قۆنتەراتچیەكانى كوردستان و هەڕاجكردنى پڕۆژەكان لەسەر حیسابی من و تۆ
Wednesday, 30/10/2013, 12:00
1680 بینراوە
ئەم گەلە ستەمدیدەمان ئەوەندە دەربەدەر و چەوساندنەوە و نەهامەتى زۆری بینیوە، كورد وتەنێ: مردنیان پێ نیشاندا بەتایەى ڕازیبوو..هەڵبەتە دوای ڕوخانى گەورەترین دیكتاتۆری سەدەى بیست و یەك(سەدام حوسێن) و ئەو كەش و هەوا نیمچە ئازاد و كراوەیەى هاتە ئاراوە و قۆستنەوە و قۆرخكاری ژمارەیەك بەرپرسی چاوچنۆك لەپەنای بوونى دەسەڵات و سەركێشی پێشینەى شۆڕشگێڕی و نیشتمانفرۆشتنەوە، گەمەیەكى وا بەو خەڵكە ڕەش و ڕووتە دەكەن، تێگەیشتنەكان بۆ كارەكانیان وا لێكدەدەنەوە: مادام من هەم، دەبێ هەموو شت بۆمن بێ، لەوەیشدا گرینگ نییە ئەو خەڵكە ڕەش و ڕووتە دەبێتە قۆچی قوربانى و باجی ئەو ئازادیە دەدات و تووشی چی دێ.
كوردستانی نەوت و كانزاكان.. كوردستانى پڕ خێروبێری چاوتێبڕینى هەموو دونیا و لەبچوكترینیشیان چاوتێبڕینى هەندێ لەبەرپرسانی دەستڕۆیشتووى دەسەڵات بۆ قۆرخكاری و هی بۆخۆم بۆ خۆم و هی تۆیش دەخۆم، درێغیان لەوە نەكردوە لەهەر پڕۆژەیەكدا ئەگەر پشكیان شێر نەبێ ئەوە نابێ ئەو پڕۆژەیە لەدایك ببێ و نابێ پشتگیری لەكارێك بكرێ با لەبەرژەوەندی گشتیشدابێت مادامەكێ ئەوان پێك نەكراون، بەڵام كە بەشی ئەوانی بەبێ سەرمایە تێدا نەبوو، پاساو بۆ رێگری و بەربەستەكانیان ئەوەیە: ئەو پڕۆژەیە سەقەتە نابێ ئەنجام بدرێ و ئەو پڕۆژەیە خزمەت بەكەرتى تایبەت و ئەو بوژانەوە ئابوورییە ناگەیەنێ كە ئەمڕۆ لەهەرێم بەخۆوەى دەبینێ و دەیەها قسەى تر وەك پۆزش و پاساو تا بەر بەو هەوڵانە بدەن كە لەدەرەوەى ئەوان پیادە دەكرێ.
نموونەیەكى جوان دەگێڕنەوە، لەباسكردنیشیدا مەبەستم بەشان و باڵ هەڵدانى ڕژێمى بەعس نییە، چونكە كاتێ دەڵێین: دیكتاتۆر، ئیتر هەناسەیەك بۆ دیموكراسی نامێنێتەوە، دەگێڕنەوە: لەبەغدای پایتەختى ئێراق، ئەندازیارێك پڕۆژەیەكى ڕێگاوبانى پێ دەدەن، دوای تەواو كردن و كردنەوەى لەڕێو ڕەسمێكدا، كە سەدام بەسەیارە بەو شوێنە گوزەر دەكات و لەهەست كردن بەچەند تاسەییەكى بچووك، فەرمانى لەسێدارەدان بۆ ئەو سەرپەرشتیارە دەدات بەوەى چۆن دەتوانێ ناپاكى لە پیشەكەى بكات و گەندەڵی لەپڕۆژەكەى بكات!
وەلێ ئەوەى مەبەستمە ئاماژەى پێ بدەم: لەهەرێمى كوردستان پڕۆژەى ڕێگاوبان هەبووە و تا ئێستایش بەهەمان نەفەسی ئەو دەمە بەبێ بوونى هیچ ئەزموونێكى پیشەیی ڕادەستى بەرپرسێكى دەستڕۆیشتوو دەكرێ، كەچی هێشتا پڕۆژەكە تەواو نەبووە، بەزەقی بیندراوە عەجەب چۆن دەبێ جادەیەك قیڕتاو بكرێ و هێشتان نەكرابێتەوە و یەك سەیارەى بەسەردا نەڕۆیشتبێ كەچی قیڕەكەی هەڵیداوە و لەنەبوونی كەوالێتى بەرز و ستانداری ئەو ئەندازەى كارەكانی لەسەر ڕایی دەكرێ، دەبینین دوای ئیعلانی یەكەمیدا كە زیاتر لەچەند ملیۆن دۆلارێكى بۆ خەرج كراوە، بەبێ لێپێچینەوە و هیچ ڕێوڕەسمێكى یاسایی وەك ئەوەى بانگ بكرێتە دادگاو دادگایی بكرێ و سزای بدەن، باسكردنى دادگا دەبێتە بڤە، كەچی كەس بۆی نییە قسەى لەسەر بكات و پێی بڵێ: بەری چاوت دوو برۆیە، دووبارە دێن سەرلەبەری جادەكە هەڵدەكەننەوە و بەدابینكردنى پارەیەكى تری زەبەلاح و گەورە، هەمان پڕۆژە دووبارە دەكەنەوە، لەكاتێكدا بەهەدەردانى ئەو پارە ناقۆڵایە بۆ ئەوان نۆشی گیانە و تاوان نییە، بەڵام بۆ كەسێك ئەگەر دزیەكى زۆر بچووكى كردبێ، چاوپۆشی لێ ناكرێ، وێڕای دادگایكردنى و ناساندنى وەك تاوانبارێك و بڵاوكردنەوەى هەواڵەكە لەدەم و دەزگاكانى ڕاگەیاندنەوە، بڕیاری بەندكردنیشی دەدرێ، ئەوەش ئەو نادادپەروەرییەیە یەخەى هەرێمەكەمانى گرتووە و نەتواندراوە سنوورێك بۆ ئەو بێ رێزییە بكرێ و چاوپۆشی لەبەرپرسێكى باڵا و دەستڕۆیشتوو نەكرێ كە تاوانێكى ئاوای ئەنجامداوە، بێن بیگرن و لەدادگادا وەكو بابای نەدار هەمان لێپێچینەوەى دەرهەق بكەن.
گەورەترین گەندەڵی لەم ڕۆژگارە فرۆشتنەوەى پڕۆژەكانە وەك ئەو تەمسیلیەى لەهەشتاكان لەتەلەفزیۆنى كەركوك نمایش دەكرا لە دابەشكردنى سەمادى كیمیایی تا دەگەیشتە خوارەوە هەر لەكورتى دەدا تا بەوە گەیشت لەفەردەوە بە كەوچك سەمادیان بدەنێ.
مەهزەلە لەوە گەورەتر چیە بینایەى قوتابخانەیەك دروست دەكرێ هێشتا بەفەرمى نەكراوەتەوە كەچی دیوارەكانى شەق دەبەن و كێلۆنەكانى لەچەند جار بەكار هێناندا یەكسەر دەشكێن و..هتد.
مەهزەلە لەوە گەورەتر چیە پڕۆژەى رێگاو بانێك دەدرێتە كەسێك نە زانیاری لەسەر زانستى ڕێگاوبان هەیە و ئەو مەسئولیەتە لەئەستۆ دەگرێ ئەوجا دوای وەرگرتنى پڕۆژەكە لەجێوە بێ ئەوەى یەك دینار خەرج بكات، بە پارەیەكى خەیاڵی دەفرۆشێتەوە و ئەویش بەیەكێكى دیكە و دیكە تا دواكەس بۆ ئەوەى شتێكى كەمى پێ ببڕێ بەناچاری دەچێ كام كەرەستە هەرزان و خراپە ئەوە دەكڕێ و پڕۆژەیەكى بەپینەوپەڕۆ و سەقەتمان پێشكەش دەكات.
مەهزەلەى لەوە گەورەتر چیە ئەو پڕۆژە ستیانەى لێرە و لەوێ ئەنجام دەدرێ، ژمارەیەكى كەمى لێ دەرچێ، ئیدی خانوویەك دەدەنە ئەوانەى خۆیان ناونووس كردووە، چ خانوویەك؟ هێشتا خاوەنەكەى بەو پارە زۆرەى دەیدات و نەچووەتە ناوى، سەرەڕای خراپترین كەل و پەلى لێ بەكارهاتوو، بنمیچەكەى تەڕەشووعە دەكات و...هتد.
سەیرە هەرێمەكەمان بەو شێوەیە گەشە بكات كە هەموو شتەكانمان لەسەر فرت و فێڵ بینا بكەین، كێ لەو گەندەڵیانە بەرپرسە و چێ بكرێ باشە، لێرەوە پێشنیار دەكەم:
یەكەم: هەر پڕۆژەیەك تەرخان دەكرێ، نەدرێ بە بەرپرسان تا بەكەیفی خۆیان گەمە بەئەقڵی من و تۆ بكەن، لەوەشدا مەبەستم ئەوەیە ئەو پڕۆژانە بەو كەسانە بدرێ كە شارەزا و لەو بوارەدا خودان ئەزموونن.
دووەم: لە وەزارەتە پەیوەندارەكانەوە لیژنەیەكى بەدواداچوون و لێپێچینەوە پێكبێ و لەهەست كردن بەهەر خەلەلێك، چ جای غەرامەكردن و لێپرسینەوە ئەگەر پێویست بكات ئەو كەسە بەند بكرێ تا ببێتە پەند و عیبرەت بۆ ئەوانەى دێنە پێش و پڕۆژەكان دەگرنەوە.
سێ یەم: لە لوتكەى دەسەڵاتەوە(ئەنجومەنى وەزیران) چاوپۆشی لەهیچ كەسێك نەكات كە بیانەوێ دەست لەو كاروبارانە وەربدەن و بیانەوێ پشتگیری لە كەسی گەندەڵ بكەن.
چوارەم: بەكردەوە دەركەوت جگە لە چەند كۆمپانییەكى كەم، ئیتر ئەویتر هەموویان بەگەندەڵی و فڕت و فێڵ پڕۆژەكان ئەنجام دەدەن، قەت لەوە باشتر نییە لەجیاتى كۆمپانیاكان حكومەت نەفەقەى دابینكردنى زەویەكان وەك ئەوەى هەیە لەئەستۆ بگرێ و ئەركى ئەقاراتیش بگرێتە خۆی بەڵام بەو مەرجەى كەسی داواكار لەو ستایل و نەخشەیە دەرنەچێ و مانگانە لەجیاتى پارە بدات بە كۆمپانیاكان، با ئەو پارەیە بداتە حكومەت كە بەدڵنیاییەوە ئەو كەسە هەرگیز شتێكى خراپ بۆ خۆی بەكاربێنێ وەكو كۆمپانیاكان بەنایاسایی پەنایان بۆی دەبرد.
پێنجەم:كارێكى وا بكرێ خەڵك دەستخۆشی لەحكومەت بكات نەوەكو وەك دەبینین چۆن ئەو خەڵكە نەفرەت لەكۆمپانیاكان و بێ هەڵوێستى حكومەت دەكەن، ئەوەش ئەركێكە جگە لەوەى كەمێ متمانە بۆ خەڵك دەگەڕێنێتەوە، دەبێتە وەرچەرخانێك تا هەموو پڕۆژەكان بەڕێك و پێكى بەڕێوە بچن.
