حاشا من عێراقی نیم
Monday, 30/06/2014, 12:00
2230 بینراوە
مەمانلکێنن بە عێراقەوە بمانلکێنن بە دیاربەکرو قامیشلۆو مهاباتەوە
نامۆ سامان
مەملکێنن بە عێراقەوە
خودا دەتانگرێ
گەر خودایەکتان هەبێت
مەملکێنن بە نیفاقەوە
حەیا دەتانگرێ
گەر تۆزێک حەیاتان مابێت
لەوەتەی هەم سنگە خشمە
لە پێدەشتە سوتاوەکانی ڕۆحەوە لەنگەر دەگرم
لەوەتەی هەم ئازارێکم
لە شیراقەوە خول دەخۆمەوە
لەوەتەی هەم کراسێکی خەمم بە باڵادا دادوراوەو
ئازار پۆیلانەی لەدایک بوونمە
مەملکێنن بە عێراقەوە
ئێستاکە لەسەر پێکانی خۆم لەنگەر دەگرم
ئەم قاچانە تەنها بۆ ڕۆشتنە نەک بۆ شکاندن
ئەم ڕوانیینە بۆ ڕۆحە نەک بۆ ئاگردان
مەملکێنن بە نیفاقەوە
من سنگم کوانوی برین‌و تەنیاییە
خووم بە تەنیاییەوە گرتووە
ئەم پەنجەرەیە بۆ ڕوانینە
نەک بۆ دزە نیگا
ئەم ئاوی ئەجەلە
ئێستاکە ڕوباری بوونمە
نەک زۆلکاوی سیخور
مەملکێنن بە جەنگەوە
من لە جەنگێکی ترەوە هاتووم
من لەم بیابانی عێراقەدا
لە لم و ئەنفال نەبیت هیچتی تر ناچنم
مەملکێنن بە عێراقەوە
ویژدان بە چۆغەی کوردییەوە جوانە
ئەم دەسماڵی ڕەشبەڵەکەم
بۆنی خوێنێکی تری لێدێت
مەملکێنن بە ئازارەوە
مەملکێنن بە عێراقەوە
ئەم دیموکراسییە بە بەری من تەنگەو
هەرگیز لە ڕەنگی ئەو نایەت
ئەم دیموکراسییە
وابەبێ چەک داگیرم دەکات
هاتووم لە کێڵگەکانی خوێن‌و جەنگەوە
هاتووم لەنێو چاوەکانی خۆڕو بەفرەوە
هاتووم لەنێو چنگی ئەنفالو ژەهرەوە
هاتووم لە نێو وەحشێت‌و جەهللەوە
هاتووم بەسەر تەرمی منداڵیمدا دهێمەوە
بەسەر تەرمی سپی بێ تاوانیما دهێمەوە
سەرم زایەڵەی ئەشک‌و خەمە
دڵم پارچە پارچەو
جەستەم بەدەم بای شەڕەوە دەشنێتەوە
دڵم بە دەست بەعس‌و
وەحشێتی ئەم دووپێیەوە دەتلێتەوە
هاتووم لەو خۆڕهەڵاتی وەحشێتەوە
لەو خۆڕ هەڵاتی ژەهرو ئەنفالەوە
بمناسەوە
ئەی وەحشێتی ئەم سەدە نەگلیسە بمناسەوە
سیمام تۆزی جەهلل‌و
سیمام تۆزی ژەهرو
سیمام تۆزی جەنگی گرتووە
بمناسەوە
ئەی خوداکانی شەڕ بمناسەوە
ئەی نەفرەتی جەنگ بمناسەوە
هاتووم بەسەر تەرمی منداڵیما
بەسەر تەرمی خۆمم‌و کاولبووما
ڕەنگی وەرینی پەنجەکانم گرتووە
ڕەنگی ئازارو ڕۆح‌و جەستەم گرتووە
وەک لێزمە دەبارێ سویسکەی دڵ بەسەرما
وەک ڕۆح نییە دەرگایەک بۆ هەڵهاتن
وەک پەنجەرەیەک بۆ هەتاو
لەو خۆڕهەڵاتی ژەهرەوە
لەو خۆرهەڵاتی شەڕەوە
بمناسەوە ئەی بای وەشت بمناسەوە
ئەی سوبحی دەم بەکەل بمناسەوە
ئەی کوردستانی حەزو خۆزگەم
گوێ ڕادێرە
بۆ سەدای دەنگی ئەم ئازارە بەسووێیەم
دەنگی وادهێت
دەنگی سەدای ئەم خەڵکەیە
زامەکانی بروسسکەیە
مەملکێنن بە شەڕەوە
ئەم تەنەکەی خۆڵە
بەس منی تێدا نەبووم
منیشتان بە تۆپزلی قاودا
ئەم گوێدرێژە
بەس من هەچەم لێنەکرد
بە منیشتانکرد
مەملکێنن بە عێراقەوە
من چی نەبووم
منتان بەچی نەکرد
زەردەشتی!
تاکو ئێستاکە پەرزگایەکەم نییە بۆ عیبادەت
بە ئاری!
تاکو ئێستاکە فەلسەفەیەکم نییە بۆ ژیان
منتان بەچی نەکرد
مەملکێنن بە عێراقەو
منتان کرد بە ئاری‌و
ڕۆحتان لەجەستەم جوداکردوە
کەچی تاکو ئێستاکە نەمتوانی قەوارەیەک
لەم گەردوونە پڕکەمەوە
منتانکرد بە ێسلام
کەچی شمشێرەکەتان
تەنها کەللەی سەری خۆمی بری
مەملکێنن بە عێراقەوە
خۆمم لێوونبووە
ئەم سەمایە دوایی نایەت
ئەم ئازارە ئەزەلییە
مەملکێنن بە عێراقەوە
ووڵاتی نفاق‌و فەساد
مەملکێن بە عێراقەوە
دیاربەکرم لەژێر ئاڵای دیموکراسییدا
هەموو ڕۆژێک لە خاچ دەدرێ
مەملکێنن بە دیموکراتییەوە
وا قامیشلیم لەیاد دەکرێ
وا مهابات‌و سنەم لە مێخ دەدرێ
وا سۆرانم بە بادینانم نامۆ دەبێت‌و
بادینام لە سۆرانم دادەبرێت
بملکێنن بەخۆمەوە
بملکێنن بە سۆران‌و بادینانەوە
بملکێنن بە بۆکان‌‌و قامیشلی‌و بۆتانەوە
دە دەی بملکێنن بەخۆمەوە
دەستەکانم بەرنەوە!
من ڕۆحم لەوێ بەجێماوە
نەک لە بیابان
مەملکێننبە عێراقەوە
ئەم بیابانی عەرعەرە
لە لاشەم تێر نابێت
من ئەشکم لەوێ دەسوتێت
ڕۆحم لە ئەنفالو هەڵبجەدا
ژەهر کوژ دەکرێت
ئەم عەرعەری عێراقەیش
تاوانەکان ژێر لم دەنێت
مەملکێنن بە نفاقەوە
مەملکێنن بەعێراقەوە
ستۆکۆڵم
2003-05-25
{ تێبینی ئەم هۆنراوەیە لە ستۆکۆڵم بە دەنگی خۆم خوێندراوەتەوە}
ئێمە بۆ کوردستان خەباتمانکرد نەک بۆ عێراقێکی دیموکراسی
ئێستاکە ئەو هەلە زێرینەیە کە کورد جاری سەربەخۆیی خۆی بدات نەک نیشتیمان بخاتە دەنگدانەوە. تۆ دەبێت لەوە بگەیت کە نیشتیمانەکەت داگیرکراوە نەک مافت خوراوە.
