تێن.
2. گورزێكی گورچكبڕ له په‌یكه‌ری نه‌خۆش و نیمچه‌ڕووخاوی یه‌كێتی نیشتمانی ده‌دات و ئه‌وه‌نده‌ی تر لاوازی ده‌كات، ئه‌ویش له‌ڕێی درزخستنه نێوان قاعیده و سه‌ركردایه‌تیی ئه‌و حیزبه‌وه، ئه‌و وه‌خت جه‌ماوه‌ری یه‌كێتی په‌ی به نه‌فامی و ساده‌یی سه‌ركرده‌كانیان ده‌به‌ن و ئه‌وه‌نده‌ی تر لێیان تووڕه ده‌بن و ده‌ته‌كێنه‌وه و، بۆیان ده‌رده‌كه‌وێت پارتی چۆنی بوێت ئاوها یارییان پێده‌كات. دوور نییه سه‌ركرده‌كانی یه‌كێتی له‌ناو خۆیشیاندا له‌سه‌ر ئه‌و ڕیسوابوونه‌یان به‌شه‌ر بێن!
3. پارتی لای جه‌ماوه‌ره‌كه‌ی خۆیشی، بارزانى _كه زۆرێكیان وه‌ك نیمچه‌خودایه‌ك لێی ده‌ڕوانن_ ئه‌وه‌نده‌ی تر گه‌وره و كارێزما پیشان ده‌دات.
4. ئینجا بارزانی دێت و ده‌ڵێت: من ئه‌و گه‌وره‌ییه‌م نواند، ئۆپۆزسیۆن ئێوه‌ش بێده‌نگ بن و با ده‌ستوور بخرێته ڕیفراندۆمه‌وه.
5. دوا هه‌نگاویش به‌ڕێز كاك (مه‌سروور بارزانی) ده‌بێته كاندیدی پارتی بۆ سه‌رۆكایه‌تی هه‌رێم.
ئاو بێره و ده‌ستت بشۆره!
