مه‌سعوود و جه‌لال عه‌قلیه‌تا سیاسی نینه
Friday, 30/04/2010, 12:00
عه‌قلیه‌تا هه‌ر که‌سه‌کی یا سیاسی ژ ئاوایێ دان و ستاندنا وی ل گه‌ل روودانێ یان بوویه‌رێ دیار دبت ، ئانکو ئه‌ڤ ئاوایێ دان و ستاندنێ پیڤه‌کا عه‌قلیه‌تا سیاسیه. ئه‌و دیار دکت کا هه‌ر که‌سه‌کی چ عه‌قلیه‌ت هه‌یه.
ل ڤێرێ ب گرنگی تێت زانین کو هنده‌ك بوویه‌ران نه خاسمه یێن پشتی که‌تنا رژێما سه‌ددامی ده‌ینم پێش چاڤان. بوویه‌ر و روودانێن پشتی که‌تنا ڤێ رژێمێ گرنگترن ، چنکی گه‌له‌ك مه‌زن و گرنگن و ژ لایه‌کێ دی ڤه هه‌میان دیتنه و ل بیرا وانه.
1- پشتی ژناڤ چوونا رژێما سه‌ددامی و که‌تنا ئیراقێ ژ ده‌وله‌تینیێ ل سه‌ر ده‌ستێ هێزێن له‌شکه‌رێ ئه‌مریکایێ ، ڤاله‌هیه‌کا ئیداری ل هه‌می ئیراقێ په‌یدا بوو ، که‌سه‌کی ئاگه‌هـ ژ که‌سه‌کی نه‌ما ، هینگێ ده‌لیڤه‌کا زێڕین هل که‌تبوو کو ئه‌و عه‌ره‌بێن کو رژێما سه‌ددامی ل پارێزگه‌ها که‌رکووك و ده‌ڤه‌رێن دی یێن کوردستانێ ئاکنجی کربوون ، هه‌میا ژ وان ده‌ڤه‌را ده‌ربێخن پشتی کو ناسنامێن وان ژێ دهات ستاندن و سۆتن ، ئو کوردێن وان ده‌ڤه‌را یێن کو رژێما سه‌ددامی ژ جهـ و وارێن وان دابوون بارکرن ، ل جهێن وان عه‌ره‌با هاتبان ئاکنجی کرن ، نه کو ئه‌و کوردێن به‌له‌نگاز ئاڤێتبان د بن خیڤه‌تا ڤه و چ خزمه‌ت بۆ وان نه یێت کرن.
مه‌سعوود و جه‌لالی نه کو به‌س ئه‌ڤه نه کر ، به‌لکو هه‌تا هزرا هندێ ژی نه کرن. ئه‌گه‌ر وان هینگێ ئه‌ڤ پێنگاڤ ئاڤێتبا ، ئیرۆ کورد ل که‌رکووك و وان ده‌ڤه‌را دا واقع بن نه کو عه‌ره‌ب.
ژ لایه‌کێ دی ڤه ، گه‌لشا که‌رکووکێ به‌رێ د ناڤبه‌را کوردا و خونکاریێن ئیراقێ دا بوو . ئه‌گه‌ر خونکاریه‌ك ژ وان رازی ببا کو که‌رکووك پشکه‌که ژ کوردستانێ ، هه‌ما دا بت پشکه‌ك ژ کوردستانێ بێ کو گه‌لشه‌ك په‌یدا ببا. به‌لێ سیاسه‌تا مه‌سعوود و جه‌لالی ئه‌ڤ گه‌لش مه‌زنتر و ئالۆزتر لێ کر. تورکمان و عه‌ره‌ب ژی ئینان د ناڤ دا و بوون پشکه‌ك ژ گه‌لشێ. حه‌تا مادێ 140 ێ ژی هه‌ژهه‌ژۆك لێ کرن. وه‌خته‌کێ دیار کری بۆ ده‌ینان ، بێ کو وێ چه‌ندێ دیار بکن ، ئه‌گه‌ر هات و ئه‌ڤ ماده د ده‌مێ دیار کری دا بجهـ نه هات ، دێ چاوا بت ؟ یان ژی دیار کربان ، ئه‌گه‌ر د ده‌مێ دیارکری دا نه هات بجهـ ئینان ، دڤێت کو بێت حساب کرن کو هاتیه ب جهـ ئینان و دڤێت کو ئه‌و ده‌ڤه‌ر بێن د گه‌ل کوردستانێ. ئه‌ڤ نه‌زانین و کارێ وان یێ زاڕۆکانی ، بوو سه‌ده‌ما هندێ کو مادێ 140 ێ که‌تیه به‌ر مرنێ.
2- ژبه‌ری هل بژارتنێن په‌ڕله‌مانێ ئیراقێ ، سه‌رۆکێ ئه‌مریکایێ ، باراك ئۆبامایی ب ته‌له‌فۆنێ ل گه‌ل تارق الهاشمی و نووری المالکی و مه‌سعوود ئاخفت کو هه‌ر ئێك ژ وان ده‌ست ژ هنده‌ك کورسیکا به‌ردت دا کو بگه‌هن چاره‌سه‌ریه‌کێ. هندی هاشمی و مالکی بوون رازی نه بوون کو تشته‌کێ وه‌سا بکن و ب ئاشکرایی گۆتن کو نه‌شێن کو تشته‌کێ وه‌سا بکن چنکی مافێ مله‌تیه ، به‌لێ مه‌سعوودی گۆت ل سه‌ر خاترا ئۆبامایی دو کورسیك چنه. ڤێجا نزانین کا نه‌ختێ ژن خواستنێ بوو کو دو کورسیك سه‌ر خاترا ئۆبامایێ چاڤ ره‌ش هێلان یان ژی مافێ مله‌تی بوو ، به‌رخوه‌را خوینا شه‌هیدا بوو، به‌رخوه‌را زه‌حمه‌ت و خه‌باتا پێشمه‌رگان بوو کو وی ده‌ست ژێ به‌ردا ؟!!
ما وی چ په‌یمانێن ستراتیژی یێن واژۆ (ئیمزا) کری ل گه‌ل ئه‌مریکا هه‌نه کو دبێژت هه‌ڤاله‌تیا ئه‌مریکا بۆ مه ژ دو کورسیکا باشتره ؟!!
ئه‌م هه‌می دزانین کا ئه‌مریکا چه‌ند هاریکاریا ئیسرائیلێ دکت و چه‌ند به‌ڕه‌ڤانیێ ژێ دکت ، ئو هه‌که‌ر ژ ئه‌مریکا نه‌با عه‌ره‌ب دا شێن کو ئیسرائیلێ داعوورن. ل گه‌ل ڤێ هه‌میێ ژی ، هه‌تا ڤێ گاڤێ جاره‌کێ تنێ ژی ، ل ده‌مێ گفتوگۆیێ ل گه‌ل عه‌ره‌با ، حه‌تا ژبۆ رووسپی کرنا ئه‌مریکا ل نك عه‌ره‌با ، ئیسرائیلێ نه گۆتیه کو سه‌ر خاترا ئه‌مریکا ده‌سته‌سه‌رکرنا عه‌ردێ عه‌ره‌با ل فه‌لستینێ دێ راوه‌ستینین و ئاڤاهیا ل سه‌ر ئاڤا ناکین. به‌لێ ئه‌مریکا بۆ مه چ نه کریه ژی و چ په‌یمان ژی ل گه‌ل کوردا واژۆ نه کرنه ، مه‌سسعوود سه‌ر خاترێ چاڤێن ره‌ش و به‌له‌ك دو کورسیك ژ نه‌ختی هێلان !!!
ئه‌گه‌ر ئه‌مریکا تشته‌ك کربت ژی ، بۆ شیعا گه‌له‌کتر و گه‌له‌کتر کریه. هه‌می ئیراق کریه د ده‌ستێ وان دا ، به‌لێ ل گه‌ل هندێ ژی به‌رهه‌ڤ نه بوون کو تشته‌کێ وه‌سا بکن. نه کو ئه‌ڤه تنێ ، به‌لکو دبێژن ئه‌مریکا ژ وه‌لاتێ مه ده‌رکه‌ڤه. ئو گه‌له‌ك جاران که‌نکه‌نێن شیعا ل سه‌ر ته‌له‌فزیۆنێ دبێژن ئه‌مریکا مافێ هندێ نینه کو مایێ خوه د ئیراقێ بکت.
ئه‌ڤ تشتێن کو مه ل سه‌لال گۆتین دو نموونه نه ژ ده‌هان نموونێن دی ، یان بێژین ژ بوویه‌ر و روودانێن گرنگ یێن کو ده‌رفه‌تێن زێڕین بۆ مله‌تی تێ دا هل که‌تین ، به‌لێ مه‌سعوود و جه‌لالی چ پێ نه کرن و ژ ده‌ستێ مله‌تێ مه ده‌رێخستن. ئه‌ڤ هه‌می وێ راستیێ دپه‌یتینن کو ڤان هه‌ردو که‌سا عه‌قلیه‌تا سیاسی نینه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
